Teklah man Jesus
Yohanes 3: 36
3:36 Barangsiapa percaya kepada Anak, ia beroleh hidup yang kekal, tetapi barangsiapa tidak taat kepada Anak, ia tidak akan melihat hidup, melainkan murka Allah tetap ada di atasnya.”
3:36 Ise tek man Anak e ialokenna me kegeluhen si tuhu-tuhu si la erkeri-kerin. Tapi si ngelawan Anak e asa ndigan pe la ngaloken kegeluhen si rasa lalap e, janah ia lalap i teruh ukumen Dibata.
(Keselamaten/Kerajan Dibata)
Ogen : Johanes 3: 36
Tema : Teklah man Jesus
Tujun : Gelah Saitun:
- Meteh ras mpebagesi pengangkan kerna palas keselamaten man Kalak Kristen
- Ngarihken ras-ras kegiaten guna mpebagesi kinitekenna bage pe kiniteken sapih-sapih Saitun
I. BENA KATA
Keselamaten eme jadi tema kerina agama-agama i doni enda. Ertina maka la lit agama si la ngajarken kerna keselamaten man manusia. Termasuk agama-agama suku pe ngerana kerna kegeluhen manusia kenca nadingken doni enda. Perbedaanna eme maka keselamaten si iajarken arah Pustaka Si Badia nge si mereken dalan si terang. I je si jumpai kai dalanna manusia perlu iselamatken ras uga dalanna maka banci manusia ndai mulihi selamat.
Kitab Johanes eme Berita Si Meriah si peempatken si itulis murid Jesus jine eme Johanes senina Jakub anak Sebedeus. Ituliskenna kitabna enda enggo kenca umurna metua. Banci jadi enggo ogena pe kitab-kitab Berita Si Meriah si deban maka lanai kerina ulihna kai si enggo itulisken Matius, Markus ras Lukas. Inti kitab Johanes enda eme tek. Tek nandangi Jesus eme dalan keselamaten si pasti.
II. MPEBAGESI OGEN
Ise tek man Anak e ialokenna me kegeluhen si tulu-tuhu si la erkeri-kerin. Tapi si ngelawan Anak e asa ndigan pe la ngaloken kegeluhen si rasa lalap e, janah ia lalap i teruh ukumen Dibata. Ise si tek, enda ertina ise saja la i balengi suku, bangsa asal ia tek. Kai ertina tek? Tek ertina lit dua, eme pang erpengendes tuhu-tuhu ras setia seh rasa lalap. Jadi, adi tek man Jesus ningen ertina maka pang erpengendes tuhu-tuhu man baNa. Kai si ikatakenNa i ikutken i bas kegeluhen. Adi nggeluh kam alu bujur nina, bujur saja dalanken. Jenari kata setia eme maka la ertupang ukur ku japa pe selain ku Jesus. Jesus ngenca pengarepen i bas keriahen entah kesusahen. Emaka tanda kalak si setia eme kalak si la ertupang ukurna.
Kalak si tek man Anak e ialokenna me kegeluhen si tuhu-tuhu si la erkeri-kerin (hidup kekal). Kenca manusia ndabuh ku bas dosa maka kegeluhen doni enda enggo ermasap-masap. Lanai lit si tahan rasa lalap, kerina berubah ras lanai lit si tetap. Kune meriah pe iakap kalak nggeluh maka si e kentisik ngenca perban umur manusia pe enggo erbaleng. Erdandanken keleng ate Dibata doni enda, la ateNa manusia ndai bene rasa lalap, emaka Jesus reh ku doni enda gelah itebusiNa dosa kerina manusia alu darehNa si mambur i uruk Golgota. Dareh e simbol kegeluhen. Emaka kasai kalak si tek mnan Jesus lanai ia mate rasa lalap sebab enggo igalari Jesus alu lunas kerina utang kematenna. Man kalak si ngelawan eme kalak si la nggit tek man Anak e maka la ia ikut ngaloken kegeluhen si rasa lalap, tapi sebalikna makai a iukum seh rasa lalap.
JadÃ, arah erkiniteken man Jesus ngenca dalanna banci kalak bengket ku bas kegeluhen si rasa lalap i bas kesenangen i surga. Labo arah perbahanen manusia. Sabab perbahanen manusia, sanga ia erbahan mehuli e pe desken uis si melket (Jes.64:6). Janah mehuli pe perbahanen manusia adi la palasna kiniteken la pernah ngena ate Tuhan (Heb.11:6)
III. PENGKENAINA
John Newton si ngkarang lagu No 212, Perkuah Ate Si Mbelin, pernah nuratken i bas sada tulisenna nina,” I surga pagi lit telu si ajaib. Si pemena nina, maka enterem pagi kalak si arusna akap i je la ia i je. Si peduaken, enterem pagi si arusna la ku akap ia i je justru ia i je. Si peteluken, maka aku tuhu-tuhu lit i je. Man banta pe maka si peteluken eme si paling penting, maka kita ikut pagi i bas kinirajan surga.
Dalanna banci bengket ku bas kinirajan surga e eme arah erkiniteken man Jesus. Tek man Jesus ertina maka pang kita erpengendes man bana subuk sanga keriahen tah kesusahen, subuk sanga nggeluh entah sada paksa kita nadingken kegeluhen enda. Bage pe setia kita man baNa kai pe si terjadi ula nggit nilah arah dalan si enggo ituduhkenNa. Dalanna maka ngasup kita setia eme arah ngaloken usur gegeh arah Kata Dibata. Kata Dibata enda desken nakan man pertendinta. Kai pe si nggeluh babo doni enda adi la ibere man maka la banci la kote entah pe mate. Bage me kinitekennta man baNa labo banci paguh ras megegeh adi la kin si bere man rusur alu nakan pertendin eme Kata Dibata enda. Erdandanken si e sangap kal kita banci denga kita rusur er PA bagenda, dalanna kita rusur megegeh ndalani wari-warinta seh pagi Jesus reh mulihken ku doni enda.
IV. PERTOTON
O Tuhan Dibata si mada kegeluhen kami, Kam ingan kami erpengendes suari ras berngi. GelarNdu rusur i inget kami segedang kegeluhen kami, subuk sanga meriah entah pe susah. Bujur ikataken kami man bandu i bas iberken Kam perkuah ateNdu man kami seh banci kami jadi kalak si erkiniteken man baNdu. Kiniteken eme erbahanca maka lit kepastin keselamaten man kami. Teneng kal tendi kami nandai Kam selaku juruselamat kami. Terpuji Kam seh rasa lalap arah kegeluhen kami, janah bere dameNdu ngiani pusuh kami suari ras beringi. I bas gelar Jesus Kristus Juruselamat kami ertoto man banNdu. Amin
V. DISKUSI
- Engkai maka arah erkinteken man Jesus ngenca banci kita bengket ku bas kegeluhen si rasa lalap?
- Kai nge banci si ban geleh paguh lalap kinitekenta kerina Saitun, subuk ras-ras entah pe sekalak-sekalak?
Pdt. Yunus Bangun, M.Th