BIMBINGEN PA MAMRE 9-15 OKTOBER 2022

October 10, 2022 Writer-1 Mamre 0

(HUT Moria)

Teks       : Ende-enden Salomo 4:12-15

Tema     : KEMBERAHENKU

Tujun     : Gelah Mamre:

  1. Ngidah kiniulin sekalak kemberahen si ipujiken Raja Salomo
  2. Nulisken kata-kata pujian man kemberahen tengah jabu (dalam rangka HUT Moria GBKP)

Metode : Diskusi ras Aksi

12 Dinda, pengantinku, kebun tertutup engkau,kebun tertutup dan mata air termeterai.13 Tunas-tunasmu merupakan kebun pohon-pohon delimadengan buah-buahnya yang lezat,bunga pacar dan narwastu,14 narwastu dan kunyit, tebu dan kayu manisdengan segala macam pohon kemenyan,mur dan gaharu,beserta pelbagai rempah yang terpilih.15 O, mata air di kebun,sumber air hidup,yang mengalir dari gunung Libanon!

KATA PENARUH

Menam teptep wari lit kalak si melasken selamat Ulang Tahun i bas FB, subuk e man teman sada dahin, teman sada perpulungen, sangkep nggeluh, man anak la ketadingen man ndehara. Kirim ka kue ulang tahun amin pe gambarna saja, kirim gambar bunga, entah emoji; love, jempol sidebanna. Tapi tupung jumpa ras teman si erulang tahun ndai i dunia nyata, melala si lupa ngataken selama ulang tahun. Bas dunia maya meriah kal tempa tapi la semeriah dunia nyata. Adi ndeharanta si erulang tahun, arah FB nge si kirim kue ulang tahun ras bunga mawar entah lit si bahan waktu berdua nehken kekelengenta?

URAIAN TEKS/TAFSIREN

Ende-enden Salomo e me gelar kitab enda, i je ipepulung kerina ende-enden si mejilena si itulisken Salomo tupung ia nguda denga. Lit 1005 ende-enden si ituliskenna si erkawiten ku bas perjabun. I bas ende-enden si itulisken Salomo e, ibahanna ia selaku pengantin si dilaki. Diberu Sulam em si jadi pengantin si diberu. Ras enda me ndeharana si pemena, jadi Salomo paksa si e lenga poligami (melala ndeharana). Diberu Sulam e singuda-nguda i kuta nari, seh kal jilena: mejile rupana, mejile perukurenna, mejile penampilenna, tutur bahasana sederhana ras mehamat. Jadikal ate Salomo singuda-nguda enda, natap ayona ras megi pengeranana, debet-debet pusuh Salomo, e maka ibuatna e jadi ndeharana.

I tengah-tengah kesibuken Salomo selaku raja, isikapkenna rusur waktuna lako emperdiateken Kemberahenna, seh maka turah belas-belas ras pujin bas pusuhna nari. Impalku, kemberahenku peken si terbuni kap, peken si erbenteng, sumbul si erbide. Lit telu kiasen si ituriken Salomo e me; peken si terbuni, peken si erbenteng, sumbul si erbide. Teluna kiasen e nuduhken maka diberu Sulam ope lenga iempoi Salomo, diberu si sokeliamen (perawan) bali ras Maria ope lenga erjabu ras Jusup. Diberu e mehuli kal lagu langkahna, jagana dirina i bas pergaulen si la mehuli nari, jagana kebadian dirina. Enda jadi sada keriahen kal man Salomo, e maka lalap atena tedeh man kemberahenna e.

Kemberahen si mehuli e igambarken Salomo desken sinuan-sinuan i bas taheh si mehumur, melala buahna ras mejile ulihna. landingken ulihna e bagi bunga kacar, narwastu, kayu manis, tebu, kuning gersing, kumenen, mur, ras rempah-rempah pilihen si melala erbagena. Kerina enda si merim-merim, banci i bahan jadi adum minak wangi si meherga banci ka jadi rempah-rempah guna tambar, bagepe jadi alat kosmetik si erbahansa mejile kulit ras sidebanna. Bageme iandingken Salomo sekalak ndehara si mehuli , erguna kal geluhna, mereken aroma si merim i bas jabu, jadi tambar ras banci erbahan kerinana jadi mejile.

Sinuan-sinuan bas peken pe banci jadi ingan nimpan lau, e maka arah tengah-tengah peken e maler lau anak. Kerina tinepa perlu lau, e me si la banci lang arus lit. Lau e maba kegeluhen. Igejapken Salomo maka kemberahen e maba kegeluhen, maba kemalemen ate, mereken semangat dingen keriahen. Kegeluhen e la terjeng man isi jabuna tapi pe man sekelewetna. Kemberahen e tuhu-tuhu kal jadi keriahen.

APLIKASI

Kemberahen i bas kalak karo, e me penggelaren man ndehara pengulu kuta entah pe ndehara raja-raja entah si erjabaten i bas sada ingan. Keduduken kemberahen e cukup terhormat, ras mehaga. Genduari penggelaren kemberahen e lanai terjeng man ndehara si erjabaten i bas kuta ngenca, tapi pe enggo semal ipake man kerina ndehara khususna tupung i bas kerja adat. Jadi kata kemberahen e ipake man kelompok, man kerina ndehara si perbulangenna semerga. Umpamana, kemberahen bangun mergana, e me kerina si perbulangenna merga bangun.

Terdauhen, genduari enggo semal ilebuh “kemberahen” tengah jabu, erkiteken enggo ka semal ibelasken perbulangen e “pengulu” jabu. Adi perbulangen pengulu, pendilon man ndeharana e me kemberahen. Jadi kemberahen e enggo jadi pendilon man kerina ndehara secara pribadi-pribadi.

Adi sinen arah pengertin kemberahen e, cukup mehuli kal posisina i bas jabu. larakkenna perbulangenna i bas ndahiken dahinna, Isikapkenna kai si iperluken perbulangenna, alu kata ras perbahanen, ituduhkenna kehamatenna man perbulangenna. Bersih ukurna ras la pernah ipindona semulihna arah kai siibahanna. Ikepkepna keluarga ras anak-anakna. Uga maka sikap kerina isi jabu e kal perjuangenna.

Adi Salomo i tengah-tengah kesibuken ndahiken dahinna selaku raja, lit waktuna mperdiateken kiniulin kemberahenna, Mamre GBKP, katawari nge tatapndu kiniulin ras kinijilen kemberahenndu? Salomo, iidahna si mehuli i bas kemberahenna nari, Mamre, lit denga nge simehuli iidahndu bas kemberahenndu nari? Amin pe sekali mejungutsa entah merambitsa kemberahen e, uga kal pe lit denga atena keleng. I bas rambitna e me keleng atena e. Tupung Mamre ngidah si mehulina i bas diri kemberahenna, uga kal pe lanai lit sura-sura poligami, enggo ngasup ia ngidah kemberahen e pemere Dibata si mbelin man bana, e maka iergakenna tuhu-tuhu. Dalankenna sura-sura Dibata e me gelah perjabun e tetap badia, bagi itulisken i bas Heber 13:4, Kerinalah kam ngergaken perjabun. Kegeluhen perbulangen ras ndehara i bas perjabun la banci melket. Dibata pagi ngukumsa kalak si erlagu la mehuli bagepe si erlua-lua.

I bas minggu enda Ulang tahun Moria GBKP pe 65 tahunken. Dem pengharapen maka kerina Mamre natap si mehulina i bas diri kemberahenna bagepe i bas diri Moria runggun seh ku perpulungen ras sektor. E maka i bas jabu sekalak-sekalak ikatakenna “kemberahenku.”

  • DISKUSI RAS AKSI
  • Kira-kira kai alasen Salomo mereken kata-kata pujin man kemberahenna arah ende-enden si ituliskenna?
  • Tulisken sada kalimat gendek nduhken kebangganndu nandangi kemberahen tengah jabu, banci itulis i bas kertas entah arah WA. Si arah kertas, kenca mulih PA mis bereken man kemberahenndu, si arah WA mis kirim man bana.
  • Inget erbahan ucapan selamat Ulang tahun man Moria GBKP pe 65-tahunken i bas runggun bage pe sektorndu, labo terjeng arah FB.

Pdt. Nurbety Br. Ginting, M.Th
HP. 0821 6869 6383

Post Views: 1,260