JESUS MPELIMBARUI ORAT NGGELUH
(ADAT RAS BUDAYA)
Johanes 4 : 5 – 10
4:5 Maka sampailah Ia ke sebuah kota di Samaria, yang bernama Sikhar dekat tanah yang diberikan Yakub dahulu kepada anaknya, Yusuf. 4:6 Di situ terdapat sumur Yakub. Yesus sangat letih oleh perjalanan, karena itu Ia duduk di pinggir sumur itu. Hari kira-kira pukul dua belas. 4:7 Maka datanglah seorang perempuan Samaria hendak menimba air. Kata Yesus kepadanya: “Berilah Aku minum.” 4:8 Sebab murid-murid-Nya telah pergi ke kota membeli makanan. 4:9 Maka kata perempuan Samaria itu kepada-Nya: “Masakan Engkau, seorang Yahudi, minta minum kepadaku, seorang Samaria?” (Sebab orang Yahudi tidak bergaul dengan orang Samaria.) 4:10 Jawab Yesus kepadanya: “Jikalau engkau tahu tentang karunia Allah dan siapakah Dia yang berkata kepadamu: Berilah Aku minum! niscaya engkau telah meminta kepada-Nya dan Ia telah memberikan kepadamu air hidup.”
A. PERSIKAPEN
1) Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
2) Nikapken ingan persembahen.
3) Nungkun ras nuratken topik pertoton sapaat.
4) Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masing-masing, maka perdalanen PJJ ibabai bapa, nande, bage pe anak.
5) Sope benaken PJJ, banci kita rende alu make ende-enden KAKR.
6) Janah kerina perdalanen PJJ enda banci iubah (imodifikasi) rikutken perluna.
B. PERPULUNGEN JABU-JABU/ PERPULUNGEN JABU
RENDE : KEE No. 424 : 1 “Ipuji Kami Kam Dibata Si Mbelin”
(Ibabai Simada Jabu )
https://www.youtube.com/watch?v=LyHdP4iCMQs
I puji kami Kam, Dibata si mbelin
Alu ende-enden si meriah
Suari ras berngi, kawali kami min
Segelah la celus bas percuban
Reff : Sangap kap kalak, si ‘rnalem baNdu e
Daten tuah ras kesenangen pe
Sangap kap kalak, si ‘rnalem baNdu e
Daten tuah ras kesenangen pe
ERTOTO (Ibabai Simada Jabu/ Bapa)
NGOGE KATA DIBATA Johanes 4: 5 – 10 (iogeken sekalak anak)
RENUNGEN
Tema : Jesus Mpelimbarui Orat Nggeluh (Adat ras Budaya)
Kata ‘orat’ lit telu ertina i bas cakap Karo, e me; (1) orat= aturen, tata krama, adat; ‘rorat’= beraturen, bertata krama, beradat. (2) orat= guna, faedah, manfaat, contoh; lanai bo lit oratna, singetken pe. (3) orat= tanya, contoh; orati min kai kin sura-surana. Temanta enda sue ras pengertin si pemena, si nuriken kerna orat nggeluh si ratur bagi enggo ipedahken Dibata man bangsa pilihenNa.
Sekali paksa, Jesus i bas perdalinen nadingken Judea ku Galilea. IbentasiNa daerah Samaria. Sebab daerah e lit i tengah-tengah Judea i Selatan ras Galilea i Utara. Kalak Jahudi enterem tading i Judea ras Galilea. Adi la ate mentasi daerah Samaria, Jesus arus lewat jalur Timur Lau Jordan. Perdalinen reh dauhna banci seh 3 wari dekahna. Erkiteken si e Jesus milih mentasi daerah Samaria.
I bas perdalinenNa, Jesus singgah ku bas sada sumur si biasa diberudiberu kalak Samaria muat lau ku je. Tupung e pas ciger wari, melungen sumur e sabab labo semal kalak ku sumur ciger wari. Tapi lit sekalak diberu Samaria muat lau sekalak ku sumur e. Biasana diberu-diberu Samaria adi ku sumur erteman (erkelompok). Diberu enda enggo pangen si sada asangken erteman.
Seh kenca i sumur jumpa ia ras Jesus. Ipindo Jesus sitik lau man bana. Minter ieteh diberu e maka Jesus e me kalak Jahudi, banci saja arah logat ntah pe caraNa ngerana. Ieteh diberu e orat geluh kalak Jahudi maka la banci ngerana ras kalak Samaria apaika ras sekalak diberu Samaria. Ngerana pe la banci, apaika erjabu. Nina kalak Jahudi, Kalak Samaria e lanai murni Jahudi sabab kalak e enggo erjabu silang (perkawinan campur) ras bangsa non-Jahudi. Kalak Samaria e kafir, najis, lanai banci bengket ku rumah
pertoton. E maka lanai iakui kalak Jahudi kebenaren ibadah agama kalak Samaria. Contoh bas kegeluhen si teptep wari, piring si enggo ipake kalak Samaria, aminna pe enggo icuci lanai banci ipake kalak Jahudi. Bage me hebatna keterpisahan dua ras enda. E maka, situhuna Jesus la arus ngerana, apaika make timba si seri ras kalak Samaria guna muat lau inemen.
Tapi, pelayanen Jesus ngajari suku, ras bage pe agama. Orat nggeluh kalak Jahudi bage pe diberu Samaria perlu ipelimbarui. Ibenai Jesus percakapenNa ras diberu e alu mindo lau inemen. Sengget diberu e sabab ia tetap denga ngukurken orat nggeluh kalak Jahudi tapi Jesus ngerana kerna lau. Orat nggeluh kalak jahudi terjeng keperlun doni, kentisik ngenca janah la mereken keterkelinen. Lau si ate Jesus iturikenNa eme si mereken kegeluhen si rasa lalap. Ndauh perlun lau si maba kegeluhen asangken orat nggeluh si la ngasup ngaloken kalak si deban. La iangka diberu e kai si ikataken Jesus. I bas ukurna lau e si lit i bas sumur, si banci iinem gelah lanai muas. La mungkin Jesus banci muat lau e sebab lalit ibabaNa timba.
E maka ituriken Jesus erti lau si nambari muas i bas paksa kentisik bage pe lau si mereken kegeluhen si rasa lalap. Lau si nambari muas e lalap perlu sebab kenca iinem i bas paksa si kentisik muas denga ka. Tapi lau si ibereken Jesus e lau kegeluhen si tuhu-tuhu. Sekali lau e ialoken rasa lalap ndatken kegeluhen. Lau kegeluhen e me Kesah Si Badia (Joh. 7:39; Jes. 44:3; Jo. 2:28).
Percakapen Jesus ras diberu kalak Samaria enggo mpelimbarui pengakan kerna orat nggeluh si mehuli. Aturen-aturen adat si lit i bas doni enda kentisik ngenca ras la maba keterkelinen. Iajarken Jesus gelah kita kerina ngaloken lau kegeluhen, e me Kesah Si Badia. Orat geluh si ibabai Kesah Si badia e me nggit ngaku salah, nggit ngalemi salah, nggit erdame, ngaloken teman amin beda suku, ras agama ras kita. Kalak si sedekah enda la erteman, gundari enggo purpursage.
NURIKEN PENGGEJAPEN
1) Bapa
2) Nande
3) Anak
IRAKUT PERTUA/ DIAKEN/ EMERITUS/ PENDETA
DISKUSI
1) Orat nggeluh si apai nge si ipelimbarui Jesus i bas hubungen kalak Jahudi ras kalak Samaria?
2) Selaku kita kalak Karo, orat nggeluh si apai saja nge perlu ipelimbarui ras apai ka si perlu tetap sipertahanken i bas perkembangen jaman enda?
RENDE : KEE No. 445 : 1 (PERSEMBAHEN)
https://youtu.be/Bn0WbX7wnH8
Si pepulung me persembahenta
Si endesken dage man Dibata
Tanda m’riah ukur, ban pasu-pasuNa
Si simpar b’reNa man banta
Reff : Asa si nggo isikapken, asa si nggo itotoken
Em pengataken bujurta, kempak Dibata
PERTOTON SAPAAT
1) Gelah gereja-gereja si lit i bas doni enda tetap ipelimbarui Dibata (Nande)
2) Gelah i bas perbedan suku, budaya ras agama tetap lit kerjasama si mehuli i bas tantangen-tantangen sosial ras ekonomi (Bapa)
3) Persembahen, si mada jabu, perpulungen, ingan pulung si reh (Serayan Tuhan)
RENDE : KEE No. 212 : 5
https://youtu.be/-yqm2IpjaRs
Perkuah ate si mbelin, alokenlah dage
Lalit jumpa si terulin, bas Yesus ngenca e
PERTOTON TUHAN (ibabai sekalak serayan/ nande)
MOMO
C. JEDA RAS PENUTUP
Pdt. Amos Redy Ginting, S.Th., M.Sn.
HP/WA : 0821 6149 4067