Pendilo Dingen Pemilihen Dibata
2 Petrus 1: 3 – 10
Panggilan dan pilihan Allah
1:3 Karena kuasa ilahi-Nya telah menganugerahkan kepada kita segala sesuatu yang berguna untuk hidup yang saleh oleh pengenalan kita akan Dia, yang telah memanggil kita oleh kuasa-Nya yang mulia dan ajaib. 1:4 Dengan jalan itu Ia telah menganugerahkan kepada kita janji-janji yang berharga dan yang sangat besar, supaya olehnya kamu boleh mengambil bagian dalam kodrat ilahi, dan luput dari hawa nafsu duniawi yang membinasakan dunia. 1:5 Justru karena itu kamu harus dengan sungguh-sungguh berusaha untuk menambahkan kepada imanmu kebajikan, dan kepada kebajikan pengetahuan, 1:6 dan kepada pengetahuan penguasaan diri, kepada penguasaan diri ketekunan, dan kepada ketekunan kesalehan, 1:7 dan kepada kesalehan kasih akan saudara-saudara, dan kepada kasih akan saudara-saudara kasih akan semua orang. 1:8 Sebab apabila semuanya itu ada padamu dengan berlimpah-limpah, kamu akan dibuatnya menjadi giat dan berhasil dalam pengenalanmu akan Yesus Kristus, Tuhan kita. 1:9 Tetapi barangsiapa tidak memiliki semuanya itu, ia menjadi buta dan picik, karena ia lupa, bahwa dosa-dosanya yang dahulu telah dihapuskan. 1:10 Karena itu, saudara-saudaraku, berusahalah sungguh-sungguh, supaya panggilan dan pilihanmu makin teguh. Sebab jikalau kamu melakukannya, kamu tidak akan pernah tersandung.
Tujun : Gelah Mamre:
1) Nggeluh i bas pendilo ras pemilihen Dibata
2) Ikut i bas pemilihen Pertua Diaken i bas Sektor
KATA PENARUH
Pemilihen Pertua Diaken sada dahin si ilakoken bas gerejanta ngelitken serayan Dibata. Sue ras periodesasi jabaten Pertua ras Diaken GBKP erpalasken Tata gereja GBKP 2015-2025, maka ilakoken ka me pemilihen Pertua ras Diaken GBKP Periode 2024-2029. Pengelayasi kerna pemilihen Pertua ras Diaken isehken ku perpulungen. Pemilihen calon Pertua ras calon Diaken i perpulungen jabu-jabu /sektor ilakoken i bas bulan April 2024. Kerina ngawan perpulungen ersikap guna terlaksanana dahin enda, Mamre pe ikut muat bagin ndahikenca. Arah PA Mamre wari enda radu ras kita niksiki kata Dibata kerna pendilo dingen pemilihen Dibata.
URAIAN TEKS
Surat Petrus si peduaken i bas Simon Petrus suruh-suruhen dingen rasul Jesus Kristus. Isehken man senina-senina si enggo ndat kengasupen gelah tek man Jesus Kristus. Surat enda risiken pengajuk man kalak Kristen segelah ncikep pemeteh situhu-tuhu kerna Kristus guna ngelawan pendahin guru-guru perguak ras lagu langkah si la mehuli erkiteken pengajaren si papak.
Pemeteh kerna Dibata ndilo manusia (Ayat 3-4)
Dibata ndilo kita gelah kita dat bagin i bas kemulian ras kiniulinNa. IberekenNa keperlun guna nggeluh nembah man baNa. IberekenNa kengasupen mulahi diri arah kerincuhen daging nari si ncedaken doni enda. Kalak si enggo idilo Dibata kinitekenna ncidahken perbahanen si ngena ate Dibata, ncidahken biak-biak nggeluh i bas pendilo Dibata.
Biak- biak nggeluhi bas pendilo Dibata (Ayat 5-8)
• Rakutken ku kiniteken kai si mehuli
• Rakutken perbahanen si mehuli pemeteh kerna Dibata
• Rakutken pemeteh kerna Dibata ku penguasan diri
• Rakutken ka ku megenggeng
• Rakutken ka ku ate tutus erDibata
• Rakutken ka ku je keleng ate man teman sapih-sapih Kristen jenari ku kerina manusia
Kata “rakutken” i bas terjemahan Alkitab bahasa Indonesia “menambahkan”. Banci i ertiken tambahken perjuangen, kininggiten ndalanken biak-biak si mehuli, dungna jadi kesemalen (gaya hidup). Biak-biak nggeluh i bas pendilo Dibata idalanken e maka menang ras erbuah kiniteken ilebe-lebe Dibata. Ertambah-tambahna terus turah kiniteken si erbuahken perbahanen si mehuli. I lakoken alu tutus i bas kegeluhen.
Rikutken biak-biak nggeluh i bas pendilo Dibata sendalanen ka adi ikawitken ku syarat-syarat jadi calon Pertua ras Diaken: la arus saber, terkuasaina dirina janah ratur kegeluhenna. la arus kalak si lemah lembut dingen ngena atena kedamen. la arus sekalak si tutus ras bujur, janah terteki i bas kai pe. Arus tehna ngepkep jabuna alu mehuli seh maka se isi jabuna pe mehamat man bana. Adi la ia ngasup ngepkep jabuna labo ia ngasup ngepkep perpulungen Dibata. Anak-anakna, perbulangen/ndehara tutus ku gereja ras ku perpulungen. Mehuli lagu langkahna itengah-tengah masyarakat gelah ola mecekurak ukur kalak kerna ia. la arus pertemue, meriah ukurna ngalo-ngalo kalak kesilang ku rumahna. Ia la banci perampang, pemabuk (peminum-minum), merangap, mata duiten tah perjudi, pengusaha prostitusi, pengedar/konsumen narkoba, rentenir. Nggit ersada arih ras temanna sapih pelayan/serayan guna ngaturken dahin perpulungen Tuhan (1 Tim.3:1-13)
Adi la lit biak-biak nggeluh bas pendilo Dibata i bas kita (Ayat 9-10)
• Pentang mata perukurenna
• La ia ngasup ngidahsa maka dosa-dosa si enggo lepas enggo ibersihken
Kalak si la lit biak-biak nggeluh i bas pendilo Dibata ikataken maka pentang mata perukuren (bhs. Indonesia: buta dan picik). “Buta dan picik” ertina Ia nggejapken ras la sadar kerna dosa enggo ialemi. Adi dosa enggo ialemi biak-biak si la mehuli ras si jahat itadingken, lanai i lakoken. Alu bage mata perukuren bersih ku pendilo Dibata. paguh kiniteken, geluh rikutken si ngena ate Dibata, la jadi batu antuken.
PENGKENAINA
Pendilo ras pemilihen Dibata man banta erkiteken perkuah ateNa si erbahanca kita terkelin. Enggo iselamatken Dibata kita e maka si dahiken keselamaten e arah ndalanken perentahNa. Keselamaten e si aloi alu tek man baNa. Ibenai i bas dirinta jine si tuduhken “jati diri”nta selaku kalak si erkiniteken man Kristus. Silumbaken terus (berusaha dengan sungguh-sungguh) ndalanken biak-biak si mehuli. E maka i bas pelaksanan pemilihen Pertua ras Diaken, Mamre GBKP ikut bas pendilo dingen pilihen Dibata. Mamre “Siap di pilih ras ikut memilih” Pertua ras Diaken Peride 2024-2029 menaken i sektor nari seh ku runggun. Si ayuken pendilo ras pilihen Dibata di kune kita si jadi calon Pertua ntah Diaken, ula tulak persuruhen Dibata. Kune kita la terpilih tetap meteruk ukur ngasup ngkuasai diri segelah la ka “mundur” ndahiken dahinNa. Mamre tetap ngelakoken biak-biak si mehuli.
DISKUSI
1) Rikutken bahan PA nta enda, biak-biak kai saja nggeluh i bas pendilo dingen pemilihen Dibata?
2) I bas pelaksanan pemilihen Pertua ras Diaken, kai si ilakoken mamre guna ikut bas pendilo dingen pemilihen Dibata?
USULEN ENDE-ENDEN
1) KEE GBKP No. 368: 1-2
2) KEE GBKP No. 68: 1-2
3) KEE GBKP No. 102: 1-2
4) KEE GBKP No. 272:1- (Persembahen)
5) KEE GBKP No 330: 1-2
Pdt. Karvintaria Br. Ginting, S.Th., MM.
HP/WA: 0812 635 964