Nggeluh Jadi Pasu Pasu Man Kalak Sideban
Matius 5: 13 – 16
Garam dunia dan terang dunia
5:13 “Kamu adalah garam dunia. Jika garam itu menjadi tawar, dengan apakah ia diasinkan? Tidak ada lagi gunanya selain dibuang dan diinjak orang.
5:14 Kamu adalah terang dunia. Kota yang terletak di atas gunung tidak mungkin tersembunyi.
5:15 Lagipula orang tidak menyalakan pelita lalu meletakkannya di bawah gantang, melainkan di atas kaki dian sehingga menerangi semua orang di dalam rumah itu.
5:16 Demikianlah hendaknya terangmu bercahaya di depan orang, supaya mereka melihat perbuatanmu yang baik dan memuliakan Bapamu yang di sorga.”
Ogen: Matius 5:13-16
Tema: Nggeluh Jadi Pasu Pasu Man Kalak Sideban
Tujun: Gelah Mamre:
1) Ngangkai erti sira ras terang rikutken teks
2) Meteh maka kalak si tek arus erguna man kalak si enterem
- KATA PENARUH
Kai kin gunana gereja? Termasuk Mamre si merupaken bagin I bas gerejanta GBKP, kai nge gunana keberadanna? Apakah gereja (bagepe Mamre) lit guna dirina jine? Sepakat kita jababenna: Lang! Sue ras tema PAnta, gereja (termasuk Mamre bagin I bas GBKP) lit dingen nggeluh guna jadi pasu-pasu man kalak sideban, man doni enda. Visi gerejanta GBKP pe jelas isina eme “GBKP aron Dibata maba pasu-pasu man isi doni enda” (“GBKP menjadi kawan sekerja Allah untuk menyatakan rahmat Allah kepada dunia” erpalasken 1 Kor. 3: 9 ras 1 Pet. 2: 9-10).
Janah kidekah enda, gerejanta termasuk kategorial Mamre, enggom jadi pasu-pasu man kalak sideban arah program-programna. Tema PA nta enda bagepe Visi GBKP sendalanen kal ras Sasaren Pelayanen gerejanta tahun 2024 (sue ras Garis Besar Pelayanen (GBP) GBKP}, eme “Berkarya dan berguna untuk orang lain”. E maka, erpalasken kata Dibata si jadi bahan PA Mamre nta sekali enda, mari tole kita erlajar gelah geluhta selaku Mamre GBKP reh ergunana/reh ngasupna jadi pasu-pasu man kalak si deban. - URAIAN TEKS
Bahan ogenta Matius 5:13-16 enda merupaken bagin I bas pengajaren Jesus i das uruk (Khotbah di Bukit) si lit I bas Matius 5:3-7:27. Tupung Jesus ngajar e, Jesus mereken julukan ‘sira’ ras ‘terang’ nandangi jelma si nterem si ngikut-ngikut la bagepe ajar-ajarNa. Kai kin nge si ate Jesus itekankenNa alu julukan e? Eme kerna kegunan, manfaat, ntah pe faedahna nandangi kalak sideban. Ertina, keberadan pengikut Jesus (gereja) erguna nandangi kalak sideban. Nina Jesus, “Bagi sira si seh kal perluna nandangi pangan, bagepe kam nandangi kerina manusia” (ay.13a). Bagepe ikataken Jesus, “Bagi terang si seh kal perluna I bas gelap, bagepe kam nandangi doni enda” (ay.14a). Sisedarilah bahwa meherga (berharga/bernilai) geluhta selaku pengikut Kristus. Erga ntah pe nilai siimaksudken e me mereken pengaruh si mehuli, berkontribusi positif kita nandangi teman. Janah sebalikna tentu, alu julukan sira siibereken Jesus man pengikut-pengikutNa (termasuk kita Mamre GBKP), adi lanai masin sira e berarti lanai lit gunana geluhta e. Nina Jesus, “Tapi adi sira e lanai masin, lanai banci ibahan masin mulihi. Sira e lanai erguna, emaka iambekken jenari idedehi kalak” (ay.13b). Bali ras terang (pelita) labo isagani kalak jenari itutupina alu tumba, melainken itamakenna ku datas nahe pertendangen, gelah terang iakap kalak kerina si lit i bas rumah e” (ay.15 → Alkitab Bahasa Indonesia Terjemahan Baru Versi 2: “Lagi pula orang tidak menyalakan pelita lalu meletakkannya di bawah tempayan, melainkan di atas kaki pelita sehingga memberi terang kepada semua orang di dalam rumah itu”).
Julukan ‘sira’ siikenaken Jesus man pengikut-pengikutNa, tentu lit alasenna. Menurut William Barclay, minimal lit 3 (telu) hal si iangkatken jadi alasen:
Pemena, sira e murni. Kalak Romawi menganggap bahwa sira e eme benda si paling murni erkiteken sira terbentuk arah 2 (dua) benda si murni eme matawari ras lawit. Emaka, bageme geluhta selaku pengikut Kristus arus jadi contoh I bas kemurnian. Adi doni bas doni enda siidah standar kejujuran, pengabdian bagepe kerajinan reh merosotna, kita pengikut Kristus ula ikut merosot. Sipeduaken, sira ipake guna mencegah pembusuken. Bage me pe pengikut Kristus arus ncibalken geluhna lako mencegah pembusuken si lit i tengah-tengah moralitas bagepe mentalitas manusia si -sadar ntah lang- ncidahken proses pembusuken erkiteken lanai nari mbiar man Dibata dingen lanai ngergaken teman manusia sada ras sidebanna. Sipeteluken, tentuna sira mereken nanam. Ertina, selaku pengikut Kristus arusna geluhta mereken nanam si metebu melam, mereken semangat dingen erbanca meriah ukur kalak sideban, Jadi. julukan ‘sira’ ras ‘terang’ siisehken Jesus e ngataken bahwa sipentingna man Jesus la terjeng gelarta sebage kalak Kristen ntah pe sebage Mamre GBKP melainken apakah kita Mamre GBKP (kalak Kristen) si erguna, si bermanfaat, si jadi pasu-pasu man kalak sideban.
Sehubungen ras geluh si jadi pasu-pasu man kalak sideban, tentu perlu lit daya tarik (keistimewaan) I bas kita si mbedaken kita asangken sideban. Lit nilai plus I bas kita. Kalau gereja (termasuk Mamre GBKP) tidak mempunyai keistimewaan apa-apa lagi, sama saja dengan dunia ini, bahkan mungkin lebih buruk, untuk apa menjadi pengikut Kristus? Kalau dunia dilanda korupsi, gereja pun ikut-ikut korupsi. Kalak dunia gontok-gontokan, gereja pun gontok-gontokan. Adi seri saja nge cara nggeluh Mamre ras doni enda, tentu labo kita ngasup jadi pasu-pasu man sekelewetta. - PENGKENAINA
Julukan ntah pe gelar siibereken Tuhan Jesus man banta si tek baNa, eme ‘sira’ ras ‘terang’ labo mabai kita jadi kalak si meganjang ukur. Labo teraku-aku ntah pe merasa sebagai orang sok penting kita, tapi sura-sura Tuhan nge maka penting akap kalak sideban keberadanta. Adi la kita je, kurang ntah pe la sikap akap kalak. Terdaram-daram kalak sideban kune kenca la kita je. Labo sebalikna, dosa je kalak Kristen, mungkin termasuk Mamre, piah segat ntah pe nembeh ate kalak erkiteken nampati pe lang tapi nampeti nggit, umpamana. Adi la ka gia kita ngasup mpekena-kena kegeluhen I sekelewetta gelah terulin, nambah cedana lah gia kita ula.
Emaka, sitandailah potensi ntah pe talenta si lit I bas kita. Pakeken alu maksimal la terjeng man diri/jabu/gerejanta, tapi guna kiniulin kalak sideban si lit i sekelewetta pe. Adi bage nggo jadi pasu-pasu geluhta man kalak sideban erkiteken erguna igejapkenna keberadaanta. I bas si enda, pasu-pasu labo terjeng ntahpe terutama Si Ertiken bas hal sisipatna materil, masuk duit/sen, melainken melala hal/dampar bas geluhta sibanci erguna man kalak sideban. Sebage contoh eme ide-ide pemikiren ntahpe saran si banci ipeseh man kalak sideban si mungkin paksana butuh kal ia sumbangen pemikiren/ide-ide ntah pe gagasen mbaru. Contoh sideban, mungkin kerna waktu, pusuh ras ukur si isikapken kita man teman guna ndengkehken ia nuri-nuri kerna perbebenna, anem la gia kal banci mis sibere solusi man bana. Deba lit ka arah gegeh (tenaga) sibanci iberekenna lako nampati kalak sideban ndungi dahinna. Termasuk arah pengerana (kata-kata/ belas-belas) ntah pe pengajaren/ nasehat simereken pengertin ras kepentaren; kata-kata simpepalem pusuh sigetem/ siceda; pengerana si mpetetap ukur teman; belas-belas simembangkitken semangat ras mpeteguhi pengarapen, rsd. Terdauhen, tentu kita jadi pasu-pasu mungkin banci ka teridah arah usaha si lit bas pasu-pasu kita si mereken kesempaten erdahin (mbuka lowongan kerja) atau mereken informasi man kalak simembutuhken pendahin. Melala denga kal si banci sicibalken geluhta seh maka erguna man kalak sideban. Janah penting I bas si e maka penampat ntah kai pe siipeseh/siibereken kita man kalak sideban e tepatlah min sasarenna. Ertina, memang Si eteh kondisi si man sampaten kita e. Emaka, perlu sipelajari situasina, kai pergumulen ras kebutuhenna maka ula sempat salah sasaren. Atau ula ka min penampatta e ‘kena la seh nanamna’, nina kin kuan-kuanta kalak Karo.
Erpalasken tema PA nta “Nggeluh jadi pasu-pasu man kalak sideban” siantusi me Sasaren Pelayanen GBKP Tahun 2024 enda (Berkarya dan berguna untuk orang lain”) tujunna gelah kita Mamre GBKP (radu kerina anggota GBKP) proaktif ras responsif nandangi pergumulan warga GBKP bagepe masyarakat guna ndatken serpang pulah alu pemberdayan kerina potensi si lit I bas dirinta, janah pe alu kerjasama ras denominasi bagepe kelompok-kelompok si lit i tengah-tengah masyarakat. - DISKUSI:
1) Kai nge pengangkanta kerna perkatan Jesus, “Tapi adi sira e lanai masin, lanai banci ibahan masin mulihi. Sira e lanai erguna, emaka iambekken jenari idedehi kalak” (ay.13b) bagepe “Labo isagani kalak lampu kenca bage itutupina alu tumba” (ay.15a)?
2) Kai nge aksi nyata si terdalanken gelah reh teremna Mamre pulung er PA bagepe tandana anggota Mamre erguna nandangi sekelewetna? Dalanken aksi nta e alu berkelanjuten! - USULEN ENDE-ENDEN:
- KEE GBKP No. 319: 1,4
- KEE GBKP No. 209: 1,4,5
- KEE GBKP No. 381: 1-3
- KEE GBKP No. 171: 1,3
- KEE GBKP No. 343: 1, 3
Pdt. Theodosius Keliat, M.Th.
HP/WA: 0812 6244 0044