(Minggu 20 kenca Trinitatis)
Ogen : Masmur 23:1-6
Tema : Kesenangen kalak si enalem man Dibata.
Tujuan : Gelah Saitun:
- Ngangkai kuga belinna keleng ate ras pengarak-ngarak Dibata i bas kegeluhen si tetap setia ras tek man Dibata.
- Nggejapken maka Dibata e sumbul keriahen ukur, gegeh, ras keselamaten.
TUHAN, gembalaku yang baik
23:1 Mazmur Daud. TUHAN adalah gembalaku, takkan kekurangan aku. 23:2 Ia membaringkan aku di padang yang berumput hijau, Ia membimbing aku ke air yang tenang; 23:3 Ia menyegarkan jiwaku. Ia menuntun aku di jalan yang benar oleh karena nama-Nya. 23:4 Sekalipun aku berjalan dalam lembah kekelaman, aku tidak takut bahaya, sebab Engkau besertaku; gada-Mu dan tongkat-Mu, itulah yang menghibur aku. 23:5 Engkau menyediakan hidangan bagiku, di hadapan lawanku; Engkau mengurapi kepalaku dengan minyak; pialaku penuh melimpah. 23:6 Kebajikan dan kemurahan belaka akan mengikuti aku, seumur hidupku; dan aku akan diam dalam rumah TUHAN sepanjang masa.
BENA KATA
Kerina manusia babo doni enda ndarami kesenangen i bas geluhna. Tentuna kita pe selaku Saitun merhat nge kita maka jumpa min rusur kesenangen e. Ma bage? Tapi soalna kuga dalinna maka kita banci rusur jumpa kesenangen e bas geluh enda?
Mari si orati Kata Dibata i bas PA Saitunta sendah i je ngenca kita banci jumpa kesenangen i bas geluh enda.
PEBAGESI OGEN
Si man oratenta sendah Masmur 23:1-6 e me Masmur Daud. Adi si pepayo kegeluhen Daud, ia anak si nguda i bas jabu bapana si Isai, dahinna ermakan biri-biri bapana (1 Samuel 16:11), Tapi alu perkuah ate Dibata, Daud itangkuhken Nabi Samuel jadi Raja Israil pengganti Raja Saul si enggo ngelanggar perintah Dibata (1 Samuel 16:12)
I bas Masmur 23:1-3 teridah kuga Daud i bas perdalanen geluhna nggejap maka Dibata e si jadi permakan man bana. Dibata mereken nakan ras inemen si cukup man bana segedang geluhna. Labo berarti maka Daud la pernah jumpa perbeben i bas geluhna, tapi igejap Daud maka Dibata lalap si ngkawali ras mereken serpang pulah i bas perbebenna nari.
Ayat 4 ngataken: “Aminna erdalin pe aku arah kelbung si gelap, la aku mbiar jumpa cilaka sabab Kam kap ras aku, o Tuhan. IkawaliNdu aku, desken permakan ngkawali biri-biri alu ciken ras kayan-kayanna”
Ayat 5 Daud ngenanami uga belinna lias ate Dibata i bas geluhna, Ipehaga Dibata ia alu mereken pasu-pasu si simpar seh riba-iba.
Ayat 6 Daud erbahan kesimpulen bas geluhna maka Dibata e tetap erkeleng ate man bana si jadi penundalenna, dingen ia tetap tading i bas rumah Dibata. Teneng dingen senang akapna nggeluh.
PENGKENAINA
Bagem man banta Saitun i bas kita nerusi geluhta i babo pertibi enda, jumpa nge kita rusur perbeben bas geluh enda, tapi bagi Daud tetap ia ernalem man Dibata, maka Dibata lalap ngkawal, ncukupi keperlun geluhna si tep-tep wari, kesehatenna, bagepe dolatna sebagai Raja Israil. E maka marilah kita kerina Saitun GBKP tetap ernalem ku bas teruh pengarak-ngarak Dibata alu tutus ku Perpulungen Tuhan terlebih ku PA Saitunta.
Dibata e kap ulu/sumbul keriahen ukur, gegeh ras keselamaten. Bicara gia lit kita jumpa perbeben tapi kayan-kayan Tuhan ngkawali kita e me Kesah Sibadia si tetap nemani ras si njagai geluhta Puji Tuhan. Amin.
PERTOTON:
Bujur O Tuhan Dibata erkiteken lias ateNdu enggo banci kami erbahan PA Saitun GBKP i bas paksa enda. Pasu-pasu KataNdu siniorati kami enda, gelah banci jadi pedoman man kami guna ndatken kesenangen bas geluh enda. I bas gelar Tuhan Jesus kami ertoto. Amin.
DISKUSI:
1.a. Mari si oge Kitab 1 Samuel 17: 34-37, gelah siangka terbagesen engkai maka ikataken Daud ibas ayat 4 ndai “Aminna erdalin pe aku arah kelbung si gelap, la aku mbiar jumpa cilaka sabab Kam kap ras aku, o Tuhan. lkawaliNdu aku, desken permakan ngkawali biri-biri alu ciken ras kaya-kayanna”.
b. Kai dage gegeh ras senjata Daud maka pang dingen menang ia ngelawan Goliat Panglima perang Pilisti e?
2. Kai saja dage banci sibahan tupung man banta pe reh perbeben si mberat, seh maka baban si mberat, e kerina salih jadi keriahen ukur, si dat gegeh si mbaru janah terkelin ka kita? Turikenlah.