Evaluasi program berjalan di tengah kegiatan berdasarkan PA Mamre tahun 2023 (Tahun Kreatif Merawat Lingkungan)
Teks : Heber 6:9-12
Tema : LABO ILUPAKENNA DAHIN SI ENGGO IDAHIKENNDU
Tujun : Gelah Mamre:
- Meteh maka Dibata tetap nginget kerina si enggo idahiken Mamre nandangi sekelewetna
- Nambahi ketutusenna ndahiken dahin si mehuli (alu mperdiateken Hutan Mamre i RC Sukamakmur)
Berpegang teguh pada pengharapan
6:9 Tetapi, hai saudara-saudaraku yang kekasih, sekalipun kami berkata demikian tentang kamu, kami yakin, bahwa kamu memiliki sesuatu yang lebih baik, yang mengandung keselamatan. 6:10 Sebab Allah bukan tidak adil, sehingga Ia lupa akan pekerjaanmu dan kasihmu yang kamu tunjukkan terhadap nama-Nya oleh pelayanan kamu kepada orang-orang kudus, yang masih kamu lakukan sampai sekarang. 6:11 Tetapi kami ingin, supaya kamu masing-masing menunjukkan kesungguhan yang sama untuk menjadikan pengharapanmu suatu milik yang pasti, sampai pada akhirnya, 6:12 agar kamu jangan menjadi lamban, tetapi menjadi penurut-penurut mereka yang oleh iman dan kesabaran mendapat bagian dalam apa yang dijanjikan Allah.
KATA PENARUH
Sasaren Pelayanen GBKP tahun 2022 e me kreatif merawat lingkungen enggo si dalani menaken tanggal 1 Januari seh paksa enda. Enggo melala rancangen si litken bagepe dahin si dahiken subuk secara pribadi, sector bagepe runggun gereja. Kerina tujunna e me lako njaga tinepa Dibata gelah tetap mehuli dingen si enggo ceda banci mulihi mehuli. Alu bage banci kerina mehuli bage ndube asum Dibata nepa doni enda. I bas wari pemena seh wari peenemken i bas dungna Dibata nepa tinepaNa tetap isuratken kata mehuli (Ind. baik).
Nikataken sasaren pelayanen GBKP tahun 2022, tapi si tuhuna kreatif merawat lingkungen labo terjeng tahun 2022. Tapi segedang-gedang tahun. Erdandanken tinepa Dibata si mehuli denga tetap perlu i jaga. Dingen si enggo ceda perlu proses ndekah guna pekenasa gelah mulihi mehuli. Alu bage banci kerina mehuli jenari doni enda banci ingan tading si mehuli man kerina tinepa Dibata. Tinepa Dibata tuhu-tuhu ersada jadi kiniersadan si la terpesirang (satu kesatuan yang utuh) bagepe kerina nggeluh sejahtera.
URAIAN TEKS/ TAFSIREN
Tujun penulis kitab Heber nehken persinget kempak perpulungen singaloken suratna e me segelah perpulungen tetap nggeluh i bas kiniteken si paguh man Dibata. Icidahkenna kiniteken si paguh arah tetap erdahin alu tutus. Tek penulis Heber maka perpulungen si ngaloken suratna banci nggeluh terulin si lit pertalinna ras keselamatenna.
Pengertinna e me tanda sekalak jelma erkiniteken man Tuhan Dibata arus icidahkenna arah pendahinna. Arah pendahin icidahken buah kiniteken. Alu bage banci i idah ras inanami kalak si deban.
Penulis kitab Heber mpetetap ukur perpulungen singaloken suratna gelah tetap tutus erdahin anem gia paksa lit i bas kiniseranna alu nuratken Dibata bujur nge. Labo pagi ilupakenNa dahin si enggo idahikenndu e. lingetNa nge keleng atendu nandangi la, si icidahkenndu arah nampati teman-temanndu kalak Kristen, subuk si enggo idalankenndu bage pe si paksana idalankenndu. Perkatan enda mereken semangat man perpulungen gelah tetap erdahin sabab kerina pendahinna lalit sada pe sia-sia. Dibata tetap nginget dahin sidahikenna bagepe keleng atena alu nampati teman-teman kalak Kristen (secara khusus isingetken kalak Kristen erdandanken paksa e kalak Kristen paksa ipesega-sega kaisar Romawi erkiteken kinitekenna man Dibata. E maka kerina kalak Kristen perlu kal isampati dingen ipegegehi).
Penulis kitab Heber seterusna nehken pengarapen kempak perpulungen gelah kerina ia tetap ergiah-giah ukurna, gelah kai si iarap-arapkenna e ialokenna pagi dungna. Pengarapen perpulungen kerna tetap ngaloken keselamaten perlu i jaga alu nggeluh tutus erdahin. Pendahin e me kebaktin. E maka arah pendahin tole perpulungen encidahken kepatuhenna man Dibata.
Pengajuk si perpudina isehken penulis kitab Heber kempak perpulungen e me ola min mekisat. Tapi nggeluhlah ngusih kalak si enggo tek dingen saber, gelah ialokenna kai si enggo ipadanken Dibata. Pengajuk enda me jadi kesimpulen si isehken penulis Heber. I bas pengajuk pendungi enda iajuk penulis kitab Heber ngusih kalak si enggo tek dingen saber (bdk. Heb. 11) i ja kerinana ia ngaloken ulih kiniteken ras kesabarenna
APLIKASI
Tema PA Mamre paksa enda: “Labo ilupakenNa Dahin si enggo idahikenndu”. Arah tema enda ituriken maka Dibata bujur nge dingen tetap ngidah perbahanen kiniteken Mamre dingen asa nigan pe la ilupakenNa kerna si e. Erdandanken sie tetaplah ergiah-giah ukur lako ngerawat sekelewet, la mekisat. Persinget enda me isehken man Mamre si enggo ikut njaga ras mpekena-kena lingkungen kidekah enda bagepe enggo ndalani sasaren pelayanen GBKP tahun 2022 kreatif merawat lingkungen. Dibata la pernah lupa nandangi kerina pengkebet geluhta.
Secara khusus isingetken maka selaku kita si enggo ipekuanak Dibata teridah min tetap kinitekenta arah pendahinta. Alu bage erdahin kita alu tutus, erbintuas ras pentar.
Jenari PA Mamre enda pe mpersingeti si lupa Mamre maka Mamre GBKP lit kerangenna i Suka Makmur i bas plang tersurat Hutan Mamre GBKP lokasina deherken PPOS Suka Makmur (Laporen Rapat Pengurus Pusat Lengkap (RPPL) MAMRE GBKP Tahun 2013 Hotel Rindu Alam Bukit Lawang, 30 Agustus – 01 September 2013 bidang Litbang) Hutan Mamre i komplek Retreat Center Sukamakmur belangna 15.000 M (1,5 ha).
Rikutken perarihen ras direktur RC maka kayu si isuan emekapken kayu sibersifat Street Furniture ras bersifat kayu buah. Enggo ilakoken penanaman hutan enda buena 600 batang e me: Mahoni, Sengon, Durin, Nangka, Manggis, nambahi Acem Gelugur si umurna enggo 5 tahun gundari. Keputusen RPPL tahun 2013 enda iumputi neruskenca dingen ilaporken i bas RPPL tahun 2014: Guna pelestarian hutan Mamre /lingkungan i Retreat Center, BPP Mamre enggo nuan kayu i bas hutan Mamre buena 600 batang erbage-bage kayu. Penanaman pohon enda BPP kerjasama ras pengelola Retreat Center Sukamakmur. Iarapken arah penanaman pohon enda khususna i hutan Mamre lebih mehuli.
Tetaplah dage rawat kerangen Mamre GBKP enda, ula pediat tempa la lit empuna. Ersadalah ukur Mamre GBKP pekena-kenasa bagi ndube ersada ukur menakenca. Alu bage mehuli iarak-arak, mehuli perturah batang kayuna dingen i bas paksana buahna banci inanami.
- DISKUSI
- Oge mulihi ayat 10. Turiken kai ertina.
- Bereken usul-usul guna mpehuli hutan Mamre si lit i Retreat Centre. Jenari sirumusken guna siendesken ku Pengurus Mamre Runggun lako isehken ku Pengurus Mamre Klasis jenari isehkenna ku BPP Mamre.
- USULEN LAGU
- KEE GBKP No. 94:1-3
- KEE GBKP No. 163:1,4
- KEE GBKP No. 260:1,3
- KEE GBKP No. 306:1, 3
Pdt. Christopher Sinulingga, M.Th
HP. 0813 7629 1768