BIMBINGEN PA SAITUN TAHUN 2024
Tanggal 8 September 2024 – 14 September 2024
Ogen : Kejadin 15: 1-6
Tema : Metua La Alasen La Percaya Diri
Tujun : Gelah Saitun ngasup:
- Ngangkai maka Abraham ras Sarah enggo seh kal tuana tetap ipake Dibata ndalanken sura – suraNa
- Ngangkai maka Saitun pe tetap banci ipake Dibata nehi sura-suraNa
Metode : Diskusi & aksi
BENA KATA
Lit kuan – kuanen (falsafah) kerna kesangapen i bas kalak Karo emekap: “Merih manuk ni asuh, mbuah page ni suan, ertuah bayak jumpa anak dilaki ras jumpa anak diberu”. Ndatken tuah entah sinursur man kalak Karo e jadi sada simbol kesangapen. Ras si e jadi perayakenna. Emaka adi lenga jumpa tuah, melala ibahan cara guna ndatkenca. Lit si ertambar subuk medis bagepe tambar tradisional, alun ku jah ku je ras deba ibahanna acara nengget. Bagem pentingna kehadiren tuah ku tengah – tengah jabu.
MPEBAGESI OGEN
Abram idilo Dibata nadingken kutana, nadingken kade – kadena ras nadingken rumah orang tuana lako berkat ku kuta situduhken Tuhan pagin man bana (Kej 12:1). La ia nungkun, la protes, ikutkenna penuruhen Dibata alu bulat ukur. Ras ikut pe ndeharana Sarai bagepe Lut. Tupung si e umur Abram enggo 75 tahun. Kenca ia nadingken Ur-Kasdim, Dibata erpadan mereken sinursur man bana (Kej 12: 7, Kej 13: 15,16, Kej 17: 17). Kenca umurna 99 tahun (Kej 17: 1) tole erpadan Tuhan maka ibere me man bana anak siipupus Sarai. Tentuna enda sada peristiwa sienggo ndekah kal itimai keluarga Abram. Tuhu – tuhu metedeh kal atena ndatken sinursur. Emaka tupung Dibata nehken padanNa kerna ketubuhen sekalak anak ku tengah jabuna tentu e sada berita keriahen. Ras i bas paksa si e pe erpadan ka Dibata, janah teridah titik terang si mehuli. Mulai me iban Dibata perpadanen si lebih serius.
Secara logika wajar kal Abram la tek, lanai masuk akalna maka banci denga lit pupusna ras ndeharana Sarai si enggo metua e. Ise pe meteh maka sekalak diberu adi enggo umurna bagi umur Sarai lanai bo mungkin banci mupus,
Kenca Abram mbebasken Lut i bas Raja – raja si nerang ia i daerah Sodom (Kej 14), tetap icidahkenna keleng atena man Lut. Kenca kejadin e me i bas sada pengenehenen reh kata Tuhan man Abram niNa “Ola kam mbiar Abram. Aku ngampang – ngampangi kam janah mbelin kal upahndu Kubereken” (Kej. 15: 1). Kata “upah” minter ihubungken Abram ras kesusurenna, anakna. Kai ertina ialokenna upahna adi labo lit anak ipupusna. Genduari ia enggo metua, Abram 99 tahun, Sarai 89 tahun, emaka bagi si kecewa Abram man Tuhan sebab lalap denga jumpa tuah. Em sebabna ikataken Abram man Tuhan, maka singaloken tading – tadingenna eme Elieser sekalak juak- juakna i Damaskus nari.
“Kai gunana upah siiberekenNdu ateNdu man bangku e adi labo lit anakku? (ayat 2). Lanai bo arapkenna upah i bas Dibata nari. Elieser e pe enggo nge iakap Abram bagi anakna jine. Emaka tupung ikataken Tuhan man Abram maka labo Elieser singalo tading – tadingen, tapi anak si ipupusna jine, labo ia tek kal. Lanai akapna mungkin lit pupusna.
Salah kin Abram adi bage penggejapenna? Lang, Entah lanai kin ia tek man janji Tuhan? Wajar kal bage pengukurina nginget ia ras ndeharana enggo metua. Ipetetap Tuhan ukur Abram, ibabai Tuhan ia ndarat janah niNa, “Tarelah ku langit, cubaken beligai bintang – bintang ah”. E nuduhken maka bintang e teridah alu tangkas, terang i datas langit tapi la terbeligai. La ngasup manusia engkirasa sebab mulai kira, miser embun teridah ka Bintang simbaru. Bagem ia encidahken bana. Bagi Bintang eme buena sinusur Abram, e padan Dibata bana. Ertina, lanai terbeligai ban buena. Tek Abram man Tuhan, emaka ialoken Tuhan ia selaku kalak si benar.
PENGKENAINA
I bas umur Saitun si meganjang banci jadi perukuren Saitun bagi perukuren Abram. Megati sibatasi dirinta erpalasken kengasupenta. Lanai siakap kita banci berkreasi, ngelakoken kai si banci ilakoken kalak si nguda denga. Sigejap gegehta reh urakna. Kai pe terbatas. Termasuk sehna janji Dibata i bas geluhta. Siidah arah Kitab Kejadin 15 enda, ipetangkas Dibata arah pengenehen Abram tupung ia ibaba Tuhan ndarat dingen natap ku langit. I je me ietehna lenga kepe angkana sura – sura Dibata i bas geluhna. La kepe terukuri kuga cara Dibata mpetangkas rahasiaNa man Abram. Bage me kepe bedana cara rukur manusia ras cara rukur Dibata (Jesaya 55: 8, 9)
Enda jadi tantangen bas kegeluhen Saitun. Umur banci meganjang tapi rencana Dibata man kalak si enggo metua e pe she kal belinna. Saitun labo kem saja i rumah, labo olah raga saja, labo jadi singian kampil saja i kerja-kerja. Mbue denga banci si lakoken guna makeken kegeluhenta bagi sura – sura Dibata. Saitun ermomo kerna kinimbisan Dibata man kerina sinursur (Masmur 71:18). E sada tugas si mbelin sabab kalak si ermomo enggo ietehna kai si man momonken ras kai gunana. Saitun erbahanca jabu erdolat.
Lalap kepe lit sura – sura Dibata man kalak si enggo pe meganjang umurna. Labo kalak si nguda ngenca banci ndalanken sura – sura Dibata. Kerina la ibatasi, kerina banci jadi perkakas Dibata encidahken Kuasa Dibata si la ersibar e. Kinata i bas jabu paksa enda adi lit Saitun bas jabu e, megah kel iakap anak ras kempu sabab lit singajar – ngajari ia. Lit simpedahi ia. Saitun desken rem i bas motor. Kuga hebatna, kuga baruna pe motor e, adi la sikap remna pasti maba cilaka. Bagi nina kuan kuanen, “pengalaman guru terbaik” Pengalamen e buen bas Saitun. Ertina, Saitun adalah guru terbaik. Si penting, ula mekisat mbagiken pengalamenta e man anak kempunta. Emaka teruslah berkarya, gegeh banci reh urakna, penginget banci erkurangna, tapi pengkebet kegeluhen Saitun erpalasken peraten Dibata lalap teridah i bas sikap geluhna.
PERTOTON:
Bapa sini Surga bujur kerna umur sigedang siberekenndu man kami, bahanlah gelah umur sigedang e erbahanca reh pentarna kami ras i bas umur kami enda pakekenNdu lah kami guna neheni sura-suraNdu,enda me pertoton kami, ibas Yesus Kristus. Amin.
DISKUSI
- I bas kitab Kejadin 15: 1- 6 si jadi ogenta sendah, teridah maka lit nge keragun Abram kerna padan Dibata. Kuga pengalamenndu selaku Saitun kerna padan Dibata e? I bas situasi si bage, kuga nge hubungenndu ras Tuhan, nggit denga nge kam ertoto alu buat ukur ras tutus?
- Kai dage harapenndu man Gerejanta GBKP enda, i bas Runggunndu lah gia, gelah lit min inganndu nuri – nuri man anak singuda kerna kinitekenndu man Dibata? Usulkenndu e guna icakapken terbagesen i bas Sidang Runggun
Pdt Elitawati Br Sembiring Meliala
081260256355