Ngasup Ngaloken Perbedan

Teks       : Galati 5: 13 – 15

Tema     : Ngasup Ngaloken Perbedan

Tujun     : Gelah Mamre:

• Meteh persadan ras Tuhan mpengasup ngaloken perbedan.
• Ngasup ngaloken perbedan simpepaguhi persadan, labo perubaten.

Galati 5: 13 – 15

5:13         Saudara-saudara, memang kamu telah dipanggil untuk merdeka. Tetapi janganlah kamu mempergunakan kemerdekaan itu sebagai kesempatan untuk kehidupan dalam dosa, melainkan layanilah seorang akan yang lain oleh kasih.
5:14         Sebab seluruh hukum Taurat tercakup dalam satu firman ini, yaitu: “Kasihilah sesamamu manusia seperti dirimu sendiri!”
5:15         Tetapi jikalau kamu saling menggigit dan saling menelan, awaslah, supaya jangan kamu saling membinasakan.

1. KATA PENARUH

Tangkas teridah man banta maka Dibata nepa isi doni enda erbage-bage (berbeda), subuk sinuan-sinuan, rubia-rubia, nurung, manusia, taneh ras sidebanna, bage pe benda penerang she langit, lit matawari, bulan ras bintang-bintang. I bas sada kula pe lit erbage-bage ring-ring, Kerina enda nuduhken maka perbedan e Dibata si erbahanca alu kata sideban, Si erbage-bage e ncidahken kepentaren ras kemulian Dibata.

2. URAIAN TEKS

Genduari ikataken sebage jaman kemerdekan entah pe kebebasen, tep-tep kalak bebas ngerana kai atena ibelaskenna, kai atena ibahanna, kuja atena si penting la ngganggu ise pe, bage me tempa prinsipna. Bahan PA-nta minggu enda nuriken maka kebebasen si imaksudken Rasul Paulus e me kebebasen simabai kiniulin man sekelewet, labo kiniulin guna pribadi saja.

Bahan PA-nta ilatarbelakangi situasi perpulungen Galati sipaksana la kondusif erdandanken pengajar-pengajar palsu (ay.10-12). Pengajar enda rehna I bas kalak Jahudi si ersura-sura mabai perpulungen guna mulihken ku kiniteken sidekah singataken maka kebenaren seh lebe-lebe Dibata eme arah sunat ras 10 Pedah Dibata bage pe mpelebe ‘hidup saleh’. Bagenda me ilayasi Rasul Paulus nina:

• Kemerdekaan i bas Kristus, ibenarken arah kiniteken, adi mulihken ku sunat, sepuluh Pedah Dibata ras ‘hidup saleh’ ertina enggo terjadi pembatasen kebebasen, ipebelin perbudaken bagi kegeluhen sidekah. Ertina, adi sitik saja ngelanggar sepuluh Pedah Dibata, arus ndat hukumen. Emaka pengajaren sibagenda rupana arus itulak. Sabab la lit manusia si ngasup ngelakokenca alu sempurna. Kerna Si enda nggo idungi i bas Jesus Kristus. Tangtangna manusia budak dosa, i bas Jesus enggo salih jadi anak-anak Dibata (psl 4:7).

Kiniseran Kristus erbahanca manusia ialoken Dibata uga litna, dosa-dosa manusia la jadi penghalang guna iangkat jadi anak-anakNa. Amin bage gia, labo ertina dosa-sosa la iperdiatekenNa tapi igalariNa i bas kayu persilang, emaka manusia arus ertanggungjabab nandangi kai siibahan Jesus (13b-15), umpamana la mere kesempaten dosa Si engkuasai geluhna. Sabab aminna pe manusia enggo itebus alu darehNa, labo ngataken maka manusia bebas erbahan dosa. Kebebasen siibereken Kristus ngajuk gelah manusia patuh man baNa, patuh nandangi Kata Dibata e me kebebasen situhu-tuhu. Manusia ibebasken i bas dosa labo guna dosa.

• Kalak Kristen la cukup terjeng ngelawan dosa, tapi pe arus ngelai sada ras sidebanna, nuanken kiniulin ras erbahan si mehuli nandangi teman manusia (ay.13c-14). Sepuluh Pedah Dibata enggo irakut i bas sada pedah e me “Kelengilah temanndu manusia bagi kam engkelengi dirindu”.
• Piga-piga perpulungen Galati, la nggeluh I bas perdamen temanna manusia, lit deba perlu ihamati, lit ka ngena atena permusuhen, deba sician-cianen, lit ka erbahan dirina ulin asangken temanna, nggeluh I bas sura-sura daging, rubat ras la siangkan. Kebebasen si aruasna mpeteguhi kiniersadan ras kekelengen tapi ipergunaken guna encedai teman nanusia. La terjeng gagal ngkelengi tapi ernembeh ate sada ras sidebanna.

Ncidahken perbahanen bagi rubia-rubia, sikaraten, siatahen, perpulungen arus megermet ras metenget nandangi situasi enda, sabab banci engkernepken persadan perpulungen e. Adi situasi enda ipediat, maka banci jadi bibit-bibit perubaten ras perpecahen.

3. PENGKENAINA

Arah kai siituriken she datas teridah maka perubaten, sikaraten, siatahen banci erbahan kernep kegeluhen manusia. E maka guna meneken situasi si bagenda rupana arus ipebelin kekelengen. Sabab kekelengen ngasup naluken nembeh ate ras perubaten. Perubaten bagi api si erbahan meseng kerina kalak si rubati, la lit si menang.

Kristus enggo mereken usihen, kebebasen ras gegeh guna ngkelengi ras ngelai teman manusia. Si meserana pe enggo ibahanNa guna kita, kita enggo ibebasken I bas kuasa dosa nari. Kita enggo ngaloken keleng ateNa si mpengasup kita guna erkeleng ate nandangi temanta manusia. Lit denga kin alasen man banta la erdiate ras la ngkelengi temanta manusia? Erbahan ceda ukur teman bali ras ngelawan Kata Dibata, kiniseran Kristus seh kayu persilang arusna banci mpepalem pusuhta erdandanken erbage-bage persoalen si lit, erdandanken perbedan si lit i bas sapih-sapih Mamre.

Kita berbeda latar belakang, pendidiken, ekonomi, keluarga inganta ipebelin, perukurenta, pendapatta, bage pe engkai maka kita jadi Mamre pe la bali (berbeda). Cara ngerana, perbahanen guna ncidahken si mehuli pe banci berbeda. Jadikenlah kerina perbedan enda jadi kebayaken guna erbahan kegeluhen enda jadi sempurna. Pedauh perjengilen, merawa, elem-elem, bahanlah perbedan e mpeturah kesadaren maka perbedan e erbahnca kita bayak, megegeh dingen ergegeh guna ngkelengi teman manusia. Bage pe arus iinget, gelah metenget nandangi kai-kai saja si erbahanca kernep persadan i bas Mamre, i bas jabu bage pe i bas persadan si lit i bas kegeluhenta. Carana e me kap pentar, bijaksana ngaloken perbedan, ergaken perbedan si lit i bas kita. Bagi rende, lit sora sada, dua, telu ras empat radu ras rende, emaka she kal jilena dingen sikap kal man beginken. Ingetlah makai bas persadanta ras Tuhan ngasup kita ngaloken perbedan entah pe ersada, meriah ukurta ras kalak si berbeda ras kita. Marilah si sicidahken i bas kegeluhenta kebiasan (biak) “Dewasa Ngaloken Perbedan” sue ras sasaran pelayanen GBKP tahun 2024.

4. DISKUSI

• Oge ayat 14 ngataken “Kelengilah temanndu manusia, bagi kam engkelengi dirindu”, turiken pengangkan ras pendalankenndu kerna ayat enda.
• Rikutken pengalamenndu, perbedan si uga nge kidekah enda erbahanca turah perpecahen ras la siangkan, subuk i bas jabu bage pe perpulungen ras masyarakat. Sikap kai si arus i bahan gelah teraloken perbedaan e?

USULEN ENDE-ENDEN:

• KEE GBKP No. 399: 1-3
• KEE GBKP No. 319: 1-3
• KEE GBKP No. 200: 1,3
• KEE GBKP No. 209: 1-2
• KEE GBKP No. 350: 1-2

Pdt. Jennie Elliyani Keliat, S.Th.
0813 7552 3001