NGASUP NGALOKEN PILIHEN TUHAN
Ulangen 31: 7-8, Ras 34: 9
(Ngaloken Ulih Pemilihen Pertua Diaken GBKP
Periode 2024-2029)
31: 7 Lalu Musa memanggil Yosua dan berkata kepadanya di depan seluruh orang Israel: “Kuatkan dan teguhkanlah hatimu, sebab engkau akan masuk bersama-sama dengan bangsa ini ke negeri yang dijanjikan TUHAN dengan sumpah kepada nenek moyang mereka untuk memberikannya kepada mereka, dan engkau akan memimpin mereka sampai mereka memilikinya.
31: 8 Sebab TUHAN, Dia sendiri akan berjalan di depanmu, Dia sendiri akan menyertai engkau, Dia tidak akan membiarkan engkau dan tidak akan meninggalkan engkau; janganlah takut dan janganlah patah hati.”
34: 9 Dan Yosua bin Nun penuh dengan roh kebijaksanaan, sebab Musa telah meletakkan tangannya ke atasnya. Sebab itu orang Israel mendengarkan dia dan melakukan seperti yang diperintahkan TUHAN kepada Musa.
A. PERSIKAPEN
B. PERPULUNGEN JABU-JABU
Rende KEE No. 395: 1, 4 “Sipujilah Tuhanta E”
Sipujilah Tuhanta e Dibatanta si erkuasa
La ersibar kuasaNa liasNa nggo tetap
Reff: Marilah kita kerina si puji Tuhan bas geluhta
Mbelin kekelengenNa banta krina
Segedang geluhta
Sipujilah Tuhanta e Dibatanta e si perkuah
Singaloken kita k’rina adi reh ersembah Reff: …
Ertoto (Ibabai Pertua)
Ngoge Pustaka Si Badia (Ibabai Simada Jabu)
Rende KEE No. 176: 1-2 “I Bas Toto Kubelasken”
I bas toto kubelasken seh man baNdu Tuhanku
Ajar aku lah ngaloken si mehuli akapNdu
Pertotonku bagi Jesus sanga bas kinis’ranNa
Labo peratenku Bapa, peratenNdu jadilah
Kai pe saja si mehuli i bas perbahanenNdu
Bahan aku la nimbaki, ngaloken bas geluhku
Reh lah dage Kam O Bapa, tegu aku la pulah
Labo peratenku Bapa, peratenNdu jadi lah
Renungen
Teks : Ulangen 31: 7-8; 34: 9
Tema : Ngasup Ngaloken Pilihen Tuhan
Lit sada penelitian ngatakenca maka kalak dewasa erbahan keputusen milih sekitar 35.000 kali teptep wari, mulai kerna milih jam piga medak, kai si man dahin, milih pangan, paken, perkatan, rsd. I bas kinata kegeluhen, labo kerina pilihenta e pasti mehuli jadina, mawen banci kita salah pilih desken kuan-kuan “bagi si milihi tebu”, ate dat si mehuli kepe dat si macikna. Bahan PJJ wari enda mabai kita gelah “Ngasup Ngaloken Pilihen Tuhan”. Ngasup ngaloken Tuhan e menukah adi pilihen Tuhan e sue ras pilihenta. Si mesera ngalokenca e me adi pilihen Tuhan e la sentudu ras pilihenta. Kawiten renungen enda e me ngasup ngaloken pilihen Tuhan sehubungen enggo dungna pemilihen Pertua ras Diaken i bas tahun enda.
Konteks ogen enda kerna Musa si enggo metua (120 tahun), nina Dibata maka ia la bengket ku taneh perpadanen, dingen wari kematenna pe enggo ndeher. E maka arah penuruh Dibata, Musa mpetetap ukur Josua jadi gancihna nerusken mimpin perdalinen bangsa Israel. Ulangen 31: 1-6 Musa mpetetap ukur bangsa Israel maka Josua me sinitetapken Dibata jadi gancihna (31:3). Umputenna Ulangen 31:7-8, isina Musa mpetetap ukur Josua ngaloken dahin e alu la mbiar, sabab bagi Dibata engkawali Musa, bage ka pe pagin Dibata engkawali Josua nerusken dahin e. I bas bindu 34: 9a, kenca Musa mate, isingetken mulihi maka Musa nai enggo namaken tanna ku babo takal Josua selaku sada bentuk penangkuhen i lebe-lebe bangsa Israel. Penangkuhen e ertina maka Dibata jine kap si netapkenca erkelangken Musa, ilakoken i lebe-lebe jelma si enterem jadi saksi, labo sada peralihen kepemimpinen si erbuni-buni si la resmi. I bas bindu 34: 9b tersena “kalak Israel ngikutken ia (Josua) janah icikep bangsa Israel perentah-perentah si enggo ibereken TUHAN man bangsa e arah Musa”. I jenda teridah kepatuhen bangsa Israel ngikutken Josua selaku pilihen Dibata jadi pemimpinna bage pe kepatuhen bangsa e ngikutken perentah Dibata. Patuh man pemimpin bage pe patuh man Kata Dibata. Adi nulih ku pudi, Josua enda salah sada i bas sepuludua mata-mata si ikirim Musa guna mengintai Taneh Kanaan, kerina mata-mata e nuriken maka tuhu mehumur negeri e, tapi sepuluh kalak peturah kebiaren alu ngataken kalak Kanaan e raksasa kerina. Josua ras Kaleb ngenca si mpetetap ukur bangsa e guna tetap maju mengketisa. Tupung si e Josua ras Kaleb menam mate ibenteri bangsa Israel si terpengaruh kebiaren si sepuluh kalak ndai. Tapi genduari kenca Josua itangkuhken, konflik masa lalu lanai jadi persoalen sabab bangsa Israel si ersura menterisa nai enggo mate kerina, janah bangsa Israel si gundari e me anak-anakna si tubuh i bas perdalinen.
Erpalasken GBP maka Visi GBKP e me “Jadi Aron Dibata guna maba pasu-pasu man seisi doni”. Guna ndalankenca i bas Misi GBKP point a nina “menumbuhkembangkan spiritualitas jemaat berbasis Alkitab.” E maka spiritualitasta (geluh erkiniteken) sicidahken arah pesan Pustaka Si Badia wari enda e me sipemena, selaku ngawan perpulungen, ngumban bangsa Israel subuk man pemimpin bage pe kepatuhen man Kata Dibata. Salah sada bentuk kepatuhenta e me ngasup ngaloken ulih pemilihen Pertua ras Diaken guna periode 2024-2029 selaku pemilihen Dibata erkelangken perpulungenNa. Bagi bangsa Israel patuh man Josua amin pe bagi ukurna ntah lang gia, tapi penangkuhen Tuhan e ihamatina alu patuh man kepemimpinen Josua, bage ka pe, terlepas Pertua ras Diaken si terpilih e ulih pilihenta entah lang, bagi ukurta entah lang, arus sihamati pemilihen ras penangkuhenna e selaku tanggung jababta pribadi langsung ku Dibata. Soal serayan si terpilih e ndahiken dahinna altutus entah lang, e tanggung jabab pribadina langsung ku Dibata. Saja e me man totonta gelah tutus kerina.
Sipeduaken, Arah dampar Musa nangkuhken Josua, selaku gereja kita perlu erlajar maka guna keberlangsungen ras kemajun gereja, arus lit kaderisasi entah pe peralihen estafet kepemimpinan si berkualitas. Kualitas Josua labo terjadi rempet sada wari, Josua e i bas umurna anak perana nari enggo icidahkenna ketutusenna jadi suruh-suruhen Musa (Kel.33:11). E maka kerina dahin pelayanen gerejawi bagi kepanitiaan, pengurus PJJ, pengurus Kategorial rsd enda me jadi panggung encidahken ketutusenta selaku ngawan perpulungen sope ibere Dibata tangggung jabab si terbelinen.
Sipeteluken, man pertua ras Diaken si enggo terpilih dahiken dahin e alu tutus, ernalem man Tuhan, ula mbiar, dem kepentaren, ergaken pilihen Dibata e (Ul. 34:9). Arah Kata Dibata idatken Josua pedah ras pergegeh, arah Musa idatkenna usihen. Man pertua diaken si mbaru terpilih arus nggit erlajar subuk arah Pustaka bage pe arah serayan si leben enggo ngelai. Bage pe serayan si lebih metua arus jadi usihen man serayan si nguda denga.
Sipeempatken, man calon si la terpilih perlu erlajar arah kegeluhen Kaleb, amin pe ia kandu-kandu Josua, duana setia dingen ipujiken selaku si ngikut TUHAN alu bulat ukur (Bil. 32: 12), keterpilihen Josua la erbanca ia kecewa, terbukti i bas naluken taneh Kanaan pagin, Kaleb tetap ikut nampati Josua (Jos.14). Calon pertua diaken si la terpilih ula kecewa, ula sakit hati, ula pe meriah ukur tempa lepas sada tanggung jawab. Si mehulina man si la terpilih e me tetap nggit ngelai Tuhan amin pe la erjabaten, tetap ngelai alu talenta si lit i bas kita. Ngelai janah mendukung siterpilih, labo ngelai guna menyaingi si terpilih. Kita la ngasup memaksa kalak si deban milih kita guna ngelai Tuhan, tapi kita ngasup nentuken pilihenta jine guna ngelai Tuhan amin pe la erjabaten i bas gereja. Jadi Pertua/Diaken e me “otoritas” Tuhan arah pilihen perpulungen. Tapi ngelai la erjabaten, e pilihenta. Sabab alu jabatan gerejawi kita harus melayani, tapi untuk melayani kita tidak harus memiliki jabatan gerejawi. Selamat ngaloken pilihen Tuhan. Selamat melayani alu tutus.
Nuriken Penggejapen pegancih-gancih + irakut Serayan Tuhan
Diskusi
a. Erpalasken teks Pustaka wari enda, kai-kai saja si erbahanca bangsa Israel ngasup ngaloken Josua jadi pemimpinna gancih Musa?
b. Enggo nge ngasup kita ngaloken ulih Pemilihen Pertua Diaken i bas tahun enda selaku pilihen Tuhan? Turiken alasenna si erpalasken Pustaka Si Badia.
Nehken Persembahen
Rende guna persembahen KEE No. 272: 1-2 “Ise Kin Kami Enda O Bapa”
Ise kin kami enda o Bapa, maka kami ngasup mere baNdu
Labo ban gegeh kami o Bapa, lako mere man baNdu
Reff: Kai pe si lit i bas kami O Bapa
E kap pemereNdu man kami
Enda sada bagin Bapa, ipersembahken kami
Ngataken bujur kami man baNdu
Arah persembahen kami enda
Aloken ras ipasu-pasuNdu, Terpujilah gelarNdu
Reff: …
Nggejap b’linna perkuah ateNdu
Makana kami mere man baNdu
Kai pe cukup i bas Kam O Bapa, Kam Raja Surga doni
Reff: …
Pertoton Sapaat:
- Sekalak Saitun notoken pertua ras diaken si enggo terpilih segelah tutus i bas ngelai
- Sekalak Pertua notoken panitia pemilihen pertua/ diaken GBKP i bas kerina kinilatihen pendahinna
- Sekalak Diaken notoken kerina perpulungen ras calon si la terpilih segelah kerina tetap tutus ngelai Tuhan
- Sekalak Moria notoken Persembahan si mada jabu ras si turah i bas perpulungen
Rende KEE 297: 1-2 “Man Bandu Raja Greja”
Man bandu Raja G’reja isehken kami bujur
Kam kap si njayamsa geluh perpulungenNdu
Pasu-pasuNdu Tuhan kuse min bagi udan
Maka serayanNdu idemi KuasaNdu
Latih ia la mbiar, ukurna tetap nggintar
Kek’lengenNdu simpar, b’ritaNdu jadi mbincar
Bahanlah min o Tuhan, erdolat serayanNdu
Ngayu ras tersuan ngikutken pendiloNdu
Ukur, pengarapenna man baNdu saja ngenca
Tutus ras setia, kataNdu la tersia
Lagu langkah mulia, e Kam si pesikapsa
Tutus kal atena mbarken Kata Dibata
Pertoton Tuhan
Momo
C. Jeda ras Penutup
Pdt. Josep Sianturi S.Th, M.Psi, C.NLP
HP/WA: O8236566113