Erguna Nampati Kalak Si Deban
Efesus 4: 29 – 32
4:29 Janganlah ada perkataan kotor keluar dari mulutmu, tetapi pakailah perkataan yang baik untuk membangun, di mana perlu, supaya mereka yang mendengarnya, beroleh kasih karunia. 4:30 Dan janganlah kamu mendukakan Roh Kudus Allah, yang telah memeteraikan kamu menjelang hari penyelamatan. 4:31 Segala kepahitan, kegeraman, kemarahan, pertikaian dan fitnah hendaklah dibuang dari antara kamu, demikian pula segala kejahatan. 4:32 Tetapi hendaklah kamu ramah seorang terhadap yang lain, penuh kasih mesra dan saling mengampuni, sebagaimana Allah di dalam Kristus telah mengampuni kamu.
Ogen : Epesus 4:29-32
Tema : Erguna Nampati Kalak Si Deban
Tujun : Gelah Mamre:
1) Meteh maka nampati kalak sideban e me biak-biak geluh simbaru.
2) Nggit nampati kalak sideban guna jadi kesaksin geluhna.
- KATA PENARUH
Sasaren pelayanen GBKP tahun 2024 enda eme “BERKARYA DAN BERGUNA UNTUK ORANG LAIN” arah sasaren enda, ilumbaken segelah teptep anggota GBKP encidahken biak-biak Si erguna, nggit nampati kalak si deban. Erguna nampati kalak sideban labo terjeng man anggota GBKP saja, tapi pe man kerina kalak. Bahan PA Minggu enda mpersingeti anggota Mamre segelah ncidahken biak-biak, orat geluh si ersaksi subuk arah perukuren, pengerana ras perbahanen e me erguna nampati kalak si deban. Enda me sinikataken Mamre si muat bagin i bas marturia, naksiken orat geluh selaku kalak si enggo tek man Dibata ras ncidahken orat geluh si mbaru. - URAIAN TEKS
Surat man perpulungen Epesus enda rehna i bas rasul Paulus nari (Ep. 1: 1). Rasul Paulus nehken suratna tupung ia i bas penjara erkiteken Berita Si Meriah. Kecibal anak kuta Epesus paksa si e, enterem denga si nembah kempak dewi Artemis (dewi kesuburan), e me dewi kalak Yunani. Tujun rasul Pauhus nehken surana man perpulungen Epesus e me segelah perpulungen njadiken Jesus Kristus jadi takal ni perpulungen ras segelah teridah min orat gelah teptep anggota perpulungen selaku kalak si enggo ipelimbarul Dibata. Orat geluh perpulungen teridah min selaku kalak si enggo ngaloken kegeluhen si mbaru i bas Kristus.
Alu tangkas ituriken rasul Paulus maka petembil kel orat geluh kalak si nggeluhken geluhna i bas kegeluhen si mbaru ras kegeluhen si male (Ep. 4:17-32)
Kegeluhen si male:
La nandai Dibata, si la erguna perukurenna, dingen gelap pengertinna. La lit baginna i bas kegeluhen si ibereken Dibata, sabap lanai kal lang-lang ia bodohna, dingen mersik ukurna. Lanai sitik pe ia meteh mela; ipelepasna dirina italuken sura-surana si jahat, janah ilakokenna kerina si la mehuli alu la alang-alangen.
Kegeluhen si mbaru:
Nggeluh i bas Kristus, ndalanken si mehuli bagi silakoken Jesus Kristus, nangtangi manusia si male, Pusuh peratenna ras perukurenna kerina enggo ipelimbarui. Makeken manusia si mbaru si itepa rikutken tempas Dibata, dingen ncidahken bana i bas kegeluhen si tuhu-tuhu adil dingen badia. Lanai erbual, nuriken si tuhu-tuhu man seninana, sabap kerinana ringring i bas sada kula. Adi merawa, la seh erdosa. Janah la nimpan rawana seh ben wari. La nggit mere kesempaten man si iblis. Lanai nggit nangko, erdahin alu mehuli guna ncariken keperlunna, ras gelah lit guna nampati kalak si i bas kepiceten. Ngerana alu melasken cakap si erturi-turin ras kata-kata si erguna, si banci nampati kalak si deban rikutken perluna, gelah kata-katana e maba kiniulin man si megisa. La nggit ncedaken ate Kesah Dibata, nadingken biak cian ate ras perampus bage pe pernembeh. Lanai nggit si isak-isaken ntah si cekurak-cekuraken. Lanai sitik pe erelem-elem. Tapi melias dingen mesayang sapih-sapih ia. Nggit si alem-alemen bagi Dibata nggo ngalemi salahna i bas Kristus.
Sura-sura Rasul Paulus segelah anggota perpulungen nggeluhken geluhna selaku anak-anak Dibata, si enggo itebus Jesus Kristus alu mereken kesahNa. Ertina, Dibata enggo nampati manusia, alu bage maka perpulungen ncidahken arah perbahanenna segelah nehken penampat man kalak si deban. Nampati kalak si deban labo arah nehken penampat (materi) saja, tapi pe arah pengerana, perbahanen (la percian, la perampus ras perembeh). la nggit si isak-isaken, si cikurak-cikuraken ras la nggit relem-elem. Kerina enda banci idalanken eme erkiteken penampat Kesah Si Badia ras nginget maka Dibata enggo ngalemi kerina salah lepak manusia, si nggo nebusi dosa kalak si tek. Alu palas enda me maka perpulungen Epesus iarapken encidahken orat geluh selaku anak-anak Dibata. - PENGKENAINA
Arah PA Mamre sekali enda, kita ipersingeti kerna orat geluh kalak erkiniteken, eme teridah arah orat geluh si mbaru. Teptep kalak si enggo tek man Dibata, icidahkenna kesaksin geluhna arah pengerana ras perbahanen.
Nina I bas tema Erguna Nampati Kalak Sideban. Salah sada erguna nampati kalak si deban eme arah pengerana. Ersaksi arah pengerana, teptep ranan si ibelasken eme ranan si erguna, ranan si nampati ras tama kiniulin man simegisa. Kalak si erkiniteken teridah arah pengeranana eme nehken Berita Si Meriah. Teptep ranan siibelaskenna erpalasken Kata Dibata, ngapuli man kalak Si erceda ate, nambahi pemeteh man kalak si lenga erpengangka, mpeturah semangat man kalak si kote ras mereken serpang pulah man kalak si bene pengarapenna. Enda me sinimaksudken ranan si erguna. Alu bage kita enggo nampati kalak si deban. Petembil kal ras kalak si melasken cakap si la erturi-turin. Biak-biakna eme percian, perampus ras pernembeh. Belas-belasna pe nggit ngisak-ngisak, cekurak ras erelem-elem. Alu bage maka kai-kai saja pe siiukurkenna, ibelaskenna ras ilakokenna e me meneken ras nambahi ate kalak ceda.
Maka ngasup kita ngelakoken si erguna, nampati kalak si deban eme alu pengajari Kesah Si Badia. Jadi ola kal ukurken, belasken ras lakoken Si erbahanca ceda ate Kesah Si Badia. Ngelakoken si ncedaken Kesah Si Badia eme perbahanen si erpalasken sura-sura manusia. “Sura-sura ukur manusia erlawanen ras sura-sura Kesah Si Badia, janah Kesah Si Badia erlawanen ras sura-sura ukur manusia. Si dua enda ermusuhen, janah si enda ertina maka la banci idalankenndu peratenndu. Perbahanen-perbahanen si erpalasken sura-sura ukur manusia tangkas kap. Si enda teridah i bas: erlua-lua, si nggesuh, la meteh mela; nembah man berhala ras erbahan ilmu sihir; simusuhen, rubati, mecimbern, perampus dingen kepentingenna saja ngenca iukurina. Erbahan perpecahen dingen erpihak-pihak. Sician-cianen, mabuk, pesta minem-minem seh mabuk ras si debanna. Enda me si ncedaken ukur Kesah Si badia. Tapi ulih Kesah Si Badia eme: lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia. Meteruk ukurna dingen ngasup engkuasai diri. Erkiteken Kesah Si Badia me si mereken kegeluhen man banta, emaka lagu langkahta pe arus rikutken peraten Kesah e. La banci meganjang ukurta, ntah sitokoh-tokohen, ntah pe sician-cianen (Gal. 5:16-26).
Rasul Paulus alu tangkas nehken kai-kai dage siarus ilakoken “Tadingken cian ate, perampus ras pernembeh. Ulanai kam si isak-isaken ntah si cekurak-cekuraken. Ulanai sitik pe erelem-elem. Tapi melias dingen mesayanglah sapih-sapih kam. Si alem-alemenlah bagi Dibata nggo ngalemi kam i bas Kristus.” Enda me orat geluh kalak si erkiniteken, ngelakoken si erguna i bas perukuren, pengerana ras perbahanen. Marilah kita nampati, gelah reh tangkasna kesaksinta selaku kalak si tek. - DISKUSI
1) Turiken kai kin maksudna cakap si la erturi-turin, ras kai ka maksudna ranan si erguna lah belasken?
2) Turiken i bas kai-kai saja Mamre banci muat bagin guna nampati kalak si deban? - USULEN ENDE-ENDEN
1) KEE GBKP NO. 322: 1, 2
2) KEE GBKP NO. 298: 1, 2
3) KEE GBKP NO. 257: 1, 6
4) KEE GBKP NO. 281: 1-3
5) KEE GBKP NO. 256:1-3
Pdt. DR. Kalvinsius Jawak, M.Si.
HP/WA: 0813 6141 9249