(Invokavit)
Ogen : Efesus6:19
Tema : Pembarken Berita Simeriah
Tujun : Gelah saitun:
- Ikut pembarken berita keselamaten si rehna ibas Jesus Kristus nari
- Ngarihken guna erbahan pertoton khusus subuk secara pribadi ntah pe ras-ras gelah jadi kesemalen saitun, tandana ikut muat bagin i bas dahin pembarken Berita Simeriah
6:19 juga untuk aku, supaya kepadaku, jika aku membuka mulutku, dikaruniakan perkataan yang benar, agar dengan keberanian aku memberitakan rahasia Injil
- BENA KATA
Pembarken Berita Simeriah eme dahin si la banci lang arus isehken ope denga Jesus Kristus reh sipeduakaliken, Dahin e enggo iendesken Tuhan Jesus man kerina ajarNa sienggo leben ngaloken Berita Smeriah e sanga Jesus nggeluh denga ras IA, ope denga IA nangkih ku surga. Man kalak si enggo ngaloken Berita Smeriah arus maka ipembarkenna ka Berita Simeriah e ku sekelewetna segedang-gedang geluhna. Pembarken Berita e jadi tanggungjabab, si banci teridah ibas keadaan si kugapana pe, meriah ukur ntah pe susah, sanga nguda entah metua, tupung sehat entah pe sakit, cocok entah lang pe paksana ras sidebanna. Pembarken Berita Smeriah arus tetap ilakoken.
- MPEBAGESI OGEN
Surat Efesus, isuratken Paulus tupung ia ibas penjara. Penjara, erbanca ruang gerakna terbatas, lanai banci bebas jumpa ras kalak sideban, la bebas ku jah kuje. lbas situasi siterbatas, i penjara, la ngkurangi semangatna guna pembarken Berita Smeriah man kalak sideban. Ipergunakenna kesepatan i penjara guna erban surat ras notoken kerna pendahin pebelangken Berita Simeriah ku belang-belang doni. Kalak sinehken Berita Simeriah, banci saja lit kalak si ngolangi ntah pe ngambatisa tapi Berita Simeriah e la banci iambati, ise pe la banci mpengadisa sabab Berita Smeriah e, eme kuasa ras keleng ate Tuhan siisehken Na guna nelamatken manusia.
Rasul Paulus mindo perpulungen gelah tetap notoken la selaku perberita simeriah. Sabab igejabkenna maka Dibata nge singajari ia guna ncibalken Berita Simeriah e alu payo aminna I bas situasi si sulit. Gegeh toto tuhu-tuhu igejabken Rasul Paulus sierbahanca maka ia tetap megegeh. Janah ibas perpulungen notoken ia, maka situhuna perpulungen e pe enggo muat bagin pembarken Berita Smeriah.
Erdandanken nehken Berita Simeriah ia maka ipenjaraken. Ibas situasi enda iidahna maka ia itekan, ibatasi, iolang-olangi, iukum erdandanken pembarken berita e. Igejabkenna maka, nehken dahin erberita labo mesunah. Emaka labo banci gegehna saja ipenalemna, adi gegehna ipenalemna labo ia ngasup. Banci saja kebiaren turah ibas dirina. Erdandanken sie, maka tole ipindokenna man perpulungen gelah itotoken ia, alu bage maka pang ia mpetangkas Berita si Mehuli e. Ibas sie teridah maka Rasul Paulus nandai dirina, ietehna kekurangen ras keterbatasenna, ietehna ise si banci nampatisa, eme kap DIBATA. Janah perlu iakapna maka labo terjeng ia ngenca ertoto guna ia, tapi pe ikut ras perpulungen. Alu bage nterem kalak sinotokenca, maka reh belinna kengasupen ras kinipangenna guna nehken Berita Smeriah, aminna pe ia arus ngenanami kiniseran.
- PENGKENAINA
Kerina kalak si enggo ngaloken Berita Simeriah, arusna orat geluhna enggo encidahken kegeluhen si erberita simeriah, ibas rukur pengerana bagepe perbahanen alu ia ngenen ise ia, ija nari rehna, piga tahun umurna, bayak ntah musil ia ras sidebanna. Kerina, la erndobahen arus kegeluhenna erberita simeriah. Alu bage ngataken maka enggo Saitun pe la jadi alasen maka la erberita, umpamana enggo metua, lanai lit gegeh, lit penakit ras alasen sidebanna, la banci jadi alasen guna la er Berita Simeriah. Erberita simeriah eme bagian geluh, keriahen geluh kalak si tek. Emaka labo banci ipeserap geluh kalak si tek ras erberita si meriah. Bagi sada kula, ibas kula e la banci ipeserap ia ras tanna. Adi kula la ertan, cacat gelarna. Bage me pe kalak si tek, adi la raduken ras erberita simeriah e pe cacat gelarna.
Banci saja gegehta enggo terbatas (kurang) tapi kuasa Berita Simeriah e sierbanca ukurta tetap erburak-burak guna naksiken Berita Simeriah e ku sekelewetta. Arah totonta si la banci ibatasi ingan ras waktu eme salah sada caranta muat bagin i bas nehken Berita Simeriah.
Totoken kerina anak-anak Dibata ijapa pe gelah tetap pang ras megegeh nehken Berita Simeriah aminna mbue pe tantangen ras hambatenna. Totoken gelah benih Berita Simeriah siipembarken banci turah alu mehuli janah erbuah meramis sebab Tuhan si masu-masusa
Selaku kalak sierkiniteken, sibahan pertoton kerna dahin erberita simeriah jadi salah sada topik pertoton syafaatta. Alu bage maka Berita Simeriah tetap ipembarken. Kerina perberita simeriah la mbiar, tetap ukurna aminna gia erbage-bage tantangen siengkenai geluhna. Erbage-bage singolangisa, banci saja erbage kiniseran pe jadi. Tapi kerina enda la jadi kebiaren, tapi jadi keriahen ras nambahi semangat.
- PERTOTON
O Tuhan pengasupNdu kami sienggo ngaloken Berita Simeriah e maka tetap ergiah-giah ukur kami lako meritakenca ku kalak si lit isekelewet kami. Aminna mbue pe tantangen, i bas sie turahlah Berita Simeriah si isuanken anak-anakNdu maka reh teremna kalak singaloken keselamaten arah Jesus Kristus, Juru Selamat kami. Amin
- DISKUSI
- Rikutken bahan PA-nta, kai saja bentuk kebiaren ibas pembarken Berita Simeriah ibas jaman enda?
- Kai sibanci silakoken guna encidahken tanggung jababta muat bagin nehken Berita Smeriah rikutken kecibalta selaku Saitun genduari?
Ketadu langkem ndelmat bas batang kayu
Enda entebu nanamna nginem tengguli
Nehken Berita si Meriah la perlu mela-malu
Sabab e me dahin si mehuli
Kata-Kata Bijak:
Jadilah pribadi yang sabar, tekun dan tetap tenang menanti pertolongan Tuhan