(HUT RI)
Ogen : 1 Petrus 2:13-17
Tema : “Nggeluh Bagi Kalak Merdeka'”
Tuijun : Gelah Mamre:
- Meteh ldentitasna e me kalak si enggo merdeka
- Ngasup ncidahken jiwa nasionalisme i bas ngisi kemerdekanna alu perbahanen si mehuli e me ulih kinitekenna man Tuhan
2:13 Tunduklah, karena Allah, kepada semua lembaga manusia, baik kepada raja sebagai pemegang kekuasaan yang tertinggi, 2:14 maupun kepada wali-wali yang diutusnya untuk menghukum orang-orang yang berbuat jahat dan menghormati orang-orang yang berbuat baik. 2:15 Sebab inilah kehendak Allah, yaitu supaya dengan berbuat baik kamu membungkamkan kepicikan orang-orang yang bodoh. 2:16 Hiduplah sebagai orang merdeka dan bukan seperti mereka yang menyalahgunakan kemerdekaan itu untuk menyelubungi kejahatan-kejahatan mereka, tetapi hiduplah sebagai hamba Allah. 2:17 Hormatilah semua orang, kasihilah saudara-saudaramu, takutlah akan Allah, hormatilah raja!
KATA PENARUH
Indonesia seri ras sada perahu si galang, janah kita kerina 268 juta penduduk enda, tading ras-ras bas perahu e, erlayar ras-ras ngalaken udan, gelombang, ras angin meter. I bas erlayar perahu e, macam-macam tuhu kesibuken 268 juta penumpang i datas. Lit deba sibuk ngelubangi perahu, ncabuti papan, buatina baut-bautna, besi-besina gelah bocor gelah banci pindah ku perahu si deban sebab idahna jile perahu si deban. Lit ka deba sibuk ngecat perahu, napui, ngepel gelah mejile perahu enda atena. Lit ka si tutus atena ndayung perahu e, gelah mejile kel perdalanna atena. Si deban lit ka deba riahen akapna foto-foto bas perahu e, la masalah bana uga situasi perahu ras laut. Lit ka deba dekahen ka rubati, erjengil sapih-sapih ia bas perahu ndai. Lit ka si dekahen ka mandangi, jungut-jungut, “adi bagenda min ndai bentuk perahu e, mejile min ndai”, “adi tama ka ndai lampuna bage, tiang bage nggo sikap kel.” Sisana deba erdalan-dalan ku jah ku je, nonton-nonton, bagepe medem.
Siapai nge kita, adi kita bas perahu Indonesia raya enda? Kai nge si banci silakoken selaku kita kalak Kristen, selaku Mamre GBKP, bagepe kita selaku warga Negara Indonesia yang baik dan benar. Enda me ateta si ukuri i bas bahan PA Mamrenta minggu enda.
URAIAN TEKS/TAFSIREN
Perpulungen si ngaloken surat 1 Petrus i e me kalak Kristen perlajang si merap i belang-belang provinsi Pontus, Galati, Kapadokia, Asia, ras Bitinia. Kalak enda e me perpulungen si kitik si nggeluh i tengah-tengah kalak si la tek man Kristus, ngalaken perbeben si mesangat si reh i bas masyarakat sekitar pemerentah si erkuasa. Amin bage gia, Petrus mpersingeti perpulungen e maka ia e me bangsa pilihen Tuhan, si iangkatNa jadi anak-anakNa, emaka perpulungen e min nuduhken cara nggeluh si la bali ras kalak i sekelewetna. Cara nggeluh si la bali enda labo terjeng aksesoris saja tapi lahir i bas sada pengangkaan kerna ise ia i lebe-lebe Dibata dingen kai arus ilakokenna selaku anak-anak Dibata.
Ngidah situasi si jadi i bas kalak Kristen si tading merap i e perlajangen, Petrus mpersingeti perpulungen e gelah selaku kalak pendatang, kalak Kristen ula “pengacau,” tapi jadi usihen si mehuli, jadi pasu-pasu man sekelewetna. Emaka nina Petrus ndai patuhlah kam nandangi kerina pemerentah i doni enda subuk raja, gubernur-gubernur si itugasken raja. Palas kepatuhen e labo ban kebiaren, paksaan, ntahpe ukumen, tapi palasna eme erkiteken Tuhan. Ertina kepatuhen e jadi ban si inget kinitekenta man Tuhan si enggo ngaturken kerina pemerentah ras si erkuasa, janah alu si e kuasa Dibata erdahin arah pemerentahen si lit. Perlawanen/pemberontaken nandangi pemerentah si erkuasa la saja banci erbahan kekacauan, tapi pe situhuna perlawanen nandangi sura-sura ras kuasa Dibata. Uga adi pemerintahen e la benar, jahat, rsd? Tek kita i bas Dibata lit kuasa guna mpeganjangken bagepe mpeteruk, termasuk raja-raja, pemerentah si erkuasa. Si inget uga Dibata mpeteruk raja Nebukadnezar si mulai meganjang ukurna, janah si inget ka, Raja Kores, si labo nandai Tuhan justru ipake Tuhan mulahi bangsaNa i bas pembuangen i Babel nari. Ertina, Dibata erkuasa janah pasti bertindak i bas kerina penguasa, pemerentah si enggo iaturkenna i doni enda
Emaka nina Petrus i bas ayat 15, kepatuhenndu man pemerentah e la saja erbahanca aman kecibal perpulungen e, tapi eme sura-sura Dibata, gelah arah perbahanen si mehuli ipesinik kalak bodoh si luam cakapna. Ertina, melala kalak si la nandai Dibata si ngeranai, menyebarkan info si la payo kerna kekristenan si erbahanca turah pandangan miring, ate segat man kalak kristen, tapi alu kepatuhen ras kiniulin kalak Kristen nandangi pemerentahna kerina cakap e ipesinik, bahkan kalak Kristen ipujiken kalak si deban. Emaka nina Petrus, jadilah kalak bebas tapi terikat. Uga maksudna? Memang kalak Kristen bebas, la ise pe mengendaliken, si mengancam, tapi kita teriket makeken kebebasen e guna si mehuli, si benar, si ngena ate Dibata, labo nutupi kejahaten, apai ka jadi pelaku kejahaten. Enda me imaksudken jadi budak Dibata, kalak si tuhu-tuhu patuh man kai si iperentah tuanna, eme Dibatanta. Emaka selaku anak Dibata si bebas, si arus ilakoken nina Petrus eme mehamat man kerina manusia, erkeleng ate man teman sada kiniteken erkemalangen man Dibata, anak Dibata janah mehamat man raja. Ertina, hubungen vertikal ras Dibata bagepe hubungen horizontal ras teman manusia erdalan alu mehuli.
APLIKASI
Arah bahan PA-nta minggu enda Petrus dasar prinsip kekristenan, eme “jadilah Kristen/ Pengikut Kristus” i ja pe kam ringan bagepe kai pe situasi ras pendahinndu. Identitasta selaku kalak Kristen si enggo imerdekaken Kristus labo serta merta mengubah geluhta, si musil jadi bayak, sakit rempet sehat, si la lit motorna rempet reh kalak naruhken motor. Fungsi kiniteken selaku kalak Kristen menurut Petrus eme mengubah cara nggeluh si ndekah jadi mbaru, pola pikir si ndekah jadi mbaru. Emaka nggeluh bagi kalak merdeka pemena ibenaken i bas kemerdekaan pola pikir/paradigma.
Selaku kalak Kristen bagepe selaku warga Indonesia idilo kita gelah min ikut kita mereken kontribusi si mehuli nandangi perdalanen bangsanta. Usahakenlah gelah i bas kerina kegeluhenta la kita jadi batu antuken, tapi kerina min kalak ngidah uga kuasa Jesus Kristus i bas kegeluhenta bagepe kekelengenta man sekelewetta. Si jadi wujud rasa nasionalis bagepe kinitekenta man Tuhan, adi erdahin kita, erdahinlah alu mehuli, tutus, dalanken si benar, la korupsi, la nebu-nebu, adi kita ber-usaha bahanlah pelayanen si mehuli, ula merangap, ula kasar. Teridahlah i bas jabunta kita bapa si banci jadi usihen, ihamati se-isi jabu erkiteken karakter si payo ras kinitekenta man Tuhan. Tuhu tersampat kel bangsanta Indonesia enda adi i bas kita kerina Mamre se-GBKP enda bersih i bas judi, bersih i bas penyalahgunaan Narkoba, bersih i bas KDRT, perselingkuhen, bagepe ikut kita njaga lingkungen/ alam enda, si bahan gerakan kebersihan, aksi donor darah, aksi Diakonia, si ncidahken uga anak Tuhan ikut membangun masyarakatna si palasna reh i bas kehamaten man Tuhan Dibata.
DISKUSI
- Perbahanen-perbahanen kai saja nge si arus silakoken/sicidahken, selaku kalak Kristen si patuh dingen erkemalangen man Dibata rikutken ogenta wari enda?
- Kai nge tantangen/ hambaten si erbahanca rusur kita lenga ngasup nggeluh merdeka/bebas selaku anak-anak Dibata, hususna i bas jabunta ras negaranta enda?
USULEN ENDE ENDEN
- KEE GBKP No. 338.1-2
- KEE GBKP No. 463:1-2
- KEEGBKP No. 323:1-2
- KEE GBKP No. 471:1
Pdt. Ebenezer Karo Sekali, S.Si, MM