BIMBINGAN PA MAMRE 02 – 08 FEBRUARI 2025

BIMBINGAN PA MAMRE

TANGGAL, 02 FEBRUARI – 08 FEBRUARI 2025

 

Teks       : Roma 15: 1-6

Tema     : Kerina ersada muji Dibata

Tujun    : Gelah Mamre:

• Ngasup ngidah nilai si mehuli (‘kebayaken’) i bas perbedan-perbedan si lit bas kegeluhen.
• Ncidahken kiniersadan ukur arah perbahanen si nyata sebage puji-pujin man Dibata.

Orang yang lemah dan orang yang kuat

15:1 Kita, yang kuat, wajib menanggung kelemahan orang yang tidak kuat dan jangan kita mencari kesenangan kita sendiri. 15:2 Setiap orang di antara kita harus mencari kesenangan sesama kita demi kebaikannya untuk membangunnya. 15:3 Karena Kristus juga tidak mencari kesenangan-Nya sendiri, tetapi seperti ada tertulis: “Kata-kata cercaan mereka, yang mencerca Engkau, telah mengenai aku.” 15:4 Sebab segala sesuatu yang ditulis dahulu, telah ditulis untuk menjadi pelajaran bagi kita, supaya kita teguh berpegang pada pengharapan oleh ketekunan dan penghiburan dari Kitab Suci. 15:5 Semoga Allah, yang adalah sumber ketekunan dan penghiburan, mengaruniakan kerukunan kepada kamu, sesuai dengan kehendak Kristus Yesus, 15:6 sehingga dengan satu hati dan satu suara kamu memuliakan Allah dan Bapa Tuhan kita, Yesus Kristus.

 

1) KATA PENARUH

Sasaren Pelayanen GBKP tahun 2025 eme “Dewasa Menerima Perbedaan”. Kata dewasa mereken pengertin maka sesekalak si ikataken dewasa e me lanai anak-anak entah pe remaja. Dewasa erkawiten ras biak (karakter) si biakna sempurna (kuh) ras ertanggungjabab. Kata dewasa erkawiten ras perukuren, pengeranan ras perbahanen, mehuli ibas erbahan keputusen, teneng, saber, la pergelut, la murah merawa ras nggit ngalemi salah kalak bage pe nggit megiken ras la nggit ngeranai saja tapi mejingkat.

Ngaloken perbedan ertina, nggejabken maka perbedan sebage sada kinata kegeluhen dingen nggeluh ibas perbedan e alu meriah ukur dingen dame sebage tanda pengataken bujar man Dibata dingen jadi dalan guna muji Tuhan. Guna si enda, mari ita erlajar erpalasken kitab Roma 15: 1-6.

2) URAIAN TEKS

Roma 15: 1-6, eme nasehat Paulus man perpulungen kerna kearusen geluh kalak si tek ibas ndalani ras ngalaken situasi kegeluhenna sapih-sapih manusia pelain-lain. Sura-sura Rasul Paulus gelah perpulungen mpelebeken kepentingena guna mbangun kiniulina ras-ras. Uga kearusen kegeluhen kalak Kristen ibas kiniteken si paguh, bebas ibas iketen hukum, ngelakokenca arah pusuh siersuruh labo terpaksa, nggeluh ras teman si la (merampek) kinitekenna. Kegeluhen kalak kristen arus mereken kesenangen sada ras sidebanna labo guna kesenangen dirina jine. Sabab Kristus pe labo reh guna pesenangken dirina jine, tapi erbage hinan ngkenai IA. Alu perbahanen si bage maka si merampek kinitekenna pe banci reh paguhna kinitekenna, kerina perpulungen banci ersada ibas kerina kecibalna, alu bage kegeluhen perpulungen jadi pujin man Dibata (hidup jemaat bagaikan suara pujian bagi Tuhan).

Ayat 1, Kalimat enda ngingetken kalak Kristen kerna kesadaren diri maka enggo me jadi kearusen nggeluhken kegeluhen i bas kiniteken si megegeh janah jadi penampat man kalak si merampek kinitekenna. Si megegeh kinitekenna arus ngasup ngidah kalak si merampek kinitekenna dingen nampatisa (labo ipedauh, ihina, isakiti ras sidebanna) si lit isekelewet.

Ayat 2, nuriken maka kegeluhen kalak sierkiniteken arus erguna man sekelewetna, erdiate, nggit rukur guna kiniulin temanna, gelah kerina sierbage-bage e nggeluh ersada dingen nggeluh ibas kiniteken.

Ayat 3. Guna ndalanken kai siituriken ibas ayat 2, si jadi usiken kalak sierkiniteken eme JESUS KRISTUS. Jesus nggeluh erguna man kalak sideban, la ngukuri dirina saja, nggit ngenanami kiniseran guna kalak perdosa, ertina meherga iakapNa kalak perdosa (la ipediatNa, la iabaikenNa) igengkenNa kiniseran guna mersan kiniseran manusia.

Ayat 4-6, nuriken kerna pengajaren situhu-tuhu e me kap Pustaka Si Badia, singajari manusia nggeluh erpengarapen, sabab Pustaka Si Badia nuriken kerna kesabaren ras mereken gegeh man kalak singiit ngalokenca. Pengajaren Pustaka Si Badia nggeluh ibas diri Jesus, IA me ulu kesabaren, ulu gegeh, si jadi usihen guna mpersada kerina sipelain-lain. Kedungenna, alu gegeh kesabaren si rehna ibas Tuhan nari, si erbage-bage e banci jadi ersada, geluhna jadi sora puji-pujin man Dibata.

 

• PENGKENAINA

Kegeluhen kalak Kristen labo guna dirina jine, simegegeh ertanggungjabab nanggung kelemahen kalak si la megegeh, kalak si tek la banci mperjuangken kesenangenna saja, tapi arus rusaha mperjuangken kesenangen teman manusia, njadiken kegeluhen sibagenda rupana e me simehulina sabab bage kin usihen si enggo icidahken Kristus (IA nggeluh guna manusia).

Manusia itepa Dibata pelain-lain, bagi sada kula melala ring-ringna. Tep-tep ring-ring pelain-lain rupana, bentukna bage pe gunana. Aminna pe pelain-lain, arus ersada, sikelengen, sisampat-sampaten gelah kula e sehat. Kinierbagen e ncidahken uga belinna kuasa Tuhan dingen ncidahken kinibayaken, kesempurnan tinepaNa e. lbas Tuhan tep-tep tinepa e mehuli, bali ulina sada ras sidebanna.

Selaku Mamre, idilo gelah ngidah kiniulin ibas manusia sierbage-bage. Ibahan jdi kebayaken, ibahan jadi kesempaten guna ncidahken kiniersadan ras kekelengen sada ras sidebanna. Adi lit teman si lemah, umpamana ibas kiniteken, SDM, ekonomi, pengalamen geluh, disabilitas, anak melumang, mesunah merawa dingen pergelut ras sidebanna. Kerina enda jadi dalan ras kesempaten man kalak si megegeh guna nampati dingen ncidahken kekelengenna. Ertina kalak si lemah, arus tetap iperdiateken, ikelengi, iergai, isampati, itamburi kelemahenna, kelemahen kalak jadi dalanta guna nampati. Enda jadi tanggungjabab si megegeh, sabab ibahan (itamaken) Dibata si megegeh i doni enda guna nambur-namburi kegeluhen kalak si lemah. Emaka ibas kegeluhen kalak si lemah bage pe kalak si megegeh teridah gegeh ras kebayaken Dibata.

Kalak si la megegeh lit i sekelewetta, kalak si bage la banci ipedauh ibas geluhta nari tapi arus iperdiateken, si megegeh arus ncidahken ras empaty (merasakan, sepenggejapen) nandangi kalak si la megegeh. Arah rasa empaty, ersuruh ukur guna nampati sebage bukti kita ersada selaku tinepa Dibata. Emaka kalak si megegeh arus sedar maka ia megegeh ibas bidangna, ula simegegeh mposisiken dirina ibas si lemah. Cidahken kiniersadan, empaty alu perbahanen siteridah ras tergejabken kalak si lit isekelewetta. Kerina perbahanen si mehuli e guna kemulian Tuhan dingen jadi puji-pujin ras pengataken bujur man Dibata si mereken kerina si lit ibas kegeluhenta, labo guna mpehaga diri ras kesombongen.

Mari sipakeken gegehta guna kiniulin enterem kalak.

 

DISKUSI:

1. Erpalasken bahan PA-nta minggu enda, kata kai nge si perlu lit ibas pusuhta gelah kita ngasup nggeluh itengah-tengah kalak si erbage-bage biak, kiniteken, cara rukur, pengerana ras sidebanna. Turikenlah!
2. Biak kalak si uga nge kidekah enda si mesera kal siakap ngalokenca? Ras kuga tekatta ku lebe guna nggeluh ersada ukur ras isekelewetna gelah terpuji gelar Dibata.

 

Usulan Lagu

• KEE GBKP No. 209: 1-2
• KEE GBKP No. 350: 3-2
• KEE GBKP No. 165: 1-2
• KEE GBKP No. 354 – (persembahen)

 

Pdt. Jenni E. Br. Keliat

HP: 0813 7552 3001