Kegeluhen anak anak Dibata

Arapen man Saitun
(Aspek Rohani)

1 Petrus 1: 24 – 25

1:24 Sebab: “Semua yang hidup adalah seperti rumput dan segala kemuliaannya seperti bunga rumput, rumput menjadi kering, dan bunga gugur,

1:25 tetapi firman Tuhan tetap untuk selama-lamanya” Inilah firman yang disampaikan Injil kepada kamu.

Ogen : 1 Petrus 1: 24 – 25
Tema : Kegeluhen anak anak Dibata
Tujun : Gelah Saitun:
1. Ngasup ngergaken kegeluhen sikentisik si ibereken Dibata.
2. Ngasup nuriken penggejapenna kerna kesetian Tuhan, tupung nguda denga seh asa metua.
3. Nehken pegajaren man anak, kempu bage pe man kalak sideban kerna kesetian Tuhan, bagepe kearusen selaku anak Dibata.

I. BENA KATA
Kita nggeluh i bas doni enda kentisik ngenca (sementara) dekahen kita tading i bas doni kematen (Pengerana 11:8).
I bas doni enda tah i bas doni kematen, eme ingan singgah ras ingan pengadi ngadin si sementara (ingan singgah ras transit). Tapi lit sada ingan si kekal tahan rasa lalap seh rasa lalap eme Surga sienggo isikapken Dibata man kalak sierkiniteken.
Ola kal erkiteken geluhta si sementara enda bene kegeluhen sirasa lalap. Senang tah susah gia siakap i bas doni enda ola erbahanca kita sirang ras Dibata. Sebab kuga susahna pe kita doni enda kentisik ngenca. Kuga jorena pe siakap idoni enda epe kentisik ngenca. Ulin me kita ngenanami kiniseran sikentisik gelah senang pagin rasa lalap i Surga. Asangken ntabeh gia i doni enda tapi kita kebenen Surga si kekal. Ulin me kita kebenen doni enda gelah dat Surga, asangken dat doni enda kebenen surga.

Gundera Suka Ndebi
Rimo kayu i Kandibata
Mesera gia i bas Pertibi
Gelah malem i bas Dibata

II. MPEBAGESI OGEN
Surat Petrus enda ialamatken man Kalak Kristen simererap marpar ibabo doni enda erkiteken kiniseran reh nderpa kalak Kristen. Sebab Kristen tupung e ianggap ajaren baru silanga terterima itengah – tengah kalak Jahudi. Tentu saja erkiteken kiniseran e lit dua kemungkinen siterjadi. Kemungkinen sipemena murtad erkiteken mbiar i bas ngalaken kekejamen penguasa ras penyiksan i bas anti Kristus nari. Lit ka si kiam guna menghindar i bas ancamen nari. Kemungkinen sipeduaken erteguhna kiniteken. Lit si mate tah i siksa erkiteken mpertahanken kinitekenna.

I bas situasi sibage me Petrus erbahan surat man kalak Kristen, alu tujun gelah banci megegeh dingen megenggeng ngalaken kiniseran. Petrus ngutip kai sitersurat i bas kitab Nabi Jesaya pasal 40: 6-8, alu ncidahken gambaren manusia desken dukut, kemulianna desken rudang. Dukut melus, rudangna pe nartar. Ertina enda ncidahken geluh manusia sikentisik i bas doni enda, labo kekal. Erbuena kiniseran reh pedasna dukut melus erpedasna rudang nartar. Tapi itengah tengah si kentisik e lit nge si kekal sila pernah masap eme Kata Dibata. Kata Dibata me sitahan rasa lalap seh rasa lalap, anem kai pe siterjadi, sebab Kata Dibata e nggeluh. Kata Dibata lapernah erkedungen eme Jesus si bena – benana ras pendungi. Kalak singgeluh i bas ia kata Dibata, nggeluh i bas Jesus. Kalak singgeluh I bas Jesus ia daten kegeluhen sirasa lalap si labo erkeri kerin (Joh 3: 16).

Enda me si ikataken Petrus i bas ayat 25 enda berita simeriah. Surat Petrus enda me surat nehken kata pergegeh ras pengapul man kalak Kristen i ja pa pe tading, gelah i bas situasi kai pe tetap megegeh ras setia man Tuhan. Gia dukut melus bunga nartar, tapi Kata Tuhan tetap rasa lalap la pernah melus. Bagem kiniteken man Jesus tahan rasa lalap seh rasa lalap.

III. PENGKENAINA
Guna ndatken kesenangen tah pe keselamaten sienggo isikapken Tuhan man kalak si tek, labo ibereken Tuhan secara instan (siap saji). Labo nimai saja alu tenang, tapi mesti ibentasi erbage bage proses guna seh kubas kesenangen e.
Bali ras kalak muat tengguli lebah, labo banci minter dat tengguli lebah sintebu, adi langgit latih tah ngalaken kiniseran. Mesti nangkih batang kayu sigalang ras meganjang, dingen pang ngalaken seren lebah simesui citna. Bagepe ngeri ngalaken embang i bas batang tualang sigalang. Kerina resiko e ialaken gelah dat tengguli sintebu.

Bageka pe kita jadi Kristen enda labo banci tenang – tenang saja, goyang kaki saja jenari dat surga. Tapi lit pengorbanen, gegeh, waktu,pemeteh, kiniliten, perasaan,ikorbanken guna ndatken keselamaten.

Bagenda kita enggo Saitun, kai enggo sikorbanken guna ndatken keselamaten? Kai sibahan man Tuhan i bas situasi ras kondisi geluhta enda? Kita iajak tetap setia man Tuhan. Kesetianta man Tuhan sekaligus jadi pengajarenta man anak – anakta ras kempunta. Man anakta tah kempunta e pe perlu icidahken bana kerna kiniseran ras kelatihen guna ndatken kesenangen.
Ula sipediat anak – anakta tah kempunta rate ate la erdisplin, sibage mabai ia kubas geluh ersenang – senang sierbanca arah pudi mesui atena. Adi perlu bahan tugasna rutin gelah meteh mesui. I bas ia meteh mesui e desken mbayar uang sekolah gelah ia jadi kalak pentar ras bijak ndalani kegeluhen enda. Dingen kiniseran si ibentasina mabai ia kubas kesuksesen ras keselamaten.

IV. PERTOTON
O Tuhan Dibata Bapa kami simada kuasa, bujur i bas Kam enggo mpersingeti kami, kai arus ibahan kami i bas masa tua kami. Gia lit kami i bas kiniseran perbeben tah keriahen bahan maka kami tetap setia ras erpengendes man BaNdu. Gelah i bas geluh kami si kentisik enda ipersiapken kami diri kami guna ndatken kegeluhen sirasa lalap bagi sienggo ipadankenNdu man kami anak – anakNdu. I bas Jesus kami reh man baNdu. Amin.

V. DISKUSI
1. Kuga kin kalak sindarami kesenangen sementara i doni enda, tapi kebenen kesenangen sirasa lalap sienggo ipadanken Tuhan? Tah pe sebalikna kebenen kesenangen idoni enda tapi dat kegeluhen sirasa lalap?. Bereken contohna, jenari lakoken simehulina
2. Enggo nge ndia kita pang ngakuisa maka kita enda eme kalak si setia man Tuhan? Adi enggo kai enggo ibanndu?, adi siman perubahen i bas kita?

VI. USULAN LAGU
1. KEE No. 369: 1-3.
2. KEE No. 182: 1-3
3. KEE No. 80: 1-3.

Pdt Diman Ginting
HP. 0812 6350 496

Anding-andingen:
Ikeleweti bagi si nabah batang buah:
Iandingken kempak sada perukuren entah pe rencana
si muri. Arah apai pe ikelihi, itaktaki seh ku sikitikna. Labo
si mehulina saja ngenca iukuri, tapi seh ku bas si la mehulina