Erdahin Alu Mehuli Ras Nampati
Teks: Epesus 4: 24 – 28
Tema: Erdahin Alu Mehuli Ras Nampati
Tujun: Gelah Mamre:
1) Meteh erdahin alu mehuli ncariken keperlun
2) Ncariken keperlunna alu tutus i bas erdahin ras nampati
Epesus 4: 24 – 28
4:24 dan mengenakan manusia baru, yang telah diciptakan menurut kehendak Allah di dalam kebenaran dan kekudusan yang sesungguhnya.
4:25 Karena itu buanglah dusta dan berkatalah benar seorang kepada yang lain, karena kita adalah sesama anggota.
4:26 Apabila kamu menjadi marah, janganlah kamu berbuat dosa: janganlah matahari terbenam, sebelum padam amarahmu
4:27 dan janganlah beri kesempatan kepada Iblis.
4:28 Orang yang mencuri, janganlah ia mencuri lagi, tetapi baiklah ia bekerja keras dan melakukan pekerjaan yang baik dengan tangannya sendiri, supaya ia dapat membagikan sesuatu kepada orang yang berkekurangan.
- KATA PENARUH
Erdahin e me salah sada bentuk pasu-pasu siibereken Dibata man manusia (Kejadin 1: 28). I bas ndahiken dahinna e labo “upah” lebe si itaktaki tapi uga gelah pendahin e tuhu-tuhu mehuli erpalasken kiniteken Dibata janah terpertanggungjababken erpalasken aturen dunia kerja. I bas pendahin si bagenda butuh “proses”, la banci “instan”. Kinatana genduari lit kalak erdahin, iukurina lebe kerna “upah”, erdahin gelah menggo, gelah enggo idahiken. Kerna pendahin gelah tuhu-tuhu mehuli, menam-menam lanai bo iperdiateken. Biak pendahin si bage, labo ernanam man bana bage pe man kalak si deban. Arusna, erdahin erpalasken “etos kerja”, gelah arah pendahin e lit kemalemen ate dingen tersampat kalak si deban. Sendalanen ras si enda me teks ogenta minggu enda. - URAIAN TEKS
Surat man perpulungen Efesus itulisken Rasul Paulus tupung ia ipenjaraken i Roma tahun 60-61 M. Tujunna gelah kalak Efesus banci nembah man Dibata si payo i bas Kristus. Kidekah enda si isembahna eme dewi Artemis (dewa kesuburan) bage pe Kaisar selaku penguasa. Bage pe secara eklesiologi, pekembangen kalak Kristen, si la kalak Jahudi berkembang pesat adi ibandingken ras perkembangen kalak Kristen Jahudi. Adi la ipersingeti banci mpeturah persoalen si mbaru i bas perpulungen (gereja). Tempa-tempa kalak Kristen si la Jahudi gegehen asangken kalak Kristen Jahudi, khususna arah segi jumlahna. Guna mencegah persoalen si mbaru, Paulus ngajuk perpulungen gelah banci mpersada misi lako ncidahken perbahanen si mehuli, eme “kegeluhen si mbaru i bas Kristus”.
Ayat 24, ope ayat enda Rasul Paulus enggo nuriken gelah perpulungen i Efesus olanai nggeluh bagi kalak si la nandai Dibata, si la guna perukurenna dingen gelap pengertinna, dingen la lit baginna i bas kegeluhen si ibereken Dibata. Rasul Paulus ngingetken gelah nangtangi manusia si male, si erbahansa nggeluh bagi si enggo-enggona, pusuh peraten ras perukuren arus ipelimbaruina. Jadi i bas makeken manusia si mbaru rikutken tempas Dibata arus nangtangi manusia si male, ras teridah ncidahken kegeluhen si tuhu-tuhu, adil dingen badia. Makeken paken si mbaru alu tetap la ngadi-ngadi (la banci ngadi sekali ntah pe pekesahken). Makeken geluh simbaru alu tetap, emaka adi enggo pang makeken manusia si mbaru, arus lit komitmen, tekad e me terus nggeluh selaku manusia si mbaru.
Ayat 25. Ola erbual! Paulus nurikensa man perpulungen i Efesus, erkiteken selaku kula ni Kristus la banci erbual, arus bujur. Bage pe kalak si tek erdahin lako majekken kula ni Kristus erpalasken keleng ate (Ef. 5: 11). Selaku kula ni Kristus, erdahin guna majekken kulaNa erpalasken kebenaren (la erbual). Biak erbual la pernah pehuliken tapi ncedaken, erbahan sontar (bdk. Joh. 8: 44).
Ayat. 26, merawa, eme merawa si la erturi-turin si banci mpeturah dosa, piah dungna manusia ikuasai iblis ras ngelakoken perbahanen sincedai (berbahaya). Merawa si bagenda enggo jadi kebiasaan bas perpulungen Efesus, merawa si ikuasai emosi minterlah nimpeti ope denga ben wari, gelah ola sempat ia ersuli, jenari turah, reh galangna, kedungenna enggo mesera nerouisa. Emaka nina Rasul Paulus, adi merawa kam ola seh erdosa, ertina merawa guna ndidik perlu.
Ayat 27. merawa si enggo ngadi ope ben wari, e me sada upaya gelah ola lit kesempaten man Iblis. Banci jadi manusia si ngasuhi rawana iakapna maka ia hebat, mbiar kalak man bana kerina, tapi situhuna perbahanen si bage enggo mereken kesempaten man iblis guna ngkuasai dirina. Arah kegeluhen manusia si la mehamat man Dibata, situhna enggo mereken dalan ras kesempaten bage pe kebebasen man iblis guna nehken sura-surana si jahat.
Ayat 28, kerna nangko, enggo jadi kebiasaan i bas perpulungen e, emaka ipersingeti Rasul Paulus, gelah ngadi nangko jenari erdahinlah lako ndahiken dahin si mehuli, gelah adi enggo lit dat ulihna banci ka pe nampati kalak si kekurangen. Nampati kalak si kekurangen, e me biak kula ni Kristus, (bdk. Gal. 6:10). Erdahin i jenda ilakoken erpalasken kegeluhen si mbaru, lit etos kerja si mehuli, kerja keras, kerja cerdas, ertanggungjabab, ras tuhu-tuhu mehuli bagepe banci mereken inspirasi man sekelewetna gelah jadi usihen kalak si deban, alu cara erdahhin bagi si ngena ate Dibata. - PENGKENAINA
Erdahin alu mehuli ras nampati enggo jadi perayaken kalak si erkemalangen man Dibata. Gelah banci seh ku bas perayaken si bage, la banci lang arus ibenai alu kegeluhen si enggo ipelimbarui Dibata, desken makeken paken si mbaru, bujur, la erbual, saber ras banci nahan emosi, nutup kesempaten man iblis guna ncedai dirinta, emaka erdahin erpalasken etos kerja si ngena ate Dibata. I bas jaman si genduari, etos kerja jadi standar si utama man sekalak pekerja, erkiteken arah etos kerjana banci inilai karakter sekalak jelma i bas ia ndahiken dahinna.
Etos kerja si mehuli banci meningkatken produktivitas si maksimal ras ertanggungjabab nandangi dahin si idahikenna. Kalak si bagenda labo ia ngenca iukurkenna tapi turah ukurna guna nampati kalak si deban arah kerina dampar, gelah kalak si deban pe banci terulin asa si enggona. Jadi adi mehuli etos kerjanta, kalak si deban pe ikiut ngenanamisa, erkiteken melala kreativitasta, i bas lingkungen pendahinta pe lit ije ketenengen ras dame, subuk man atasen ntah pe bawahenta, si icidahken arah pendahin, e me kerja keras, kerja cerdas ras ertanggungjabab. Adi beluh kita mbarbarisa, beluh ka lah kita ngalisisa, si enda banci terjadi adi lit etos kerja bas kita.
Bagepe etos kerja ngasup menutup peluang man biak kejahaten, ertina adi labo bujur tentu labo si lakoken. Kalak si rendah nge etos kerjana maka banci terjebak ku bas perbahanen si la bujur, korupsi, ras sidebanna. E maka adi ateta banci ras ngasup kita erdahin alu mehuli ras nampati (bagi nina i bas tema), marilah si tingkatken etos kerjanta erpalasken biak erkemalangen man Dibata. - DISKUSI
1) Oge mulihi Efesus 4: 20. Uga nge pengangkanta kerna ayat enda? Ras uga pengidahta kinatana genduari i bas kegeluhen gerejanta ras masyarakat si rulo enda?
2) Kai nge upayanta gelah reh meningkatna min etos kerjanta selaku Mamre i bas GBKP enda, gelah banci ernanam man kalak si deban dingen ermulia gelar Dibata?
USULEN ENDE-ENDEN
1) KEE GBKP No. 202: 1, 2
2) KEE GBKP No. 393: 1, 2, 3
3) KEE GBKP No. 204: 1, 2
4) KEE GBKP No. 335: 1, 2
5) KEE GBKP No. 423: 1, 3
Pdt. Justen Tarigan, M,Th.
HP/WA: 0821-2380-8035