Lagu Langkah Pengikut Kristus lbot
1 Petrus 3: 13 – 18
Menderita dengan sabar
3:13 Dan siapakah yang akan berbuat jahat terhadap kamu, jika kamu rajin berbuat baik? 3:14 Tetapi sekalipun kamu harus menderita juga karena kebenaran, kamu akan berbahagia. Sebab itu janganlah kamu takuti apa yang mereka takuti dan janganlah gentar. 3:15 Tetapi kuduskanlah Kristus di dalam hatimu sebagai Tuhan! Dan siap sedialah pada segala waktu untuk memberi pertanggungan jawab kepada tiap-tiap orang yang meminta pertanggungan jawab dari kamu tentang pengharapan yang ada padamu, tetapi haruslah dengan lemah lembut dan hormat, 3:16 dan dengan hati nurani yang murni, supaya mereka, yang memfitnah kamu karena hidupmu yang saleh dalam Kristus, menjadi malu karena fitnahan mereka itu. 3:17 Sebab lebih baik menderita karena berbuat baik, jika hal itu dikehendaki Allah, dari pada menderita karena berbuat jahat. 3:18 Sebab juga Kristus telah mati sekali untuk segala dosa kita, Ia yang benar untuk orang-orang yang tidak benar, supaya Ia membawa kita kepada Allah; Ia, yang telah dibunuh dalam keadaan-Nya sebagai manusia, tetapi yang telah dibangkitkan menurut Roh,
Karya Konkrit Saitun (Kesaksian)
Ogen : 1 Petrus 3:13-18
Tema : Lagu Langkah Pengikut Kristus lbot
Tujun : Gelah Saitun:
- Ndalanken lagu langkah selaku pengikut Kristus i bas ersaksi
- Ngidah maka kiniseran e pe banci jadi Sada kesaksin
- Niksiki kawiten teks ras tema
Metode : Diskusi
I. BENA KATA
Lit 3 dahin si penting ras utama kalak Kristen, e me ersada, ersaksi ras ngelai. Bahan PA-NTA Minggu enda ngerana kerna ersaksi. Kerna ersaksi, lit ka maun peungkunen uga kin cara ersaksi, adi Kristus e pe Kristus labo iidah. Penungkunen enda banci jadi tempa-tempa payo. Payo memang la iidah Jesus, tapi ulih perbahanen Jesus e sigejapken seh genduari i bas kegeluhenta. PerbahanenNa guna nelamatken manusia arah kiniseran i kayu persilang e me sierbahanca kita kerina tenang sebab lit penebusta. KiniseranNa e me sierbahanca kita ndalanken kegeluhen bagi ateNa ngena. Emaka bas PA-nta wari enda terdauhen ateta ngerana kerna uga kin lagu langkah pengikut Kristus sebagai caranta ersaksi.
II. MPEBAGESI OGEN
Kitab 1 Petrus 1 suratken Petrus man perpulungen si lit i daerah Asia Kitik (Turki) si ngenanami kiniseran erkiteken erkinitekenna man Dibata. Bagin PA-nta wari enda eme pengajaren praktis Petrus kerna uga kin nggeluh selaku kalak Kristen itengah-tengah kalak si nembeh atena man kalak Kristen.
Bahan PA-nta ibenai alu ngataken ise kin nuhsahi kam i bas ndalanken simehuli (ay. 13). Banci saja sedekah enda kalak Kristen nggo kisat erbahan simehuli. Bahkan mungkin membatasi perjumpan ras kalak si la ngena atena kalak Kristen. Rikutken pengertin Rasul Petrus perbahanen sibagenda salah sebab labo lit kalak merawa adi mehuli iban man bana.
Nina Rasul Petrus ulih perbahanen si mehuli labo i bas nggitna kalak si jahat ndai ngalo-ngalo perbahanenta tapi ulihna eme man banta (ay. 14), Ulih erban si mehuli eme kap ndatken kemalemen ate. Kata malem ate i bas bahasa Yunani makarios sibanci iertiken pe ipasu-pasu, runtung, cukup. Ertina kalak si erban si mehuli ipasu-pasu Dibata me ia, runtung ras cukup kegeluhenna.
Ay. 15 nuriken kerna Kristus, IA me si jadi palas dingen ulu kesaksinta. Selaku kalak Kristen arus meteh alu tangkas ise kin Jesus e bas kegeluhenna. Arah pengangkan e maka ngasup nuriken kerna IA. Salah sada bentuk kesaksin eme ngasup nuriken kerna pengarapen man Kristus. Pengarapen i bas Kristus tentu erkawiten ras keselamaten siipadankenna man si tek. Kalak Kristen arus ngasup nerangken si enda. Cara naksiken Kristus eme kap lemah lembut dingen mehamat. Megati adi jumpa kita bas diskusi ras kalak si berbeda ras kita mis naik tensita, turah rawata. Kedungenna kai ateta si peseh la iangkana bahkan banci jadi turah perubaten. Terdauhen pusuh pe bersih, la lit ukur si jahat tapi ukur si ersura-sura mereken kiniulin man bana. I bas kiniulin e me situhuna teridah kwalitas kalak si erkiniteken man Kristus. Emaka bicara lit pe kiniseran bas ersaksi kerna Dibata lanai e erbanca latih sabab banci jadi e kin sura-sura Dibata (ay. 17). Labo terjeng gelah susah tapi terdauhen gelah teridah (isaksiken) maka lit bedana kalak si erkiniteken ras lang. I bas sie sijadi usihen e me kap Kristus si ngasamken kesahNa, tapi teridah ulihna, melala kal kalak si tek dingen selamat (ay. 18).
III. PENGKENAINA
Saitun bas umurna si gedang tentu nggo melala kal naksiken kerna Dibata. Nggo melala perbahanen Dibata si mehuli si erbanca malem ateta si banci isaksiken man kalak si deban. Rikutken bahan PA-nta lit piga-piga hal si banci silakoken i bas erksaksi:
- Ersaksi tentu melala kal tantangenna apaika adi inganta ersaksi e la ngaloken kita. Tapi kalak si ersaksi tetap setia dingen la ermedu-medu ersaksi. Sebab adi lalap si mehuli silakoken dungna rulih nge perbahanenta e. Labo lit kalak si la meriah ukurna adi isehken simehuli man bana.
- Kristus mejadi kesaksinta. Cara Kristus nggeluh, carana ngalaken kalak si deban ras pe tujunna ersaksi salah sada, eme IA Jadi usihenta. Kristus lalap mehuli ukurna amin gia lit kalak si lalap ngukurken si la mehuli man bana. Jesus tetap setia ersaksi sebab bage kin tanggung jababna man BapaNa. Bage me pe Saitun, arus lalap ncidahken Kristus e nggeluh bas dirina. Ersaksi alu la ermedu medu
- Caranta ersaksi eme dem kehamaten ras lemah lembut. Mehamat ertina ngergaken teman. Biacar la pe kita seri, ula kal si pekitik ia, tetap mehamat. Bicara la pe ialo-alona kita alu meriah ukur tetap mehamat kita sabab kehamaten e man banta nge. Bage pe lemah lembut ertina la kita jadi kalak si mesunah merawa. Ula kari dung Gereja e pe, adi lit kenca la bagi ukurta mis ka merawa. Metengetlah i bas kerina perukuren, pengerana ras perbahanenta, bahanlah lagu langkahta siincidahken Pengikut Kristus (tema).
IV. PERTOTON
Tuhan Dibata simada kegeluhen kami, babai kami gelah tetap ngasup ersaksi arah pengerana, perukuren ras perbahanen kami dem alu kemalemen ate, aminna gia arus kami ngenanami kiniserann. Pengarapen kami ipasu-pasuNdulah kesaksin kami gelah reh teremna kalak si tek man baNdu. I bas Jesus Kristus kami ertoto ku Kam. Amin
V. DISKUSI
- Oge ulihi ayat 13-14, kai nge ertina kemalemen ate I bas ersaksi?
- Adi nggo Saitun, uga ngge cara ersaksi si tepat subuk bas Gereja, keluarga ras masyarakat? Banci ikawitken ras mehamat dingen lemah lembut. Turikenlah
VI. USULEN LAGU
- KEE No. 319: 1,4
- KEE No 68: 1-2
- KEE No 304: 1, 4
- KEE No. 322: 1-3
Pdt. Jefri Alexander Keliat M.fil