Ogen : 1 Petrus 1:14-15
Tema : Nggeluh Badia
Tujun : Gelah Mamre:
- Meteh kepatuhen man Dibata maba geluh badia
- Nggeluh Badia arah pemaken alat Teknologi Informasi
1:14 Hiduplah sebagai anak-anak yang taat dan jangan turuti hawa nafsu yang menguasai kamu pada waktu kebodohanmu, 1:15 tetapi hendaklah kamu menjadi kudus di dalam seluruh hidupmu sama seperti Dia yang kudus, yang telah memanggil kamu,
1) KATA PENARUH
Adi siperdiateken kegeluhen manusia i bas paksa enda maka hampir i bas setiap bidang bentuk pendahin enggo arus makai Tekhnologi Informasi. Sada sisi memang la banci sipungkiri maka Tekhnologi Informasi enda maba melala dampak positip man banta. Arah Tekhnologi Informasi enda erbahanca kita semakin hemat waktu seh maka kai pe gundari banci silakoken alu pedas ras akurat. Erga pe banci kurang seh maka barang pe banci itukur alu erga silebih murah. Tekhnologi informasi enda pe erbahanca maka anak-anakta pe banci erlajar secara daring. Masalah pendidiken pe banci teratasi amin gia pandemic covid19, alu make perangkat zoom entah pe google meet. Tapi arus ka pe kita metenget perban isamping hal-hal simehuli melala ka nge tantangen simuncul arah tekhnologi Informasi enda. Erkiteken akses semakin lancar selama 24 jam maka manusia pe banci kehilangan arah. Si ndeher banci ndauh janah si ndauh banci ndeher. Komunikasi keluarga banci terganggu khususna i bas hubungen perbulangen ras ndehara seh maka banci timbul dampak negative misalna selingkuh. Emaka tentuna percakapen kerna Tekhnologi informasi harus lit ibas bingkai kata Dibata.
2) PELIKASI (URAIAN) TEKS
Arah bahan PA nta sekali enda maka Petrus ngajuk pembaca gelah ngikutken Tuhan sue ras biakNa. Salah sada biak Tuhan si icidahken Petrus eme nggeluh alu Badia. lbas ayat 15 tangkas si idah maka Petrus mereken alasen sitegas uga maka kita nggeluh badia. “Tapi Badia min kam ibas kerina perbahanenndu bagi Dibata sindilo kam pe Badia kap”. Tole pe i bas ayat 16 sekali nari ikatakenna “Kam arus Badia sebab Aku pe Badia”. Petrus ngutip i bas Padan si Ndekah nari i bas Imamat 11: 44 simengarahken bangsa lsrael guna badia. Bangsa Israel ipeserap Dibata segelah ula bagi bangsa sideban. Bangsa Israel arus nadingken biak biak doni enda. Tuhan mindo kita badia sebab ia pe badia. Tuhan me jadi usihenta guna nggeluh Badia. E maka guna nggeluh badia ijenda Petrus mpersingeti bangsa pilihen Tuhan guna nggeluh ibas kesetian ras kepatuhen man Tuhan labo man sura-suranta sebagai manusia. Sura-suranta langa bo tentu mabai kita kubas kebenaren. Sura-suranta banci mabai kita kubas kebenen. E maka guna banci nggeluh alu badia, Jesus mereken sada syarat e me “Ise atena ikut ras Aku, ipersilahangna bana, ipersanna kayu persilangna, jenari ikutkenna Aku (Mat 16: 24). Nggeluh Badia labo erbahanca kita teridah bodoh tapi justru mabai kita teridah pentar (berhikmat). Sebab kalak bodoh meriah akapna erbahan salah, tapi kalak pentar meriah akapna ngelakoken simehuli (Kuan kuanen 10: 23). Sebagai kalak sitek tentuna kita ngataken bujur adi kita ipersingeti rusur guna nggeluh alu patuh man Tuhan. Setiap kali kita ipersingeti entahpe itegur enda merupaken sada cara Tuhan guna kita tetap njagai kita gelah ola kita papak. Perligas ras persinget Tuhan eme bukti ateNa keleng man banta. bagi sinikataken ibas Heber 12: 5-6 “O anakku, perdiatekenlah adi iajarken Tuhan kam, janah ola kitik ukurndu adi irawaiNa kam sebab iajarken Tuhan kalak si ikelengiNa, janah iligasNa tep tep kalak si ialokennNa jadi anakNa
3) APLIKASI
Perkembangen Tekhnologi Informasi ras komunikasi tuhu tuhu maba dampak si melala ibas kegeluhen. Manusia banci terhubung ku belang-belang doni. Mamre banci terhubung ras ise pe i babo doni enda. E maka amin ija pe anakta ringan ras tading enggo banci terhubung alu make perangkat tehnologi informasi. Anak banci ibereken pedah ras ajar melalui perangkat enda kerina. Kesempaten ngajarken kata Dibata arah perangkat tekhnologi enda cukup efektif. Perangkat tehnologi informasi erbahan informasi pedas seh kuja pe. E maka adi lit informasi siateta ipeseh maka enggo banci make WA grup Mamre gelah berita-berita pelayanen Mamre enggo minter seh kukerina anggota i wilayah masing-masing. Anak-anak enggo banci erlajar lewat media internet lanai hanya lewat buku. Pembelajaren pe enggo banci memakai metode si cukup canggih ras komunikatif. Tapi tentuna tekhnologi informasi ras komunikasi enda pe perlu isikapi alu bjak sebab melala ka nge dampak negative sibanci turah. lbas bidang bisnis perkembangen enda memicu Cyber Crime. Perkembangen Tekhnologi komunikasi pe berdampak kubas kegeluhen sosial kemasyarakatan misalna tindakan Cyberbullying, penyebaran berita berita hoax ujaran kebencian bagepe konten pornografi, judi online rsd.
Sekalak Mamre tentuna perlu kita bijak i bas make tekhnologi komunikasi enda. Pemaken tekhnologi informasi ras komunikasi enda sipakeken guna ngerehken hal-hal simehuli guna dirina bagepe man jelma sienterem alu kata gendek maka tekhnologi informasi enda jadi alat pelayanan si efektif guna peseh Berita si Meriah. Sekalak Mamre harus tetap nginget maka i bas buena tawaren-tawaren tekhnologi enda la erbahanca ia ndabuh i bas perselingkuhen bagepe guna nokohi, tapi sebalikna ia tetap nginget maka ia ngqeluh Badia sebab Dibata si isembahna pe Badia kap. Tetap ijagaina dirina I bas kinipatuhen man Tuhan.
4) DISKUSI:
1.Sue teks ogenta turiken ugakin nggeluh badia
2.Kai nge si harus si lakoken guna njaga segelah kita ola ndabuh ras papak i bas pemaken tekhnologi informasi ras komunikasi enda?
5) USUL LAGU
1.KEE GBKP No. 350: 1-2
2.KEE GBKP No 323: 1-2
3.KEE GBKP No 184: 1-2
4.KEE GBKP No 174:1-2
5.KEE GBKP No 212: 1, 5
Pdt. Bahagia Tarigan, M. Th
HP. 0813 7005 8916