Mpersiapken anak i bas budaya
(Adat/orat geluh; cakap karo, kehamaten ibas ngerana, rsd)
Ogen : Kejadin 10: 1-5
Tema : Megah Make Bahasa
Tujun : Gelah Mamre
- Meteh maka sinursur Japet jadi sada bangsa si mbelin arah bahasana.
- Ngajarken cakap Karo man anak singuda gelah ola bene.
Daftar bangsa-bangsa keturunan Sem, Ham dan Yafet
10:1 Inilah keturunan Sem, Ham dan Yafet, anak-anak Nuh. Setelah air bah itu lahirlah anak-anak lelaki bagi mereka. 10:2 Keturunan Yafet ialah Gomer, Magog, Madai, Yawan, Tubal, Mesekh dan Tiras. 10:3 Keturunan Gomer ialah Askenas, Rifat dan Togarma. 10:4 Keturunan Yawan ialah Elisa, Tarsis, orang Kitim dan orang Dodanim. 10:5 Dari mereka inilah berpencar bangsa-bangsa daerah pesisir. Itulah keturunan Yafet, masing-masing di tanahnya, dengan bahasanya sendiri, menurut kaum dan bangsa mereka
KATA PENARUH
Ibas kinata paksa enda, terlebih-lebih i daerah kota, enggo semal kel i bas jabu-jabu kalak Karo lanai make bahasa Karo. Terlebih-lebih nandangi anak-anak i bas jabu, si erbahanca anak-anak e lanai meteh cakap Karo. I ja ngenda salah benana? Tentuna i bas kita orangtua. Orangtua lanai make ras ngajarken kerna cakap Karo man anak-anakna. Adi cakap Karo pe lanai ieteh anak-anakta, banci jadi kerna turi-turin orat geluh kalak Karo kerna ertutur, nehken kehamaten man kalimbubu, medes ersembuyak-senina ras metami er anak beruna pe lanai iangkana. Arah PA Mamre sekali enda, ipersingeti kita mulihi, terlebih-lebih selaku bapa, segelah rutang min siakap ngajarken cakap Karo ntah cakap suku si deban (bapa ntah nande i bas suku si deban nari) man anak-anakta. Tujunna e me segelah ola bene ras cakapta e jadi “identitas” merekta selaku sada terpuk ntah suku.
URAIAN TEKS/TAFSIREN
Tangkas ituriken kerna sinursur Nuah arah anak-anakna Sem, Ham ras Japet. Tujun isingetken ise-ise saja sinursur anak-anak Nuah enda e me segelah tetap teridah maka bangsa-bangsa i doni enda terlebih kenca banjir si mbelin e me Kesusuren Nuah. Gelah bangsa-bangsa si lit tetap njaga pengerakut kiniersadan desken sada keluarga. Sinursur Nuah merap ras kedungenna pantek me sada bangsa si mbelin.
Khusus kerna sinursur Japet si jadi penekanen i bas teks PA Mamre, isingetken alu tangkas Anak-anak Japet si dilaki e me kap: Gomer, Magok, Mada, Jawan, Tubal, Mesek, Tiras. Kesusuren Gomer e me kap bangsa Askenas, Ripat, ras Togarma. Kesusuren Jawan e me kap bangsa Elisa, Sepanyol, Kiprus, Rodes. Kalak enda me nini kalak si nggeluh i tepi lawit ras i bas pulau-pulau. Enda me kerina kesusuren Japet si nggeluh i bas suku ras negeri si pelain-lain, janah tep-tep terpuk pelain-lain cakapna.” Rikutken ahli-ahli sejarah ras penafsir maka kesusuren Japet enda me si jadi nini bangsa Media, Junani, bangsa kulit putih i Eropa ras Asia. Isingetken pe maka kesusuren Japet si nggeluh i bas suku ras negeri si pelain-lain, janah tep-tep terpuk pelain-lain cakapna. Ertina, arah sinursur Japet saja enggo teridah kebayaken suku, ingan tading ras cakap si pelain-lain.Teridah tuhu kuga tep-tep sinursur Japet enda i bas terpukna sekalak-sekalak erbahan cakapna (bahasa). Enda nuduhken kuga tep-tep terpuk i bas ngerakut kiniersadan i bas terpukna ras guna meteh sesekalak bengket ku bas terpukna eme arah cakap. Cakap si lit iajarken man tep-tep sinursurna ras jadi tanda sinursur e bengket ku bas terpukna. Jadi banci ikataken, sesekalak bengket ku bas sada terpuk sinursur e salah sada tandana eme meteh cakap terpuk e.
APLIKASI
I bas paksa enda man banta isehken persinget segelah kita selaku bapa maka min megah siakap make cakap (bahasa suku) rikutken kalak kai kin kita rikutken suku. Ikataken kita kalak Karo umpamana, cakap Karo pe lanai si eteh. Situhuna enda man kemelanken. Anak-anakta pe lanai meteh cakap Karo, kuga banci ia erngena ate nandangi budaya Karo adi cakap Karo pe lanai ietehna.
Selaku bapa, kita ertanggungjabab guna nehken pengajaren kerna budaya Karo. Terlebih-lebih cakap Karo, sabab adi la kita selaku kalak Karo si njagai, mpekena-kena ras ngajarken budaya Karo ras cakap Karo ise nari si rutang? Erlajar kita arah turi-turin sinursur Japet, tep-tep terpuk (suku) njaga persadanna arah cakap siibahan ras si ipakena i bas kegeluhenna si tep-tep wari.
I bas jabu-jabunta, marilah si ajarken ras si pake cakap Karo ntah cakap suku si deban adi kin i bas jabunta ndehara ntah perbulangen i bas suku si deban narl, segelah tetap ijaga budaya ras cakap suku ija nari kin kita rehna. Tentuna, segelah ola bene. Kemegahen lah min siakap i bas kita make cakap sukunta labo ketadingen jaman. Si sehkenlah enda man anak-anakta, make cakap suku e sada kebayaken ras ngergaken kai-kai si enggo isusurken nini-nininta nai.
DISKUSI
- Kai tujunna maka i bas tep-tep terpuk sinursur Japet pelain-lain cakapna (bahasana)?
- Belasken kuan-kuan Karo ntah i bas sukundu nari ras turiken antusenna! Kuan-kuan enda guna siajarken man anak-anakta.
USULEN ENDE-ENDEN
- KEE GBKP NO. 359
- KEE GBKP NO. 223:1
- KEE GBKP NO. 204:1
- KEE GBKP NO. 208:1
Pdt. DR. Kalvinsius Jawak