Teks : Kuan-kuanen 16: 31-32.
Tema : Malem ate pudi metua
Tujuan : Gelah Mamre:
- Meteh maka lit ulih kalak bujur ibas adepen Dibata
- Tetap nggeluh ibas kebujuren dingen mehamat man orang tua (Saitun)
16:31 Rambut putih adalah mahkota yang indah, yang didapat pada jalan kebenaran. 16:32 Orang yang sabar melebihi seorang pahlawan, orang yang menguasai dirinya, melebihi orang yang merebut kota.
1) KATA PENARUH
Kerina manusia erpengarapen gelah banci ngaloken kemalemen ate, terlebih lebih ibas pudi metua. Erkiteken sie, umumna manusia e nggit erlatih-latih erdahin tupung nguda gelah banci min lit sitik pernahangna tupung enggo metua. Engkai maka bage perukuren manusia? Erkiteken manusia e ibere Dibata pemeteh janah erpalasken pengalamen kegeluhen kalak si gedang umurna, metua la kepe “terelukken”. Manjar-anjar kerehenna tapi tepat ras pasti pengkenaina, kecuali nangdangi kalak si la sempat metua nggo nadingken doni ena. Guna si e tentu melala persikapen siibahan kalak si pentar, aminna pe persikapen e labo jadi jaminen jumpa kemalemen ate. tapi silang-langna dahinta selaku kalak is am enggo silakoken. Lit kuan-kuan: “Bagi motor kuta-kuta“, ertuana motor e erberatna babanna, erteremna penumpangna. Kepe arus ka me sieteh maka kemalemen ate e pe labo semata-mata sialoken adi enggo melala buatenta, entah pe I ka kerina sura-suranta ras sidebanna, tapi kemalemen ate e kepeken banci ialoken manusia adi ibereken Dibata. Salomo ngingetken silupanta is amber geluh enda arus tetap lit iketenta ras Tuhan sabab amin kai pe sura-suranta ibas Dibata nge keputusenna (Kuan-kuanen 16:1)
2) URAIAN TEKS
Menaken ayat 1 kitab enda, teridah Raja Salomo melala nuriken kerna pentingna nggeluh alu bujur dingen tetap ndalanken kegeluhen si erkawiten ras Dibata. Teks enda eme kitab hikmat kegeluhen kalak benar. Kalak si nggeluh alu bujur, maka kebujuren e engkawali kegeluhenna. Janah ulih kebujurenna erbahanca malem atena sabab Dibata erngena ate nandangi kebujuren. Adi iterjemahken ku bas Bahasa Indonesia kata bujur seri ertina ras jujur, janah menurut KBBI, kata jujur ertina, lurus hati, tidak curang dan tidak berbohong. tulus, terus terang, terbuka dan terpercaya. Enda me pengertin si lit ibas erti kata bujur. Kalak si bujur e la mementingken dirina jine, tapi rukur ia ertimbang is am. Ulihna, ngena ate Dibata ibahanna janah kalak sideban pe erngena ate kempaksa. Terberita me ia ku sekelewetna maka kalak si bujur e mehuli dingen terdeheri, terteki kal dingen erkemalangen man Dibata.
Ibas ogen ituriken:
Ayat 31: Ulih kalak bujur eme nggeluh cawir metua, uban desken mahkota si meherga kap. Ibas is am Indonesia nina “Rambut putih adalah mahkota yang indah, yang didapat pada jalan kebenaran”. Raja Salomo nuriken maka kiniulin kalak bujur gedang- gedang kegeluhenna, kiniulinna e la ermasap-masap, seh maka kiniulin e tetap jadi kenangen segedang geluh (cawir metua). Anak-kempu pe banci denga metehsa kerna kiniulin si ndube ilakoken nini ras bulangna. Raja Salomo ngataken maka uban (buk mbentar) jadi kiniulin (keindahan) orang tua (bnd. Kuan-kuanen 20: 29). Kalak si ndalanken kebujuren ibas geluhna kinibujurenna e pe jadi kiniulin segedang-gedang geluhna I ku anak kempuna.
Ayat 32; Madin jadi kalak saber asangken erkuasa, engkuasai diri ulin asa naluken melala kuta. Engkai maka ikataken ulin jadi kalak saber asangken erkuasa? Sabab kalak si saber ngasup engkuasai dirina. Penguasan diri banci mpeturah kengasupen rukur alu mbages dingen ndatken pengertin. Kalak si mbages pengertinna pasti jadi penungkunen enterem jelma sabab buah perukurenna e melala mere garuh si mehuli man enterem jelma. Emaka e me bena-benana maka ikataken Raja Salomo ulin kalak saber asangken erkuasa. Sabab kalak si samber dingen mbages pengertinna, jadi penungkunen kalak si erkuasa. Terbagesen ikataken Raja Salomo maka kalak si ngasup ngkuasai diri ulin asa kalak si ngasup naluken melala kuta. Ngkuasai diri eme sada biak si tuhu-tuhu perlu ibas manusia. Ngasup ngkuasai diri ulihna, nggeluh alu ratur, ngasup mengendaliken perukuren, kebiasaan si la mehuli, sipetembil ras sura-sura Dibata. Kalak si la ngasup ngendaliken dirina iandingken bagi kegeluhen kuda si la ratur, si arus isangam babahna (Mazmur 32: 9). Arah kai siituriken i datas teridah maka kengasupen ngkuasai diri jadi gegeh singasup naluken erbage-bage si la mehuli.
3) PENGKENAINA
- Bagi nina kata “Tidak ada yang pasti di dunia selain perubahan”. Kegeluhen enda terus berubah, si la pernah berubah eme perubahen e sendiri. Kata enda ngajuk Mamre guna nggejabken maka genduari kita jadi mamre, tapi lit paksana jadi Saitun rikutken kategorial gerejanta. Emaka adi umurta enggo seh 60 tahun nggo banci kita ngikuti perpulungen Saitun, bicara ikut denga pe ateta ibas kegiaten Mamre, labo dalih.
- Ibas ndalani kegeluhenta melala si man alanken si banci mabai kita nggeluh la setia man Dibata, emaka tetaplah jemak enteguh kinitekenta. Bahanlah kebujuren ras kiniteken man Dibata jadi palas kegeluhen. Nggeluh la ngukurken dirin jine, tapi jadi bapa si bijaksana (pentar), berintegritas. Lagia kita ngasup jadi usihen si lang-langna la jadi pandangen (batu antuken). Reh tuana arusna reh pentarna, bagi tua-tua ridap reh tuana reh gersingna, reh melamna pe. Reh tuana perukuren ras kata-katanta jadi gudang kata-kata bijak simpepalem pusuh.
- Ergakenlah kalak si enggo metua entah pe si tuan asa kita. Ula mapas man kalak si enggo metua, arus siinget, kalak si metua enggo pernah nguda, kalak si nguda lenga pernah metua janah singuda banci saja la sempat metua.
4) DISKUSI
- Erpalasken teks PA-nta minggu enda, kai nge dampak negative ras positifna adi kita ndalanken kebujuren? Turiken erpalasken pengalamen kinitekenta.
- Kai-kai saja nge si perlu si persiapken guna kiniulin geluhta baik secara jasmani bage pe pertendin maka banci sialoken kemalemen ate subuk genduari bage pe guna pudi metua? (berbagi pengalamen gelah simehuli silakoken kita banci ka iusih temanta)
5) Usulen Lagu
- KEE No. 354: 1-3= https://www.youtube.com/watch?v=Gcu8h_8HH3s
- KEE No. 350:1-2= https://www.youtube.com/watch?v=xDd_DvTknAU
- KEE No. 363: 1-2= https://www.youtube.com/watch?v=8D9j_Jd6dS8
- KEE No. 293:1-.. (persembahen)= https://www.youtube.com/watch?v=za-1JW9PWU0
Pdt. John Terkelin Ginting, MA., M.Th.
HP: 0813 7012 2163