NGUSIH KEGELUHEN NANDE
(Mempersiapkan Generasi Muda)
TUJUN: Gelah Moria:
- Meteh maka Pemasmur ngidah nandena jadi suruh-suruhen Tuhan.
- Nulisken pengalamen pelayanen ras potensi si lit i bas diri guna peseh man sinursur.
METODE PA: Nuri-nuri
Mazmur 116: 16 – 19
116:16 Ya TUHAN, aku hamba-Mu! Aku hamba-Mu, anak dari hamba-Mu perempuan! Engkau telah membuka ikatan-ikatanku!
116:17 Aku akan mempersembahkan korban syukur kepada-Mu, dan akan menyerukan nama TUHAN,
116:18 akan membayar nazarku kepada TUHAN di depan seluruh umat-Nya,
116:19 di pelataran rumah TUHAN, di tengah-tengahmu, ya Yerusalem! Haleluya!116:16 Suruh-suruhenNdu kap aku TUHAN, bali ras nandengku, aku pe erdahin guna Kam. Enggo aku ipulahiNdu idur kematen nari.
116:17 Kubaba ateku baNdu persembahen pengataken bujurku, janahku ertoto man baNdu.
116:18-19 I bas perpulungen kerina bangsaNdu, i bas RumahNdu si Badia i Jerusalem, kuendesken baNdu kai si enggo kupadanken.
Kata Penaruh.
Nande eme “orangtua si diberu” si nggo mpetubuh anak-anakna i bas jabu. Isamping bapa, nande pe selaku wakil Dibata si enggo ipercayaiNa guna ertanggungjabap encukupi keperlun geluh subuk kula ras pertendin (jasmani ras rohani ) anak si nggo ipelimiken Tuhan ku bas jabuna. Peran sekalak nande seh pentingna nandangi kegeluhen anak, anak pernah sada kegeluhen ras nande, menaken i bas bertin nari seh ia tubuh ras i bas pebelin-belinsa sekalak nande arus mere waktu 24 jam teptep wari alu labo ngarapken balasen. Bagi kuan-kuan kalak Karo “nande nge ras anak” nande si er-anak, emaka nande nge si pemena kal njalin hubungen ras anak.
Erbage cara ilakoken nande gelah teridah nande e tetap ras anak subuk langsung tah pe la langsung i bas ngawasi anakna, njadiken dirina jadi usihen subuk arah kata bage pe arah perbahanen. Hubungen nande ras anak seh kal deherna seh maka nande ngasup ngangka sura-sura anak amin gia la ia erbelas. Nande i bas engkelengi anakna la ersyarat, ia me sentral i bas tumbuh kembang anakna, bage pe jadi guru si pemena guna ngajarken kegeluhen ras erkiniteken man anak, “ajarken man anak – anakndu” (Ul. 6:6-9). Kegeluhen sekalak nande mbelin kal ngaruhna i bas mbentuk biak ras kepribadin anak i bas nentuken masa depanna. I bas PA- nta ibabai kita ngidah uga sekalak anak ngusih nandena selaku suruh – suruhen Tuhan nggejabken kiniulin Dibata ras nehken pengataken bujur.
Mpebagesi Pengangkan Kerna Ogen.
Masmur 116 nuriken kerna pemasmur si nggejapken perbahanen Dibata i bas kerina situasi geluhna janah nehken pujin ras pengataken bujur man Tuhan. Pemasmur ngenanami perbeben si mesangat, bahaya kematen si ngkeleweti, mesuikal atena, mbiar dingen aru ate si erbanca menam bene pengarapen i bas ngalakenca (ay. 3 ). 1 bas ngalaken situasi si mberat e tetap ia erkiniteken man Tuhan (ay. 10). Kinitekenna teridah arah ia pang nehken kerina perbebenna man Tuhan, nderkuh mindo penampat man Tuhan gelah ipulahi (ay. 4). Arah enda teridah maka pemasmur tuhu – tuhu nandai Dibata alu mbages, janah tek ia maka Tuhan ngasup mulahi ia idur kematen nari. Tuhan njabab ras ndengkehken pertotonna, ia selamat i bas kematen nari emaka iresponna perbahanen Tuhan alu encidanken keleng ate, alu erpadan nehken persembahen man Tuhan. Tentu pengakun ras tekat si bagenda rupana labo banci turah bage saja tapi lit si man usihenna. Respon Pemasmur i bas kerina si inanamina eme:
- Njadiken dirina selaku suruh-suruhen Dibata, bali ras nandena, “aku pe erdahin guna kam.” Teridah maka Pemasmur ngusih nandena i bas erkiniteken nan Tuhan, uga nandena engkelengi Dibata, setia, ersembah alu dem keteruken ukur sebage suruh-suruhen (mengabdi sebagai hamba) man Tuhan. Mereken geluhna guna ndahiken ras ndalanken si ngena ate Tuhan. Eme si iusih Pemasmur “erdahin guna Tuhan”, ertina mpesenangken Tuhan i bas geluhna (ay 16). Nandena la ngenca ertanggungjabap guna ncukupi keperlun daging kula anakna tapi pe ngasup ertanggungjabap guna jadi usihen i bas kiniteken.
- Selaku suruh-suruhen Tuhan, erpadan ia guna nehken persembahen man Tuhan, “ku baba ateku baNdu” nuduhken maka nggo lit sura – surana guna nehken persembahen pengataken bujur i bas keleng ate Tuhan si enggo mulahi geluhna, janah ertoto. Ertina pemasmur tetap ngidah maka pertoton e seh pentingna i bas kegeluhenna. Tetap lit komunikasi, hubungen si akrab ras Dibata, encidahkеn keteruken ukurna ras ketergantungenna man Dibata. Alu bage reh bagesna igejapna perbahanen Dibatasi erdahin i bas kerina situasi geluhna.
- Pemasmur nehken persembahen si nggo ipadankenna man Dibata. Teridah maka janji kalak si erkiniteken, si nggejapken kiniulin Tuhan i bas geluhna alu bulat ukur, dingen tutus ersaksi i tengah-tengah perpulungen i bas Rumah Tuhan isehkenna kai si nggo ipadankenna man Tuhan. Pemasmur terteki i bas padanna la terjeng sura-sura tapi pe ilakokenna arah perbahanen si tuhu-tuhu, sue kata ras perbahanenna.
Pengkenaina.
Lit kuan-kuan nina maka buah e labo ndauh ndabuh i bas batang na nari, batang si mehuli mereken buah si mehuli ka, entah pe labo ndauh tubis i bas batang buluh nari, enda nuduhken maka biak anak labo ndauh kal ras biak orangtuana. Karakter orangtua tergambar i bas kepribadian anak, sabap nande me jadi guru anakna, si ngajari ras si mereken usihen subuk arah kata entah arah perbahanen i bas tumbuh kembang anak. Kehadiren nande mbelin ngaruhna nentukan geluh anak i bas masa depanna, subuk kiniteken, pemeteh ras emosina. Nande arus ngasup njaga keseimbangen kebutuhen kerohanian (Spiritual Overtient, SQ), Pemeteh (Intelligence Quotient, IQ), ras emosi tah Penggejapen (Emotional Quotient, EQ) anakna arah mereken usihen kegeluhen i bas pebelin belin anakna.
Alu bage anak e turah i bas kepribadian si njadiken pengalamen geluh nandena jadi sikap peluh pribadina i bas ndalani kegeluhenna. Bagi Pemasmur arah pengalamenna naksiken kegeluhen kiniteken nandena selaku suruh – suruhen Tuhan, kepatuhen nandena man Dibata i bas ertoto, erlebuh man Tuhan i bas ngalaken perbeben geluh, bage pe nepati padan guna nehken persembahen man Tuhan selaku respon kinitekenna ,enda ka me si lusih pentasmur jadi biak entah orat geluhna, Gejaplah maka kita selaku wakil Dibata ibas mpebelin-belin ras ertanggungjabap mabai anakta nggeluh sue ras si ngena ateNa. Ajarken ras susurken man anakta biak si mehuli gelah biak e jadi asam geluhna i bas masa depanna. Jadilah nande si idolaken anakta, bas kerina lagu langkahta mesikel ia ngusihsa njadikenca jadi biak geluhna. I je entah lanai kital je tapi kita tetap geluh i bas kepribadin anakta.
Nuri-Nuri.
Bagi Moria 2 kalak 1 kelompok:
a. Pengalamen pribadi. Tep-tep Moria bas kelompokna nuriken pengalamen pribadina ngaloken pengajaren nande i tengah jabu. Janah pengajaren e iajarken ka man anak jabunta, umpamana: “Kita la banci nggeluh si sada, kita perlu kalak sideban janah kalak pe perlu ka kita, emaka kita nggeluh arus:
- Mediate ras kepate, ertina ikut nggejapken penggejapen kalak.
- Adi reh temuenta e nuduhken ndeher rejekinta.
- Adi lit kalak mindo penampat bere asa ngasupta, ula sempat ia
- mulih ngambe-ngambe.
Teridah i bas pengajaren enda litna pesan: ula degil tapi arus nggit nampati sabap Tuhan pasti ersimulih. Kata enda ka me isenken man anak – anak i bas jabu i bas tep-tep kesempaten si lit guna mpeturah biak mediate, nggit erdiate ras nampati alu kiniteken Tuhan si ersimulih.
b. Banci erbagi i bas PA enda pegancih nuri-nuri kerna pribadinta si banci jadi usihen anakta.
Pdt. Misalta Kaban
Wari enda si pepulung kolekte extra guna dana JK-GBKP