Tanggal 03-09 Juli 2022
(Minggu II Kenca Trinitatis)
Ogen : Masmur 119:15-16
Tema : Kata Dibata Kap Ulu Kesenangan ras Kegeluhen
Tujun : Gelah Saitun:
- Tetap ermeriah ukur nggeluh sentudu ras peraten Na ibas geluhna sitep-tep wari
- Encidahken keriahen ukurna ibas ndalanken Kata Dibata, umpamana tutus ngoge Pustaka Si Badia, ndengkehken Kata Dibata arah IT (renungan ibas media social), PA
119:15 Aku hendak merenungkan titah-titah-Mu dan mengamat-amati jalan-jalan-Mu. 119:16 Aku akan bergemar dalam ketetapan-ketetapan-Mu; firman-Mu tidak akan kulupakan.
1. BENA KATA
Kesenangen e me jadi sada perayaken manusia. Janah erbage-bage si jadi tolak ukur manusia kerna kesenangen e. Lit deba kesenangen e terletak ibas hal-hal materi contohna erta ras jabaten ntah pe keduduken, lit ka deba kesenangen e terletak ibas hal-hal si menyangkut batin (pusuh bage pe perukuren). Arah bahan PA nta ibas minggu enda kita erlajar kerna pengalamen pemasmur si ngatakenca maka kesenangen e terletak ibas kita ndalanken undang-undang Tuhan.
2. MPEBAGESI OGEN
Masmur 119 enda e me masmur si ipake kalak Jahudi ibas perayaan paskah tep-tep tahunna. Pasal enda cukup gedang adi bandingken rás pasal-pasal sidebanna. Isina ngerana kerna keriahen nggeluh ibas ndalanken undang-undang Tuhan. Arah enda pemasmur naksiken maka Undang-undang Tuhan e me pengajaren, aturen, pengapul. keriahen ntah pe kemalemen ate. Masmur enda tuhu-tuhu merupaken kesaksin pribadi pemasmur si enggo mengalami erbage-bage persoalen nggeluh. Amin gia melala kalak isekelewetna sinadingken Tuhan erkite-kiteken erbage persoalen tapi pemasmur tetap setia erdalan ibas undang-undang Tuhan. Ibas pasal enda ituriken pemasmur man banta kai kin undang-undang Tuhan e, engkai maka perlu patuh man Undang-undang Tuhan, kai sidatken pemasmur ibas patuh nandangi undang-undang Tuhan, uga carana pemasmur ibas tetap patuh ndalanken undang-undang Tuhan, sie kerina tangkas ituriken pemasmur ibas pasal enda.
Khusus si jadi bahan PA nta sendah e me kerna pengakun pemasmur ibas ayat 15, ija pemasmur nggit ngkusur-kusuri ibas pusuhna dingen mpergermetken pelajaren siibere Tuhan. Ibas terjemahen b. Indonesia ikataken, “Aku hendak merenungkan titah-titah-Mu dan mengamat-amati jalan-jalan-Mu”. Merenungkan artinya memikirkan atau mempertimbangkan dalam-dalam, sedangkan mengamat-amati artinya melihat dan memperhatikan dengan teliti. Alu kata sideban, pemasmur la meros nandangi undang-undang Tuhan ntah pe Kata Dibata si ialokenna. Ikusur-kusur bas pusuh ras ipergermetken e me encidahken ketutusen guna ngangkai pengajaren Tuhan. Undang-undang Tuhan la terjeng ialoken bage-bage saja tapi ipelajari seh iangkai dungna mereken pengangkan simbaru man singalokenca, Ibas ayat 16 ikataken pemasmur maka meriah akapna ibas ndalanken undang-undang Tuhan janah la ilupakenna kata Tuhan. ljenda teridah maka pemasmur ibas ndalanken perintah Tuhan la akapna jadi sada beban simberat ntah pe sekedar kewajiban tapi jadi sada keriahen. Biasana kalak sindalanken perintah arah ukur si meriah siidalankenna e pe maba kiniulin subuk guna dirina bage pe sekelewetna. Contoh ibas kegeluhenta sitep-tep wari, kalak si ugal-ugalen bas dalan la hanya saja membahayaken dirina tapi kalak si sekelewetna e pe banci celaka erkiteken kelapatuhen nandangi undang-undang berlalulintas.
3. PENGKENAINA
Arah pengalamen pemasmur enda lit piga-piga hal si banci jadi pergegeh man banta, e me:
- Undang-undang Tuhan ibas pengertin pemasmur e me aturen, pengajaren, pengapul, keriahen dingen kemalemen ate. Emaka jadi keriahen akapna guna ngkusur-kusurisa ibas pusuhna dingen mpergermetkenca. Mpelajari Kata Dibata la jadi beban ntah pe sekedar kewajiben tapi jadi sada keriahen si mpeturah kemalemen ate.
- Ibas kerina situasi kegeluhenna pemasmur tetap setia nggelem undang-undang Tuhan dingen ndalankensa ibas kegeluhenna sebab e me kemalemen atena.
- Mulai kin masa pandemi reh kutengah kegeluhenta, khusus na man banta si nggo lanjut usia ibahan aturen bas gerejanta, maka lanai kita banci pulung ntah pe erPA. Sie ula min erbahanca kita ngadi erlajar kerna Kata Dibata. Sebab itengah-tengah kecanggihen teknologita sigenduari enda, amin gia la kita jumpa secara langsung, banci ka kita megiken kata Dibata arah media social facebook. youtube, ikut pulung arah live streaming ntah zoom. Situasi la erbahanca kita ngadi erlajar kerna Kata Dibata sebab Kata Dibata e me ulu kesenangen ras kegeluhen bagi siisaksiken pemasmur arah ogenta enda.
4. PERTOTON
O, Tuhan bujur ibas pengertin simbaru siberekenNdu man kami. Ajari kami guna tutus megiken ras ngukuri KataNdu segedang-gedang kegeluhen kami, sebab e me kap keriahen situhu-tuhu. Sampati kami guna nggeluh ibas KataNdu katawari paksa pe. Amin
5. DISKUSI
- Cuba turiken pengalamenndu si erbahanca senang kel akapndu ibas ndalanken Kata Dibata.
- Ibas usia si nggo lanjut genduari enda, kai saja siilakokenndu gelah tetap nggit erlajar kerna Kata Dibata?
Kata-kata bijak:
Tuhan tidak melarang kita kaya, pintar atau
populer, tetapi melarang jika itu menghalangi
kita untuk datang kepadaNya
Adi sekolah perlu kepe pulpen
Rumah i kota Medan perlu ka ac
Adi kita enggo kalak Kristen
Ulanai min siasuhi pinakit acc