BIMBINGEN PA SAITUN GBKP TAHUN 14 Mei – 20 Mei 2023

(PA AKSI BERSAMA KATEGORIAL)

Ogen : Galatia 6: 2-10

Tema : Sisanpat sampaten i bas ndalanken simehuli

Tujun : Gelah Saitun:

1. Meteh maka nggeluh arus sisampat-sampaten
2. Alu semangat kiniersadaan mbangun Mamre Centre

6:2 Bertolong-tolonganlah menanggung bebanmu! Demikianlah kamu memenuhi hukum Kristus. 6:3 Sebab kalau seorang menyangka, bahwa ia berarti, padahal ia sama sekali tidak berarti, ia menipu dirinya sendiri. 6:4 Baiklah tiap-tiap orang menguji pekerjaannya sendiri; maka ia boleh bermegah melihat keadaannya sendiri dan bukan melihat keadaan orang lain. 6:5 Sebab tiap-tiap orang akan memikul tanggungannya sendiri. 6:6 Dan baiklah dia, yang menerima pengajaran dalam Firman, membagi segala sesuatu yang ada padanya dengan orang yang memberikan pengajaran itu. 6:7 Jangan sesat! Allah tidak membiarkan diri-Nya dipermainkan. Karena apa yang ditabur orang, itu juga yang akan dituainya. 6:8 Sebab barangsiapa menabur dalam dagingnya, ia akan menuai kebinasaan dari dagingnya, tetapi barangsiapa menabur dalam Roh, ia akan menuai hidup yang kekal dari Roh itu. 6:9 Janganlah kita jemu-jemu berbuat baik, karena apabila sudah datang waktunya, kita akan menuai, jika kita tidak menjadi lemah. 6:10 Karena itu, selama masih ada kesempatan bagi kita, marilah kita berbuat baik kepada semua orang, tetapi terutama kepada kawan-kawan kita seiman.

1. BENA KATA

Surat Galatia merupaken tulisen tertua i bas dokumen Padan si Mbaru. Surat enda merupaken tulisen pemena Paulus si itujuken man perpulungen Galatia, sada kota i bas Asia Kitik. Iperkiraken surat enda ikirimken i bas tahun 49-50 M. Kenca Berita si Merah seh kubas perpulungen Galatia si labo Jahudi, lit turah penungkunen: ntah sada kearusen kin ngikutken Taurat maka banci jadi sekalak Kristen si tuhu tuhu. Paulus nuriken maka hal sie labo perlu, sada sarat sipayo jadi Kristen tuhu-tuhu eme tek man Kristus. Alu tek man Kristus maka manusia enggo iperdameken ras Dibata. Tapi i bas perpulungen e lit kalak, khususna pengajar/guru si keturunen Jahudi ngataken maka kalak arus patuh man Taurat maka banci iperdameken ras Dibata.

Erkiteken lit pemahamen si salah e maka Paulus nulisken suratna enda guna mabai kalak si papak e kubas pengajaren si payo. I bas hal enda me Paulus nuriken pembelaanna sebagai rasul si langsung ipilih Tuhan guna nehken Berita si Meriah man kalak si labo Jahudi (pasal 1-2), kenca bage manusia iperdameken ras Dibata alu kiniteken saja (pasal 3-4). Bagepe icidahken Paulus maka lagu langkah kalak Kristen arus ncidahken keleng ate erpalasken kiniteken nandangi Kristus (pasal 5-6).

2. MPEBAGESI OGEN

Rikutken bahan oratennta i bas PA enda, maka i bas bagin Paulus nuriken kerna sikap nggeluh selaku kalak kristen bagi siisuraken Kristus. I bas penggalian teks maka bahan ogenta banci ibagi kubas 4 (empat) bagin eme:

1. Ay 2, sisampaten nehi undang undang Kristus.

Kata barh (beban) merujuk kubas beban si mberat si arus ipikul bersama labo beban biasa ntah ringan. Nasehat Paulus enda lit denga hubungenna ras Gal 5: 13-14 si ningetken gelah tiap perpulungen tetap sisampat sampaten, sebab arah sisampat sampaten maka ia nggo ndalanken pedah Dibata eme ngkelengi teman manusia bagi kam ngkelengi dirindu.

2. Ay 3-6 ula ermegah ras tipundu bandu tapi ujilah dirindu

Kata kauchema (=megah ntah mehaga) mengandung makna maka:

• Labo pantas manusia (tinepa) ermegah iadepen Dibata (1 Kor 1:29; Ef 2:9)
• Kalak si tek arus ermegah i bas Tuhan (1 Kor 1:31). Emaka lit ermegah si pantas (ermegah i bas Tuhan) ras ermegah la pantas (sombong) alu merendahken kalak sideban.

Alu bagin enda Paulus menegasken maka kalak si tek la banci terlalu melebih lebihken dirina man kalak si deban. Sebab megati jadi bas geluhta, adi lit kelebihenta nandangi kalak sideban maka enda jadi bukti kita lebih hebat asangken kalak ndai. Tapi bahan enda ningetken mulihi adi ermegah ateta, ermegahlah i bas Tuhan. Ertina bahanlah nehi peraten Dibata e jadi perayaken dingen kemegahennta. Alu bage tentu selaku kalak si tek berarti erlumba kita guna ncidahken kekelengen man kalak si deban

3. Ay 7-9 Kai siisuanndu e me si peranindu.

I bas bagin enda Paulus ningetken kerna hukum tabur-tuai secara jasmani ras rohani (kiniteken). Secara prinsip hukum tabur-tuai nuriken maka kai siisuanndu maka e ka nge siiperanindu. I bas kesempaten enda Paulus ningetken maka prinsip kerja hukum enda seri antara antara si jasmani ras rohani. Tapi lebih lanjut Paulus menekanken bahwa ulihna berbeda. Adi tabur-tuai secara jasmani ulihna banci macik (la bagi siiarapken, terbatas). Tapi tabor-tuai secara rohani (kiniteken) ulihna kegeluhen si rasa lalap (la terbatas). Alu bage Paulus menekanken gelah kalak si tek tetap naksiken keleng ate Tuhan alu terus ncidahken perbahanen si mehuli alu la erleja leja, sabab lit ulih perarin ibas sie.

4. Ay 10 Pake kesempaten bahanlah si mehuli

I bas bagin pendungi teks enda, Paulus make kata kairos (waktu adalah anugerah) guna ningetken maka tiap waktu/kesempaten bas geluh sitek merupaken anugerah siibereken Dibata bas geluhna. Emaka peken waktu e alu mehuli i bas ndahiken dahin si mehuli gelah ulihna pe jadi kiniulin man banta.

Bagepe isingetken bahwa perbahanen si mehuli e ilakoken man kerina manusia, terlebih lebih man teman sada kiniteken. Ertina mari sipesikap ra sipekena gerejanta, perpulungenta, janah kenca enggo sikap gereja/perpulungenta maka enda me jadi alatta guna ersaksi man kalak si enterem guna ncidahken kiniulin si nggo jadi bas kita.

3. PENGKENAINA

Sisampat sampaten maba baban geluh merupakan pola kegeluhen anak anak Tuhan. Arah pesan siituriken Paulus man perpulungen Galatia alu tangkas teridah uga arusna sikap nggeluh kalak si erkiniteken. Bagepe man banta selaku kalak si tek isingetken gelah tetap nggeluh si sampat sampaten i bas ngelakoken simehuli. Alu sederhana lit 3 pokok perenungen sibanci iangkat kita guna jadi pesan man banta eme:

1. Sisampat-sampaten erban simehuli arus iperjuangken gelah terwujud.

Nggeluh sisampat-sampaten la bias terjeng ibelasken ntah ituriken saja. Tapi nggeluh si sampat-sampaten membutuhkan aksi ntah tindaken nyata. Guna sie maka nggeluh si sampat-sampaten membutuhken perjuangen ras perngorbanen i bas dirinta man temanta ntah kalak sideban. Sebab rah kita nehken penampatta man bana berarti kita nggo ikut muat bagin guna mpenahangi perbeben siialami temanta ndai.

2. Sisampat sampaten erban simehuli bersifat permanen labo temporer.

Ertina mereken penampat e labo erkiteken sekalak jelma si ndeher ras kita, ntah pe si meriah ras kita misalna erkiteken kita si kade-kaden ntah kita erteman meriah. Bagepe labo erkiteken lit sura-suranta man bana maka kita nggit nampati temanta e. Nampati teman e la bias sekali ntah dua kali saja maka kenca sie lanai perlu iakoken nari. Tapi sebalikna Paulus menekanken maka nggeluh sisampat sampaten e arus ilakoken kidekah lit waktu ntah kesempaten geluhta. Maka kidekah gedang geluhta e marilah tetap sipakeken guna sisampat sampaten, jadi e sebagai hal si tetap ntah permanen bas geluhta

3. Sisampat sampaten erban simehuli labo beban tapi gaya hidup kalak si tek.

Man kalak si tek nggeluh sisampaten sampaten erban si mehuli labo merupaken beban, untung ntah rugi adi si lakoken. Tapi arah persinget si nggo isingketken Paulus maka nggeluh si sampat sampaten e merupaken biak ntah gaya hidup selaku anak anak Tuhan. Ertina maka tindakenta nampati temanta e jadi keriahen kemalemen ate adi kita ngelakokennca. Sebab lit ulih si luar biasa si nggo ijanjiken Dibata man banta i bas kegeluhenta.

Sehubungen ras sie kerina maka i bas PA aksi bersama kategerial bas tahun 2023 enda, Mamre GBKP nehken sura-sura membangun Mamre Center GBKP. Mamre Center enda terletak i desa Sibolangit, Kecamaten Merek kawasen Dano Toba. I bas program nggo itetapken maka Mamre Center merupaken ingan siibangun guna pembinaan spiritualitas (rohani) ras pemberdayaan man Mamre-mamre GBKP. larapken arah Mamre Center enda jadi sarana i bas pembentuken karakter man Mamre-mamre GBKP, maka kerina Mamre GBKP banci jadi bapa si erkemalangen man Tuhan bagepe bapa siibanggaken i bas jabuna.

I bas perdalanenna, taneh Mamre Center enda nggo menjadi milik GBKP (Mamre GBKP) i bas tanggal 29 Juni 2022. Janah i bas program kerja berikutna maka mulai me ilakoken tahap pembangunen i bas taneh Mamre Centerta enda. Kerna proposal program pembangunen enda ilampirken kami i bas buku PA nta enda.

Mamre Center enda labo milik Mamre GBKP saja, tapi Mamre Center enda kita kerina si empunana. Emaka ngarap kami gelah i bas PA Aksi bersama enda sibuat baginta guna mbenaken pembangunen i Mamre Center alu Geraken Rp 10.000/orang. Guna kiniraturen dahin enda maka guna pepulung dana enda gelah iaturken Pengurus Pusat masing masing kategorial berdasarken tingkatenna mulai sektor nari ku runggun bagepe ku Klasis ras Pengurus. Janah Pengurus Pusat Kategorial enda kari si netorkenca ku rekening BPP Mamre eme: an Mamre Center GBKP, Bank BNI no 1346145049.

Maka alu bage nggo banci sibenaken pembangunen i bas Mamre Centerta. Dibata tetap si masu masu kita kerina i bas kita nehken penampat guna dahin si mehuli enda.

4. DISKUSI AKSI

1. Oge mulihi ayat 2, kai maksud ayat enda man bandu? Turiken
2. Sehubungen ras bahan renungenta, cidahkenlah aksinta i bas geraken 10.000 guna pembangunen Mamre Center GBKP. Aturken gelah aksi enda banci ratur dingen mehuli perdalinna, sebagai wujud kepedulian ras dukungenta man Mamre GBKP.

Pdt Darius Rinadi Sembiring MTh

HP. 08121931648