“Ngidah Keleng Ate Dibata”
(Hari Ulang Tahun Saitun – LANSIA GBKP)
Kejadian 50: 22 – 26
Yusuf meninggal50:22 Adapun Yusuf, ia tetap tinggal di Mesir beserta kaum keluarganya; dan Yusuf hidup seratus sepuluh tahun.
50:23 Jadi Yusuf sempat melihat anak cucu Efraim sampai keturunan yang ketiga; juga anak-anak Makhir, anak Manasye, lahir di pangkuan Yusuf.
50:24 Berkatalah Yusuf kepada saudara-saudaranya: “Tidak lama lagi aku akan mati; tentu Allah akan memperhatikan kamu dan membawa kamu keluar dari negeri ini, ke negeri yang telah dijanjikan-Nya dengan sumpah kepada Abraham, Ishak dan Yakub.”
50:25 Lalu Yusuf menyuruh anak-anak Israel bersumpah, katanya: “Tentu Allah akan memperhatikan kamu; pada waktu itu kamu harus membawa tulang-tulangku dari sini.”
50:26 Kemudian matilah Yusuf, berumur seratus sepuluh tahun. Mayatnya dirempah-rempahi, dan ditaruh dalam peti mati di Mesir.Jusup mate
50:22 Jusup ras keluarga bapana tetap denga tading i Mesir; sanga ia mate umurna seratus sepuluh tahun.
50:23 Sempat denga iidahna anak-anak ras kempu-kempu si Eperaim, janah sempat denga pe ialokenna anak-anak si Mahir kempu Manase jadi keluargana.
50:24 Nina man senina-seninana, “Aku lanai ndekah mate, tapi kuga pe ipekena-kena Dibata nge kam. ItaruhkenNa kam ndarat i jenda nari ku taneh si enggo ipadankenNa man Abraham, Isak ras Jakup.”
50:25 E maka isuruh Jusup kerina kesusuren Jakup ersumpah nina, “Erpadanlah man bangku, maka adi itaruhken Dibata kam ku taneh si ipadankenNa e, tulanku pe ibabandu ku jah.”
50:26 Dungna mate me Jusup i Mesir i bas umur seratus sepuluh tahun. Itama rempah-rempah ku badanna, jenari itamaken maitna ku bas peti.
Gelah PERMATA GBKP:
- Ngidah Keleng ate, pengarak-ngarak ras pasu-pasu Dibata arah kegeluhen saitun
- Nehken Keleng Ate Man Saitun
Metode: Aksi Nehken Keleng ate Man Saitun
I. BENA KATA
Pernah isungkun kami sekalak saitun si enggo berumur 92 tahun alu penungkunen: “kai nge resepna ibas kam dalani kegeluhenndu, makana banci gedang umurndu”? Nina Saitun ndai ngaloi: “ola bahan ukur kalak segat, adi I tokohi kalak kam, ula erbalas”. Arah kesaksin sekalak Saitun enda banci sikatakan: ibas kita nggit ngalemi salah kalak, bagepe erbahan mehuli nandangi kalak em tandana kita nggo ngidah dingen nggejapken keleng ate Dibata man banta. Kalak si enggo ngidah dingen nggejapken keleng ate Dibata, harus me ia ngkelengi temanna manusia.
Adi si idah uga turi-turin Jusuf ibas kegeluhenna, aminna ia i celakaken bahkan idayaken senina-seninana tapi perbahanenna kempak seninana tetap mehuli, dingen dem keleng ate. Nggit ia ngalemi perbahanen salah senina-seninana bahkеn nampatisa pe. Em erkiteken Jusuf nggo ngidah dingen nggejapken keleng ate Dibata ibas ia.
Bicara PERMATA GBKP i bas posisi Jusuf, ngasup nge kita bagi silakoken Jusup kempak senina-seninana?
II. ISI
Yusuf labo pernah terpikir ras terbayang kenca kuga masa depanna kenca ia idayaken senina-senina ku pedagang mesir. Saja ijape ia tading ras erdahin erkemalangen ia man Dibata, dahikenna dahinna alu tutus ras ertanggung jawab. Aminna gia arus jadi budak, ipenjaraken ras ngalaken kiniseran tetap ia setia nandangi pendilo Dibata, emaka ijapape tetap ia jadi saksi Dibata, janah tetap i pasu-pasu Tuhan ras jadi pasu-pasu man jelma si enterem, termasuk nandangi keluarga/senina-seninana si nggo ndayaken ia bagepe man bangsa Mesir si la nandai Tuhan, bahkan seh masa tua na pe ia ikelengi Dibata.
Ibas Kejadin 50: 22-26 bahan PA PERMATA GBKP enda nuriken kerna akhir masa kegeluhen Jusuf. Jusuf ras keluarga bapana tetap denga tading i Mesir, erkiteken ingan si ingani keluargana mbarenda lit terjadi kiniseran simesangat. Tepatna daerah Gosen, taneh enda daerah simehumur (Kej. 50: 8). Jusuf mate ibas paksa enggo metua umur 110 tahun. Sempat denga i idahna anak-anak ras kempu-kempu si Efraim, janah sempat denga pe ialokenna anak-anak si Mahir kempu Manase jadi keluargana. (Efraim ras Manase e mekap anak Jusuf arah perjabunna ras Asnat (Bdk. Kej. 41: 50-52).
Tuhu maka umur gedang i gejapkenna selaku pasu-pasu, tapi kinata sijelas maka keadaan cawir metua banci saja peturah keadaan kurang pesenangken. Piga- piga hal si icatatken i bas Pustaka Si Badia, eme:
- Kula enggo menukah bergehen (Bdk. 1 Raj. 1:1)
- Urak gegeh (Mzm. 71:9)
- Enggo seleng mata, lanai erpengidah (Kej. 48:10).
Amin bage gia, keleng Ate Dibata dingen pengarak-ngarak ras pasu-pasu Dibata tetap icidahkenna kempak kalak si tetap setia dingen ernalem man Tuhan. E teridah i bas masa tua Jusuf pe, kerina keluarga erkeleng ate kempak Jusuf.
Ayat 24: lje teridah, i bas masa akhir hidupna pe Jusuf tetap denga ngasup mpetetap ukur kerina keluargana. Emakana Dibata tetap mpekena-kena ia dingen ngkawali perdalanenna ku taneh si enggo ipadankenNa man Abraham, Isak, ras Jakup.
Ayat 25 dan 26: Kiniteken Jusuf tetap ibas Padan Dibata kerna Kanaan jadi ingan kerina bangsaNa/kesusuren Jakup ( Kej. 13:12-15; 26:3; 28:13). Emaka i suruh Jusuf kerina kesusuren Jakup ersumpah, segelah tulanna pe ibaba ku jah. Karakter Jusuf si nggit ngalemi salah seninaseninana sebagai keleng atena kempak senina- seninana, erbahanca maka kerina keluargana pe erkeleng ate kempak Jusuf. Teridah kai si ipadanken Jusuf kempak keluargana tersehi, kerna tulan-tulan Jusuf pe ibaba ku Negeri si ipadanken Dibata (Bdk. Kel. 13:19). Dung Jusuf nuriken kerna pemindonna man kerina kesusuren Jakup, mate me ia ibas umur 110 tahun.
III. PENGKENAINA
Tema PA PERMATA GBKP ta ibas wari enda ngajarken man banta makana kegeluhenta ibas doni enda lit jangka waktuna rikutken peraten Tuhan. Ibas kesempaten si ibereken Tuhan e, ngajuk kita segelah banci tetap ngelakoken sura- sura Tuhan ibas kegeluhenta. PERMATA GBKP si setia man Tuhan pasti i pasu-pasu Tuhan ibas kerina dampar kegeluhenna (Bdk. Uga Jusuf, ibas kegeluhenna subuk ibas paksa susah ntah pe senang tetap ngelakoken kai singena ate Tuhan).
Ibas bahan PA PERMATA GBKP ta enda pe siperingeti HUT Saitun. Jadi sekalak Saitun eme sada kesangapen, erkiteken Saitun nggo pasti pernah nanamina masa nguda, tapi kita PERMATA GBKP lenga bo tentu si nanami masa tua. Makana ikataken sada kesangapen. Adi lit Kategorial Saitun i bas tengah-tengah Runggunta, meriahlah siakap, sebab teridah salah sada janji Tuhan alu mereken umur sigedang man bana. Emaka si litken waktunta ndahi ia dingen erbahan aksi guna ncidanken keriahen ukurta ibas HUT Saitun. I bas kita nehken keleng ate man Saitun, e ertina kita nggo ngerespon keleng ate Dibata si iberekenna man banta Selamat HUT Saitun man orangtuata kerina ke- 30 Tahun i bas Bulan Agustus enda selama litna Pusat Pelayanan Orangtua Sejahtera (PPOS) GBKP. Rikut pe HUT Saitun ke-6 tahun selaku Kategorial ibas GBKP.
IV. AKSI
- Cakapken dingen bahanlah aksinta ibas HUT Saitun i tengah-tengah Runggunta!
- Nehken Puji-Pujian man Tuhan ibas Kebaktin Minggu guna HUT Saitun.
V. USULEN LAGU
- KEE No. 388: 1-2 “O Dibata Kam Kap Dibatangku”
- Hidup Ini Adalah Kesempatan
- KEE. No. 59: 1-2 ” Keleng Atendu Tangkas Bangku”
Pdt. Novian P. Ginting, S. Th