Diberu Si Melias
(HUT MORIA si pe – 66ken)
Amsal/Kuan-Kuanen 11: 16
11:16 Perempuan yang baik hati beroleh hormat; sedangkan seorang penindas beroleh kekayaan.
11:16 Diberu si melias ihamati kap, kalak si merangap kebayaken saja ipepulungna.
Ogen : Kuan-Kuanen 11:16
Tema : Diberu Si Melias
Tujun : Gelah Saitun:
- Meteh tanda-tanda diberu si melias eme diberu si pentar.
- Njemba Moria guna jadi diberu si melias
- Notoken Moria GBKP reh ngasupna jadi pasu-pasu.
Metode PA : Diskusi
I. BENA KATA
Mekatep sibegi penggelaren man diberu, ‘nande e me ingan ertunande’, ‘Nande nge maka Nande’. Penggelaren enda turah arah penggejapen pengalamen ernande enterem kalak. Mbages kal pengkenaina i bas pusuh tep-tep kalak ngidah ras nggejabken perbahanen, pengerana, perukuren nande nandangi anak-anakna ras seisi jabuna rikut pe itengah masyarakat. Melias kal nande e. Aminna pe ia la terberita, tapi ia me sierbahnca perbulangen ras anak-anakna terberita. Rusaha ia rusur namburi kelemahen perbulangen ras anak-anakna. Adi sitatap kerna dirinta selaku Nande entah Bapa, melias nge kita selaku orang tua? Adi sitatap Moria si lit isekelewetta melias nge ia? Metunggung nge igelari sebage Nande ingan ertunande, nande simelias?
II. MPEBAGESI OGEN
Kata Dibata sijadi bahan PA-nta Minggu enda ngataken ‘Diberu si melias ihamati kap, kalak si merangap, kebayaken saja ipepulungna’. Arah ayat enda banci ibuat piga-piga pelajaren eme:
- Diberu si melias. Kata ‘melias’ ndeher kal ras ‘Pentar’ ertina kalak si melias e me kalak si pentar, sabab ietehna uga kearusen nggeluh. Kalak pentar teridah i bas pengerana ras perbahanenna melias si reh i bas pusuhna nari. Kata melias i bas Bahasa Indonesiana eme ‘Baik Hati’ ertina, i bas pusuhna nari kin reh simehuli, ‘baik hatinya’, la ibahan-bahan, la erdandanken lit latar belakang entah pe sura-surana maka ibahanna si mehuli, emaka banci ikataken melias kin biakna. Jadi, katawari pe kiniulinna e tetap mehuli, bicara lit pe masalah erdandanken kiniulin e, i bas waktuna banci ibuktiken maka ia tuhu-tuhu mehuli, emaka kalak sibage ihamati.
- Kalak merangap, i bas Bahasa Indonesiana ituriken ‘penindas’. Kalak merangap biasana, kai pe atena bana, bana ka simbuena, janah erbahan jahat pe la akapna dalih gelah seh sura-surana. Kalak sibage, kebayaken saja ipepulungna. Emaka labo seh ukurna guna nampati kalak sideban. Kai pe si lit i bas ia guna pesenangken dirina saja, emaka labo ietehna, labo seh ukurna ngukurken kalak, apai ka jadi pasu-pasu man kalak sideban, pasti ndauh i bas ia nari.
Arah kai siituriken idatas teridah maka petembil kal biak si melias ras merangap. Sura-sura Dibata arah KataNa i bas bahan PA-nta enda, gelah kerina pernanden (diberu) jadi nande si melias, ingan ertunande, terlebih i bas jabu, nandangi perbulangen bage pe man anak-anak. Nande jadi teman sicocok man perbulangenna subuk i bas susah entah senang. Alu bage tersehi Kata Dibata rikutken Kejadian 2:18, Kenca bage nina Tuhan Dibata “La mehuli adi manusia nggeluh sisada-sisada. Kubahanlah teman si cocok man bana guna nampati ia”. Tuhu-tuhu nande jadi teman si cocok man perbulangenna.
III. PENGKENAINA
Diberu si melias eme diberu si pentar, kepentarenna mpeturah erbage biak simehuli, melias, megenggeng, saber, dem alu keleng ate. Teneng ia tupung lit kebiaren ras masalah, la meganjang ukurna aminna pe erbage kesangapen ialokenna. Tek ia man Dibata i bas kerina kecibal geluhna. Emaka nina perbulangenna “Nterem diberu si mehuli, tapi i babo sie kerina kam simehulina” (Kuan-kuanen 31:29).
Tanggal 16 Oktober 2023 Moria GBKP genep umurna 66 tahun, selaku orangtua (Nande ras Bapa), sitoken, sijemba anak-anakta, Moria GBKP gelah jadi diberu si melias. Bicara melala gia tantangen si lit i sekelewetna, umpanana teknologi Informasi jadi gaya hidup, ekonomi keluarga sulit, narkoba judi ras pergaulen bebas engkelewetti anak-anak bagepe perbulangen, biak rangap ras sidebanna. Nggeluh i bas situasi sibagenda rupana, selaku orangtua (Saitun), kita banci jadi usihen, jadi pendoa, jadi teman curhat man Moria janah silayasi pusuhna alu terang Kata Dibata. Pengurus Moria bas perpulungen, ijemba maka selaku pengurus eme pendilo, labo jabaten entah kekuasaan, gelah tutus ras setia ia erpalasken kiniteken ndahiken dahinna. Alu bage i bas kegeluhenna nari teridah kemulian Dibata, malem ate kalak si lit isekelewetna. Ija lit Moria, ije tergejab pasu-pasu Tuhan.
IV. PERTOTON
Tuhan, i bas wari ulang tahun Moria GBKP si pe 66 tahunken enda, mindo kami man baNdu, gelah kerina Moria GBKP jadi Nande ingan ertunande, jadi diberu Simelias, pentar i bas ndalani kegeluhenna subuk i bas paksa susah entah senang. O Tuhan, mbelin pengarapen kami maka ija lit Moria, ije tergejab man selewetna pasu-pasu Tuhan. bage pe pasu-pasu kerina pengurus Moria, mulai i Sektor, Runggun, Klasis seh ku BPP Moria GBKP, gelah pentar ia i bas ndahiken tanggungjababna selaku pengurus. I bas Jesus Kristus kami ertoto. Amin.
V. DISKUSI
- Cuba turiken rikutken pengalamen ntah pengidahnau maka ‘diberu’ si melias ihamati’.
- Rikutken penggejapenndu, enggo nge kam jadi orang tua si melias nandangi anak-anak ras kalak si lit isekelewetndu. Turikenlah!
- Diskusikenlah kai si banci ibahanndu guna mperingeti wari ulang tahun Moria, emaka lakokenlah!
Pdt. Jennie E. Keliat