Membangun Spiritualitas Anak

Mazmur 127: 3 – 5

127:3 Sesungguhnya, anak-anak lelaki adalah milik pusaka dari pada TUHAN, dan buah kandungan adalah suatu upah. 127:4 Seperti anak-anak panah di tangan pahlawan, demikianlah anak-anak pada masa muda. 127:5 Berbahagialah orang yang telah membuat penuh tabung panahnya dengan semuanya itu. Ia tidak akan mendapat malu, apabila ia berbicara dengan musuh-musuh di pintu gerbang.

Tema : Membangun Spiritualitas Anak

Tujuan : Gelah Mamre:

1) Meteh maka anak-anak e si tuhuna pasu pasu bas Tuhan nari

2) Ertanggungjabab ibas membangun spiritualitas anak anakna

Metode: Nuriken Penggejapen ras Aksi

I. KATA PENARUH

Kehadiren anak ibas jabu jadi sada keriahen si mereken kemalemen ate. Tep-tep jabu erpengarapen makana lit min tuah ibas jabu. Sebab kehadiren anak jadi pelengkap keriahen sada jabu. Tapina megati sura-sura jabu e terjeng kerna litna anak ibas jabu. Kerna tanggungjawab pe terjeng ngukuri keperlun sandang pangan ras papan saja. Tanggungjawab guna membangun spiritualitas anak megati kel ilupaken. Arah PA Mamre sekali enda ibabai me Mamre segelahna mediate nandangi pertumbuhen rohani anak e tah pe ngasup membangun spiritualitasna.

II. URAIAN TEKS

Ibas padan si ndekah, jabu si lit pupusnna igambarken jadi sada pasu-pasu, tapi jabu si la lit pupusna igambarken jadi jabu si la ipasu pasu Dibata (Kej 30: 2, 18; Kej 33: 5; 48: 9; Ul 7: 13). Tapina ibas Padan Si Mbaru, litna tuah i tengah jabu labo jadi sada jaminen makana jabu e ipasu-pasu entah pe kena kutuk. Tapina tep-tep jabu tentuna erpengarapen makana lit min tuah i tengah-tengah jabu. Sebab anak igambarken jadi sada pasu-pasu si mbelin idur Dibata nari.

Ibas budaya kalak Jahudi, anak-anak si tubuh ibas keluarga kalak Jahudi ipandang jadi sada pasu pasu si meherga idur Dibata nari. Bagi sitersurat ibas Masmur 127: 35. nuriken maka anak eme pasu-pasu ibas Tuhan nari. Anak dilaki igambarken desken anak panah ibas tan si mbisa. Ija anak e mereken keriahen ras kemalemen ate man orangtuana. Subuk anak dilaki bagepe anak diberu eme erta kebayaken si meherga. Janah anak-anak e jadi bagin i bas bangsa pilihen Tuhan. Ibas kebudayan kalak Israel, melala anak eme jadi keriahen orangtua. Janah perjabun israil erpengarapen segelahna pasangen e ipasu-pasu alu ndatken melala tuah.

Erpalasken Masmur 127: 3-5 ngandingken anak bali ras anak panah i bas tan si mbisa. Enda ngartiken maka anak panah enda erguna ibas erperang. Alu bage ibas ngalaken perang lit persedian senjata si mahanca terjamin keselamaten si makekenca. Ertina maka, kehadiren anak ibas jabu jadi senjata ornagtua guna ngalaken tantangen geluhna. Khususna ibas mentasi masa-masa tuana. Anak jadi kebanggan si mereken kemalemen ate.

Alu bage, orangtua harus tetap ertanggungjawab lako pebelin-belin anak ras mereken pengajaren si payo guna kegeluhen anak e. Orangtua ertanggungjawab guna mabai anak-anak erkiniteken man Dibata. Orangtua me si jadi guru utama anak-anak ibas pembentuken spiritulitasna.

III. PENGKENAINA

Lit kuan-kuan ngatakensa maka, “Buah jatuh tidak jauh dari pohonnya”. Enda ngertiken maka karakter anak-anak tentu la terlepas ibas karakter ras pola asuh orangtuana. Erdandanken sie me makana arah PA mamre enda ibabai mamre segelahna ngasup memaksimalkan tugasna selaku imam ibas tengah-tengah jabu. Mamre ertanggungjawab lako empetandaken Jesus Kristus selaku Tuhan ras Juruselamat man anak-anak.

Tentuna segalahna mamre ngasup membangun spiritualitas anak-anak harus maka mamre pe memiliki spiritualitas si mehuli. Tentuna pembentuken spiritualitas mamre la terlepas arah persadanna ras Dibata. Alu bage, mamre iarapken memiliki relasi si mehuli ras Dibata. Arah relasina e ka pe banci jadi usihen si mehuli man anak-anak. Mamre harus ngasup jadi rule model spiritualitas nandangi anak-anak i tengah jabu.

IV. DISKUSI-AKSI

1. Erpalasken Masmur 127:3-5, kai-kai saja upaya si ibahan mamre selaku imam i tengah-tengah jabu i bas proses pembentuken spititualitas anak?

2. Guna pembentuken spiritualitas anak bahan dage aksi nta mamre, Selaku imam i tengah-tengah keluarga, gelah erbahan jam doa i tengah jabu tiap berngi.

Usulen Lagu

1) KEE GBKP No. 399: 1-2

2) KEE GBKP No. 323: 1-3

3) KEE GBKP No. 374: 1-3

4) KEE GBKP No. 343: 1- (persembahen)

Pdt. Berandes Ginting, S.Th., M.Psi.

Hp: 0812 6905 4130