(Remisnicere)
Ogen : Jesaya 40: 29
Tema : Tuhan Ulu Gegeh
Tujun : Gelah Saitun:
- Tetap tek maka Tuhan e ngenca ulu gegeh ras jadi penundalen ibas geluhna
- Ergiah-giah ka mpetetap ukur kalak si ngelabuh guna mindo gegeh man Tuhan
40:29 Dia memberi kekuatan kepada yang lelah dan menambah semangat kepada yang tiada berdaya.
- BENAKATA
Salah sada kesemalen simehuli ibas kita kalak Karo eme sisampat-sampaten ibas ndahiken dahin peradaten, Kerina pihak ikut muat bagin, sembuyak, kalimbubu, anak beru ras teman meriah. Seh maka kuga belinna pe dahin e. dung kerina alu mehuli. Keberhasilen dahin e itentuken oleh gegeh keersadaan arih. Adi ersadalah arih, ibas kai pe lalit si la terdungi, la kita kemalun. Sukut si mada kerja megegeh ras tetap pe ukurna.
Adi secara manusia tah secara peradaten pe enggo nge biasa kita sitatang-tatangen, sisampat-sampaten, emaka ibas PA nta wari enda mari sipebagesi ka tole kinitekenta kerna ulu gegeh tah pe penampat si rehna ibas Dibata nari.
2. MPEBAGESI OGEN Kuasa Dibata
Tupung bangsa Israel ibuang ku Babel, melala perbeben sinialamina. Kelsehen perpulungen. Lanai lit pengarapenna. Jungut-jungut bangsa e, tempa-tempa lalit Dibata. Tempa-tempa la iidah Dibata kesusahen bangsa e (Yes 40:27). Emaka ipersingeti Dibata bangsa e gelah tetap min ingetna Dibata sebab Dibata e me: Si nepa don enda, kundul bas kursi kinirajanNa, Dibata si ngkimbangken langit desken kire-kire si mbelang desken kemah man ingan tading Kuasa raja-raja i doni idabuhken Na. Dibata si nepa bintang-bintang i langit, Dibata si ngaturkenca kerina bintang e. janah letehna piga beliganna, janah sada-sadai idiloNa rikutken gelarna. Perbahan bage belinna Kuasa Tuhan e, lalit sada pe ibahan Na bene. (Yesaya 40: 21 -26). Adi bagekalbelinna Kuasa ras Gegeh Dibata e, arusna min bangsa Israel labo perlu mbiar amin pe mbue kiniseran. Tapi kinatana, bangsa e ngelabuh, latih akapna.
KALAK SI LATIH RAS NGELABUH IBEREKEN DIBATA GEGEH
Erdandanken si e me erpadan Dibata nampati bangsaNa bagi nina ibas ogenta ndai: “Man kalak si latih ibereken Na gegeh, itambahina gegeh man kalak si ngelabuh”. Ibas Kitab Heber pe Dibata erpadan man manusia si tek: “Asa ndigan pe la kam Kutadingken, asa ndigan pe la kam Kupulahi (Heber 13: 5c). Kata “asa ndigan” ertina asa umur manusia nggeluh, mulai kin tubuh she metua pe la pernah itadingken ras ipulahi Dibata. Dibata jadi ulu, sumber gegeh ras kegeluhen manusia si tek.
3. PENGKENAINA
Banci jadi selaku Saitun pernah seri perbebenta ras bangsa Israel ndai. Mawen bene pengarapenta, kote daging kulanta, sakit kita, jungut-jungut kita, kelsehen kita, terlebih erkiteken Covid-19 kita I batasi ku Gereja, latih ras ngelabih kita, semangat ras kinitekenta surut. Adi secara manusia latih ras ngelabuh kita. e nuduhken maka lanai lit gegehta, kote janah banci sakit pe. Perlu ibereken penambahi gegehna, misalnya tambar, vitamin, pangan si ntabeh, cukup istirahat. Jadi sekalienda, Dibata erpadan mereken gegeh man banta kerina si latih ras ngelabuh. Desken vitamin ndai, mari sibahan Dibata jadi “Vitamin” kinitekenta Erkiteken pertambahen umur, banci saja dagingta enda rusur mesui, sakit, lanai megegeh, tapi kinitekenta tetaplah megegeh alu gegeh si rehna ibas Dibata nari.
Dibata si ngerana man bangsa Israel e. Dibata si e ka nge si isembah kita wari enda. Adi doni ras kerina tinepaNa itandai Dibata kerina, bagepe bintang-bintang i langit sibage buena pe ieteh Dibata beliganna, idiloNa rikutken gelarna, maka kerina Saitun se GBKP pe itandai, itemani ras ieteh Dibata gelarta sekalak-sekalak. Malem kal ateta ari.
Emaka adi nggo kita tek ras ngaloken gegeh bas Dibata nari, pakeken ka dage kerina talenta si lit ibas kita asa ngasup ras gegehta, rende kita tiap wari, oge tah begiken Kata Dibata, sitelphoni tah sidahi temanta Saitun si sakit bagepe kute kinitekena Petetap ukurna pe maka Dibata la pernah nadingken ia
4. PERTOTON
Raduken permazmur ibas Mazmur azmur 25: 4.5 mari ertoto kita man Dibata, ras-ras kita melaskensa:
“Ajari aku O Tuhan kerna peratenNdu, petangkas kai si arus kulakuken. Ajari aku O Tuhan erdalan arah kebenarenNdu, sabab kam kap Dibatangku. Kam kap si ngkelini aku, man baNdu aku lalap ernalem” Amin
5. METODE PA: DISKUSI
- Kuga penggejapenndu tupung ibegindu ndai Kata Dibata si ioge kita, eme “Man kalak si latih iberekenNa gegeh, itambahina gegeh man kalak si ngelabuh” Turiken penggejapenndu!
- Diskusikendulah dingen aturken waktundu guna mpetetap ukur anggota Saitun bas sektor tah runggunta si mungkin paksana kote genduari daging kulana ntah pe kinitekenna.
Kerja meriah I kuta Buluhnaman
Buluh lidi mejile man suling
Si ngikutken Yesus ise pe atan
Asal ukurna ola sempat seding
Kata Kata Bijak
Kegagalan atau keberhasilan seseorang dalam hidupnya ditentukan oleh sikap hatinya, baik atau tidak