JADI IMAM-IMAM TUHAN

Keluaran 19: 1 – 8

TUHAN menampakkan diri di gunung Sinai

19:1 Pada bulan ketiga setelah orang Israel keluar dari tanah Mesir, mereka tiba di padang gurun Sinai pada hari itu juga. 19:2 Setelah mereka berangkat dari Rafidim, tibalah mereka di padang gurun Sinai, lalu mereka berkemah di padang gurun; orang Israel berkemah di sana di depan gunung itu. 19:3 Lalu naiklah Musa menghadap Allah, dan TUHAN berseru dari gunung itu kepadanya: “Beginilah kaukatakan kepada keturunan Yakub dan kauberitakan kepada orang Israel: 19:4 Kamu sendiri telah melihat apa yang Kulakukan kepada orang Mesir, dan bagaimana Aku telah mendukung kamu di atas sayap rajawali dan membawa kamu kepada-Ku. 19:5 Jadi sekarang, jika kamu sungguh-sungguh mendengarkan firman-Ku dan berpegang pada perjanjian-Ku, maka kamu akan menjadi harta kesayangan-Ku sendiri dari antara segala bangsa, sebab Akulah yang empunya seluruh bumi. 19:6 Kamu akan menjadi bagi-Ku kerajaan imam dan bangsa yang kudus. Inilah semuanya firman yang harus kaukatakan kepada orang Israel.” 19:7 Lalu datanglah Musa dan memanggil para tua-tua bangsa itu dan membawa ke depan mereka segala firman yang diperintahkan TUHAN kepadanya. 19:8 Seluruh bangsa itu menjawab bersama-sama: “Segala yang difirmankan TUHAN akan kami lakukan.” Lalu Musapun menyampaikan jawab bangsa itu kepada TUHAN.

(Visi GBKP)

MODEL PJJ: KESAKSIAN

KATA PERLEBE :

Imam e me sada jabaten si lit i bas kegeluhen bangsa Israel. Tugas sekalak imam e me ngurusi kerina dahin si lit kawitenna ku bas dahin-dahin ibadah. Banci jadi tema-nta enda labo semal kal sibegi, sabab labo rusur tema enda iangkatken. Sedekah enda si mekatep sibegi e me “kita anak Tuhan, kita surat Kristus” ras si debanna. I bas PJJ nta sekali enda iangkat tema e me “jadi imam imam Tuhan” si eteh maka makna tema-nta enda cukup mbages dingen tuhu-tuhu mereken pengajaren man banta. Tambah sie, tema-nta enda pe ikawitken ka ras Visi GBKP e me GBKP jadi aron Dibata si maba pasu-pasu man doni enda. Guna mpebagesi pengertin ras pengangkanta kerna tema-nta bas wari enda, mari radu ras kita erlajar arah bahan PJJ-nta.

ISI :

I bas bulan peteluken bangsa Israel ndarat i Mesir nari, seh me kalak enda i deleng Sinai (cataten: kalak Israel nadingken Mesir e me bulan Abib (12:2), e me bulan peteluken siigelari bulan Sivan, pertengahen Mei – pertengahen Juni). Ije me ipajekken bangsa enda kemahna, jenari Musa lawes ku datas deleng njumpai Tuhan sue ras siiperentahkenNa. I bas perjumpan e ibereken Tuhan hukum/aturen ras petunjuk man bangsa Israel kerna kearusen geluh. E me: undang-undang si ngaturken peribadahen bagepe kegeluhen si teptep wari, kerna tugas ras tanggung jabab imam bagepe pakenna, kerna kemah si Badia, kerna 10 Hukum Taurat, ras si debanna. Janah banci ikataken maka bahanta enda me palas perpadanen Tuhan ras bangsaNa. Khusus bahan PJJ-nta enda iturikenNa kerna piga-piga si arus iinget dingen ilakoken bangsa enda tandana ia nggeluh i bas perpadanen ras Tuhan.

• Bangsa enda arus nginget kerina si enggo ibahan Tuhan nandangi bangsa Mesir guna keselamatenna. Ija bangsa Mesir enggo kena 10 tulah, janah tulah si pesepuluhken e me kematen anak sintua. La terjeng e ngenca, tapi teridah uga Tuhan ngkernepken kerina pasukan ras gereta perang Mesir i Laut Merah si ngayaki bangsa Israel.

• Bangsa Israel pe arus nginget uga Tuhan natang-natang geluhna maka seh i Sinai; menaken tiang awan tupung suari dingen tiang api tupung berngi, gelah bangsa Israel banci erdalan alu sikap tupung suari entah berngi. Sieteh maka daerah padang gurun tuhu-tuhu melas adi suari e maka Tuhan reh jadi tiang awan, janah tuhu-tuhu mbergeh tupung berngi e maka Tuhan reh jadi tiang api. Tambah sie Tuhan ncukupken pangan (leto ras manna) dingen lau inemen i bas perdalinen, ras si debanna. IgambarkenNa maka Ia desken sada rajawali si maba anak-anakna i bas kabengna. Rajawali e pasti mereken kenyamanen man anakna sekaligus mereken pengajaren gelah anakna e ngasup ndalani kegeluhen pagin.

• Nina Tuhan, adi bangsa enda patuh man perentahNa; bangsa Israel me jadi bangsa Dibata/bangsa pilihen Tuhan. Bangsa si nggeluh man guna Tuhan saja, janah bangsa enda me jadi imam-imam Tuhan (Ind; “bangsa yang kudus”). Imam-imam i bas jaman e e me suku (Lewi) si enggo itetapken/ikhususken jadi imam Tuhan i bas rumah pertoton. Ija tugas utama para imam e me: pemena: njaga hubungenna ras Tuhan i bas ingan si badia. Sipeduaken: nampati perpulungen gelah tetap bersih dingen metunggung iadep-adepen Tuhan. Alu bage banci iertiken maka bangsa enda e me bangsa siikhususken/iserapken Tuhan guna ngelai Ia arah kerina dampar kegeluhenna labo terjeng imam bas Rumah Pertoton saja. Bangsa enda arus tetap njaga hubungenna ras Tuhan dingen banci jadi kelang-kelang umat ras Tuhan.

Respon Musa e me langsung nuriken kai siikataken Tuhan nandangi bangsa e; minter ipepulungna kerina pemimpin janah iturikenna sura sura Tuhan. Bangsa e pe minter ngaku maka nggit ia ndalanken kerina siikataken Tuhan. Respon bangsa Israel enda pe minter ka ikataken Musa man Tuhan.

PENGKENAINA :

Arah keterangen i datas banci sidatken piga-piga pengajaren man banta e me:

1. Tuhan enggo leben ngelai manusia; ngelakoken kerinana guna keselamaten manusia. Adi ndube Tuhan enggo mereken tulah bagepe ukumen man kalak Mesir gelah bangsa Israel banci selamat, genduari enggo siidah uga Tuhan ngendesken AnakNa si Tonggal ipakuken ku kayu persilang guna nelamatken kita si perdosa. Kita kerina si tek man baNa enggo iserapkenNa guna jadi imam imam man baNa.

2. Kita kalak si tek igelari bangsa Dibata, bangsa sikerajangen Dibata, imam-imam raja, bangsa sikerajangen Dibata (bdk. 1 Pet 2:9-10). Alu bage banci ka pe ikataken maka kita me imam-imam Tuhan, si enggo ikhususkenNa guna ngelai Ia arah kerina dampar geluhta.

3. Imam imam Tuhan ikawitken ras aron Dibata tentu ndeher kal hubungenna. Imam e me si ertugas i bas ngaturken kerina dahin Rumah Pertoton; adi siandingken i gereja imam e me kerina jemaat siikut muat bagin i bas ndahiken dahin i bas ngelai. Janah adi ikawitken ras pelayanen PJJ, imam tentu kerina ka kita si ikut muat bagin guna dahin pelayanen i bas pertumbuhen jemaat i bas sektorta

4. Adi ikawitken ras doni enda, banci si simpulken maka kerina kalak Kristen e me imam (aron) Tuhan si enggo ikhususken guna ngelai doni enda; subuk i bas inganta erdahin, inganta rusaha, keluarganta, bagepe ku masyarakat si lit i sekelewetta. E maka si isingetken i bas visi GBKP aron Dibata (jadi aron Dibata si maba pasu-pasu man doni enda) e me kerina anggota GBKP si rikutken statistik GBKP tahun 2023 teremna e me 326.804 kalak. Kerina anggota GBKP min nggeluh (rukur, ngerana ras erdahin) jadi pasu-pasu man doni enda.

DISKUSI :

1. Turiken pengangkanta adi kita igelari “imam imam Tuhan”!

2. Mari sidiskusiken, kai saja kin dahin imam (aron) Tuhan bas doni enda? Janah siapai dage singasup kita ngelakokenca tandana kita imam Tuhan!

USULEN ENDE-ENDEN:

1. KEE GBKP No. 396:1,3 = https://www.youtube.com/watch?v=dduRwJPFQAk

2. KEE GBKP No. 297:1,2 = https://www.youtube.com/watch?v=B7G82Is8la4

3. KEE GBKP No. 256: 1,2 = https://www.youtube.com/watch?v=6_ZnXh2f6kM

4. KEE GBKP No. 59:2 = https://www.youtube.com/watch?v=egEKy53QGVg

DAFTAR BACAAN:

1. Alkitab

2. Alkitab Edisi Studi: Hal 1990

3. Tafsir Alkitab Perjanjian Lama, John F Craghan, hal 102-103