MEREKEN AJAR
(Nehken Pengajaren Man Anak i bas Jabu)
Amsal 13: 1, 15: 20
13:1 Anak yang bijak mendengarkan didikan ayahnya, tetapi seorang pencemooh tidak mendengarkan hardikan.
15:20 Anak yang bijak menggembirakan ayahnya, tetapi orang yang bebal menghina ibunya.
Kuan-kuanen 13: 1, 15: 20
13:1 Anak si pentar ipergermetkenna adi bapana mereken ajar, tapi kalak si meganjang rukur la nggit ngaku salah.
15:20 Anak si pentar, malem ate bapana ibahanna; tapi anak si lenge la iergakenna nandena.
PERSIKAPEN
- Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
- Nikapken ingan persembahen ras pertoton syafaat
- Adi i bas sektor entah jabu kepkepen perdalanen PJJ ibabai Pt/Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
- Kerina perdalinenna rikutken situasi janah banci iubah (imodifikasi).
- Sope benaken PJJ banci kita rende Lagu KAKR
Rende Kidung Pujian – “Dalam Yesus Kita Bersaudara”
Dalam Yesus kita bersaudara.. dalam Yesus kita bersaudara..
Dalam Yesus kita bersaudara, sekarang dan selamanyaDalam Yesus.. kita bersaudara
I bas Yesus kita ersenina
I bas Yesus kita ersenina
I bas Yesus kita ersenina
I bas Yesus kita ersenina,
gundari seh rasa lalap, i bas Yesus kita ersenina.
Ertoto ibabai sekalak Mamre
Rende KEE. 244 – Nusur Min O Kesah Tuhan
Nusur min o Kesah Tuhan, bengket ku pusuhku e.
Maka Kata si nisuan, turah ras erbuah pe.
Kam i bas Dibata nari, kepkeplah ukurku min,
Pasu-pasu pendahin, maka aku genduari
Ndaram tuah si tetap, alu ate si telap.T’rang Badia ras penuduh, dalin kegeluhen e.
Ajar kami maka mubuh, kami arah Kam ke pe.
‘Lah ersada ras Dibata, maka aku tutus e.
Rembak min ras Kristus pe, seh me dungna lanai lata
Haleluya lah pujin, asa lalap baNdu min.
Ertoto Guna Ngoge Kata Dibata (ibabai Bapa)
Ngoge Kata Dibata (iogeken sekalak anak Remaja/Permata)
Renungen
Nai nari Dibata lalap la erngadi-ngadi mereken pedah ras ajarNa erkelangken suruh-suruhenNa (Raja, Nabi, Imam, Rasul-Rasul, Pertua Diaken, Guru Agama/Evanglis, Pandita, rsd) e me gelah manusia erkemalangen man baNa. Ertina ngikutken kerina perentahNa. Alu bage me maka kai si iperluken manusia itambahkenNa (icukupken Dibata) man banta (bdk. Mat. 6:33).
Jadi kalak si pentar (bijak) e seh kel pentingna i tengah-tengah kegeluhen kalak Israel, bage pe tentuna i bas kegeluhenta genduari. Engkai? Sue ras bahan PJJ-ta enda, misalna sekalak anak. Adi ipergermetkenna (ibegikenna, isimakna, iukurkenna) i bas pusuhna ajar bapana e, tentu nambahi pengalamenna nggeluh alu bijaksana ras bujur. Sabab sekalak bapa mereken ajar erpalasken pengalamenna si langa pernah ialami (i idah) anakna. Tentu bapa ngajarken anakna gelah kai si la mehuli si pernah inanami entah i idah bapana, ola min jadi i bas anakna. Tentu bage ukur bapa. “Sekolah hidup” enggo leben inanami bapa. Termasuk si perlu iajarken man anak e me biak meteruk ukur. Biasana kalak si meteruk ukur e me kalak si nggit erlajar ras nambahi pemetehna, meriah ukurna megiken ajar orangtuana. Tapi anak si meganjang ukur, biasana kurang nggit erlajar, sabab enggo beluh iakapna bana.
Penting pe siajari anak-anakta meteh (nandai) ras ngergai sangkep nggeluhna, orat nggeluh selaku kita kalak Karo, ngergai kalak si tuan asangken ia (sopan santun), ngergai perbedan si lit, nggit saling berbagi kehidupan ras tentu saja erkemalangen man Dibata. Sabab erkemalangen man Tuhan, sabab Tuhan e nge ulu kepentaren manusia (bdk. Kua. 1:7).
Tambah si e, orangtua (kususna bapa/mamre) si “pentar” (bijaksana) dingen “tegas” nge si banci ras ngasup ndidik alu disiplin anak-anakna, alu bage dungna lit i bas jabu e generasi (anak) si mehuli ras erkiniteken, erpemeteh bage pe meteruk ukur. Si e kerina enggo jadi saja aset/modal si meherga kal si enggo ibereken/itadingken (iwarisken) bapana kempaksa. “Anak si pentar, malem ate bapana ibahanna, tapi anak si lenge, la iergakenna nandena” (Kua. 15:20).
Gelah tersehi kai si nisuraken Dibata bage pe sura-suranta, si perlu man banta lebe selaku orangtua e me: sipemena: ula kisat erlajar. Pengalamen e me guru si meherga. Melala pengalamenta si mehuli, ula kita mela ras kisat nurikenca nandangi anak-anakta. Peduaken: sibabai anak-anakta beluh rukur erban keputusen si “tepat”, si erguna nandangi masa depanna. Bereken perbandingenperbadingenna (anding-andingen ntah perumpaman) ras contoh gelah banci isesuaiken ras bakatna (kemampunna). Peteluken: sidukung ia alu notokenca, mereken motivasi, mereken usihenusihen praktis bas kegeluhen si teptep wari arah kinijingkatenta (disiplin kerja) erdahin. Si e penting, sabab anak-anak mesunah akapna erlajar ras ngangkaisa arah litna contoh si man usihenna. Si jadi perbandingen banci si nen kegeluhen Jesus. IA ngajar sekitar 30% ngenca, janah 70% icibalkenNa arah praktek pelayanenNa.
Selaku kalak si nggelem “prinsip-prinsip” eradat-erbudaya, ula kita erleja-leja mabai anak-anakta make cakap Karo, sabab e identitasta, nuriken terombo ras hubungen perkaden-kaden: Merga si Lima, Tutur si Waluh, Perkade-Kaden Sepuluh Dua + sada. Arah peradaten e pe mbue kal pelajaren si banci sibereken.
Nuriken Penggejapen (sekalak Mamre, Moria ras sekalak Anak)
Irakut Serayan Tuhan (Pdt/Pt/Dk/Emeritus)
Diskusi/Sharing
- Sekalak Mamre ras sekalak Moria nuriken pengalamenna i bas jabuna tupung ia mereken ajar rikut ras contohna itengah-tengah jabu. Misalna: disiplin mabai ertoto alu pegancih sanga man.
- I bas paksa/situasi si kuga nge orangtua e mereken pedah-ajarna nandangi anak-anak itengah jabu? Misalna: tupung lit masalah nge maka siajarken anakta?
Momo Perpulungen (Pengurus PJJ ncatat kai si man totonken ras nentuken simabaisa)
Rende KEE.374 – Yesus Ulu Kegeluhenku (Persembahen)
Yesus ulu kegeluhenku,
Kam nge ngenca pengendesenku
Lalap tedeh ate pusuhku,
ku pehaga Kam bas geluhku.O Tuhan pernehen pusuhku,
si ertedeh ate man baNdu.
Ku gelem pedah ras padanNdu,
kusembah Kam i bas geluhku.Kusembah Tuhan penebusku,
simereken kekelengenNa
Alu tutus reh aku Tuhan
ras kerina isi jabungku
Pertoton Syafaat:
- Kerna Kata Dibata ras Pelajaren si enggo idiskusiken, gelah tutus ate ndalankenca (ibabai Mamre).
- Kerna Persembahen ras pendahin kerina ngawan ni perpulungen (ibabai sekalak Moria).
- Kerna siturah i bas perpulungen (ibabai serayan setempat).
Rende KEE. 350 – Kelengi Kebenaren
Kelengi kebenaren, pedauhlah si jahat,
pakeken Kata Tuhan, tahan rasa lalap.
Nggeluhlah alu bujur, meteruk ukur kin
dalanken kebenaren, maka ukur teneng.Erjaga-jagalah, reh me wari Tuhan.
Ersikap-sikaplah, pake Kata Tuhan
Pertoton Tuhan (ibabai pengurus PJJ/Bapa)
Pdt. Yosfran P. Sembiring, S.Th., M.M