PERPULUNGEN E ME KULA KRISTUS
Epesus 1:22-23
(Konfesi GBKP BAB IX: Gereja)
1:22 Dan segala sesuatu telah diletakkan-Nya di bawah kaki Kristus dan Dia telah diberikan-Nya kepada jemaat sebagai Kepala dari segala yang ada. 1:23 Jemaat yang adalah tubuh-Nya, yaitu kepenuhan Dia, yang memenuhi semua dan segala sesuatu.
A) PERSIKAPEN
1) Pengurus PJ] ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
2) Nikapken ingan persembahen.
3) Nungkun ras nuratken topik pertoton sapaat.
4) Kune i bas sektor entah jabu kepkepen, perdalanen PJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken I bas teptep jabu ngawan perpulungen, maka perdalanen PJJ ibabai bapa, nande, bage pe anak.
5) Sope benaken PJJ, banci kita rende alu make ende-enden pop rohani.
6) Janah kerina perdalanen PJJ enda banci iubah (imodifikasi) rikutken perluna.
7) Erdandanken perpulungen jabu-jabu e me ingan sharing grup/ wadah kesaksin e maka mehuli leben pandita, pertua, diaken, entah emeritus nuriken Kata Dibata.
B) PERPULUNGEN JABU-JABU/ PERPULUNGEN JABU
1) RENDE: KEE No. 255:1 (2x iendeken: ibabai si mada jabu)
https://www.youtube.com/watch?v=iSwf3O8dF9U
Talenta si ni b’reken Dibatanta, jadi min erlipat ganda
Tutus ateta ndahiken dahinNa,
Amin pe mberat tapina ermulia
Reff: Kalak si malang nandangi Tuhan,
La kap nggit nimbak labo nggit nogan
Maka dahikenlah alu tutus,
Ola lakoken alu mekarus
2) ERTOTO (|BABAI SIMADA JABU)
3) RENUNGEN
Teks : Epesus 1:22-23 (logeken Bapa)
Tema : Perpulungen E Me Kula Ni Kristus
Gereja si nggeluh e me gereja si tetap ngikuti kecibal ras jaman si jadi i sekelewetna. Aminna pe kecibal ras jaman e banci saja lit perubahen, tapi gereja arus tetap encibalken dirina alu payo gelah keberadan gereja e banci tergejap nandangi kalak si erkiniteken. Labo e ngatakenca maka gereja la lit biak si tetap i bas ia. Tapi justru ngatakenca maka gereja pe banci encibaken dirina rikutken situasi si lit gelah banci tersehi Berita Si Meriah e kempak kerina jelma i bas teptep jaman si ibentasi gereja. E maka gereja la banci nalihken pengenehenna i bas kecibal kegeluhen jelma si nterem. Sabap gereja lit gunana e me gelah jadi sira ras terang kempak doni enda (bdk. Mat.5:13-16).
Kesadaren gelah banci jadi gereja si nggeluh tentu arus ibenaken arah pengangkan ras pengertin si payo kerna gereja. Gereja e me persadan kalak si idilo i bas gelap nari gelah bengket ku bas terang si enggo isikapken Dibata. I bas terang e iakui me maka Kristus kap si erkuasa. Bagi si ituriken Paulus maka “Dibata namaken kerina si nasa lit ku teruh tapak-tapak nahe Kristus” (Ep. 1: 22). Ertina maka Paulus tek kerna “kemahakuasan” Dibata nandangi kerina si nasa lit. Ngertiken maka kuasa Dibata kap si ngerajai kerina si lit bas doni enda. E maka ipetangkas pe alu ngataken kerina sinasa lit e iteruh tapak-tapak nahe Jesus. Subuk kuasa kai pe si lit bas doni enda, kerina “tunduk” kempak kinimbisan Jesus. Tentu enda me nuduhkenca kuga belinna kuasa ras kinimbisan Kristus e i bas doni enda. Seh maka Ia me kap si merentah kerina sinasa lit babo pertibi enda. Janah si nambahi kemalemen ate man perpulungen (kalak si erkiniteken) maka ibahan Dibata Kristus jadi kepalana. E ngatakenca maka i bas kerina dampar, Kristus me kap jadi takal perpulungen e. Kristus me kap si merentah dingen ngaturken kegeluhen kalak si erkiniteken e. la kap Dibata man kalak si tek.
Adina ndai ituriken maka sinasa lit e itamaken iteruh tapak-tapak nahe Kristus, lain ka kepe ingan perpulungen e ibahan Dibata. Perpulungen e la itamaken iteruh tapak-tapak nahe Kristus. Tapi perpulungen e itamaken jadi kula ni Kristus. Tentu lit keistimewaan sinialoken kalak si erkiniteken i bas geluhna. la ikut mbentuk kula ni Kristus e. Janah labo e ngatakenca maka seri kecibal perpulungen e selaku kula ras Kristus selaku kepala. Lit perbedaanna. Sabap kepala ningen e tetap nge encibalken dirina si jadi ulu guna merentah sinasa lit. Kuasa e tetap nge jadi sikerajangen Kristus. Saja man perpulungen e ibereken sada kehamaten selaku kula ni Kristus. Tentu ikataken selaku kula ni Kristus la banci lang lit nge tanggungjabab si arus ilakoken kalak Kristen i bas geluhna. Arus nge ituduhkenna kuga ia ndalani misi si ibereken Kristus man baNa i doni enda. Bagi situriken i bas Konfesi GBKP nina: Gereja idilo guna ngelakoken telu dahin gereja guna peturah perpulungen si ‘misioner’ guna encidahken ulih Kinirajan Dibata si teridah i bas kegeluhen Jesus eme: keleng ate, kepate man si musil, kote ras medungu/medanggel guna majekken kebenaren ras kebujuren (bdk. Luk. 4:18-19) bage pe ngasup ersikap “positif, kreatif, kritis ras realistis” nandangi ulih doni enda (Rom. 12:2), Erpalasken konfesi enda tentu tangkas ituriken maka perpulungen selaku kula ni Kristus arus ngasup nuduhken biak-biak Kristus i bas kegeluhenna. Enda me si ikataken “imamat rajani”. Ertina maka perpulungen pe banci jadi pelaku aktif i bas misi si enggo iendesken Kristus man bana.
Erpalasken si enda, tentu melala dahin si arus ilakoken perpulungen selaku kulani Kristus. I bas kegeluhen perpulungen e arus min teridah erbage-bage perbahanen si mehuli sinilakokenna man kalak si deban. Perpulungen pe arus jadi “pelopor” misi Kristus, segelah reh teremna kalak banci tek man baNa. Iperluken kal perpulungen si ergiah-giah i bas encidahken dirina selaku kula ni Kristus. Si teridah arah kerina perbahanen sinilakokenna man kalak si deban, subuk i bas ia kepate man kalak si deban bage pe i bas mpegegehi kinitekenna.
4) NURIKEN PENGGEJAPEN
1. BAPA
2. NANDE
3. ANAK
5) DISKUSI/SHARING/CERAMAH/AKSI
1. Turikenlah pengangkanta kerna Kristus me kan kepalą perpulungen dingen perpulungen kap kula ni Kristus
2. Turikenlah perbahanen ras pelayanen kai si banci si lakoken ku lebe wari enda tandana kita selaku kula Kristus.
6) NEHKEN PERSEMBAHEN
RENDE KEE No. 471:1 (ibabai anak)
https://www.youtube.com/watch?v=M0fSFzco7-k
Ermengkah ukurku, ras ngataken bujur Tuhan
Kelengi min aku, Kam empu geluhku
Enda ngenca Tuhan, persembahenku
Kerina geluhku, kesah ras kulangku
La kap lit bas aku, erta kebayaken
Si cukup meherga, lah ku persembahken
Sada ngenca Tuhan, lit pemindonku
Aloken min Tuhan, persembahenku
Pakeken geluhku, jadi perkakasNdu, segedang geluhku
7) PERTOTON SAPAAT (Ibabai Nande)
1. Notoken teptep kalak si erkiniteken gelah tetap jadi gereja si nggeluh.
2. Notoken gereja gelah ngasup tetap ersaksi bas doni enda.
3. Notoken kecibal bangsa ras negara bage pe pemimpin-pemimpin bangsa.
4. Si turah i bas jabu ras perpulungen
8) RENDE: KEE No. 209:1,2 (ibabai Bapa/Nande)
https://www.youtube.com/watch?v=CW_YNHCWKR0
Perpulungen ersadalah, ngikutken pedahNa
Bas kiniteken tetaplah, man Tuhan Dibata
Bas si mehuli ayaklah, si sampat-sampaten
Bage kap pedah Dibata, sikeleng-kelengen
Gereja Kristen sikaplah, ersada paguhlah
Ersada ukur min i bas, Dibata Bapanta
Perturah kiniteken pe, ras dame k’rinalah
Ras sikeleng-kelengenlah, ngikutken Tuhanta
9) PERTOTON TUHAN
10) MOMO
C) JEDA RAS PENUTUP
Pdt. Dicky A. Bangun, M.Th.
HP/WA: 081263231231