Bahan PJJ 06 – 12 Agustus 2023

Tutus Dingen Siiah-iahen

Ibrani/Heber 10: 19 – 25
Ketekunan

10:19 Jadi, saudara-saudara, oleh darah Yesus kita sekarang penuh keberanian dapat masuk ke dalam tempat kudus,
10:20 karena Ia telah membuka jalan yang baru dan yang hidup bagi kita melalui tabir, yaitu diri-Nya sendiri,
10:21 dan kita mempunyai seorang Imam Besar sebagai kepala Rumah Allah.
10:22 Karena itu marilah kita menghadap Allah dengan hati yang tulus ikhlas dan keyakinan iman yang teguh, oleh karena hati kita telah dibersihkan dari hati nurani yang jahat dan tubuh kita telah dibasuh dengan air yang murni. 10:23 Marilah kita teguh berpegang pada pengakuan tentang pengharapan kita, sebab Ia, yang menjanjikannya, setia.
10:24 Dan marilah kita saling memperhatikan supaya kita saling mendorong dalam kasih dan dalam pekerjaan baik.
10:25 Janganlah kita menjauhkan diri dari pertemuan-pertemuan ibadah kita, seperti dibiasakan oleh beberapa orang, tetapi marilah kita saling menasihati, dan semakin giat melakukannya menjelang hari Tuhan yang mendekat.

Sideherilah Dibata

10:19 Dage erkiteken kematen Jesus, o senina-senina, enggo bebas kita bengket ku bas Ingan Sibadiana kal.
10:20 Enggo italangi Jesus man banta sada dalan si mbaru, sada dalan si nggeluh, arah kire-kire, e me kap kulaNa.
10:21 Lit Imam si Mbelinta; e me si jadi kepala i bas rumah Dibata.
10:22 Dage sirembakkenlah dirinta ku Dibata alu tutus ate dingen kiniteken si tetap. Alu pusuh peraten si bersih i bas penggejapen ersalah nari, bage pe alu kula si enggo ibersihken alu lau meciho, sideherilah IA.
10:23 Tetaplah si gelem pengarapen si enggo siakui, sabap tek kita maka isehken Dibata nge padanNa.
10:24 Marilah kita sisampat-sampaten gelah keke ukurta guna nehken keleng ate ras ndalanken si mehuli.
10:25 Ola kita la reh ku perpulungen, bagi si ibahan piga-piga seninanta. Tapi lebih asa si e siiah-iahenlah kita sabap sieteh maka wari Tuhan, e me wari kerehenNa, reh me.

TUTUS DINGEN SIAH-IAHEN
Heber 10:19-25
(Kehadiren Jemaat Meningkat)

A. PERSIKAPEN

• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen.
• Nungkun ras nuratken topik pertoton sapaat.
• Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
• Sope benaken PJJ, banci kita rende alu make ende-enden pop rohani.
• Janah kerina perdalanen PJJ enda banci iubah (imodifikasi) rikutken perluna.
• Erdandanken perpulungen jabu-jabu e me ingan sharing grup/wadah kesaksin e maka mehuli leben pandita, pertua, diaken, entah emeritus nuriken Kata Dibata.

B. PERPULUNGEN JABU-JABU/ PERPULUNGEN JABU

1. RENDE: KEE No. 20: 1,2 (Ibabai nande)
   Reh kam min, reh kam min, ndahi Tuhan si mbelin
   B’reken baNa ras pujin, dahi min, dahi min, dahi min

Inget min, inget min, ngaruh Tuhan bandu kin
PemereNa la ‘rkerin, inget min, inget min, inget min

2. ERTOTO (Ibabai Bapa)
3. RENUNGEN
   Teks : Heber 10: 19-25 (logeken Anak)
   Tema : Tutus Dingen Siiah-iahen

I bas percakapen i kede kopi bas sada kuta, sekalak perpulungen ngerana, “Man kai kin kita ku gereja? Man kai kin reh PJ? Man kai kin er-PA? Me Tuhan jine ngerana man manusia kita banci terkelin asal kita tek man bana?” Kira-kira uga pengakapta kerna ranan enda? Labo banci ikataken kita kalak si tek adi kita pe mekisat ndahi IA, mekisat erlajar kerna IA, mekisat nuriken kerna IA. Sabap kiniteken arus teridah arah ketutusen, gelah terjaga kinitekenta maka perlu tutus kita reh ku perpulungen.

Penulis kitab Heber ngajuk kita gelah ngerembakken dirinta ku Dibata alu tulus ate dingen kiniteken si tetap, alu pusuh peraten si bersih i bas penggejapen ersalah nari, bage pe alu kula si enggo ibersihken alu lau meciho. Kai palasna maka kita perlu ngadap Dibata alu tutus? Sabap Jesus nggo ngasamken kesahNa man banta, IA maba dalan gelah kita bebas bengket ku bas Ingan Si Badiana kal. Kiniseran Jesus pe jadi bukti ras jaminen maka Dibata tetap setia ras erkeleng ate man manusia. IA me Imam Si Mbelin si mimpin kalak si tek reh ku Dibata guna iperdameken. Selaku kepala i bas rumah Dibata, la nggo encidahken kiniraturen ras kepatuhen Na reh ngadap man Dibata si jadi usihen man kalak si tek i bas reh ersembah man Dibata. Kalak si tek e me kalak si nggit ngerembakken dirina ku Dibata, tapi kita labo banci ngukurken dirinta saja, kita iajuk gelah si sampat-sampaten gelan keke ukurta nehken keleng ate ras ndalanken si mehuli. Manusia pasti lemah ras ndabuh adi la sisampat-samnpaten, dingen la saling mpegegehi i bas keleng ate, Hubungenta ras Tuhan erbahanca kita nggit mediate nandangi kalak si deban.

“Ola kita la reh ku perpulungen, bagi si ibahan piga-piga seninanta” (ayat 25). Lit piga-piga ngawan perpulungen si enggo nadingken persadanna ras Tuhan. Kalak si la reh ku perpulungen labo perlu iusih, tapi tanggungjababta guna ngiahken ia guna reh ku perpulungen, sabap Wari Tuhan nandangi reh me.

Selaku manusia si enggo ngaloken perkuah ate Dibata si Mbelin e me keterkelinen arah kiniseran Jesus Kristus si nggit mate guna nebusi dosa-dosanta, maka si kataken bujur man Tuhan arah tutus ku perpulungen dingen si iah-iahen. Ertina kalak si tek arus engkelengi Tuhan ras engkelengi teman manusia. Kita perlu mpegegehi kinitekenta man Tuhan arah ratur ras disiplin ersembah man baNa. Paksa gundari enda adi lenga banci kita radu pulung kerina, amin pe arah rumah secara live streaming entah pe zoom meeting ula si tadingken tapi tetaplah si dahi kegiaten gereja. Janah adi lit temanta nggo jarang ras lanai reh ku perpulungen rutang kita guna mpegegehi kinitekenna gelah ula ia bene. Siiah-iahen ras radu mpegegehi gelah perpulungen banci enterem.

Adi si idah arah hasil analisa partisipasi kehadiren jemaat siilakoken Litbang GBKP i bas tahun 2018 e me 37,05%. Arah enda banci si idah lebih setengah anggota perpulungen si lenga tutus reh ku perpulungen. Terjeng i bas acara-acara si mbelin umpamana Perayaan Paskah, Perayaan Natal, kehadiren anggota perpulungen banci ikataken cukup enterem (banci lebih 50%). Selaku aron Tuhan i doni enda, GBKP pasti ersura-sura enterem perpulungen ngikuti kegiaten-kegiaten gereja, ketutusen perpulungen selaku bentuk keikutsertan ras keleng atena nandangi gereja Tuhan. Tapi adi keikutsertan perpulungen i bas kegiaten gereja kurang, enda jadi perbeben man gereja. Banci saja keikutsertan perpulungen terus urak ku masa-masa si reh enda.

Guna ningkatken kerehen perpulungen labo saja dabin Majelis Runggun, tapi enda dahinta ras-ras gelah perpulungen metedeh atena reh ku kegiaten gereja ras kebaktin. Hasil penelitian Litbang GBKP tahun 2019 e me kerna Penelitian Faktor-Faktor Yang Mempengaruhi Partisipasi Jemaat Datang Beribadah idatken me hasil pengukuran nandangi Motif Psikologi jemaat i bas kegiaten gereja encidahken selaku motif terbesar guna ikut muat bagin i bas kegiaten gereja, perpulungen ngarapken banci ndatken pusuh si teneng, dame kenca dung ibadah. Selanjutna arah data si idatken, Motif Sosial pe cukup tinggi. Suasana akrab i bas praktek kegeluhen perpulungen GBKP tergejab denga. Kehadiren i bas kegiaten gereja, iakui megati gelah banci jumpa ras teman janah keseganen adi la reh. Ngidah kerna si enda, banci ikataken perpulungen enterem reh adi motif Psikologi ras Sosial banci tersehi. E maka marilah kita sisampat-sampaten, erlumba nehken keleng ate, ras ndalanken si mehuli sapih-sapih kita sada perpulungen. Banci saja erkiteken perbebenna si mberat ia lanai reh ku perpulungen, banci saja erkiteken enggo ndekah la reh erbahanca ia enggo mehangke reh, banci saja perban “merasa tersingkir” la lit temanna erbahanca kisat ia reh, ras si debanna. lje me perlu peranta guna ngiah-ngiahi ia, ndahi kurumahna, ntah nelpon ia, ngkirim pesan singkat guna ngingetken dahin gereja. Kita perlu saling mpegegehi, ula kita sipanjang punjuten sada perpulungen, ula si bahan kitik ukur temanta, belasken persinget alu tepat gelah arah persadan si mehuli Motif Psikologi ras Sosial banci tersehi.

Ambah si e pe Majelis Runggun perlu mberdayaken pengurus PJJ guna ngenen perpulungen si la reh, Majelis Runggun ras pengurus PJJ, tim PRT ngelakoken perkunjungen rumah tangga nandangi perpulungen si kurang reh bage pe si la pernah reh. Arah si e kerina, pengarapenta reh meningkatna kehadiren perpulungen arah kita tutus dingen siiah-iahen.

4. NURIKEN PENGGEJAPEN
   • Bapa
   • Nande
   • Anak
5. AKSI
   • Nggo nge lit Tim PRT bas sektor ta? Adi lenga lit bentuklah TIM PRT bas sektor ta. Adi nggo lit, TIM PRT terus erdahin. Si data perpulungenta si la aktif, si bahanlah waktu rutin guna perkunjungan rumah tangga nandangi perpulungenta si la aktif
   • Lakoken pe bas sektor ngiah-ngiahi temanta si lanai pernah ngikuti kegiaten gereja telponi ia kenca dung PJJ enda.
6. PERSEMBAHEN: RENDE KEE No. 315: 1-2 (lbabai nande)

Simpar tuhu pemereNdu, jujurkenNdu kap man bangku
Ermengkah kal me ukurku, la ku lupa lias ateNdu

Reff: AlokenNdu o Tuhanku, persembahen anakNdu
Usekenlah pasu-pasu, peteguhi perpulungenNdu

Benih si isuan kami, e pe kap i bas Kam nari
KuasaNdu mahanca turah, kuasaNdu mahanca erbuah
Reff: ..

7. PERTOTON SAPAAT (Ibabai bapa)
   • Notoken persembahen
   • Gelah ngawan perpulungen tetap tutus reh ku perpulungen ras ngasup ngiah-ngiahi teman
   • Notoken temanta sada sektor si la aktif
   • Si turah i bas perpulungen.
8. RENDE KEE No. 86: 1-3 (lbabai anak)
   Tuhan Jesus si permakan, aku biri-biriNa
   Jesus si ndemi pusuhku, kuikutken IA nge
   Kuikutken IA nge, kuikutken IA nge
   Jesus si ndemi pusuhku, kuikutken IA nge

Dage mari kita k’rina, si pehaga Jesus e
IA si permakan kita, lanai kita kelehen
Lanai kita kelehen, lanai kita kelehen
Keriahen lalap lit kin, man si ngikut IA nge

9. PERTOTON TUHAN (lbabai Serayan Tuhan/ bapa)
10. MOMO

C. JEDA RAS PENUTUP

Pdt. Tetty Hana br Sinulingga, M.Th.
HP/WA: 081362302527