ERTA RAS KEBAYAKEN I BAS TUHAN NARI
1 Kronika 29:10-14
(Persembahen Kerja Rani)
10 Lalu Daud memuji Tuhan di depan mata segenap jemaah itu. Berkatalah Daud: ”Terpujilah Engkau, ya Tuhan, Allahnya bapa kami Israel, dari selama-lamanya sampai selama-lamanya.
11 Ya Tuhan, punya-Mulah kebesaran dan kejayaan, kehormatan, kemasyhuran dan keagungan, ya, segala-galanya yang ada di langit dan di bumi! Ya Tuhan, punya-Mulah kerajaan dan Engkau yang tertinggi itu melebihi segala-galanya sebagai kepala.
12 Sebab kekayaan dan kemuliaan berasal dari pada-Mu dan Engkaulah yang berkuasa atas segala-galanya; dalam tangan-Mulah kekuatan dan kejayaan; dalam tangan-Mulah kuasa membesarkan dan mengokohkan segala-galanya. 13Sekarang, ya Allah kami, kami bersyukur kepada-Mu dan memuji nama-Mu yang agung itu.
14 Sebab siapakah aku ini dan siapakah bangsaku, sehingga kami mampu memberikan persembahan sukarela seperti ini? Sebab dari pada-Mulah segala-galanya dan dari tangan-Mu sendirilah persembahan yang kami berikan kepada-Mu.
A. PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen.
- Nungkun ras nuratken topik pertoton sapaat.
- Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masing-masing, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden KAKR.
- Janah kerina perdalanen PJJ enda banci iubah (imodifikasi) rikutken perluna.
B. PERPULUNGEN JABU-JABU/ PERPULUNGEN JABU
RENDE : KEE No. 163:1,2 (Ibabai anak)
https://www.youtube.com/watch?v=Xf1A8ifhPSc
Badia, badia, Tuhan si erkuasa
Dem me doni enda, salu kemulianNa
Badia, badia, Tuhan bala surga
Kam me kap Bapa, si ermulia
Badia,badia, Bapa si perkuah
Reh kerina kami alokenNdu gelah
Badia, badia, Tuhan maba tuah
Reh kami enda baNdu ersembah
ERTOTO (Ibabai anak)
NGOGE KATA DIBATA : 1 Kronika 29:10-14 (Iogeken anak)
RENUNGEN
Tema : Erta Ras Kebayaken I Bas Tuhan Nari
Nehken persembahen man Tuhan e me tanggungjabab kalak Kristen. Persembahen e jadi bukti pengakunta nandangi kuasa Tuhan si masu-masu ras mereken rejeki ku bas geluhta si teptep wari. Sabab arus si akui, maka kerina si lit i bas kita, rehna i bas Dibata nari. Dibata enggo nikapken kerina keperlun gelah ngasup kita nggeluh (bdk. Kejadin 1,2 Dibata nepa doni ras kerina isina). Dahinta e me ngusahai ras njagai kai si enggo i jadiken Dibata e (bdk. Kejadin 2:15). Tambah si e, kenca si dahiken dahinta, Dibata masu-masusa alu pesusur udan, berekenNa matawari, oksigen (O2), ras pe ukur si erlayas ras mata kiniteken gelah si idah maka Dibata ikut erdahin i bas kai si enggo si dahiken. Alu gendek kata, i bas kerina si idahiken kita, lit “faktor luar” dirinta si berperan penting, e me Dibata. Dibata me si ngkuhi kerina si enggo ras si nandangi si ilakoken kita (bdk. Masmur 127:2). I bas cara rukur si bage rupana me maka meriah ukurta nehken tanggungjababta e me maba persembahen si mehulina kal man Tuhan.
I bas kitab 1 Kronika 29:10-14, i je enggo terang kal ituriken Daud puji-pujin ras penggejapenna kerna kuasa Tuhan i bas geluhna ras bangsana Israel. Kai nina Daud?
- Tuhan Dibata nu nini kami Jakup, terpujilah Kam asa lalap seh rasa lalap. Engkai? Perban: Kam kap si mbelin, si mehulina, si Mada Kuasa, Kam si mada langit ras doni, Kam kap raja, Kerina erta-erta ras kebayaken rehen i bas Kam nari nge, Janah Kam ngasup erbahan kalak jadi si mbelin dingen erkuasa (jabaten).
Kenca bage puji-pujin (pengakun) Daud man Tuhan, e maka i umputi alu tindaken berikutna e me (ayat 14):
- Sabab bangsangku ras aku tuhu-tuhu la ngasup mere man baNdu,
- Sabab kerina ialoken kami i bas Kam nari nge
- Janah kami ngulihkenca ngenca man baNdu kai si enggo iberekenNdu man kami.
Daud selaku raja, i bas ia lit kuasa (jabaten), erta (kebayaken), kemegahen doni, nggejapken maka labo ia ngasup mere man Tuhan sabab kai si lit bas ia, igejapkenna rehna i bas Tuhan nari. Ertina, kai si lit i bas Daud, bangsa Israel bage pe si lit bas kita, e kerina rehna i bas Tuhan nari. Tuhan merekenca. Tuhan uluna. Dibata ngasup mereken kai pe si iperluken jabunta. Aminna gia Dibata ulu sinasana, labo ka kita lanai mereken persembahennta man Tuhan.
Cara rukurta e me : perban Dibata ulu kerina keperlun (kebutuhen) geluhta, arus lit pengakunta, pengerganta, ras lit pengataken bujurta man baNa e me persembahen. Persembahen jadi alat (dalan) guna ngakui, nembah ras mpermuliaken Dibata si mpekenakena kegeluhenta (Sang Pemelihara Kehidupan). I bas sigejapken Dibata mpekena-kena kegeluhenta, si kataken bujur man baNa alu nehken persembahen.
I bas gerejanta GBKP lit erbage-bage bentuk persembahen si enggo semal e me persembahen i bas Kebaktin/PJJ/PA/Retreat berupa kolekte. Persembahen Riah Ukur erdandanken kesehaten, pendahin, anak, persekolahen. Persembahen Persepuluhen/bulanen arah penggejapen kinitekenta ija Dibata nemani pendahinta tiap bulanna. Persembahen Kerja Rani setahun sekali nginget ras nggejapken uga Dibata masu-masu ulih juma, usaha ras pendahinta, ras si debanna. Intina, aminna gia lit si seri bentukbentuk persembahen enda, tujunna ngingetken kita gelah tetap si inget ngakui, ngataken bujur ras mpehaga Dibata i bas kegeluhenta. Ras biasana, labo pernah kekurangen ise saja si nehken persembahenna alu tutus, tulus, ras meriah ukur.
I bas Tata Laksana BAB XLII (42), Pasal 179-184, Tata Gereja GBKP 2015-2025, maka kerina persembahen ta e khususna Kolekte kebaktin Minggu, Persepuluhen, ras Kerja Rani enda, 60% tading i Runggun, janah si 60% e iaturken Runggun ka pembaginna ku Bajem/Perminggun ras PJJ, janah 40% isetor Runggun ku Klasis/Moderamen. Si 40% enda i pakeken gerejanta guna biaya gaji Pendeta, tunjangen Moderamen/BPMK, ras Program kerja tiap tahunna. Pemasuken gerejanta GBKP si galangna arah pos anggaren si 3 enda e me Kolekte Minggu, Persepuluhen ras Kerja Rani. I tambahi ka arah persembahen Kebaktin 3 Pekan-Pekan, Lakon Persadan Si Badia, Pemasu-masun, Mengket Rumah, Retreat (terdauhen banci si nen Tata Gerejanta). Janah alu pertoton ras dukungenta kerina Serayan ras perpulungen ni Tuhan, maka banci keuangen gerejanta GBKP enda stabil, ras si arapken surplus min. Alu bage melala program banci si lakoken.
I bas kondisi pandemi Covid 19 enda, ntah enggo nge perlu kita nambahi pemasuken keuangen gerejanta arah Bidang Usaha, misalna Juma Runggun/Sektor, Toko Sembako Diakonia, kolam ikan, pangkas buk, kuliner khas Karo, sembur, minak, kerajinan tangan ras si debanna sue ras potensi si lit i bas inganta masingmasing. Arihken i bas Runggunta uga maka payo ras tengteng.Terpuji Tuhan arah pelayanennta.
NURIKEN PENGGEJAPEN (Bapa, Nande, anak)
IRAKUT BAPA/NANDE (Adi i bas jabu), Serayan (i rumah, Gereja entah zoom)
DISKUSI
- Turiken pemahamenta kerna ayat 14 bahan PJJ-ta enda.
- Kai dage upayanta gelah stabil (adi banci surplus) keuangen gerejanta GBKP enda?
RENDE : KEE No. 354:3 (PERSEMBAHEN)
https://www.youtube.com/watch?v=kWee7ydJH_0
Genduari o Dibata, ku sehken bujur baNdu
Terpuji Kam si mada k’rina, si ngkelengi kegeluhenku
Reff : Sinalsal keleng ate Tuhan, bagi emas si labo luntur
Rejin tuhu dolatNdu Tuhan, ngarak-ngarak kegeluhen
PERTOTON SAPAAT
a. Kerna pendahin, usaha, sinuan-sinuan, asuh-asuhen ras si debanna.
b. Gelah reh ngasupna kita kerina ngangkai erti nehken persembahen
c. Gelah keuangen GBKP banci surplus.
RENDE : KEE No. 290:3
https://www.youtube.com/watch?v=CW_YNHCWKR0
Labo erkiteken ertangku, labo erkiteken bayakku
Tapi perbahan pemereNdu, pasu-pasuNdu simpar bangku.
PERTOTON TUHAN
MOMO
C. JEDA RAS PENUTUP
Pdt. Jekson Barus, M.Th.
HP/WA : 0813 7027 3729