(Minggu Septuagesima)
Ogen : Kuan kuanen 4:23
Tema : Pusuh si mabai kegeluhen.
Tuiun : Gelah Saitun:
- Tetap njaga ras makeken perukurenna lako mereken terang si ersinalsal ras mereken buah simehuli
- Meteh ras kai ulihna “Adi kita manjar anjar rukur” ras “meter- meter rukur”
4:23 Jagalah hatimu dengan segala kewaspadaan, karena dari situlah terpancar kehidupan.
I. BENA KATA
Isi Kitab Kuan-kuanen eme ajaren kerna kegeluhen si payo ibas manusia Pengajaren e icidahken ibas bentuk petuah, perumpaman dingen ajar, simabai manusia jadi “pentar”. Isina mbue nuriken kerna cara nggeluh ibas kegeluhen si tep-tep wari, umpamana: hubungen manusia ras Dibata, hubungen manusia ras manusia, I bas usaha, pendahin guna kebutuhen nggeluh. I bas terang pemahamen isi Kitab Kuan Kuanen enda banci siangkai maksud Kuan Kuanen 4:23, si jadi bahan PA-nta Minggu enda alu temana eme kap: “Pusuh si Mabai Kegeluhen”
II. MPEBAGESI OGEN.
- Mulai Kuan-Kuanen 1: 8-9:18. lit icidahken 13 pengajaren kerna kepentaren. Salah sada eme “gambaren ndalani kegeluhen (dalan kegeluhen)“, si jadi ogen PAnta enda eme Kuan-kuanen 4:10-27.
- I bas ndalani kegeluhen lit 2 dalan eme dalan si benar ras dalan si la benar. Uga meteh apai dalan si benar, eme teridah ibas kalak si erkemalangen man Dibata. “Bena-benana kepentaren eme erkemalangen man Tuhan” (Kuan-kuanen 1:7:9: 10). Dalan si benar e me si idalani kalak bujur, si erkemalangen man Tuhan (Kuan-kuanen 4:18). Janah dalan si la benar e me dalan kalak jahat si la erkemalangen man Tuhan (Kuan-kuanen 4:19)
- Kalak si erkemalangen man Tuhan (bujur) e me kalak si makeken Kata Dibata i bas pusuhna (Kuan-Kuanen 4:21) Si muniken Kata Dibata I bas pusuhna, manjar-anjar rukur, sebab perukurenna me mabai ia i bas “dalan kegeluhen” (ayat 23) eme sijadi tema PA enda Ukurina lebe mbages-mbages maka idalankenna kegeluhenna (ayat 26). Ulihna e me ibas kai pe si ilakokenna tuhu-tuhu mehuli jadina, datna kegeluhen dingen kejuah-juahen (ayat 22) “Manjar-anjar kam rukur, sebab perukerenndu kap si mabai dalan kegeluhenndu” (Kuan-kuanen 4:23) Alu bage maka labo bicara pusuhta eme sada bagin si kitik ibas kulanta, tapi banci mpengaruhi kula sibage belinna. Emaka perlu kal ijaga, ipekena-kena pusuhta.
III. PENGKENAINA
Kegeluhen i doni enda desken sada perdalanen. Erdalan ku bas sada tujun. Sedar tah lang, tah kai gia si bahan jadi tujun, tapi tujunta eme ku bas kegeluhen “mejuah-juah”, dem keriahen ras kesenangen. Guna si e manusia rukur ras rusaha, erdahin, guna ndatken ntah pe seh ku tujun e. Nggeluh enda desken sada perdalanen, janah si la erpemeteh, motu, bodoh banci papak ntah pe talu nari nge ibas perlumban doni enda Nina kalak si nai (enggo Saitun gundari): “Adi bodoh ula ku tiga, tendeng beca kari” E maka orang tua erlumba-lumba nekolahken anakna mulai PAUD, TK seh ku Perguruan Tinggi.
Tapi ibas dampar si deban, lit ka sada penggejapen maka pemeteh si iayaki manusia si gundari la mahan bana kalak nggeluh jadi kalak si mehuli. Kepentaren doni enda (beluh) banci mabai manusia ku bas kejahatan. Janah dalan si dalani kalak jahat bali kap ras berngi si gelap seh maka jongkang nari nge ia (Kuan-kuanen 4:19) Tapi enterem kalak la tek maka kalak bujur nggeluh bagi matawari pultak erpagi-pagi. terus ersinalsal, mehuli kegeluhenna. E maka kalak jahat terus erdalan ibas gelap, pusuhna la nimpan kepentaren (pemeteh si i bas Dibata nari) Ulihna, salah rusur pertimbangenna, si erbahanca jahat si ilakokenna, jongkang me ia, mesui me atena.
Ibas ndalani kegeluhenta. mbue kal perbeben si arus ialaken, terlebih adi daging pe enggo metua (lansia) Enggo latih ras mesera siakap ndalani kegeluhen enda. Banci pe bene ukurta, lanai siakap lit teman, termasuk anak kempunta. Banci papak pe enggo pengerananta, reh pedasna pe kari jadi “tua-tua kolihen”. Padahal adi enggo metua arusna jadi “penggurun” (kalak pentar, kalak si ndatken pemeteh i bas Dibata nari, aminna pe gia la meganjang sekolahta). E maka perlu kal kita pentar (cawir metua ingan penggurun anak-kemputa) Enda idatken Dibata nari, janah ngikuti PA Saitun e me salah sada inganta erlajar kerna kepentaren. Sabab, Kata Dibata e kap Jesus (Yoh 1:1) Jesus kap kepentaren e IA gurunta (Mahagurunta, Profesorta). Kepentaren e la i bas otakta, tapi i bas pasuhta
Mari terus sidalani kegeluhen enda alu kepentaren si rehna i bas Dibata nari, sidalani ras Jesus (Kata Dibata i bas pusuhta) Adi bage, tetap nge sijaga ras makeken perukurenta lako nuriken terang (lansia jadi penggurun), si ersinalsal ras mereken buah si mehuli. Adi Jesus (Kata Dibata) i bas pusuhta, manjar-anjar kita rukur, mbages-mbages lebe i ukuri maka ibelasken ras idalanken, erdalan ibas dalan si benar (Kuanen 4:23). Adi meter-meter kita rukur, la kita jadi pentar, meter-meter erkai pe, mejingkat kal tempa, tapi situhuna meturdak, erbahanca ceda kerina, teman rubat kerina, termasuk anak-kempunta. Jesus ngenca Dalan Kegeluhen (dalan dingen ketuhu-tuhun, Yoh 14:6) si mabai kita ke dalan si benar gelah seh kita ke bas tujun nggeluh e me mejuah-juah (syalom) si dem keriahen ras kesenangen, kegeluehn situhu-tuhu si la erkeri-kerin, kegeluehn si rasa lalap. Mejua-juah, Syalom.
IV. PERTOTON
O Tuhan Dibata, sampati kal kami njagai ras makeken perukuren kami. Kesah si Badia ngiani pusuh kami, gelah ngasup kami manjar-anjar rukur, gelah dat kami kepentaren si rehna i bas Kam nari, gelah kai pe si ibelasken ras idalanken kami mereken buah si mehuli man jelma si enterem, terlebih-lebih man anak-kempu kami. Sampati kal kami gelah ula meter-meter rukur, gelah ula kal kami jadi kalak si meturdak, encedaken man kalak si deban. Tapi pakeNdu kami guna naksiken Tuhan Jesus si jadi Guru ras Penebus Dosa kami. Amin
V. DISKUSI
- Uga e maksudna “…perukurenndu kap si maba kegeluhenndu” Mari sidiskusikenl
- Lit kuan kuan Karo nina “Siksik lebe maka belasken, ukuri lebe maka dalanken” Ngkai maka ibelasken kuan-kuan enda? Kai nge maksudna?
Anding-andingen
Bagi singayaki batu megulang; iandingken
kempak kalak si sura-surana lalap la tersehi