Kinitekenndu Erbahan kam enggo Malem
(Kiniteken)
Lukas 18: 35 – 43
Yesus menyembuhkan seorang buta dekat Yerikho18:35 Waktu Yesus hampir tiba di Yerikho, ada seorang buta yang duduk di pinggir jalan dan mengemis.
18:36 Waktu orang itu mendengar orang banyak lewat, ia bertanya: “Apa itu?”
18:37 Kata orang kepadanya: “Yesus orang Nazaret lewat.”
18:38 Lalu ia berseru: “Yesus, Anak Daud, kasihanilah aku!”
18:39 Maka mereka, yang berjalan di depan, menegor dia supaya ia diam. Namun semakin keras ia berseru: “Anak Daud, kasihanilah aku!”
18:40 Lalu Yesus berhenti dan menyuruh membawa orang itu kepada-Nya. Dan ketika ia telah berada di dekat-Nya, Yesus bertanya kepadanya:
18:41 “Apa yang kaukehendaki supaya Aku perbuat bagimu?” Jawab orang itu: “Tuhan, supaya aku dapat melihat!”
18:42 Lalu kata Yesus kepadanya: “Melihatlah engkau, imanmu telah menyelamatkan engkau!”
18:43 Dan seketika itu juga melihatlah ia, lalu mengikuti Dia sambil memuliakan Allah. Seluruh rakyat melihat hal itu dan memuji-muji Allah.Ipepalem Jesus sekalak pemindo-mindo si pentang
18:35 Asum Jesus nandangi seh i Jeriho, lit me sekalak pentang kundul i tepi dalan mindo-mindo.
18:36 Asum ibegina mentas jelma si nterem, nungkun ia nina, “Kai e?”
18:37 Erjabap kalak man bana, “Mentas Jesus kalak Nasaret.”
18:38 Jenari erlebuh ia alu sora megang, “O Jesus! Anak Daud! Mekuah min ateNdu aku.”
18:39 Ilarang kalak si arah lebe ia, gelah ola ia gejek. Tapi reh gangna ia erlebuh nina, “O Anak Daud! Mekuah min ateNdu aku.”
18:40 E maka ngadi Jesus erdalan, jenari isuruhNa kalak negu si pentang e ku IA. Kenca seh ia i lebe-lebe Jesus, isungkun Jesus ia nina,
18:41 “Kai kin atendu Kubahan man bandu?”
Erjabap ia, “O Tuan, ateku min gelah aku erpengidah mulihi.”
18:42 E maka nina Jesus man bana, “Erpengidahlah kam! Kinitekenndu erbahanca kam enggo malem.”
18:43 Minter ia erpengidah, jenari ikutkenna Jesus, janah ikatakenna bujur man Dibata. Asum kalak si nterem ngidah si e, kerina ia muji Dibata.
Tujun: Gelah Saitun:
- Ngidah kinigenggengen kalak si pentang tetap reh ndahi Jesus.
- Tek maka lit ulih kiniteken.
- Tetap megenggeng i bas ertoto, ersaksi, nehken kekelengen, er-PA, ku gereja ras sidebanna.
I. BENA KATA
Manusia labo banci pulah i bas sakit pinakit si ndendeni daging kula. I bas jaman si genduari tuhu melala erbage pinakit, janah melala ka cara guna ndarami ras ndatken ingan ertambar bagepe kalak si beluh nambari pinakit e. Subuk ertambar secara medis bage pe ertambar kuta. Kalak si sangana sakit bali ras ngalaken baban kiniseran si mberat. Apai ka adi enggo ertambar ku jah-ku je tapi langa malem-malem pinakit e. Tambah ka biaya pertambar si cukup meherga. Latih tuhu adi sangana ngalaken sakit-pinakit e. Nai-nai nari pe isaksiken i bas Pustaka si Badia melala kalak si ikenai sakit-pinakit, janah rusaha ertambar gelah malem i bas pinakit e nari.
II. PEBAGESI OGEN
Lit sekalak si pentang tiap wari kundul ia i tepi dalan mindo-mindo. Sada paksa mentas enterem jelma i bas dalan ija si pentang e kundul. Arusna kesempaten enda jadi peluang si mehuli guna ndatken pemasuken si melala arah mindo-mindo.
Banci ikataken kalak pentang enda ndai sehat daging kulana, seakatan matana ngenca la erpengidah. La idahna enterem jelma bage pe Jesus si mentas i bas dalan e. Merincuh atena metehsa, alu penungkunen “Kai e?” si tuhu-tuhu perlu kal jabapna/informasi i bas kalak si deban si erkuah ate man bana. Kalak pentang e la mindo sen bagi biasana. Tapi mindo jabapen ia nungkun kai e. Tapi jabapen kalak e jadi larangen man si pentang si erlebuh alu sora megang. Tole, nina: “O Anak Daud! Mekuah min ateNdu aku.” Informasi kerna Jesus si ikataken kalak man si pentang, nina, “Jesus kalak Nasaret”. Tapi kalak pentang e erlebuh man Jesus alu ngataken: “O Jesus Anak Daud….”
Penandai kalak pentang nandangi Jesus lebihen asangken kalak si erpengidah nandangi Jesus. Megi sora si pentang e, nungkun Jesus man bana, “Kai kin atendu Kubahan man bandu?”, laloi Jesus kap penungkunen kalak pentang ndai, ‘Kai e? ljabap Jesus ia, “Kai kin atendu Kubahan man bandu?’ Erpengaloi kap penungkunen si pentang ras penungkunen Jesus. Simpetangkas penandai rikut ras kiniteken kalak pentang e nandangi Jesus. laloi Jesus pemindon si pentang e, sabab pengarapen Israel nandangi padan Dibata (bd Mat 24:26; Joh 1:41) reh arah kesusuren Daud si mulahi i bas kiniseran nari. Bage me pengarapen si pentang e, si terjabap i bas perjumpanna ras Jesus. Maka erkiteken kinitenna man Jesus malem ia ibahan Na.
III. PENGKENAINA
Bagi kalak pentang ndai, tuhu latih iakapna ngukurken geluhna si tertaban arah pinakit la banci erpengidah. La lit dahin sibanci si bahan lain mindo-mindo perkuah ate kalak. Mbarenda sehat nge ras erpengidah ia (bd ay 41). Banci jadi mbarenda kita sehat tapi gundari sangana sakit. Erlajar i bas kalak pentang ndai, gia terbatas kesehatenna tetap ia sumangat encari. La gia bage siisurana jadi pemindo-mindo i tepi dalan. Tapi gelah lit dalinna banci ia jumpa ras kalak si deban ras ndatken informasi kalak si mentas i bas ingan ije rusur kundul, la gia idahna perbahan pentang. Keadan pentang ningetken kita tupung paksa sakit. Tuhu-tuhu perlu kal penampat arah kalak si deban guna nampati keperlunta, bagi ndatken berita lah gia.
Tapi adi gelah ateta malem i bas pinakit nari la terjeng, si pindo kalak notoken kita asum paksa kita sakit. Tapi kinitekenta arus teridah. Bagi kiniteken kalak si pentang la itamburi, la itutupi alu matana si pentang. Sabab kinitekenna erpengidah nandangi Jesus kesusuren Daud si mpepalemken kalak si pinakiten. Alu bage kinitekenta banci si pebali ras kiniteken kalak si pentang, si la banci ngambati ketedehen ateta jumpa pulung i tengah gereja ras perpulungen Tuhan, i bas perminggun, PA, PJJ ras kegiaten si debanna i bas si enterem. Nina Jesus kinitekenndu erbanca kam malem. E maka cidahkenlah kinitekenta lebih megegeh asangken sakit pinakitta, sabab alu kinitekenta man Jesus malem ibahanna pinakitta e.
IV. PERTOTON
O Tuhan tangkas pengidahNdu sakit pinakit si lit i bas daging kulangku. Mekuah min ateNdu pengasup kinitekenku erpengidah nandangi Kuasa Ndu si mpepalemken sakit pinakitku, si erbanca tetap aku ikut muat bagin i bas kerina dalin pelayanenNdu i tengah gereja ras perpulungenNdu, o Tuhan, Amin.
V. DISKUSI
- Oge ay 42, kai nge artina, uga kin kiniteken kalak si pentang e?
- Apai nge beliden si gejap tupung kita sakit, kiniteken entah kearun ras kebiaren? Turikenlah pengalamenta.
Dagingku mesui perbahan pinakit
Tambar si payo kudarami la lit
Kusambari ukurku mpepayo kinitekenku
Jesus simpepalemken mekuah min ateNa aku
Pdt Merry Tatuwo, M.Th – Rg. Namorih