Nande
HUT MORIA GBKP (16 Oktober)
Galatia 4:19-20
4:19 Hai anak-anakku, karena kamu aku menderita sakit bersalin lagi, sampai rupa Kristus menjadi nyata di dalam kamu.
4:20 Betapa rinduku untuk berada di antara kamu pada saat ini dan dapat berbicara dengan suara yang lain, karena aku telah habis akal menghadapi kamu.4:19 O anak-anakku si kukelengi! Erkiteken kam, ngenanami kiniseran aku sekali nari bagi sekalak pernanden asum mupus, seh biak Kristus lit i bas kam.
4:20 Mesikel kal aku ras kam genduari, gelah banci kusambari pengeranangku alu si deban man bandu. Aru kal ateku kerna kam!
Gelah PERMATA GBKP
- Ngangkai uga mbagesna keleng ate nande man anakna erpalasken nas.
- Ngasup ncidahken biak si mehuli gelah ula turah aru makan orangtua.
Metode: Aksi (erbahan kejutan guna ncidahken keleng ate man nande. contoh: membuat surat cinta berupa ucapan terima kasih, permohonan maaf, pujian dan janji)
I. BENA KATA
“O….nande kami kap anak-anakndu, kira-kirandu ibas kam latih erdahin e Lugejap tuhu nande kekelengenndu, si ugapana pe gengkenndu, getahna jore enda, kami anakndu.” Syair lagu si iendeken, penyanyi Karo, Plato Ginting, si judul “Nande” encidahken mbages kel keleng ate nande man anak-anakna Malai kin anak e has bertinna ijagaina anakna alu mehuli, ihabana anakna has bertinna siwah bulan dekahna, kenca siwah bulan seh me waktuna anakna e buh ku doni enda alu nggengken mesui bahkan kesahna jadi taruhenna pupusna e. Tapi kenca anakna tubuh ku doni enda, lupa ia kerna kinisuin igejabna erkiteken riahna ukurna ngidah anakna si mbaru tubuh e. Nande la pernah erkadiola nggo ngelahirken anakna ku doni enda, alu saber irawatna anakna kitik-kitik jarina, dingen iajarina kerna simehuli.
II. ISI
Paulus eme orangtua rohani man perpulungen Galati. Keleng ate si abelin si ibereken Paulus man perpulungen Galati igambarken bagi hubungan sande ras anak. Kata “o anak-anakku si kukelengi” ras “ngenanami kiniseran aku bagi sekalak pernanden asum mupus” encidahken pengorbanen si igejabken Paulus jadi bukti uga mbelinna keleng atena man perpulungen Galati. landingken bagi sekalak nande si mesui paksa mupus, Paulus pe nggejabken penderitaan batin, ceda ate, kinisuin paksa Paulus mpeseh kata Dibata man perpulungen e. Tapi penderitaan Paulus tertambari arah respons perpulungen nggit ngaloken berita kerna Dibata e. Perpulungen Galati ngaloken Kata Dibata alu meriah ukur. Tapi reh kenca godaan arah pengajaren si deban, perpulungen e nilah ibas Kata Dibata nari. Perpulungen Galati lanai ndalanken
Kegeluhenna sue ras kebenaren Kata Dibata. Ibas keadaan perpulungen si lanai erdalan Arah Kata Dibata, ngidah sie Paulus mulihi nggejapken mesui bagi suina sekalak nande paksa mupus. Paulus ertedeh makan gelah perpulungen Galati si nggo sirang ras Kristus banci iselamatken. Paulus sebagai orangtua rohani ngingetken perpulungen e mulihi gelah mulihken ku kebenaren Kata Dibata. Bagi Paulus singajarken kata Dibata man perpulungen i Galati, nande i tengah-tengah jabu pe rusur mereken kata ajar bagepe ngajarken kata Dibata man anakna gelah anakna banci jadi anak simehuli ras ngikutken kata Dibata ibas geluhna. Di kune anak e la ngikutken ajarna ras kata Dibata, pasti aru kel ate nande, sebab keleng kel ate nande nandangi anakna, la atena anakna nggeluh ibas kesalahen dingen erkadiola pepagin.
III. PENGEKENAINA
Mbelin kel pengorbanen sekalak nande man anakna. Nande la pernah ngkira uga buena si nggo iberekenna man anakna, erta, waktu, perhatin, pengorbanen, tenaga bahkan kesahna pe. Keriña iberekenna alu ikhlas, si penting anakna sehat, selamat ras bahagia. Sangat penting kel peranan nande bas kegeluhenta. Sekalak nande ngasup ngerawat sepuluh anak, tapi sepuluh anak lenga tentu ngasup ngerawat sekalak nandena. Kasih ibu sepanjang jalan, kasih anak sepanjang galah, keleng ate nande la lit batasna. Sekalak nande “orang tua tunggal” ngasup erdahin gelah anakna banci sekolah. Kai si nggo sibahan man nandeta? Si eteh nge kai si isukai nandeta? Kai makanan kesukanna? Hadiah kai si iarapkenna? Pernah nge si sungkun latih kam nande? Pernah nge si kataken kualuni kam nande gelah urak latihndu e? Pernah nge sikataken bujur man nande ibas kiniulinna e? Pernah nge kataken sentabi (maaf) man bana adi salah kita? Adi banci denga kita ngidah nandeta, ula sea-seaken kesempaten guna erbahanca ia bahagia. Adi kita ndauh ras ia erkiteken pendahin entahpe sekolah, usahaken tetap ngeluangken waktuta man bana.
Ibas Minggu enda nandeta Moria berulang tahun ke 65 tahun. Marilah si cidahken biak si mehuli man nande gelah malem atena man anakna. Adi gutul kidekah enda gundari nari robah kita. Sebab beban terberat man nande eme adi anakna la mehuli perbahanenna. Adi kita la megiken ajar orangtua ras Kata Dibata si bahan me mesui ukurna kerna perbahanenta. Ola kel si bahan aru ate nande ras pe aru Dibata erkiteken perbahanen si la mehuli. Tetaplah jadi PERMATA GBKP si engkelengi nande. Tetaplah jadi PERMATA GBKP si erkemalangen man Dibata
IV. AKSI
Minggu enda kategorial Moria GBKP berulang tahun ke-65 tahun. Mari capken Selamat Ulang Tahun man Moria (nandeta), sibahan aksi berupa surprise guna encidahken keleng ate mån nande, contoh: membuat surat cinta berupa ucapan terimakasih, permohonan maaf, pujian dan janji). Adi lit denga sandeta, bereken surat e langsung man bhana. Adi kita tading has perantauan, elpon ia ras ogeken suratta e. Adi ia nggo ras Bapa i Surga belasken surat cinta bas pertotonta. Iteruh enda contoh surat cinta berupa pujian man nande
Man nande karo si kukelengi,
O nande karoku…. kam me nande, malekat si nyata bas geluhku, perjuangenndu tuhu-tuhu mbelin gelah aku banci tubuh ku doni enda seh umurku gundari. Kam ngasup ngerawat ras njagai aku, ibas kam mbugi waktundu erdahin gelah tambah pemasuken keluargata. Amin gia padat kel legiatenndu, tapi la pernah lupa kam mereken perhatin ras keleng ate man bangku. Luar biasa kel kam nande, kam me jadi penggurunku guna jadi diberu si serba bisa ibas kerina hal. Kutatap ayondu tetap kam mejile aminpe umurndu lanai nguda. Mejile ayondu, mejile ukurndu… kam nandengku. Selamat ulang tahun nandeku sikukelengi. Ibas anakndu nari si melias metami
V. USULAN LAGU
- Di Doa Ibuku Namaku Disebut
- Cinta Untuk Mama
- Kesebut Selalu Namamu
Pdt. Tetty Hanna S. Br. Sinulingga, S. Psi, M.
Div Pendeta Tugas Khusus LITBANG GBKP
