MERITAKEN KEBEBASEN
Jesaya 61:1-2
Diakonia Transformatif
Kabar selamat kepada Sion
61:1 Roh Tuhan ALLAH ada padaku, oleh karena TUHAN telah mengurapi aku; Ia telah mengutus aku untuk menyampaikan kabar baik kepada orang-orang sengsara, dan merawat orang-orang yang remuk hati, untuk memberitakan pembebasan kepada orang-orang tawanan, dan kepada orang-orang yang terkurung kelepasan dari penjara, 61:2 untuk memberitakan tahun rahmat TUHAN dan hari pembalasan Allah kita, untuk menghibur semua orang berkabung,
A. PERSIKAPEN
1) Pengurus PJJ ngaturken perdalanen PJJ subuk kune ilakoken i bas sektor,jabu kepkepen ntah i bas jabu ngawan perpulungen
2) Ngaturken perdalanen PJJ subuk si mabaisa/singelaisa, adi i bas sektor ntah i jabu kepkepen perdalanen PJJ ibabai Pt/Dk/Pengurus sektor/sekalak si enggo iaturken pengurus PJJ.
3) Adi ilakoken irumah iaturken Bapa/Nande/Anak
4) Ngaturken kelengkapen ingan persembahen ras ngaturken si mabai pertoton sapaat
5) Perdalinen PJJ rikutken kecibalna banci i ubah (imodifikasi)
6) Sope benaken PJJ banci i lebei alu rende lagu-lagu KAKR
B. PERPULUNGEN JABU-JABU/ PERPULUNGEN JABU
RENDE : KEE No. 375 : 2 (ibabai nande)
https://www.youtube.com/watch?v=GLGaCwQWrUM
O Tuhan pakelah kami, ‘lah ngasup tutus nampati
Si labuh la jumpa dame, ‘lah geluhna jore
Reff : Bage kap pedah Tuhanta, si keleng-kelengen
Bage kap pedah Tuhanta, si sampat-sampaten
ERTOTO (ibabai bapa)
NGOGE KATA DIBATA : Jesaya 61:1-2
(ibabai sekalak anak )
RENUNGEN
Tema : Meritaken Kebebasen
Gereja si nggeluh e me gereja si ngelakoken diakonia (J.C. Sikkel). Kehadiren gereja lanai terjeng ngurusi ibadah tapi uga gereja hadir i tengah-tengah kegeluhen guna njabab persoalen-persoalen si jadi i bas doni enda. Genduari kita sangana i bas kecibal pandemi covid-19, si lenga erkedungen seh genduari. Kecibal enda labo terjeng peturah kebiaren, mbue si mate mpeturah ceda ate, mbue kalak lanai erdahin, usaha i tutup, kegiaten-kegiaten ibadah i rumah, lanai banci pulung-pulung, janah erga sinuan sinuan la tetap. Banci ikataken sangana mberat i bas kerina dampar kegeluhen.
Gereja i bas nehken kekelengen enggo muat bagin segelah mpenahangi baban si mberat i bas perpulungen. Pelayanen kekelengen enda lit telu e me:
(1) diakonia karitatif : enda i lakoken gereja mere kalak man, mere kalak uis, notoken kalak sakit, ras si debanna.
(2) Diakonia reformatif : bentuk diakonia enda fokus ku bas dampar pembangunen, contohna mbangun pusat kesehaten, penyuluhen, bimbingen masyarakat ras koperasi tapi labo masyarakat jadi subjek pelaku.
(3) Diakonia transformatif : e me bentuk diakonia si i kembangken Gereja Amerika Latin guna njabab persoalen kemusilen.
Kalak si melihe labo cukup ibere roti, erkiteken melihe ka reh denga mindo roti. Labo cukup ibere alat ngkawil ntah pe cangkul tapi uga ia i kepkep (idampingi ras i berdayaken) gelah geluhna berubah. Diakonia transformatif e me pemberdayaan masyarakat gelah ia banci ndarat i bas kemusilenna, lanai ia tergantung man kalak si deban.
I bas bahan renungen PJJta, Jesaya idilo ras isuruh Tuhan guna meritaken berita keriahen kerna kebebasen. Jesaya i suruh Tuhan nehken berita si mehuli man kalak musil, mpepalem kalak si getem pusuhna, meritaken kebebasen man kalak si tertaban, ras man kalak si i bas penjara enggo banci ndarat ia. Isuruhna momokenca maka enggo seh paksana Tuhan ngkawali bangsaNa, isuruhNa Jesaya ngapuli kalak si rate ceda. Man kalak Israel enda tahun si dem alu keriahen erkiteken kalak musil si ndube enggo ndayaken taneh ras rumahna iulihken bana, utang-utangna pe isasapken, budak-budak pe ibebasken (bdk. Im. 25).
Dibata nehken keleng ate man manusia guna mbebasken si tertaban, si pentang erpengidah, si cempang erdalan, si sakit i pepalem, kalak si melihe besur, kalak si itulak jelma sienterem, kalak si la ndatken keadilen ibere keadilen. Kebebasen si mbelinna enggo ibereken Dibata man banta e me arah Jesus Kristus i bas kematenNa i kayu persilang si mulahi kita i bas kuasa dosa nari. Pendilo enda seh man banta si enggo ngaloken perkuah ate Dibata. Mediate kita ku sekelewetta sabab nterem denga jelma ngenanami kecibal bagi si ituriken Jesaya 61:1-2.
Arah kitab Jesaya 61 ndai banci i gambarken kecibal jelma paksa genduari enda: kalak si musil secara ekonomi la lit perubahen janah tetap man sampaten. Kalak si terbatas secara fisik tetap nggeluh i bas kekurangen, lalap la mandiri. Kalak si getem pusuhna la ndatken pengapul. I bas kecibal si bagenda gereja idilo guna rukur ras nehken pelayanen mbebasken.
Pengalaman penulis ngidah kai silakoken gereja i Jerman, guna nampati si secara fisik kurang (disabillitas). Kalak e i berdayaken guna ngelakoken sada pendahin sue ras kecibal fisikna alu kerjasama ras piga-piga perusahaan janah e erbahanca ia mandiri ras secara materi lit ulih pencarinna. Contoh si deban banci arah pemberdayaan lewat peternaken umpamana: ngasuhi (beternak) kambing. Lit si mereken kambing man kalak si man sampaten Asuhina kambing e 2-3 tahun alu perjanjian adi nggo lit anakna kambing e ibereken man bana. Janah seh pagi waktuna iulihkenna kambing ndai sue ras jumlah si ibereken man bana. Arah e enggo lit kambingna ras arapenta ia pe pagi banci ngelakoken si bage man temanna. Gereja ras pemerintah banci kerjasama guna mereken keterampilen tertentu guna ngaturken sumber daya si lit i sekelewetta umpamana: tomat, jong, lacina, wortel si seh kal buena i Taneh Karo. Pemberdayaan jadi pelaku petani organik segelah terjaga kesehaten si lebih mehuli. E pe jadi peluang guna peningkaten ekonomi jabu ras kita pe sehat.
Kita i dilo guna ndahiken pelayanen, gelah arah kai silakoken kita mbue kalak ibebasken i bas perbebenna nari. Arah e pe banci teridah maka Kinirajan surga tangkas i bas doni enda.
NURIKEN PENGEJAPEN : Bapa, Anak, Nande
IRAKUT PERTUA DIAKEN/EMERITUS/PENDETA
DISKUSI
Nehken diakonia enggo semal ilakoken gerejata man kalak sakit, kalak si kena bencana ras ngapuli kalak ceda ate. Cuba dage si ukurken pelayanen si uga nge banci ilakoken gereja guna nampati temanta i bas ekonomina si mberat alu diakonia transformatif. Erkiteken enggo banci kita erbahan kerjasama ras pemerintah umpamana arah peternaken, perikanen ras genduari UMKM pe seh kel berkembangna.
RENDE : KEE No. 450 : 1 (persembahen)
https://www.youtube.com/watch?v=JpyiJPwRI10
Endesken kami man baNdu, sada bagin pemereNdu
Persembahen kami baNdu, gelah ialokenNdu
Reff : Pasu-pasuNdu min gelah, si tading i bas kami
AjariNdu dage kami, m’re persembahen baNdu
PERTOTON SAPAAT (ibabai sekalak anak/Bapa/Nande)
1) Persembahen
2) Siturah i bas jabu
3) Siturah i bas perpulungen
4) Segelah gereja ras pemerintah banci kerjasama i bas nehken
pelayanen man masyarakat
RENDE KEE No. 177 : 2
https://www.youtube.com/watch?v=QIkwZfIRbWs
Usekenlah kesahNdu sanga m’riah ntah susah
Cidahken kekelengenNdu, man gelemen kami lah
Yesus Kam arapen kami, kekelengenNdu tetap
Maka Kam lah teman kami, lalap seh rasa lalap
PERTOTON TUHAN (ibabai sekalak Pt/Dk/Em/Pdt)
MOMO
C. JEDA RAS PENUTUP
Pdt. Riyal Ginting, S.Si
HP/WA : 0813 9774 2023