RANAN SI PEGELUHKEN
(Moria memfasitasi fase perkembangen anak)
TUJUN: Gelah Moria:
- Meteh maka ranan si mehuli mereken kegeluhen.
- Ngasup milih kata-kata si pas sue ras “fase perkembangan anak”.
METODE PA: Simulasi
Amsal/Kuan-kuanen 15: 1 – 4
15:1 Jawaban yang lemah lembut meredakan kegeraman, tetapi perkataan yang pedas membangkitkan marah.
15:2 Lidah orang bijak mengeluarkan pengetahuan, tetapi mulut orang bebal mencurahkan kebodohan.
15:3 Mata TUHAN ada di segala tempat, mengawasi orang jahat dan orang baik.
15:4 Lidah lembut adalah pohon kehidupan, tetapi lidah curang melukai hati.15:1 Alu jabap si melias mantak rawa si gara, tapi jabap si merampus pekeke ate merawa.
15:2 Ranan kalak pentar dem alu pemeteh, tapi ranan kalak bodoh la lit ertina.
15:3 Kai pe si jadi idah TUHAN i japa pe, iperdiatekenNa kerina perbahanen si jahat ntah pe si mehuli.
15:4 Ranan mehuli mereken kegeluhen, cakap si ngelukai pusuh erbahanca bene ukur.
Kata Penaruh.
I bas tahun enda tema pelayanen GBKP eme anak si nguda jadi pasu-pasu. Fokus kita kerna kegeluhen anak-anakta si nguda subuk KAKR bage pe PERMATA. Perlu si eteh maka jemaat GBKP gundari kurang lebih 350.000 kalak. I bas si e 48 % PERMATA ras KAKR, emaka banci jadi 5 tahun si reh enggo teremen jemaat GBKP enda PERMATA ras KAKR bagepe si Permata ndube jadi Moria ras Mamre. Perlu si perdiateken sedekah enda kerna keterlibaten anak-anakta si nguda i bas dahin Gereja, enggo nge ia muat bagin i bas pelayanen Gereja entah ndauh denga asa siniarapken. Penungkunen seterusna, enggo nge si bereken tanggungjabap man bana ndahiken dahin pelayanen e entah si akap denga ia la ngasup ndahikensa? Enda me kesempatenta mabai anak si nguda gelah pentar, erpemeteh ras erkiniteken. Kepentaren e teridah arah pengerana ras perbahanenna. Ietehna kai arus ilakokenna tupung ia nguda kususna i bas pelayanen Gereja.
Mpebagesi Pengangkan Kerna Ogen.
Kitab Kuan-kuanen enda melala ngerana kerna kepentaren, perbahanen subuk i bas pemeteh, pengerana bujur ras pengerana ratur, erkesehen. I bas pasal 15 ayat 1-4 si jadi oratenta enda ngerana kerna ‘ranan’ (kata – kata) kalak pentar ras kalak bodoh. I bas ayat 3 ituriken maka Dibata meteh teptep ranan si ibelasken kalak pentar ras kalak bodoh. I bas ayat 1, ayat 2 ras ayat 4 e ibandingken pengerana kalak pentar ras kalak bodoh. Kalak pentar: mereken jabapen si melias, dem alu pemeteh, ranan mehuli mereken kegeluhen. Kalak bodoh; jabap si merampus, la lit ertina, ngelukai pusuh erbahanca bene ukur Arah perbandingen pengerana kalak pentar ras bodoh e, lit i je piga-piga pengajaren:
- Lit kepe kuasana kata-kata si ibelasken manusia, banci mereken semangat entah motivasi man si megisa, band ka encedai perkade- kaden i bas keluarga ras masyarakat. Di kune lit persoalen si la bagi ukur, kalak pentar ngasup nguasai dirina, ibelaskenna kata-kata si la erbahan pusuh kalak mesul megisa. Tapi adi kalak bodoh banci mpekeke rawa teman.
- Arah ranan si ibelasken tereteh ise si erbelas, kalak pentar entah kalak bodoh. Adi kalak pentar erbelas palasna kebenaren, keadilen ras kiniulin, iukurina nilal-nilai moral, praktis ras etis. Ertina lit pertimbangen adi ia erbelas, payo pe sekali pendapatna, lukurina uga maka la salah mbelaskensa, uga maka payo akap kalak si megikensa. Adi kalak bodoh erbelas la ukurina kai si ibelaskenna ras la nggit erlajar.
- Ranan mehuli mereken kegeluhen desken batang kayu si jadi lambang ulu kegeluhen. Ia banci mereken oksigen ras ngisap racun-racun si liti bas udara. Ranan si mehuli ergegeh mereken pengangkan si payo, mereken semangat, ndungi persoalen, mabai kegeluhen ku si terulin.
- Tuhan meteh teptep ranan si ibelasken manusia, i bas kerina ingan lit Dibata, iperdiatekenna kerina ranan kalak pentar ras ranan kalak bodoh. Dibata pagi si ertaktak, IA hakim si bujur, isehkenna pagi balasen sue ras pengerana kalak pentar ras kalak bodoh.
Pengajaren enda tetap ipesen man keluarga ras pribadi kalak Israel. Alu bage kerina erlajar gelah pentar melasken ranan si mereken kegeluhen.
Pengkenaina.
Jamanta genduari persaingen reh ketatna ngalaken industri 4.0 enda. Lanai jelma ngenca si jadi saingen tapi robot, apaika man anak-anakta si nguda. Emaka perlu kal pengajaren kalak pentar e lalap ipeseh, teptep wari, tiap detik gelah la bali ras kalak bodoh si la merhat erlajar. Bahanlah anak – anakta i bas jabu selaku temanta gelah ia nggit nuri-nuri man banta. Mari si perdiateken tahapen perkembangen anak i bas tiap fase:
- Fase Golden Age (1 – 6 Tahun)
I jenda fase bermain si banci ngerangsang otakna, perlu ibegina rusur cerita nambahi kosa katana, ngajak anak e erana kerna kai si alamina, kai si gejapkenna, uga perasanna ras bere kesempaten man anak guna ndungi masalahna. Nggo banci nande ngajarken anak erkreasi, nggunting kertas ras mpetandaken peran keluarga ise ras kadena kalak si rusur reh bagepe kade kadenta. Ngajari landek, olah raga bersama, mbiasaken antri ras sabar i bas nimai. Erlajar rende, megiken musik ras main alat musik. Babai ku ingan terbuka; pantai, kebun binatang, kolam renang, juma guna ngerangsang kecerdasan naturalisna, anak i bas usia enda perlu iajarken njaga kebersihen lingkungen. - Fase Kanak-Kanak Menengah (6 – 9 Tahun)
I bas usia sekolah di luar lingkungan keluarga i je idatna uga bersosial, mbedaken si apai si mehuli si apaí si jahat. Ia mulai ndatken pengajaren i luar keluarga eme arah guru ras teman-temanna, jadi kai si enggo idatna sanga usia golden ndai jadi modalna ndatken pemeteh i darat keluarga, enggo ietehna apai si mehuli ras lang erkiteken i rumah enggo melala si bereken pengajaren guna perkembangenna. - Fase Kanak-Kanak Akhir ( 9 – 12 Tahun)
I bas fase enda fase perkembangen kecerdasan guna memahami fenomena alam, nggit ikoreksi, ngenen perbedan sada ras sidebanna, konsentrasi mulai meningkat, bagepe nggit erlajar i bas kalak sideban nari, mulai mbandingken sada ras sideban, orangtuaku bagenda, orangtua temanku bagenda. Nggo rukur guna nampati kalak sideban, adi anak si dilaki i bas fase si enda me ia erlajar kerna “kelelakianna”, emaka i bas fase si enda perlu kal kedekatanna ras bapana.
Teptep fase perkembangen anak perlu lajari ngerana alu payo, ngerana la encedai pusuh si megisa, tapi banci mereken kegeluhen. Pentar i bas ngerana, iukurina kiniulin kalak si deban, bujur bas pendahin ras perbahanen, tetap paguh i bas kiniteken e me modal anak si nguda ngalaken tantangan jaman enda bagepe ndahiken dahin pelayanen Gereja. Adi labo si bere kesempaten man bana muat bagin i bas dahin Gereja, ndigan nge banci ia nggejapken Gereja GBKP enda jadi inganna mbentuk kinitekenna. Katawari igejapkenna maka lit tanggungjababna i bas ndahin pelayanen Gereja bagepe dahin jabu? Enda me bagin si perlu si perdiateken selaku orangtua.
Simulasi:
- Moria kundul 3-5 kalak sada kelompok. I bas kelompok e teptep Moria nuriken man temanna kerna uga carana ia nehken pengajaren kerna ‘ngerana’ man anak-anak i tengah jabu.
- Kenca kita er PA, kira-kira cara si kuga nge pas pengajaren si arus si bereken man anak-anakta rikutken fase-fase si bentasi anak-anakta. Cubaken diskusiken ras temanndu.
Pdt. Natalidna Tarigan, M.Th.
Inget ras ersikaplah…….minggu si reh kita nonton bareng
