KEPENTAREN MEREKEN KEGELUHEN
Kuan-kuanen 3:19-22
(Evaluasi Sasaran Pelayanan GBKP Tahun 2022)
3:19 Dengan hikmat TUHAN telah meletakkan dasar bumi, dengan pengertian ditetapkan-Nya langit, 3:20 dengan pengetahuan-Nya air samudera raya berpencaran dan awan menitikkan embun. 3:21 Hai anakku, janganlah pertimbangan dan kebijaksanaan itu menjauh dari matamu, peliharalah itu, 3:22 maka itu akan menjadi kehidupan bagi jiwamu, dan perhiasan bagi lehermu
A. PERSIKAPEN
1) Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
2) Nikapken ingan persembahen.
3) Nungkun ras nuratken topik pertoton sapaat.
4) Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken idur pengurus PJJ. Adi kune PJJ ilakoken i bas teptep jabu ngawan perpulungen, maka perdalanen PJJ ibabai bapa, nande, bage pe anak.
5) Sope benaken PJJ, banci kita rende alu make ende-enden pop rohani.
6) Janah kerina perdalanen PJJ enda banci iubah (imodifikasi) rikutken perluna.
7) Erdandanken perpulungen jabu-jabu e me ingan sharing grup/ wadah kesaksin e maka mehuli leben pandita, pertua, diaken, entah emeritus nuriken Kata Dibata.
B. PERPULUNGEN JABU-JABU/PERPULUNGEN JABU
1. Rende KEE No. 306:1-2 (ibabai si mada jabu)
https://youtu.be/fUu8xOA2pUk
1) O kam tinepa Dibata Si mada kuasa pujilah
Haleluya, Haleluya
Matawari ersinalsal
K’rina teridah merandal
Rasa lalap puji Tuhan
Haleluya, Haleluya, Haleluya
2) Cahar warina si salang
Sora perkas la teralang
Haleluya, Haleluya
Erkire embun meganjang
tembus angin si lumang
Rasa lalap puji Tuhan
Haleluya, Haleluya, Haleluya
2. KINIULIN TINEPA DIBATA
Bapa :Andiko ulina tinepa Dibatanta, la kal teralang jilena
Anak :Ajari kami tetap pekena-kena dingen njagaisa
Nande:Teridah uga bagesna kepentaren Dibata arah kerina tinepaNa
Kerina: Ertanggung jabab kita tetap muat bagin i bas pekena-kenasa
3. ERTOTO (Ibabai Anak)
4. RENUNGEN
Teks: Kuan-kuanen 3:19-22 (ibabai bapa) Tema: Kepentaren Mereken Kegeluhen
Albert Einstein pernah nuriken: “Apa yang saya saksikan di alam ini adalah sebuah tatanan agung yang tidak dapat kita pahami secara menyeluruh, hal ini seharusnya membuat kita berpikir yang dilingkupi perasaan rendah hati.” la sekalak ahli fisika Jerman si terkenal babo doni enda. Tapi arah tinepa Dibata enda saja banci mabai ia ku bas sada perenungen si mbages uga bagesna kepentaren Dibata nepa doni enda, maka arah e pe erbahan manusia meteruk ukur ngakui Dibata si mada kerina je nari mpekena-kena ras njagai doni enda.
Kata Dibata si jadi bahan renungenta i bas wari sendah kerna pengakun si nuratken Kitab Kuan-kuanen enda nandangi kepentaren Dibata i bas nepa doni enda. Uga tinepa enda sendep i bas inganna, janah sikap la teralang. Uga perputaren doni enda, jarakna ras matawari bage pe ras kerina planet-planet si deban si erjuta-juta galaksi. Sada galaksi pe erjuta-juta planet. Banci sikap kerina itepa Dibata i bas inganna.
I bas bagin si banci mesunah siakap mpergermetkenca maka tuhu kal kata enda, uga jilena doni enda, bagi pengakun 1 nuratken kitab enda. Maler lau belin, bage pe embun s mereken udan man doni enda. Salah sada si mpeturah perenungenna e me uga pentingna “lau” nandangi kegeluhen Ayat 20, maler lau belin, embun mereken udan man doni enda. Lau belin ras udan enda pe sikawiten perdalanenna. Lau belin si maler enda banci mereken kejuah-juahen, adi uluna i deleng ras kerangen pe ijaga ras ipekena-kena. Gelah sanga perlego la kerah, sanga perudan la ngeraja lau (la banjir). Lau si maler enda adi ijaga alu mehuli enda ka me si jadi penguapen ku datas si i bas paksana nusur ka jadi udan.
Guna si e maka manusia si itepa sue ras tempasna (gambar Dibata). Salah sada tandana manusia tempas Dibata e me litna kepentaren ras kebeluhen (Hikmat dan Pengertian) i bas manusia. Erdandanken si e maka manusia tuhu-tuhu banci makeken kepentarenna njaga ras mpekena-kena doni enda guna kegeluhen si terulin man kerinana. Seh i ja kesetianta ndalanken Sasaren Pelayanen GBKP tahun 2022 si lewat sidalanken subuk i jabu, sektor ras gerejanta, enda jadi sada perenungen man banta wari enda.
Sidang MPL PGI tahun 2022 si lewat pe muat sada Tema: Spritualitas Keugaharian, Membangun Keadaban Publik Demi Pemeliharaan Bumi Sebagai Sakramentum Allah. Lit piga-piga si lit kawitennta ras renungen PJJ sendah e me: Spritualitas keugaharian e me berani hidup sederhana. Pang kita ngataken cukup. Enda sada pusuh si ngena ate Tuhan. Si erbanca ceda doni perban lit biak merangap, lalap si akap la cukup kai si lit i bas kita. E maka doni enda si paksa (eksploitasi) guna mere keuntungen man banta secara pribadi. Jenari tole nina tema enda “Bumi sebagai Sakaramentum Allah” ertina adi sedekah enda terjeng Lakon Persadan Si Badia ngenca si akap jumpa ras Dibata, genduari mehuli erlajar kita maka tupung si idah doni enda, si gejap kehadiren Dibata i bas kerina tinepaNa gelah ertanggungjabab kita mpekena-kenasa guna kegeluhen si terulin.
5. NURIKEN PENGGEJAPEN
1) Anak
2) Nande
3) Bapa
6. DISKUSI/SHARING/CERAMAH/AKSI
1) Turiken pengangkanta kerna tema Renungen PJJ enda.
2) Kai banci silakoken guna pekena-kena lau ? Enda me jadi komitmen ras aksi PJJ enda.
7. NEHKEN PERSEMBAHEN
1)Rende KEE No. 302: 1-2 (Ibabai anak)
https://youtu.be/qjJ412nrMdI
Nginget perkuah Dibata si mbelin
Si isehkenNa man banta k’rina kin
I bas kerina dampar kegeluhen
I doni si dem alu keguluten
Reff: Endeskenlah kulanta man Dibata
Kerinana si lit bas geluhta
Selaku persembahenta si nggeluh
Em persembahen si ngena ateNa
2) Sabap bage me arusna kita kin
Ersembah man Dibatanta si mejin
Si nggo m’reken man banta manusia
Keg’luhen si mehuli ras badia Reff: …
8. PERTOTON SAPAAT
1) Notoken perdalinen jabu gelah tetap i bas dalan Tuhan
2) Notoken GBKP tetap banci jadi Aron Dibata maba pasu-pasu alu muat bagin njaga lingkungen
3) Notoken Pemerintah gelah tetap ibere Dibata kepentaren mimpin bangsa ras negaranta
4) Siturah i bas jabu/perpulungen
9. RENDE KEE No. 309: 1 (ibabai nande/bapa)
https://youtu.be/oVgKu841LSQ
1) Pengasup kami o Tuhan
Gelah pedahNdu banci idalanken
Em kap tendang kami bas kegeluhen
KataNdu si man gelemen
Gelah tangkas kata ras perbahanen
Ban min kami tetap bas kebujuren
SurgaNdu kap perayaken
10. PERTOTON TUHAN
C. JEDA RAS MOMO
Pdt. Yunus Bangun, M.Th.
HP/WA : 081361625080