(Teologia Lingkungan)
Teks : Masmur 19:1-7
Tema : TINEPA ENCIDAHKEN KEMULIAAN DIBATA
Tujun : Gelah Mamre:
- Meteh maka kerina tinepa e patuh nandangi perintah Dibata
- Nuri-nuri kerna perbahanen Dibata man sekelewetna subuk arah kata ras perbahanenna
Metode : Diskusi/ Studi Kasus
Kemuliaan Tuhan dalam pekerjaan tangan-Nya dan dalam Taurat-Nya
1 Untuk pemimpin biduan. Mazmur Daud.
2 Langit menceritakan kemuliaan Allah,dan cakrawala memberitakan pekerjaan tangan-Nya;
3 hari meneruskan berita itu kepada hari,dan malam menyampaikan pengetahuan itu kepada malam.
4 Tidak ada berita dan tidak ada kata,suara mereka tidak terdengar;
5 tetapi gema mereka terpencar ke seluruh dunia,dan perkataan mereka sampai ke ujung bumi.Ia memasang kemah di langit untuk matahari,
6 yang keluar bagaikan pengantin laki-laki yang keluar dari kamarnya,girang bagaikan pahlawan yang hendak melakukan perjalanannya.
7 Dari ujung langit ia terbit,dan ia beredar sampai ke ujung yang lain;tidak ada yang terlindung dari panas sinarnya.
KATA PENARUH
Biasana si pujiken sekalak jelma erkiteken lit si idah ulih pendahin entah perbahanenna si mehuli. Entah ia ndatken sada prestasi bagepe karir. Umpamana anak lulus meja hijau alu nilai si memuasken, anak entah teman ndatken dahin i bas perusahaan asing si gajina menjamin, kita jine terpilih jadi ketua i bas sada organisasi ras sidebanna. Pujin e si sehken erkiteken kita temanna, si bereken tole nari semangat gelah bas dahinna reh mehulina. Tapi di kune temanta entah anakta e biasa-biasa saja pendahinna ras prestasina, jarang si bereken pujin. La tempa kit si istimewa bas kegeluhenna.
Bali kap ras kita muji Dibata, Lit min si luar biasa si jadi bas geluhta maka kita muji Dibata. Umpamana sukses bas dahin, malem i bas pinakit, seh kerina sekolah anakta, nggo dung perjabunna kerina alu mehuli, ras sidebanna. Jadi, tupung si enda la sinanami, e biasa-biasa saja, banci labo si inget ngataken bujur bas Dibata, sebab kerina erdalan bagi biasana saja. La si gejap maka situasi si biasa-biasa e pe pemere Dibata man bana.
Kai kin situasi si biasa e bas kegeluhenta?
URAIAN TEKS/TAFSIREN
Masmur 19:1-7 enda sada masmur si itulisken Daud janah rusur iendeken i bas kebaktin. Enden-enden e ngiahken kerina perpulungen emperdiateken tinepa Dibata si patuh ku bas persuruhen Dibata. Kerina tinepa e pe rende mpermuliaken Dibata amin sorana la terbegi tapi arah perputaren doni enda, uga bumi erputar engkeleweti matawari tiap detik, e maka lit suari ras lit berngi. I bas awang-awang e me kerina benda-benda langit erputar alu ratur, la ketadingen bulan ras bintang-bintang si deban. Kejadin i datas awang awang e me sada enden-enden tinepa Dibata, nuduhken perbahanen ras pendahin Dibata si mejin.
Lit suari ras lit berngi, lit musim si man bentasen teptep wari, lit kesempaten lako ndalani kegeluhen, kerina e pendahin ras permere Dibata si banci igejapken manusia. Teptep wari erberita kempak wari si pagina, teptep berngi erberita kempak berngi si pagina ka. Ngatakensa i bas teptep kesempaten Dibata erdahin. Amin la lit sorana terbegi tapi i bas kiniraturen pergantin suari ras berngi e encidahken sada berta kerna perbahanen Dibata janah e me jadi puji-pujin tinepa e man Dibata.
Matawari, itamaken Dibata i langit, tempa lit rumahna i je. Tupung matawari bengket ku rumahna, gelap me wari, tupung ia ndarat i bas rumahna nari terang me wari. Bage me iandingken pernasmur perputaren suarl ras berngi. Tupung terang wari, sinar matawari e nerangi kerina doni, erdalan ia i bas ujung langit nari seh ku ujung langit si deban. Kai pe la banci cebuni i bas sinalsalna nari. Kerina ingan ngaloken terang matawari. Igambarken pemasmur matawari e desken sekalak pengantin si dilaki luar bas bilikna nari, alu dem semangat mbenaken pendahinna. Bage me matawari ndahiken dahinna, tapi tetap patuh ku bas pengaturen Dibata. Kepatuhen kerina benda-benda langit e me si encidahken puji-pujinna man Dibata. Perbahanen Dibata e si mejin e perlu iterusken she ku tampuk doni.
Erkiteken matawar, bulan ras bintang e la ersora, perputaren waktu e pe la lit sorana, perlu perpulungen e si ersora, perpulungen e singerana. E maka ende-enden enda ngiahken kerina kaum bapa nuriken perbahanen Dibata arah kerina tinepaNa e man anak-anak i tengah jabu bagepe man anak-anak si It isekelewetna. Adi i bas kalak Jahudi sada tanggungjabab bapa e me mpetandaken Dibata man anak-anakna arah kerina dampar, termasuk arah peristiwa perputaren doni enda. Lit ibahan bapa waktuna ercakap ras nuri-nuri man anak tengah jabuna. E maka kerina anak-anak meteh perbahanen Dibata si mejine janah inanamina pendahin Dibata e bas kegeluhenna si nambahi kinitekenna man Dibata. Tuhu lit nge batasna kengasupen manusia erberita kerna perbahanen Dibata e, tapi labo banci ingadiken. Doni tetap erberita janah manusia pe tetap erberita seh maka kemulian Dibata e teridah tangkas man kerina tinepa i doni.
APLIKASI
Situhuna perbahanen Dibata i bas doni enda ajaib (luar biasa) tapi erkiteken tiap wari enda si aloken tempa enggo biasa. E maka pergantin wari suari ras berngi e pe siakap biasa, las matawari si ialoken kita teptep wari e pe siakap biasa, rembus angin si mereken kemalemen ate e pe enggo biasa. Saja, arah si biasa teptep wari si ibentasi kita e, min teridah I je puji-pujinta man Dibata.
Puji-pujin e lit telu curakna:
Sipemena, banci teridah arah ende-endenta tiap wari man Dibata. Tupung medak erpagi-pagie, rende kita muji Tuhan, tupung si tatap ku langit si cerah, si nanami sinalsal matawari ras si gejap angin rembus, rendelah kita muji Tuhan. Rende e i ja pa pe labo dalih, subuk i bas jabu, i bas perdalanen, i bas menaken pendahin. Rende i bas pusuh pe she jilena. Arah rende si sehken pengataken bujurta man Tuhan.
Si peduaken, arah pengajaren. Perbahanen Dibata e ituriken ka man anak kempu, tupung paksa ngadi-ngadi, tupung bas perdalanen, tupung i rumah ras ingan si deban. Perlu Mamre erbahan jadwal jumpa ras anak jabu entah kempu lako nuri-nuri kerna perbahanen Dibata.
Si peteluken, arah perbahanen. Si pekena-kena alam tinepa Dibata e, si jaga kebersihen ras kesehaten lingkungennta. Kitik pe si ilakoken kita e mbelin gunana man sekelewetta. Umpamana, sitamaken sampahta ku bas ingan ei enggo isikapken. Sadar bersih ras sadar sehat e perlu kel isuanken bas pusuh. Tupung si tamaken sampah i bas inganna, kita enggo muji Dibata.
DISKUSI: STUDI KASUS
Lit pengalamen Mamre tupung erdalan-dalan ku tiga Negara ope lenga lit Virus Corona i bas doni enda. Seh ku kota Singapore, sikap kal akapna ngenen-ngenen sekelewetna erkiteken bersih ras tertata kota e alu mehuli. La lit macat ras la begi sora kelekson. Tupung ngadi i bas lokasi rest area, ngopi ras teman-teman. I je lit aturen banci ngisap I teruh batang kayu. Ertina la banci i japa pe ngisap, ras sisa isap e pe arus itamaken i bas ingan si enggo sikapken, adi sembarangen iambekken lit
denda si man galaren. Kerina mamre e patuh man aturen e. Tupung perdalanen mulih ku Indonesia, Singapore-Batam, kepatuhen ndai lanai teridah, dedehkenna kenca pelabuhen Batam mis ngisap sembarang ingan, ras sisa isapna pe iambekken sembarang ingan.
MARI SI DISKUSIKEN:
- Kira-kira uga nge akapndu kesadaren mamre enda nandangi kebersihan lingkungenna?
- Kai nge sebabna maka ikuta kalak banci jagana kebersihan, bas kutana jine la terjagasa kebersihen e?
- Puji-pujinta man Dibata salah sada e me njagai kebersihen lingkungenta, kai dage sura-sura Mamre arah bahan PA ta wari enda?
USULEN LAGU
- KEE GBKP No. 308:1,3 link lagu (klik disini)
- KEE GBKP No. 306:1, 2, 4 link lagu (klik disini)
- KEE GBKP No. 260: 1-3, link lagu (klik disini)
- KEE GBKP No. 262:1, 2,4 link lagu (klik disini)
Pdt. Nurbety Br. Ginting, M.Th
HP. 0821 6869 6383