Teks : Esekiel 36: 25-27
Tema : Pusuh Si Mbaru Dingen Patuh
Tujun : Gelah Mamre:
1) Meteh perbahanen Dibata mbersihken bangsa Israel jadi bangsa simbaru dingen patuh.
2) Mamre ngasup nggeluh I bas pusuh si mbaru dingan patuh.
36:25 Aku akan mencurahkan kepadamu air jernih, yang akan mentahirkan kamu; dari segala kenajisanmu dan dari semua berhala-berhalamu Aku akan mentahirkan kamu. 36:26 Kamu akan Kuberikan hati yang baru, dan roh yang baru di dalam batinmu dan Aku akan menjauhkan dari tubuhmu hati yang keras dan Kuberikan kepadamu hati yang taat. 36:27 Roh-Ku akan Kuberikan diam di dalam batinmu dan Aku akan membuat kamu hidup menurut segala ketetapan-Ku dan tetap berpegang pada peraturan-peraturan-Ku dan melakukannya.
- KATA PERLEBE
Mekatep usur si perseri ukur ras perasaannta. Kalak si la lit perasaanna mekatep si kataken kalak si la lit ukurna. Adi perasaan sekalak manusia paguh maka si kataken ia megegeh ukur, bagepe asum lit si ngatakenca “kam mekeng pusuhndu” ei ertina kalak si bage nggo nutup kesadarenna guna banci berubah padahal mekatep ipersingeti ntah pe ipedahi ia, tapi lalap bagi Si enggona ilakokenna I bas kegeluhenna.
Persinget ras pedah e pe banci mabai manusia kubas kegeluhen si mbaru, janah kegeluhen si mbaru maksudna pola kata, pikir ras perbahanennta nggo mengalami perubahan. Ras kinimbarun manusia e teridah arah kai sindarat I bas dirina nari nandangi kalak si deban. larapken sindarat e jadi pasu pasu min man kalak si dedeban. - URAIAN TEKS
I bas kitab Esekiel 36: 25-27 isinggung kerna ukur si mekeng, janah ise si bas ia ukur simekeng e? Jababna eme bangsa Tuhan, asum Si e eme bangsa pilihenNa kalak Israel. Janah turah penungkunen kai nge sebabna maka kalak lsrael enda mekeng I bas pusuhna? Janah tentuna jababna eme erkiteken kinilapatuhen bangsa enda bagepe kinilasetian bangsa enda nandangi Dibata. I bas keleng ate Dibata mekatep bangsa enda ipersingeti, tapi bangsa enda lebih tek ras mbegiken kai siikataken guru-guru perguak (palsu). Janah akibatna asum kalak enda la mbegiken kata Dibata ras la patuh man Dibata maka bangsa enda iserang bangsa sekitarna seh maka kalak enda talu ras jadi bangsa tabanen. Bangsa enda ngenanami kiniseran ras kecedan si mesangat.
Tapi Dibata e dem perkuah ate, ipadankenNa kiniulin mulihi nandangi bangsa Israel. Cara sinibahan Dibata eme mpelimbarui pusuh kalak Israel. Pusuh si mekeng i ubah Dibata alu pusuh si nggit patuh seh maka alu bage turah sura sura i bas pusuh nari guna ndalanken perintah Dibata (nggit Patuh man perintah Dibata). Enda me arus lebe si ilakoken bangsa lsreal bagepe anak-anak Dibata. Eme pusuh si nggit ipelimbarui ras patuh man Dibata seh maka alu bage Dibata npelimbarui situasi ras keadaan manusia ku singena ateNa ras simereken kemalemen ate man manusia.
Kai kin tanda-tanda Mamre singgit ipelimbarui pusuhna i bas kegeluhen I bas Tuhan? Pemena adi sinen kubas ayat 25 nuriken maka kegeluhenna lit i bas Dibata. Arah proses penyadaren siinanami bangsa Israel asum lit i bas tabanen, pusuh kalak enda ipelimbarui Dibata seh maka ulihna eme pusuh simbaru ras nggeluh simbaru. Sebab pusuh adi i bas kitab Padan Sindekah iertiken sebagai pusat ntah pe inti i bas kepribadian manusia. Manusia lanai egosentris tapina nggo mpelebe sinisuraken Dibata i bas kegeluhenna. Emaka kita selaku Mamre iajuk guna ngendesken pusuhta guna ipelimbarui Dibata ras nggit ibabaiNa ku singena ateNa. Sipeduaken e me geluh manusia lit i bas geluh eme pusuh si mbaru (ay.26) Pusuh simbaru berbeda ras pusuh sindekah. Pusuh si ndekah eme pusuh si batu-batun si la nggit iajari ras ibentuk Dibata sedangken pusuh simbaru eme sebalikna seh makana seh sura-sura Tuhan i bas kegeluhenta ras e mereken kemalemen ate man banta. Sipeteluken eme nggeluh rikutken aturen Si enggo itetapken Dibata (ay. 27) Aturen-aturen Dibata irancangNa guna mere pasu-pasu man banta. Bagem kedungenna bangsa Israel nggeluh alu senang. - PENGKENAINA
I bas kitab 1 Petrus 1: 15-16 ikataken: “Tapi badia min kam i bas kerina perbahanenndu, bagi Dibata si ndilo kam pe badia kap, i bas Pustaka Si Badia ikataken Dibata, “Kam arus badia, sabap Aku pe badia.” Tentuna arah kata enda me jadi perayaken man banta Mamre segelah jadi bagi si niarapken Dibata janah e banci erkinata man banta. I bas kita enggo ipelimbarui Dibata pusuhta. Kebadian dirinta harus si jaga janah patuhlah kita ndalanken perintah Dibata enda. Sebab benana kecedan si mesangat man anak-anak Dibata eme erkiteken la ngasup njagai kebadian i bas kegeluhenna.
Ingetlah bagi bangsa Israel si nggo lanai njagai kebadian e ija I bas ia nggeluh mekeng, pusuh si batu-batun erbahanca kegagalen ras kekalahen lalap jadi sekerajangenna, tapi si idah erkiteken Dibata tetap erkeleng ate maka Ia jine reh guna mpelimbarui pusuh kalak Israel gelah ola keliamen tapi nggeluh alu kebadian sebab Dibata jine si erbahanca janah arus tetap sijagai kebadian i bas geluhta baik I bas jabu, masyarakat ras perpulungen Tuhan
Bageme kita Mamre i bas ngaloken perkeleng ate Dibata enggo ipelimbarui pusuhta janah iberekenna man banta gelah ngasup tetap nggeluh I bas nggeluh siipelimbaruiNa. I bas konteks kebadiaan enda banci siidah arah lanai lit mamre terlibat i bas penakit masyarakat (pekat) antara lain eme judi, pergaulen bebas ras Narkoba. I bas enggo litna pusuh simbaru si enggo ipelimbarui Dibata pasti Mamre ngasup ndalanken kai singena ate Dibata. Bahkan ibas si e Mamre la terjeng terhindar i bas pekat enda tapi pe menjadi Duta Kristus ntah Duta Mamre GBKP guna mengawasi dan menjaga ras mengantisipasi segelah ula nari pekat enda lit i bas inganta tading. Lanai keliamen doni enda tapi siban maka doni enda mehuli mulihi bagi Si enggo ijadiken Dibata. Selamat berjuang. Amin - DISKUSI
1) Kai akapndu sabapna bangsa Israel keliamen seh maka jadi bangsa tabanen? Turiken!
2) Kai Si erbahanca maka Mamre terlibat i bas “Pekat (penyakit masyarakat)” enda? Ras kuga caranta penanggulangenna? Diskusikenlah
USULEN ENDE-ENDEN:
1) KEE GBKP No. 424: 1-2
2) KEE GBKP No. 451: 1, 3
3) KEE GBKP No. 350: 1, 2
4) KEE GBKP No. 343: 1 – (persembahen)
5) KEE GBKP No. 163: 1, 2
Pt. Januar Jesuil Eliasta Ginting, M.Th.
WA/HP 0813 7015 2654