Ogen : Roma 8:31-32
Keyakinan iman
8:31 Sebab itu apakah yang akan kita katakan tentang semuanya itu? Jika Allah di pihak kita, siapakah yang akan melawan kita? 8:32 Ia, yang tidak menyayangkan Anak-Nya sendiri, tetapi yang menyerahkan-Nya bagi kita semua, bagaimanakah mungkin Ia tidak mengaruniakan segala sesuatu kepada kita bersama-sama dengan Dia?
Tema : Dibata temanta
Tujun : Gelah Saitun
- Ngasup nuriken uga belinna keleng ate Dibata si enggo mereken AnakNa Si Tonggal
- Tetap setia ras tek maka Dibata si jadi teman erkuasa njagai bagepe ngkawali kegeluhenna, anak jabuna ras temanna
1) BENA KATA
Tupung kita ntah temanta ngenanami perbeben, kiniseran, megati sibegiken percakapen, maka nina: “ndarami ras ndatken teman tawa she kal sukahna, tapi ndarami teman ngandung seh kal serana muatsa”. Kalimat enda nuduhken maka selaku manusia, lit keterbatasenta. Labo kerina kita ngasup jadi “teman” man kalak si deban. Sanga meriah e ngenca kita ngasup jadi teman.
I bas Kitab Ende-enden GBKP No 98 syairna bagenda : “Ise kin ndia temanta si tetap seh lalap e, temannta si tuhu-tuhu, e me Tuhan Yesus e, nterem gia kade-kade teman labo kurang kin, krina denggo itadingken di nggo mate kita kin”. Tuhanta Yesus Kristus e, jadi temanta s ituhu-tuhu, seh ku pintun kubur pe.
2) MPEBAGESI OGEN
Perbeben perpulungen i Roma.
Perpulungen Tuhan i Roma ngenanami erbage-bage perbeben ras kiniseran erdandanken iikutkenNa ajaren Tuhanta Yesus Kristus. Turah erbage-bage pengajaren si papak, reh ku perpulungen gelah ula iikutkenna Yesus. Rasul Paulus pe melala ngenanami kiniseran, ntah piga-piga kali ia ipenjaraken, icambuk. Situasi e erbahansa kerina kalak Kristen la tenang, mbiar janah menderita. Nandangi perpulungen e, reh Paulus ngapuli ia nina i bas Roma 8: 18, “Rikutken perkiranku, maka kiniseran sini inanami kita genduari labo kai kal pe, adi ibandingken ras kemalemen ate si pagin ipetangkas Dibata man banta”. Ertina, Paulus ngarapken gelah perpulungen tetap megenggeng. Labo sia-sia kiniseran sini ialami perpulungen e. Janah nina Paulus tole maka “ibas kai pe Dibata erdahin guna kiniulin man kalak si erkeleng ate man bana. Janah kerina kalak si tek e, enggo itetapken Dibata bali ras tempas anakNa Yesus Kristus, janah Yesus Kristus jadi anak si ntua i tengah seninana si enterem (Roma 8: 29)
Yesus Kristus jadi teman si tuhu-tuhu.
Guna ngalaken kiniseran e, ipetetap me ukur perpulugen, maka Dibata arah Yesus Kristus kap teman si tuhu-tuhu, subuk susah tah senang. Ibereken Dibata anakNa Yesus Kristus ku doni enda. Raduken Yesus Kristus e, ibereken Dibata nge kai pe man banta (ay 32) Yesus enggo mate gunanta, enggo ka nggeluh mulihi, janah enggo merentah ras Dibata guna kita. Ise pe la ngasup nirangken kita i bas keleng ate Kristus nari. Janah i Surga pe pagi, Yesus si mbela kita, bagi isuratken i bas ayat 34b nina: “Kristus Yesus pagi jadi pembelanta i lebe-lebe Dibata”
3) PENGKENAINA
Bagi perpulungen i Roma ndai, banci jadi maka kita ras temanta si sada kiniteken melala ngenanami kiseran ntah perbeben, erdandanken kita erkiniteken man Kristus. Mungkin pernah kita ipesulit nai i bas karierta, i bas pendahinta, erkiteken kita kalak Kristen, Bage pe tupung kita ngenanami kiniseran, pinakit, ras si debanna, bagi si urak temanta, anakta pe banci jadi dongkel akapna kita. Guna si e, enggo seh Kata Dibata wari enda man banta, ulanai morahi kai si jadi, si peturah semangat kinitekenta. Dagingta enda banci metua, kote, tapi kinitekenta tetap semangat. Sebab Yesus Kristus kap temanta seh rasa lalap.
Adi enggo turah semangatta, e maka, siajuk ka temanta Saitun si deban gelah turah ka semangatna, Ula ngadi i bas kita Berita si Meriah e arus sisehken man kerina kalak. I ja saja kam jumpa ras kalak si putus asa ntah patah semangat, I je kam minter hadir mereken pergegeh. Yesus kamp pembelanta. Yesus teman nta si tuhu-uhu. E maka adi kalak si deban la ia nggit jadi temanta, kita ka lah gia Saitun enda jadi teman man ise pe, Adi jadi teman ateta kita man kalak si deban, tentu lit pengorbanenta, Misalna siluangken waktunta, si telphoni ia, sidahi ia janah mawen sisampati ia alu pemerenta. Bagi Yesus Kristus pe erkorban man banta, guna nehken keleng ateNa e, bage ka me kita, i bas pengorbanenta e, terpuji gelar Dibata.
4) PERTOTON
Bujur O Tuhan, enggo Kam nggit jadi teman man kami Saitun, mawen-mawen megogo dingen morah ate kami, sebab enggo kurang kal teman kami i bas geluh enda. Bujur ibas KataNdu si Badia si enggo petetap ukur kami, maka Kam kap teman kami rasa lalap. Pengasup dage kami kerina gelah banci jadi teman man kerina kalak. Amin.
- METODE PA: DISKUSI
- Roma 8:32 “..Adi AnakNa kal pe ibereken Na man banta, tentu ibereken Na nge kai pe man banta radu ras AnakNa e”. Kai kin akapndu ertina adi ikataken Rasul Paulus i bas ayat enda “iberekenNa nge kai pe man banta…”. Turiken pengangkanta!
- Yesus Kristus reh ku doni enda guna mulahi kita i bas dosa ras kebiaren nari, Turiken dage man temanndu, ntah lit pengalamenndu marenda tupung kam itemani Dibata i bas ngalaken kiniseran, pinakit, kebiaren tah ceda ate.
LANSIA
Adi umur enggo metua igelari me Lansia
Adi enggo Lansia matawarina pe enggo reh benna
Janah gegehna pe enggo me reh urakna
Perdalanna pe lanai bo metersa
Pemegina pe enggo me lanai jelassa
Ras pengenehenna lanai bo terang
Dingen perpanna pe lanai bagi biasa
E maka adi enggo Lansia Ulanai petca ngerana
Dingen ula ka merambitsa
Si perlu e me tutus ertoto bage pe ku gereja
Gelah adi enggo seh padan Dibata
Atan kam pagi ku ingan si ipadanken Na
Eme surga kesenangen i rumah Bapa