Toto Kalak Sinandai Tuhan
Matius 6: 5 – 8
Hal berdoa
6:5 “Dan apabila kamu berdoa, janganlah berdoa seperti orang munafik. Mereka suka mengucapkan doanya dengan berdiri dalam rumah-rumah ibadat dan pada tikungan-tikungan jalan raya, supaya mereka dilihat orang. Aku berkata kepadamu: Sesungguhnya mereka sudah mendapat upahnya. 6:6 Tetapi jika engkau berdoa, masuklah ke dalam kamarmu, tutuplah pintu dan berdoalah kepada Bapamu yang ada di tempat tersembunyi. Maka Bapamu yang melihat yang tersembunyi akan membalasnya kepadamu. 6:7 Lagipula dalam doamu itu janganlah kamu bertele-tele seperti kebiasaan orang yang tidak mengenal Allah. Mereka menyangka bahwa karena banyaknya kata-kata doanya akan dikabulkan. 6:8 Jadi janganlah kamu seperti mereka, karena Bapamu mengetahui apa yang kamu perlukan, sebelum kamu minta kepada-Nya.
Ogen : Matius 6: 5 – 8
Tema : Toto Kalak Sinandai Tuhan
Tujun : Gelah Saitun:
- Meteh cara ertoto singena ate Dibata.
- Ngasup ndalankensa ras ngajarkensa man anak kempu.
I. BENA KATA
Kita lit i bas suasana Pekan Doa GBKP. Tapi pe, lit ka Pekan Doa Sedunia (PDS) si pemena irayaken, 18-25 Januari 1908 guna persadan umat Kristiani. Lit Week of Prayer for Christian Unity (WPCU) ntah Pekan Doa Sedunia guna kiniersadan gereja, tahun 1966. Kerina enda labo terlepas ras pertoton safaat Tuhan Yesus i bas Yohanes 17:21 “0 Bapa, ertoto Aku man baNdu gelah ersada min ia kerina. Ersadalah min ia ras Kita, bagi Kam ersada ras Aku janah Aku ersada ras Kam. Ersadalah min ia gelah tek doni enda maka Kam me si nuruh Aku’. I bas bahasa latin “Ut Omnes Unum Sint = supaya mereka semua menjadi satu”.
Ertoto eme kontak berhubungen ngerana ras Bapa sini Surga, megiken, ntah muji Dibata alu kata ras ende – enden. Lit erbage – bage penekanen i bas ertoto. Banci saja, pengakun kerna perbahanen ras perukuren si enggo lepak. Banci ka pertoton mindo penampat man Tuhan. Banci pe pertoton pengataken bujur, erkite-kiteken pemasu-masun Tuhan. I bas ertoto bana sisada, bagi ibahan Jesus i bas Matius 14: 23. Banci ka ertoto radu ras kalak sideban i bas kata ras ende – enden, ntah pe lit kalak si mabai pertoton. Kata kunci: perhatian penuh man Dibata.
Kitab Masmur eme kitab ende – enden ras pertoton. Lit pertoton pengataken bujur (Msm.11, 18, 63, 103). Lit puji – pujin man Tuhan (Msm.19, 104, 148), Lit pengakun dosa ras mindo pengalemi dosa (Msm.51). Lit pertoton gelah selamat ras tupung i bas kesusahen (Msm.59, 69). Lit gelah min Tuhan nehi padan-Na (Msm.89). Lit pujl pujin man Tuhan erkiteken undang-undang Tuhan (Msm.119). Lit puji – pujin kerna kai si enggo ibahan Tuhan man bangsaNa (Msm.136). Bagi cikal bakal Pekan Doa GBKP, Pekan Doa Sedunia, Week of Prayer for Christian Unity (WPCU), i ja Jesus pe nggedang ertoto kerna ajar-ajarNa. (oh.17). Paulus pe ngajak perpulungen tutus ertoto ras pindolah rusur man Dibata. (Kol.4: 2, Pil.4: 6).
- Bahan PA Saitun enda, bagin Khotbah di bukit ntah pengajaren Jesus idatas uruk (Matius 5 -7), Khusus Matius 6: 5-8 kerna ciri-ciri pertoton kalak Kristen ras cara ertoto si payo. Dem kiniteken, sederhana, labo pamer, nilahken pengulangen pengulangen si labo lit ertina bagi mesin si otomatis.
II. MPEBAGESI OGEN
- Adi sinen 4 ayat bahan PA-nta:
• Ayat 5, Pertoton si ilakoken kalak Jahudi cenderung pekulah – kulah erkiteken lit maksud terbuni i je. Tempa menaruh perhatian man Tuhan, tapi situhuna gelah ipuji kalak. Biak sibagenda labo sue ras sura – sura Tuhan. Enggo nangko kemulian Tuhan. Jadi labo ngena ate Tuhan.
• Ayat 6, Lit kebiasan kalak Jahudi ertoto i bas jelma sienterem. Sambil tedis ertoto ngangkat tan kudas, mawen erjimpuh, bage pe telungkup ku taneh. Adi ertoto terjeng i idah kalak sideban, maka pertoton e jadi sarana pertunjuken guna mpemuliaken diri saja. Em dalanna, maka Tuhan ngajuk ajar – ajar-Na gelah bengket ku kamar dingen eruk pintun. Ertina i bas ingan si terbuni. Adi si inget i bas KAKR (Kebaktian Anak Kebaktian Remaja) ikataken tutup mata ertina gelah tergejap kal hubungen e ras Tuhan dem ketenengen.
• Ayat 7, Ola mulih – ulih. Ternyata kepe Tuhan labo senang, adi pertoton e mulih – ulih ntah pengulangen si labo lit ertina. Adi pertoton e hanya bagi mesin si otomatis. Adi sibandingken peristiwa i Deleng Karmel i bas 1 Raja – raja 18: 20-40, sanga Nabi Elia ngelawan nabi-nabi Baal. Pertoton nabi Baal mulai erpagi-pagi nari seh pukul 3 karaben. Sedangken Pertoto nabi Elia i bas ayat 36-37 pertoton si singkat, padat, jelas.
• Ayat 8, Jesus ngajari ajar – ajarna ertoto labo bagi pertoton kalak Jahudi si pekulah – kulah ras mulih – ulih janah pertoton e si ikataken kita rusur alu istilah Pertoton Tuhan ntah “Doa Bapa Kami” ayat 9-13.
III. PENGKENAINA
Kita Saitun, si umurta enggo 60 tahun ku das. I bas Pokok Pokok Peraturan Rumah Tangga Saitun GBKP (P2PRT Saitun GBKP) Tahun 2020 – 2025 pasal 1 butir d Saitun adalah Persekutuan Kaum Bapak / Ibu para anggota GBKP yang telah berusia 60 tahun ke atas. Ertina sanga kita ndube erlajar agama ntah katekisasi, iajarken: ertoto, ngoge Pustaka si Badia, pertoton Tuhan ras pengakun kiniteken kalak Kristen, ras sidebanna. Tentuna ngerana kerna ertoto lanai mamang ras enggo semal kal sidalanken. Gia bage, i bas bahan PA sendah ipetangkas mulihi kerna ciri – ciri pertoton kalak Kristen ras cara ertoto si payo. La lit kata terlambat. Gelah sisa geluh Saitun i bas nerusken ertoto tuhu – tuhu min bagi si ngena ate Dibata. Adi kam ertoto, ola bagi kalak si pekulah – kulah. Bagi kalak si main drama idas panggung. Ertina emosi-na luar biasa. I bas ncidahken ermeriah ukur, banci siang kal ayona, janah tawa kal ia. Bage pe i bas ncidahken ceda ate, banci ka ngandung ia kesi – kesi. Adi i bas main drama ia kalak si berhasil. la ipuji kalak penampilenna si luar biasa. Tapi adi i bas ertoto, erkiteken labo bagi situhuna, labo bagi perasanna, maka si ibahanna e pekulah – kulah. Kata – kata si ndarat arah babahna, labo bekas penjemba i bas pusuh si mbages nari. Jadi banci ikataken, kata – kata e kosong. Sedangken pertoton si payo, turah i bas pusuh si mbages, seh njemba ia guna melaskenca. La terjeng je saja, tapi pe i umputi alu sada upaya si dem alu pengorbanen, baik waktu, tenaga, duit, ras geluhna sendiri gelah sitotoken e banci min jadi kinatan.
IV. PERTOTON
O Tuhan Dibata Bapa kami sini Surga. Bujur ikataken kami man baNdu. Erkiteken arah bahan PA Saítun sendah, ipersingetiNdu kami gelah ertoto alu cara si payo. Alemi Kam kami, adi i bas waktu silepas, sengaja ntah la sengaja mawen kami pekulah-kulah i bas ertoto. Mawen i bas ertoto e pe, kami ndarami pujin manusia, seh kami gagal i bas nghamati Kam Tuhan Dibata kami. Mawen labo ate kami gelah ipuji, tapi pe la ka sepenuh hati, ikut-ikuten saja, la terbeban. Pengasup kami o Tuhan, gelah kami pe selaku Saitun banci jadi usihen man anak kempu kami, kuga kin arusna ertoto bagi si ngena ateNdu. Pertoton enda isehken kami arah Tuhan Jesus Kristus si jadi Tuhan ras Juruselamat kami singgeluh. Amin.
V. DISKUSI
- Pertoton si kuga nge si la ngena ate Dibata ras pertoton si kuga ka si ngena ate Dibata? Turiken contoh – contohna.
- Enggo me ndia akapndu pertotonndu e sue ras siarapken Tuhan? Adi langa, kai-kai saja si man pekenan gelah ngena ate Dibata.
VI. USULEN LAGU
- KEE No.25
- KEE No.35
- KEE No.176
- KEE No.270
- KEE No.327
Tuhu meledang si batang mayang
Bulungna mole-ole tempa erlebuh
Pertoton si nandai Dibata mesayang
La pekulah-kulah tapi rehna i bas pusuh
Pdt. Eliezer Pietje Sembiring