KERINA GUNA KEMULIAN DIBATA
Roma 11:36
Sebab segala sesuatu adalah dari Dia, dan oleh Dia, dan kepada Dia: Bagi Dialah kemuliaan sampai selama-lamanya!
A. PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah I bas jabu ngawan perpulungen erkiteken situasi.
- Nikapken ingan persembahen.
- Nungkun ras nuratken topik pertoton sapaat.
- Kune i bas sektor entah jabu kepkepen, perdalanen PJJ ibabai Pertua, Diaken, Pengurus PJJ, bage pe sekalak si enggo iaturken pengurus PJJ. Dikune PJJ ilakoken i jabu masing-masing, maka perdalanen PJJ ibabai bapa, nande, bage pe anak.
- Sope benaken PJJ, banci kita rende alu make ende-enden KAKR.
- Janah kerina perdalanen PJJ enda banci iubah (imodifikasi) rikutken perluna.
B. PERPULUNGEN JABU-JABU/PERPULUNGEN JABU
RENDE KEE No. 205: 1,2 “Rehlah min O Tuhan”
https://www.youtube.com/watch?v=8bzr3hnJdrU
| Kerina | Rehlah min o Tuhan, sikap kami k’rina Ersembah man baNdu jenda Nusurlah min Tuhan, bahan sikap k’rina ukur kami pe badia O Bapa, bre gelah, daten pasu-pasu, kami k’rina enda |
| Dilaki | Tuhan Dibatanta lit bas rumah enda, nembah kita k’rina baNa |
| Diberu | Alu kehamaten mungkuklah man baNa, kula tendi pe kerina |
| Kerina | Aloken kataNa, ras pasu-pasuNa, usekenNa banta |
ERTOTO (Ibabai bapa i tengah jabu)
NGOGE KATA DIBATA : Roma 11:36 (logeken sekalak anak)
RENUNGEN
Tema: Kerina Guna Kemulian Dibata
Salah sada pengajaren Johanes Calvin (Bapak reformasi gereja) e me : “Soli Deo Gloria”, si ertina “Kemulian man Dibata saja”. Kerina sinasa lit subuk i doni bage pe i surga tujunna guna permuliaken Dibata saja. Johanes Calvin pe ngataken maka doni enda desken “panggung kemuliaan Allah” (opera dei) e maka doni enda arus encidahkеn (menampilkan) kemulian Dibata saja.
I bas Roma 11:36 i je ituriken Paulus kerna “Kemulian Dibata“. Ikataken Paulus bage sabab mbelin perkuah ate Dibata nandangi bangsa-bangsa si labo kalak Jahudi, atan kepe ia ngaloken perkuah ate Tuhan. Kedungenna keselamaten nggo jadi sikerajangen kerina bangsa si labo kalak Jahudi pe. Sedekah enda lit prinsip : kalak Jahudi (bangsa Israel) ngenca si ngaloken keselamaten (partikularisme), tapi kenca kerehen Tuhan Jesus Kristus, kerina bangsa-bangsa enggo jadi bangsa pilihen Tuhan (universal). Jesus Kristus kite-kitena kita ngaloken perkuah ate simbelin (Joh. 3:16). Enda me si ikataken Paulus “Kemulian Dibata” si la tersipati manusia, la terantusi cara Dibata engkelengi kita, enda me kemulian Dibata e.
Terbagesen, Roma 11:36 ningetken : kerina sinasa lit Dibata kap njadikenca, kerina lit erkiteken IA dingen man gunana. Manusia rikut kerina isi pertibi enda sikerajangen Tuhan kap, e maka tinepa Dibata mpehagaken Tuhan saja sabab doni enda e me ‘panggung kemuliaan Allah’. Rasul Paulus jine nggo mpersembahken kegeluhenna guna kemulian Tuhan saja. Bage pe Tuhanta Jesus Kristus, kegeluhenNa pe mpermuliaken Bapana si isurga si nuruh IA.
Sue ras pengajaren gerejanta si tersurat i bas Konfesi GBKP, kita ertanggungjabab ngepkep ras ngkelengi kerina isi doni si nggo itepa Dibata segelah kemulian Dibata lalap teridah i babo pertibi enda. Kita itenahken Dibata jadi aronNa ngarak-ngarak ras terus mpelimbarui doni enda. Tentu kalak si nggeluh i bas Kristus nge si ngasup jadi teman Dibata, si jadi “tenaga-tenaga” si ngkelengi doni enda, sabab kalak si bage enggo leben dirina ipelimbarui Dibata (2 Kor. 5:17).
Selaku aron Dibata, arus sicidahkеn kemulian Dibata i bas perukuren, pengerana, ras perbahanen si teptep wari. Umpamana i bas erdahin, malem ate kalak arah caranta ndahiken dahinta sabab mejingkat, erbintuas, ergiah-giah, bujur, tutus, ras ertanggungjabab. Umpamana kerna pengerana, megegeh kalak si deban sebab belas-belasta mereken pergegeh (motivasi), la nggit ncekuraki, la erbual, ranan si positif rusur si belasken kita. Si enda kerina erbahanca ermulia gelar Dibata. Arah kegeluhenta ipuji kalak Tuhan Dibata si nisurga (bdk. Mat. 5:16).
Terdauhen, kemulian Dibata banci sicidanken i bas jabu-jabunta alu ngelakoken:
- Teptep anggota jabu nggeluh ersembah man Dibata si ermulia, si erdolat, si nggo nepa kita
- Ngaturken sampah rumah tangga alu mehuli (tidak buang sampah sembarangan), mengolah sampah organik jadi pupuk skala rumah tangga, sampah non-organik itutung sabab mesera getem secara alami.
- Ngkelengi kerangen, mata lau, taneh, udara, bage pe rubia-rubia kerangen
I bas masyarakat, kemulian Dibata banci sicidanken arah ndukung program Pemerintah/Desa kerna reboisasi (penanaman kembali), pendidiken kerna lingkungen hidup, mendukung potensi pariwisata alam i daerahta. Kerina tinepa i pertibi enda guna kemulian Dibata kap. Deleng si meganjang, lawit si mbelang, kerangen si meratah, sabah, juma, peken, bage pe asuh-asuhen, kerinana guna meritaken kemulian Tuhan, jadi dalan meritaken kuasa Dibata man doni enda. Piga-piga i bas daerahta ipasu-pasu Tuhan alu potensi wisata alam si tuhu-tuhu mejile, enda pe jadi dalan ncidahkеn kemulian Dibata. Terpujilah Tuhan arah kerina dampar geluhta “Soli Deo Gloria”, kerina guna kemulian Dibata kap.
NURIKEN PENGGEJAPEN
- Bapa
- Nande
- Anak
IRAKUT PERTUA/DIAKEN/EMERITUS/PENDETA
DISKUSI
- Oge mulihi Roma 11:36, uga nge penggejapenta kerna ayat enda?
- Enggo nge sicidahken kemulian Dibata I bas geluhta?
RENDE KEE No. 445 : 1,2 “Sipepulung Me Persembahenta (PERSEMBAHEN)
https://www.youtube.com/watch?v=Bn0WbX7wnH8
Si pepulung me persembahenta, si endesken dage man Dibata
Tanda m’riah ukur ban pasu-pasuNa,
si simpar b’reNa man banta
Reff: Aso si nggo isikapken, aso si nggo itotoken
Em pengataken bujurta, kempak Dibata
Tuhu simpar pemere Dibata, man perjuma ras si erbinaga
Krina si erdahin si ngarap man baNa, ituahi pasu-pasuNa Reff:
PERTOTON SAPAAT
- Gelah kita ngasup ncidahken kemulian Dibata arah kerina dampar kegeluhenta (ibabal Nande)
- Gelah si gejapken kita manusia e me “mitra kerja” Dibata mpesikap doni enda (ibabai Bapa)
- Kerna persembahen ras si turah i bas perpulungen/Jabu (ibabal serayan Tuhan/Bapa)
RENDE KEE No 358 “Muliakenlah O Tendingku (iendeken 2x)
https://www.youtube.com/watch?v=HUrwRafmros
Mullakenlah a Tendingku, muliaken Tuhan Dibata o tendingku
Mullakenlah, Mullakenlah, Muliaken Tuhan o Tendingku
PERTOTON TUHAN
MOMO
C. JEDA RAS PENUTUP
Pdt. Mikha Pranata Manik, S.Th.
HP/WA: 0852 9741 9809