Lingkungan Hidup
Ogen : 1 Raja-raja 4: 29-34
Tema : Ngergaken Kerina Tinepa
Tujuan : Gelah Mamre:
- Meteh kepentaren Salomo si ngasup ngantusi ras ngergaken kerina tinepa Dibata.
- Njagai ras peken-kena doni enda arah perbahanenna.
4:29 Dan Allah memberikan kepada Salomo hikmat dan pengertian yang amat besar, serta akal yang luas seperti dataran pasir di tepi laut, 4:30 sehingga hikmat Salomo melebihi hikmat segala bani Timur dan melebihi segala hikmat orang Mesir. 4:31 Ia lebih bijaksana dari pada semua orang, dari pada Etan, orang Ezrahi itu, dan dari pada Heman, Kalkol dan Darda, anak-anak Mahol; sebab itu ia mendapat nama di antara segala bangsa sekelilingnya. 4:32 Ia menggubah tiga ribu amsal, dan nyanyiannya ada seribu lima. 4:33 Ia bersajak tentang pohon-pohonan, dari pohon aras yang di gunung Libanon sampai kepada hisop yang tumbuh pada dinding batu; ia berbicara juga tentang hewan dan tentang burung-burung dan tentang binatang melata dan tentang ikan-ikan. 4:34 Maka datanglah orang dari segala bangsa mendengarkan hikmat Salomo, dan ia menerima upeti dari semua raja-raja di bumi, yang telah mendengar tentang hikmatnya itu.
KATA PENARUH
Masalah Lingkungan hidup i negaranta Indonesia bagepe dunia tetap jadi perbeben si mbelin seh genduari. Adi masalah lingkungan hidup enda la itanggulangi secara konsisten ras terus-menerus, tentu enda pasti berdampak man kegeluhen manusia, erkiteken manusia ngaloken kerna kebutuhen nggeluh arah alam. Manusia la banci nggeluh adi lalit udara bersih, lau, pangan, rsd. Emaka lingkungan hidup/alam siceda seri ertina ras ncedai kegeluhen manusia. Erkiteken sie perlu kel kita kerina radu ras njagai lingkungan hidup guna kiniulin kegeluhen manusia.
URAIAN TEKS/TASIREN
Bahan renungenta paksa enda nuriken kerna kepentaren Salomo si ibereken Dibata. Salomo e me raja si peteluken i tengah-tengah bangsa lsrael. Salomo e me anak raja Daud ras ndeharana Betsyeba. Salomo e me raja si isegani raja-raja sideban termasuk raja Mesir e me Firaun. I bas masa pemerintahen raja Salomo, bangsa Israel nggeluh alu dame erkiteken kepemimpinen Salomo erdalan erpalasken kepentaren sirehna i bas Dibata nari.
Secara khusus i bas 1 Raja-raja 4: 29-34 nuriken kerna Salomo si ngaloken kepentaren si luar biasa ibas Dibata nari. Janah kepentaren ras pemeteh e ngelebihi arah tokoh-tokoh si cukup terkenal erpemeteh paksa si e, e me:
- Kalak pentar i Timur nari ntah pe kalak pentar i Mesir nari kelompok enda e me kelompok si terkenal alu kepentaren/ keahlian kerna benda-benda langit. Janah kelompok enda enggo terberita nai-nai nari. Erpemeteh kerna benda- benda langit seri ras erpemeteh kerna dewa-dewa. Emaka la terjeng pentar secara ilmu pengetahuan, tapi kelompok enda pe erpermeteh kerna kekuatan magis.
- Etan kalak Esrah
Etan kalak Esrah e me sekalak si terkenal pentar i bas zaman Raia nan Raja Salomo. La sekalak penulis berhikmat si karyana mbue i kagumi jelma si entererm
- Herman, Kalkol ras Darda anak-anak Mehol
Situhuna labo lit data siterperinci nuriken kerna kelompok enda, Tapi i bas Mazmur 88 lit i singetken kerna Herman. i bas dugaan penafsir maka kelompok enda ncidahken kepentaren ras pemeteh si teridah arah kegeluhen si mehuli janah ikataken berhikmat.
Arah litna 3 kelompok kalak si ianggap luar biasa pentar ras erpemeteh ituriken maka kepentaren Salomo lebih asa sie kerina. Lit piga-piga bukti kepentaren Salomo si luar biasa e me isuratkenna 3000 kuan-kuan ras lebih 1000 ende-enden Salomo pe ngasup ercakap kerna kayu-kayu ras sinuan-sinuan, mulai i bas pinus si merim si turah i Deleng Libanon nari seh ku dukut i Sop si turah i ling-ling. Salomo pe ngasup ercakap ras rubia-rubia, perik-perik, kerna rubia-rubia si njoler ras nurung. Arah sie teridah maka Salomo e me sekalak si tuhu-tuhu mediate kerna lingkungan hidup. Sebab guna meteh kerna sinuan-sinuan ras rubia-rubia labo perkara si nukah. Salomo pe makeken kerina tinepa Dibata guna jadi sarana i bas ngelitken pemeteh ras nasehat. Arah pemeteh kerna rubia-rubia ras sinuan-sinuan pe, Salomo nehken pengajaren-pengajaren si penting.
Dibata mereken kepentaren ras pemeteh man Salomo alu luar biasa. I bas kerina keberhasilan, kinibujuren ras kehormatan salomo, Si jadi unsur si terutama e me kepentaren i bas Dibata nari. Salomo enggo memilih si terutama jadi sipemena e me kepentaren asangken umur panjang, kinibayaken, bahkan nyawa. Salomo mindo kepentaren guna ndalanken perentah Tuhan e me meminpin Israel ras Jehuda. Erkiteken sie me maka jelma sienterem erlajar man Salomo.
APLIKASI
Salomo ncidahken kegeluhen situhu-tuhu erkiniteken man Tuhan. Kualitas kiniteken pe teridah arah kepentaren si luar biasa si ibereken Dibata. Janah Salomo pe makeken kepentaren e guna kiniulin kegeluhen bangsa lsrael. lje terida sebagai sekalak pemimpin, Salomo enggo ncidahken teladan si mehuli man rah rakyatna. Mamre pe me peminpin i bas jabu. Selaku peminpin, Mamre harus
Tuhu-tuhu ngangkai kai kin si pentingna i bas kegeluhen. Bagi Salomo si enggo milih kepentaren ! bas Dibata nari jadi siterutama, bageme arusna Mamre GBKP pe milih kepentaren i bas Dibata guna ndalani kegeluhen enda. Kepentaren i bas Dibata e me si terutama asangken sideban. I bas ndalanken kerina aktifitas tep-tep wari, subuk I bas jabu, pendahin, pergaulen, rsd tetaplah pakeken kepentaren si rehna i bas Dibata.
Arah kepentaren i bas Dibata nari Mamre pe iarapken ngasup ngergaken kerina tinepa Dibata. Ngergai tinepa Dibata subuk manusia, sinuan-sinuan, rubia-rubia tuhu penting, erkiteken mbue kel masalah si jadi perbeben mbelin man doni enda. Masalah siterjadi justru erkiteken kinirangapen manusia si kedungenna berdampak la mehuli man manusia kerina. Persoalen lingkungan hidup siterjadi. Contohna: polusi udara, penebangan hutan, pencemaran laut, kepunahan keanekaragaman hayati, penipisan lapisan ozon rsd mereken dampak si la mehuli man doni enda. Emaka marilah radu ras kerina MAMRE guna banci makeken kepentaren i bas Dibata nari guna njagai ras pekena-kena doni benaken arah perbahanen si kitik i bas jabu seh ku lingkungenta.
DISKUSI
- Engkai maka Salomo mindo kepentaren asangken sideban?
- Kai nge sibanci sibahan guna ngergaken tinepa Dibata eme lingkungan hidup ibas jabu bagepe masyarakat?
USULEN ENDE ENDEN
- KEE GBKP No. 368: 1,2,3
- KEE GBKP No. 432 : 1,2
- KEE GBKP No. 260: 1,2,3
- KEE GBKP No. 183: 1,2
Pdt. Monalisa Br. Ginting, S.Th
Komisi HIV-AIDS