Nggeluh I Bas Persadan Ras Tuhan
Tujun: Gelah Saitun:
- Meteh pemahamen Pemasmur kerna kemalemen ate situhu-tuhu.
- Meteh ulih kegeluhen si ernalem man Tuhan i tengah-tengah jabu.
- Banci jadi usihen i bas kiniersadanna ras Tuhan (erkiniteken)
I. BENA KATA
Adi ngerana kita kerna nggeluh i bas persadan ras Tuhan, la kepe cukup adi enggo kita ikut ras ndalanken dahin-dahin gereja e enggo si akap nggeluh i bas persadan ras Tuhan. Adi nggeluh i bas persadan ras Tuhan berarti geluhta, perukurenta, pengerananta ras perbahanenta si tep-tep wari arus sue ras sini suraken Tuhan. Ersada ras Tuhan e la tergantung kubas situasi sini hadapi kita. Tapi enggo kin mendarah daging Kata Dibata e bas geluhta, bagi dareh maler i bas kerina daging kulanta, bage me Kata Dibata e enggo ersada bas daging kulanta seh maka IA nge si ngkuasai geluhta. Tentu guna seh ku bas kegeluhen si bage tempasna labo hal si mesunah, labo banci bagi ate-ateta saja i bas ndalani kegeluhenta tapi arus secara totalitas kegeluhenta enda ipalasi alu kiniteken si paguh man Dibata. Sabab gegeh ras pemetehta sebagai manusia terbatas, e maka pengarapenta man Dibata saja janah IA lah si tetap ngkawali ras numpak-numpak geluhta.
II. MPEBAGESI OGEN.
Adi siperdiaten bentuk tulisen kitab Masmur maka lit piga-piga bentuk tulisenna, mis: Masmur pujin, Masmur pertoton: pemindon, kiniteken ras pengataken bujur, Masmur sidebanna. Janah Masmur 1: 1-6 enda, termasuk ku bas Masmur raja ras Masmur pengajaren: kepentaren, sejarah ras Masmur pengajaren e me khususna Masmur kepentaren, si biakna ngajar ras mereken perenungen kerna kai gunana Undang-undang Tuhan man kalak si erkiniteken, uga kin kegeluhen kalak benar ras kalak jahat. Cara pengajarenna e me alu makeken kata-kata pengajuk, arah nuruh ngelakoken perbahanen si mehuli ras mpedauh perbahanen si jahat.
a. I bas ayat 1 – 3, maka si idah kata si pemena ibelasken permasmur enda e me: “malem ate” si nuduhken sada bentuk pujin man kalak si nggeluh ngelakoken perbahanen si mehuli si mabai ia ku bas keterkelinen. Janah pengajuk gelah si megiken pengajaren kalak pentar e ngaloken kai si ibegina, jenari lit piga-piga hal ituriken gelah banci kalak ermalem ate:
- Si la megiken pedah kalak jahat, sabap kalak jahat perbahanenna la sendalanen ras sura- sura Dibata.
- Si la ngusih perbahanen kalak perdosa, sabap perbahanenna petembil ras sura-sura Dibata
- Si la erteman ras kalak si megombang man Dibata, si perbahanenna ikut nokoh-nokohi Dibata bage pe nokohi kalak si erkiniteken man Dibata
Sie kerina arus isilahken i bas kegeluhenta nari ras la man deheren. Permasmur sendiri nuduhken uga malemna ate kalak si ertedeh ate ras erngena ate man Tuhan, e maka idaramina Tuhan suari ras berngi. Subuk arah mpelajari Undang-undang Tuhan/ pengajaren Tuhan dingen megiken pengajaren e jenari bengket ku bas persadan kalak si tek ras tetap ertoto.
Undang-undang Tuhan e genduari enggo ipersada bas sada kitab e me Pustaka Si Badia. Jadi kalak si ertedeh ate man Tuhan tetap iogena Kata Dibata, ertedeh ate ia rusur megi sora Dibata arah KataNa. Ketedehen atena e bali ras kalak si sangana si ngenan, lalap atena jumpa ras megiken sorana. Adi la jumpa sada wari enggo sada tahun akapna dekahna.
b. I bas ayat 3 igambarken kerna kalak si ermalem ate e desken sada batang kayu si turah i tepi lau anak, amin pe perlego, bulungna tetap meratah ras erbuah sabap uratna seh ku bas lau anak. Ertambah-tambah kemalemen atee sabap kalak si ertedeh ate man Tuhan e, sangap ia i bas kerina pendahinna. Tapi adi kalak jahat, si megombang man Dibata ras si la ndalanken kebujuren la bage, ia bali ras segal si embus angin, la pernah turah apai ka adi erbuah. Kerina ia pagi iukum Dibata, iserapken ras ipesirang sada ras sidebanna.
c. Ayat 6 enda merupaken sada kesimpulen bahan ogenta enda, maka kalak si ersada ras Tuhan, si nggeluh erpalasken pengajaren Tuhan, si tetap ertedeh ate man Tuhan, ugapa pe erbuah meramis, terkelin me ia sabap itandai Tuhan seh ku pusuhna, janah Tuhan pe erngena ate man bana
III. PENGKENAINA
Ernalem man Tuhan i bas kegeluhenta e me merupaken palas si enteguh kalak si ersada ras IA. Sabab arus siakui maka erbage-bage perbeben ras kiniseran arus si bentasi i bas kita ndalani kegeluhenta. Janah kita ngasup ras megegeh ngalakenca, sabab e me ulihna i bas kita tetap ernalem man Tuhan. Kalak si ernalem man Tuhan tetap igejapkenna perbahanen Tuhan bas geluhna. Tuhan tetap mpekena-kena geluhna ras mereken serpang pulah tupung lit perbeben. Bagi nina permasmur: Aminna erdalan pe aku arah kelbung si gelap, la aku mbiar jumpa cilaka sabap Kam kap ras aku o Tuhan (Masmur 23: 4). Tapi lit denga ka nge kalak Kristen si ngandalken gegeh ras pemetehna jine, la erpesukuten man Dibata. Bagi nina kuan-kuan: kerina e banci erdalin kiteken 3 0: Otak, Omong, Otot. Ertina adi la kin iputar otak, labo banci kai pe erdalan. Adi la kin arah omong (pengerana) ula cerita sada pe labo banci maju. Adi la kin arah ototku (gegehku) ndahikenca sada pe labo terdungi, aku nge kerina. E maka adi seh bagi sini surakenna erbahanca meganjang ukurna, tapi adi la seh bagi ukurna enggo turah jungut-jungutna ras pe kecewa. Lupa ia maka otak, omong ras otot e lit i bas pengaturken Tuhan maka banci erguna kerina, banci erdahin erkiteken kuasa Tuhan.
Kalak singandalken kebayaken/kiniliten ras pendahin si jadi jaminen masa depanna, tandana ia tetap denga ernalem ku bas dirina jine (band. Jeremia 17: 5). Tupung kita ernalem man gegehta ras erpengarapen man jelma, ije kita nundalken Tuhan. Adi kita ngandalken Tuhan ras ernalem man baNa labo berarti kita la perlu erdahin. Kata Dibata ngajarken kita gelah tutus erdahin, gelah lit ulihna. Tapi i bas tutus erdahin e palasna tetap ku bas persadanta ras Tuhan. Bahan renungen PA nta wari enda e me tetap ernalem man Tuhan sabap e kap jadi palas persadanta ras IA. E maka i bas caranta rukur, pengerana ras i bas ndahiken dahinta banci min e jadi usihen uga kin arusna kalak si nggeluh ersada ras Tuhan (erkiniteken) ras e me si tuhuna nilai lebih selaku kita Saitun i bas kegeluhenta. Uga kin kegeluhen kalak si nggeluh ersada ras Tuhan, e me tetap ngukurken kai si ngena ate Tuhan. I bas kerina dampar geluhna ipakena i bas dalan ketuhu-tuhun (Kebenaren Dibata), sabap memang bage kin situhuna biak kegeluhen kalak si ersada ras Tuhan. Kerina si lit i bas ia e jadi alat si ipake guna mpermuliaken Tuhan. Enda kerina silakoken ras sibenaken i bas jabunta nari. Geluhta jadi usihen si mehuli, kerina dampar kegeluhenta ipake janah erguna man kalak sideban. Kegeluhen Saitun i bas persadanta ras Tuhan, jadi usihen man enterem jelma.
IV. PERTOTON
O Tuhan Dibata si mada kegeluhen kami, ngataken bujur kami man baNdu sabap tetap denga isehkenNdu keleng, ate Ndu man kami seh i bas paksa enda. Pengasup kami Tuhan gelah tetap ernalem man baNdu saja, la kami ngandalken gegeh ras pemeteh kami. Meriah ukur kami ndalanken kerina perintahNdu janah tetap kami ertedeh ate guna megi soraNdu, jenari gelah ialoken kami kemalemen ate situhu-tuhu si rehna i bas Kam nari. Erkiteken Tuhan Jesus Kristus reh kami ngadap man baNdu. Amin.
V. DISKUSI
- Kai nge si jadi palas kalak si nggeluh i bas persadan ras Tuhan?
- Kai-kai saja nge ulih kegeluhen jabu si ernalem man Tuhan?
- Turiken i bas kai-kai saja Saitun enggo banci jadi usihen!
Kerja tahun i Gurusinga cukup meriah
Rell pe kade-kade i Berastagi nari
Erjumpaken kata Dibata ukurta tergiah
Turah malem ate keriahen ka pe jadi
Pdt Kasir Purba S.Th