Bahan PJJ 5-11 September 2021

TUHAN ERBAHANCA KITA SENANG
Matius 27:3-4; Jeremia 29:11
(Hari Pencegahan Bunuh Diri)

Matius 27:3-4
27:3 Pada waktu Yudas, yang menyerahkan Dia, melihat, bahwa Yesus telah dijatuhi hukuman mati, menyesallah ia. Lalu ia mengembalikan uang yang tiga puluh perak itu kepada imam-imam kepala dan tua-tua, 27:4 dan berkata: “Aku telah berdosa karena menyerahkan darah orang yang tak bersalah.” Tetapi jawab mereka: “Apa urusan kami dengan itu? Itu urusanmu sendiri!”

Yeremia 29:11
29:11 Sebab Aku ini mengetahui rancangan-rancangan apa yang ada pada-Ku mengenai kamu, demikianlah firman TUHAN, yaitu rancangan damai sejahtera dan bukan rancangan kecelakaan, untuk memberikan kepadamu hari depan yang penuh harapan.

PERSIKAPEN

• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen ras pertoton syafaat
• Adi i bas sektor entah jabu kepkepen perdalanen PJJ ibabai Pt Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
• Kerina perdalinenna rikutken situasi janah banci iubah (imodifikasi).
• Sope benaken PJJ banci kita rende Lagu KAKR

RENDE  : KEE  NO : 308 : 1  ( IBABAI SIMADA JABU ) iendeken 2x 
Puji Tuhan Haleluya, wari enda wari Dibata 
Pulung kita k’rina jenda, rende nembah muji gelarNa
Reff : Haleluya, Haleluya puji gelarNa
Haleluya,Haleluya puji gelarNa 

ERTOTO (IBABAI SIMADA JABU)

NGOGE KATA DIBATA  (iogeken sekalak anak) 

RENUNGAN (iogeken Bapa/Nande)   

“Bunuh diri” (Inggris: suicide, cakap Latin suicidium, asal kata sui caedere, ertina “membunuh diri sendiri” (munuh bana). Munuh bana e me sada  tindaken si sengaja sierbanca mate “dirina sendiri”. Bunuh diri rusur ilakoken erkiteken putus asa ikawitkan ras gangguan jiwa misalna depresi-stress, gangguan bipolar, skizofrenia, ketergantungen alkohol, entah pe penyalahgunaan tambar (obat).  Faktor-faktor penyebab depressi-stress sada bagin erkiteken kesuliten ekonomi entah masalah i bas hubungan si la mehuli ras i bas jabu entah teman. Piga-piga masyarakat, contoh kasus i Taneh Karo nai, melala ndelis ntah minem racun obat serangga (“endrin”) erkiteken ndabuh erga ulih juma (kol, tomat, rsd) mbue modal keri, janah la ka lit asilna. Akibatna stress janah ambil jalan pintas alu ndelis tah pe minem racun.

Erbage cara bunuh diri i piga-piga negara umumna antara lain: ndelis, minem racun serangga, ras senjata api. Data genduari encidahken sekitar 800.000 seh sada juta kalak mate perban bunuh diri teptep tahun. E maka kasus bunuh diri termasuk menduduki posisi ke-10 besar penyebab kematen i doni enda. Data encidahken maka angka “bunuh diri” tercatat teremen ilakoken dilaki asangken diberu, kemungkinen telu seh empat kali teremen dilaki ngelakoken “bunuh diri” ibandingken diberu. Engkai maka bage lenga dat alasenna. Tapi enda kinatana. Lit kang deba erkiteken kondisi kejiwan, budaya, kondisi keluarga, masyarakat, ras genetik. Suasana COVID 19 enda pe banci saja jadi pemicu enterem kalak stress ras depressi janah bunuh diri. 

Piga-piga  kalak i bas Pustaka Si Badia si ndungi geluhna alu munuh bana alu erbage cara

• Raja Saul, erkiteken talu i bas perang si mesangat ipindona gelah ibunuh pengawalna ia, tapi la pengawalna nggit, e maka buatna dalan pintas bunuh diri alu ndabuhken bana tepat i ujung pedangna. Pengawal Saul pe dungna munuh bana (1 Sam. 31:3-5).
• Simson, guna seh sura-surana “balas dendam”, Simson mate radu kalak si enterem bangsa Pilisti alu kuil si iruntuhkenna. Ipilihna nggunaken gegehna si terakhir naluken musuhna ras ikorbankenna dirina seh mate (Hak. 16:25-30).
• Abimelek, Hakim Israel si kejam. Ia munuh enterem jelma ras seh ukurna munuh senina-seninana pe. I ijinken Tuhan sekalak diberu guna pengadi kekejamenna. E maka ipilihna mate njaga harga dirina alu cara idilona kalak gelah nebak ia seh mate. (Hak. 9: 50-55).
• Ahitopel,  pendamping Daud, atan bas perlawanen Absalom. Talu tentera Daud dungna mbiar ras putus asa. E maka ikurungna bana i rumahna alu cara ndelis. (2 Samuel 17: 23).
• Judas, sue ras ogenta, erkiteken igejabna kesalahenna ras bene pengarapenna kenca mengkhianati Jesus. Dungna Judas milih “bunuh diri” alu cara ndelis. Turi-turin enda jadi turi-turin si paling tersena i bas Pustaka erkiteken ia salah sada murid Jesus si tuhu enggo mersoken ras ngendesken Jesus ku tan kalak Parisi (Mat. 27: 3-4).

Arah kejadin si i datas, alu cara milih sendiri ndungi geluhna, arusna ula bage. Si tuhuna banci milih cara sue ras kata Dibata. Dibata la pernah nundalken manusia erkiteken ia sakit entah sangana bas perjuangen si mberat kal pe. Dibata ngasup ngubah penderitan e jadi mehuli. Entah erkiteken mbiar, putus asa, “depresi”, sakit, kuasa kegelapen, kecewa, kebenen, ate megogo, kesombongen, elem-elem ras dosa. Pustaka Si Badia nehken banta maka perbahanen bunuh diri, e me dosa si la teralemi, e maka mate pe labo i Liturgiken. 

Selaku kalak si tek, mari si sadari maka tugasta nampati kalak i bas perjuangen nggeluh si mberat sisangana ialakenna, mehuli adi sisampati ia alu nuriken kebenaren maka nggeluh enda i teruh kepkepen Dibata. E maka sisehken pengajuk erpalasken Kata Dibata man bana alu ngataken:

1. Si sadarilah maka kita labo pernah si sada, Dibata mereken arapen ras kemerdekaan ban banta. IpulahiNa kalak si lit i bas kesusahen ras isampatiNa kalak si enggo bene pengarapenna (Msm. 34: 18-19).
2. Si sadarilah maka Dibata erkeleng ate man banta ras sieteh maka Tuhan engkelengi kita ras e maka lalaplah kita rembak ras Tuhan. Ia sinatang-natang geluhta gelah kita megegeh ras menang (Msm. 55: 23).
3. Si sadarilah maka belinen kuasa Dibata i doni enda maka kita jadi si kerajangenNa, Kuasa Kesah e lit bas kita gegehen asa kerina kuasa si lit i bas doni enda (1 Joh. 4: 4).
4. Si inget pe kai nina Paulus man perpulungen Roma: Si eteh maka i bas kai pe Dibata erdahin guna kiniulin man kalak si erkeleng ate man baNa, e me kalak si enggo ipilih Dibata arah surasuraNa (Rm. 8:16).
5. Si ingetlah maka lit rencana Dibata si terulin asa si ngasup kita ngukurisa. Aminna gia kai pe si terjadi bas geluhta i doni enda, sialaken ras Tuhan. Rencana Dibata e me rencana kiniulian, labo gelah kita cilaka. Sabab arapan guna si pepagi enggo i senaken Dibata ras sura-sura Dibata si terjadi i bas geluhta (Jer. 29: 11; Jes. 55: 11).

Alu bage adi kita sangana ngalaken perbeben situhu-tuhu mberat kal siakap, ula gendek ukurta alu ersura-sura “bunuh diri”. Ingetlah perbahanen bunuh diri e me dosa si mbelin i adepen Dibata, dosa si la teralemi. E maka dahilah Jesus, tungkasken kerina perbeben geluhta man baNa ras aloken kebebasen ras berita keriahen i bas Tuhan nari segelah kita iselamatkenNa.

NURIKEN PENGGEJAPEN

• SIMADA JABU 
• MORIA
• PERMATA

IRAKUT PENDETA/PERTUA/DIAKEN/EMERITUS

SHARING (BERBAGI PENGALAMEN NGGELUH):

1. Adi si bandingken ku bas pengalamen geluhta (penggejapenta) sedekah enda, kai nge iakapndu ertina Jeremia 29:11?
2. Kai dage si arus silakoken ras jadi gelementa gelah ula min sempat gendek ukurta tupung lit perbebenta?

MOMO 

RENDE  : KEE No. 282 : 1 (PERSEMBAHEN)
Kukataken bujur banNdu, o Kam Tuhan Penebus 
Aku enggo s’lamatkenNdu, arah lias ateNdu 
Reff :   Keleng kal ateNdu aku, simpar kap ngaruhNdu bangku 
Lias ateNdu lanai terpilasi, ku puji Kam teptep wari 

PERTOTON SYAFAAT

• Ngasup ngalaken kegeluhen gelah tetap erpengarapen man Tuhan (ibabai Nande)
• Notoken siturah bas jabu/bas perpulungen (ibabai Bapa)
• Persembahen (ibabai Anak) 

RENDE : KEE NO : 466 : 1 (iendeken 3x) 
Bujur o Tuhanku, bujur o Tuhanku
Terpujilah gelarNdu, bujur o Tuhanku 

PERTOTON TUHAN  (ibabai Bapa/Nande)

JEDA  RAS PENUTUP 

Pdt. DR. Erick J. Barus