Perubahan Budaya I Bas Pandemi
Ogen : Juna 3: 4 – 10
Tema : Ndalani Perubahan si Mbaru
Tujun : Gelah Mamre:
- Ngidah keleng ate Tuhan nandangi kepatuhen kalak Niniwje
- Mpelimbarui kebiasaan nggeluh guna keterkelinen
3:4 Mulailah Yunus masuk ke dalam kota itu sehari perjalanan jauhnya, lalu berseru: “Empat puluh hari lagi, maka Niniwe akan ditunggangbalikkan.” 3:5 Orang Niniwe percaya kepada Allah, lalu mereka mengumumkan puasa dan mereka, baik orang dewasa maupun anak-anak, mengenakan kain kabung. 3:6 Setelah sampai kabar itu kepada raja kota Niniwe, turunlah ia dari singgasananya, ditanggalkannya jubahnya, diselubungkannya kain kabung, lalu duduklah ia di abu. 3:7 Lalu atas perintah raja dan para pembesarnya orang memaklumkan dan mengatakan di Niniwe demikian: “Manusia dan ternak, lembu sapi dan kambing domba tidak boleh makan apa-apa, tidak boleh makan rumput dan tidak boleh minum air. 3:8 Haruslah semuanya, manusia dan ternak, berselubung kain kabung dan berseru dengan keras kepada Allah serta haruslah masing-masing berbalik dari tingkah lakunya yang jahat dan dari kekerasan yang dilakukannya. 3:9 Siapa tahu, mungkin Allah akan berbalik dan menyesal serta berpaling dari murka-Nya yang bernyala-nyala itu, sehingga kita tidak binasa.” 3:10 Ketika Allah melihat perbuatan mereka itu, yakni bagaimana mereka berbalik dari tingkah lakunya yang jahat, maka menyesallah Allah karena malapetaka yang telah dirancangkan-Nya terhadap mereka, dan Iapun tidak jadi melakukannya.
KATA PENARUH
Menaken bulan Desember 2019 seh paksa enda, lit sada pinakit si jadi i bas doni enda e me pinakit virus Corona. Erkiteken pedas kel penularenna dingen kerina kalak banci tertular, si erbahan kacau doni enda emaka igelari badai pandemi COVID-19 (coronavirus disease 2019). Seh tanggal 6 September 2020 iberitaken:
- Positif tertular: 27 Juta kalak
- Malem: 19 Juta kalak
- Mate: 882 Ribu kalak
Virus Corona enda menular arah perciken pernapasen (droplet) kalak si enggo positif kena virus corona si ndarat tupung mbatuk, kebacihen bagepe paksa ngerana.
Guna mencegah penyebaren COVID-19 enda si banci ilakoken e me:
- Cuci tan secara rutin. Pake sabun ras lau ntah cairen pembersih tan erbahan alkohol.
- Jaga jarak aman ras kalak si mbatuk ntah bersin.
- Tetap pake masker.
- Ula dadap mata, igung ntah babah di kune tan lenga ibersihken.
- Paksa mbatuk ntah bersin, tutup babah ras igung alu tan ntah tisu
- Ula ndarat rumah di kune siakap kulanta lit maginna.
Litna virus corona enda mabai jelma manusia nggeluh i bas perubahen si mbaru.
URAIAN TEKS/TAFSIREN
- Niniwe
Niniwe e me ingan persimpangan jalur perniagan (perdagangen) si ngeleweti sungai Tigris. Letak Kuta enda posisi tengah antara Laut Tengah ras Samudra Hindia, maka kuta enda nghubungken Timur ras Barat. Erkiteken posisi strategis guna perdagangen; erbage-bage komoditas perdagangen, duit, ras kinibayaken rehen ija nari pe ku Niniwe. Ulihna kuta enda jadi kuta si mbelinna ras si bayakna i daerahi Mesopotamia (bali ras kota Korinti i bas Padan si Mbaru).
Niniwe i gelari kota “penumpah darah.” Moralitas kalak si ngiani kuta enda tuhu-tuhu jahat, nggesuh ras nembah berhala. Istar, dewi cinta ras perang, e me berhala utama kuta Niniwe. I bas Pustaka si Badia isingetken maka kuta Niniwe dem alu erlua-lua, perampasen, e maka Tuhan ersura-sura ngkernepkenca. Tapi Tuhan pe erpengakap maka kuta si pendudukna seh teremna enda tuhu-tuhu penting emaka perlu itobatken. Paksa enda, cibal kuta Niniwe tepat i seberang kota Mosul, i Provinsi Ninawa, Irak.
- Tokoh i bas teks Juna 3:4-10:
Juna e me sekalak nabi, asalna i Kerajaan lsrael Utara nari. Gelar Juna i bas cakap Heber ertina “‘nderapati”. Juna e me anak Amitai (bdk. Jun 1:1) ras sekalak nabi i bas abad VIII SM si ernubuat kerna restorasi batas-batas lsrael si ilakoken raja Jerobeam Il, raja Samaria (bdk. 2 Raj 14:23-25). Asalna i Gat-Heper nari, sada kota i perbatasen Zebulon ras Naptali.
I bas kitab Juna 1-2, Juna idilo Tuhan lawes ku kuta Niniwe lako ngataken maka kuta e enggo ersalah. Juna la nggit berkat ku Niniwe e maka lawes ia ku Jope dingen idapetina sada kapal si nandangi berkat ku Sepanyol. Tapi, ibahan Tuhan angin ras galumbang si merawa menam pe pecah atena kapal e. Kerina si idatas kapal e ertoto man dibatana tapi Juna badeh pertunduhna. Guna nguraki baban kapal e, ibenterkenna barang-barang ku lawit tapi kapal tetap denga gedap atena ibahan angina ras galumbang. Emaka ilakokenna tikam tanduk guna meteh salah ise si erbahan reh cilaka. Kena me gelar Juna. Dung ertoto man Tuhan Dibata, ibenterken kalak e me Juna ku laut. Dungna i telen durung galang me ia. Telu wari telu berngi dekahna Juna i bas beltek nurunge. I bas beltek nurung, ertoto ia man Dibata, mindo pengalemen idur Dibata nari. Kenca bage i suruh Tuhan me nurung e ngutahken Juna ku daraten.
Kenca kejadin e, i bas bindu 3, i suruh Tuhan me peduakaliken Juna lawes ku Niniwe. Patuh Juna nandangi persuruhen Tuhan, emaka berkat ia ku Niniwe. I benaina erdalan arah tengah kuta e dingen ermomo ia, nina “Empat puluh wari nari ikernepken me kuta Niniwe!” Tek anak kuta Niniwe, emaka itetapkenna maka kerina arus erpuasa dingen make uis guni.
- Raja Niniwe
Si ilakoken Raja Niniwe kenca megi kai siikataken nabi Juna e me nusuri bas kursi kinirajanna nari, itangtangina jubahna, jenari ipakena uis guni, e maka kundul ia i bas abu. Raja Niniwe nehken perintah guna erpuasa (la banci man ras minem), make paken guni rikut ras kerina asuh-asuhen. Sekalak-sekalak arus ertoto man Dibata janah itadingkenna lagu langkah si melket dingen ipengadina perbahanen-perbahanen si jahat. Kerina enda ncidahken maka raja ras anak kuta Niniwe enggo erkadiola dingen jera atena nadingken perbahanen si nggesuh. Kinijeran si icidahken arah pusuh si mbagesna nari. Erpengarapen ia gelah salih ukur Dibata, olanai la nembeh maka kalak Niniwe la mate.
Ulih perubahen geluh si jadi i bas Juna ras Raja Niniwe, jadi pertobaten massal i kuta Niniwe. ldah Tuhan kerina kai si jadi i kuta Niniwe maka lanai ilakokenna si jahat, emaka salih ukur Dibata, janah la surung iukum Na kalak e aminna pe enggo ikatakenNa iukumNa ateNa. Kalak Niniwe enggo nggeluh i bas kegeluhen si mbaru. Nggeluh i bas si ngena ate Dibata. Perulihenna e me kegeluhen labo kematen. lalokenna keterkelinen idur Tuhan nari.
APLIKASI
Tema PA Mamre paksa enda e me: ndalani perubahan si mbaru. Perubahen sada hal si pasti jadi i bas kegeluhenta. I bas kerina dampar kegeluhenta tetap lit i bas perubahen. Perubahen enda la tertebeng kita. Emaka si perluken kita labo gegeh guna ngelawan i bas litna perubahen enda tapi kengasupen penyesuaian diri nandangi perubahen e. Bagi nina sada kata bijak: “Kita tidak akan bisa
mengendalikan angin saat berlayar, tapi kita bisa menyesuaikan layarnya.” Arah angin labo banci si ubah. Tapi gelah tetap mehuli perdalanen kapal layar, banci si cocokken layar kapal e ras arah angin e. Alu bage kapal layar e banci tetap erlayar seh ku tujun. Sembaba ras si e, perubahen si tetap i bas kegeluhenta, arus si ikuti alu litna perubahen i bas dirinta (Bila kita tidak lagi bisa mengubah situasi, kita ditantang untuk mengubah diri kita sendiri).
I bas pengalamen geluh anak kuta Niniwe si erbahan ia terkelin e me litna perubahen diri. Kenca jadi perubahen dirina maka erpengarapen ia gelah Tuhan Dibata ngubah keputusenNa lanai ngukum anak kuta Niniwe. I bas litna perubahen dirina e, pulah ia i bas ukumen Dibata nari. Terkelin ia kerina. Perubahen i bas ndalani kegeluhen pe arus silakoken. I bas mewabahna badai pandemi covid19, mahan bana kita arus cuci tan secara rutin pake sabun ras lau ntah cairen pembersih tan erbahan alkohol, jaga jarak aman ras kalak si mbatuk ntah bersin, tetap pake masker, ula ndadap mata, igung ntah babah di kune tan lenga ibersihken, tutup babah ras igung alu tan ntah tisu paksa mbatuk ntah bersin ras ula ndarat rumah di kune siakap kulanta lit maginna. Kerina si tersena enda kidekah enda tentu lenga jadi kebiasanta. Tapi arus jadi adaptasi kebiasan si mbaru i bas geluhta gelah sehat mejuah-juah kita. Kita la terpapar virus corona. Disiplin dage kita njaga diri ras keluarganta arah bahaya covid 19. Kita ras jabunta sehat bagepe kalak si deban tetap terjaga kesehatenna. Salam adaptasi kebiasan mbaru ras salam sehat.
DISKUSI
- Oge mulihi Juna 3:5-6. Kai nge pengertin si banci si turiken i bas ayat enda?
- Kai nge untungna di kune adaptasi kebiasan mbaru banci sidalanken alu mehuli i bas badai pandemi covid19?
USULEN ENDE ENDEN
- KEE GBKP No. 6:1-2
- KEE GBKP No. 41:1-2
- KEE GBKP No. 199: 1-2
- KEE GBKP No. 82:1,5
Pdt. Christoper Sinulingga, M.Th