PEJORE UKUR KU SI BENAR
1 Korinti 15:33-34
(Hari Anti Narkoba)
15:33 Janganlah kamu sesat: Pergaulan yang buruk merusakkan kebiasaan yang baik. 15:34 Sadarlah kembali sebaik-baiknya dan jangan berbuat dosa lagi! Ada di antara kamu yang tidak mengenal Allah. Hal ini kukatakan, supaya kamu merasa malu.
A. PERSIKAPEN
* Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
* Nikapken ingan persembahen.
* Nungkun ras nuratken topik pertoton sapaat.
* Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masing-masing, maka perdalanen PJJ ibabai bapa, nande, bage pe anak.
* Sope benaken PJJ, banci kita rende alu make ende-enden KAKR.
* Janah kerina perdalanen PJJ enda banci iubah (imodifikasi) rikutken perluna.
B. PERPULUNGEN JABU-JABU/ PERPULUNGEN JABU
Rende KEE No. 323:1 “SURA-SURA DAGING LAWANLAH”
(ibabaiAnak)
Dilaki : Sura-sura daging lawanlah tetap
Je di la kam talu tambah gegehndu
Diberu : Sura-sura jahat simbaklah tetap
Ngaraplah man Yesus tentu kam menang
Kerina : Reff. Pindo gegeh man Tuhan gelah kam lalap paguh
I’breNa kita menang menahang ras senang
Ertoto (Ibabai Nande)
Ngoge kata Dibata (ibabai Bapa)
Renungen : 1 Korinti 15:33-34
Tema : Pejore Ukur ku Si Benar
Kitab 1 Korinti e me surat Rasul Paulus si pemena man kalak Korinti erkiteken lit turah persoalen kerna kegeluhen ras kiniteken Kristen i bas gereja si enggo ipanteki Rasul Paulus i Korinti. Kitab 1 Korinti 15 ngerana kerna kekeken Kristus. Rasul Paulus ngatakenca i bas 1 Korinti 15:33, ola papak erkiteken
pergaulen si la mehuli ncedaken biak si mehuli. Memang manusia e me kap makhluk sosial si banci erteman ras ise pe, tapi situhuna pertemanen banci saja sipat ras perbahanenta. Adi kita erteman ras kalak mehuli kita banci jadi mehuli sebalikna adi kita erteman ras kalak jahat banci kita pe jadi jahat. Dibata labo ateNa kita ceda alu perbahanen si jahat, tapi Badia min kita iadepenNa. Paulus pe mpersingeti kita gelahna ola melantar i bas pergaulen. Si ikataken Paulus enda nuriken kerna ija lit sada pengajaren la ia tek nandangi kekeken Kristus janah enda nggo mbar i bas perpulungen Korinti. E maka Paulus mpersingeti alu tangkas maka ula min lit ndabuh perpulungen e ku bas pengajaren si papak. Perpulungen Korinti arus megermet gelahna ula min ceda kebiasan si mehuli si sedekah enda nggo idalanina. 1 Korinti 15:34 Paulus ngatakenca “Pejorelah ukurndu ku si benar, janah olanai bahan dosa.” Ijenda Paulus mulihi ningetkenca man kalak si enggo erkiniteken gelahna sadar janah ula min terpengaruh ku bas ajaren singatakenca lalit kekeken Kristus. Paulus ngatakenca maka lit piga-piga i bas perpulungen e langa nandai Dibata seh maka labo ia tek nandangi kekeken Kristus. Guna si e, Paulus mpersingetisa megermetlah i bas pergaulen gelah ula ceda kiniteken kalak Korinti.
I bas paksa genduari pe perlu nge kita metenget i bas pergaulenta erkiteken mbue kel tawaren si erbahanca kita papak salah sadana e me narkoba. Paksa genduari lanai bo ipilihina ise si banci ikenai narkoba enda, mulai i bas anak-anak, orang muda seh ku bas orang tua nggo ikenaina. Adi sekalak jelma nggo make narkoba enda lit dampakna nandangi kegeluhenna bage pe nandangi sekelewetna.
Nandangi dirina
* Ganggun saraf, jantung, peredaren dareh, paru, kulit (alergi simekelek), mesui takal ras si debanna.
* Erdahin asal-asalen, kurang nangkap, rusur mbiar
* Kurang tek nandangi ise pe termasuk man dirina
* Lagu langkahna kasar, la meteh mehuli
* Nggit niksa dirina, la lit ketenangen, lit sura-surana lako munuh bana.
* Pendidikenna terganggu e maka masa depanna pe labo ertentun Nandangi sekelewetna
* La nggit erteman ras ise pe janah ipekitik i bas sekelewetna
* Nambahi perbeben keluarga
Ngidah situasi enda perlu kal kita selaku orang tua mperdiateken anakta mula kitik nari si ajari erkemalangen man Tuhan, si dampingi i bas kerina fase pertumbuhenna. Bicara sibuk pe kita erdahin sempatkenlah waktuta ras anakta guna bermain, cerita gelah anakta ndatken kekelengen ras perhatin arah kita. Sebage lembaga gereja perlu kita erbahan seminar nandangi anak-anakta kerna bahaya narkoba, mutar film kerna bahaya narkoba. Tapi si pentingna kal ula lupa kita lalap mpersingeti kerna anggota jabuta gelahna ula min sempat ndabuh ku bas pemaken narkoba. Selaku anak Dibata mela min kita guna ngelakoken si la mehuli i bas geluhta. Bagi tersurat i bas Roma 12:2 “Ola pelepas dirindu jadi seri ras doni enda, tapi berelah maka perukurenndu ipelimbarui Dibata. Alu bage banci idatndu kai sura-sura Dibata, kai si mehuli, kai si ngena ateNa, janah kai si sempurna”. Tuhu kata enda ngingetken kita maka aminna pe sekelewetta nawarken si jahat man banta ula terpengaruh. Pejorelah ukurta katawari pe gelahna banci kita ndalanken si benar i tengah-tengah kegeluhenta.
Nuriken penggejapen
* Bapa
* Nande
* Anak
* Saitun
* Ikuhi : Pertua/Diaken/ Pendeta
Sharing
- Turiken pengalamenta uga pengkebet jelma si ketergantungen narkoba!
- Kune lit anggota jabundu tergantung narkoba kai nge arus ilakokenndu?
Persembahen,
Rende KEE No. 451:1, MALERLAH PASU-PASUNDU
(Ibabai Nande)
Malerlah pasu-pasuNdu, bagi ni padankenNdu
Gegeh ras ukur sipaguh, tetap iberekenNdu
Reff : Pasu-pasuNdu, em ulu gegeh kami
Enggo kap maler me tuhu, si ndemi geluh kami
Pertoton Sapaat
- Persembahen
- Kerna kalak si enggo ketergantungen narkoba ras ingan rehabilitasi narkoba
- Kerna jabu kundulen ras si turah i bas perpulungen
Rende KEE No. 423:1 KAM NEBUSI AKU TUHAN (ibabai pengurus PJJ)
Kam nebusi aku Tuhan, Kam si mpeteneng tendiku
Tendi sindube tertaban, teguNdu ku adepenNdu
Reff : Malem kal ateku Bapa, ban keleng ateNdu
Kupuji gelarNdu Bapa, mulia gelarNdu
TeguNdulah aku Tuhan, i bas pusuhku Kam ringan
PetetapNdu aku Tuhan, ‘lah dosa talu me ku ban
Pertoton Tuhan
- Ibabai sekalak serayan Tuhan Pt/Dkn/Pdt
- Adi pjj ilakoken i rumah banci ibabai Bapa/Nande/Anak
Momo
Pdt. Salonika br Ginting, M.Th.
HP/WA : 0813 6404 4063