CARA NEHKEN PENGAJAREN SI PAYO NANDANGI ANAK-ANAK
(Hari Keluarga Nasional)
TUJUN: Gelah Moria:
- Meteh uga belinna pengaruh pengajaren nandangi anak-anak.
- Mbedaken pengaruh pengajaren man anak-anak i bas masa si ndekah ras jaman modern enda.
- Erbahan aksi ngelitken ingan erlajar man anak – anak kususna erlajar kerna orat nggeluh, budaya ras pe pengajaren si deban si cukup penting i bas masa gundari.
METODE PA: Diskusi ras Aksi.
2 Timotius 1: 1 – 7
Salam
1:1 Dari Paulus, rasul Kristus Yesus oleh kehendak Allah untuk memberitakan janji tentang hidup dalam Kristus Yesus,
1:2 kepada Timotius, anakku yang kekasih: kasih karunia, rahmat dan damai sejahtera dari Allah Bapa dan Kristus Yesus, Tuhan kita, menyertai engkau.Ucapan syukur dan nasihat untuk bertekun
1:3 Aku mengucap syukur kepada Allah, yang kulayani dengan hati nurani yang murni seperti yang dilakukan nenek moyangku. Dan selalu aku mengingat engkau dalam permohonanku, baik siang maupun malam.
1:4 Dan apabila aku terkenang akan air matamu yang kaucurahkan, aku ingin melihat engkau kembali supaya penuhlah kesukaanku.
1:5 Sebab aku teringat akan imanmu yang tulus ikhlas, yaitu iman yang pertama-tama hidup di dalam nenekmu Lois dan di dalam ibumu Eunike dan yang aku yakin hidup juga di dalam dirimu.
1:6 Karena itulah kuperingatkan engkau untuk mengobarkan karunia Allah yang ada padamu oleh penumpangan tanganku atasmu.
1:7 Sebab Allah memberikan kepada kita bukan roh ketakutan, melainkan roh yang membangkitkan kekuatan, kasih dan ketertiban.1:1 Surat enda i bas aku nari, Paulus si enggo ipilih Dibata jadi rasul Kristus Jesus. Aku isuruhNa pembarken kegeluhen si ipadanken guna ialoken i bas persadanta ras Kristus Jesus.
1:2 Surat enda man Timotius, anakku si kukelengi. Dibata Bapa ras Kristus Jesus Tuhanta mereken lias ate, perkuah ate ras kemalemen ate min man bandu.Pengataken bujur ras pengajuk
1:3 Bujur kukataken man Dibata, si kusembah alu tutus, bagi nini-niningku nai. Bujur kukataken man Dibata asum kuinget kam rusur i bas pertotonku subuk suari bage pe berngi.
1:4 Kuinget kuga pertangisndu, janah mesikel kal aku jumpa ras kam gelah meriah kal min kuakap.
1:5 Kuinget tutus atendu erkiniteken bali ras kiniteken nini tudungndu Lois ras nandendu Enike. Tek aku maka i bas kam pe lit kiniteken si bage.
1:6 Erkiteken si e kupersingeti man bandu gelah gara mulihken i bas kam pemere Dibata, si ialokenndu asum kutamaken tanku i babo takalndu.
1:7 Sabap Kesah si ibereken Dibata man banta labo erbahanca gelah kita percik-cik; tapi KesahNa e ndemi kita alu kuasa, kekelengen, bage pe gelah ngasup kita ngkuasai dirinta.
Kata Penaruh
Labo lit manusia si tubuh ku doni enda minter jadi kalak si beluh, pentar, sopan, ramah ras sidebanna. Kerina perlu proses, pendampingen bagepe waktu si cukup nggedang. Bage ka pe kerna anak-anakta. Masa anak-anak eme masa si la terlupaken, masa e pe jadi sada kesempaten guna ndatken pemeteh, pertumbuhen fisik ras spiritualitasna. Alu kata sideban usia anak- anak eme peluang emas man banta guna mbentuk ia bagi si isuraken kita. Masa anak-anak jadi palas guna perdalanen kegeluhenta. Anak-anak labo saja generasi penerus, tapi ia pe hadir i bas paksa enda selaku manusia. Kai dage arus silakoken man bana?
Mpebagesi Pengangkan kerna Ogen
Pengogenta 2 Timotius 1:1-7, sada bagin i bas surat si isehken Rasul Paulus man anak rohanina Timotius. Surat enda ibahan Rasul Paulus tupung ia i bas penjara janah lanai ndekahsa iukum mate me ia. Tapi semangatna guna mberitaken Kata Dibata la surut aminna gia ruang gerakna ibatasi jeruji besi (penjara). Salah sada si erbahanca ia semangat emekap pengarapenna nandangi kiningasupen Timotius guna nerusken pelayanenna. Tek Rasul Paulus maka Timotius ngasup neruskan pekabaren Injil si enggo ibenakenna e.
Rasul Paulus mereken dorongen semangat, mujiken bagepe ras ngajuk Timotius guna mpegara semangatna ras kinitekenna si enggo lit tupung ia kitik denga. Sabap ia kitik denga pe enggo iajari ninina Lois ras nandena Enike kerna perbahanen si mehuli ras Pustaka Si Badia. Janah pengajaren ninina ras nandena enda mbue kal mpengaruhi kengasupenna guna ngangkai pengajaren Rasul Paulus, seh maka ngena ate Rasul Paulus ia aminna gia Timotius nguda denga.
Cara Lois ras Enike ngajarken Timotius sendalanen ras pengajuk si isehken man bangsa Israel guna ngajarken anak-anakna. Emekap alu nurikenca suari ras berngi, ncidahkenca arah perbahanen orangtuana si mehuli bagepe alu mabai ia ku Rumah Pertoton Tuhan i je ia ndatken pengajaren kerna ise kin Dibata e janah uga ncidahkеn kehamaten ras kepatuhen man Tuhan. Salah sada metodena emekap nuriken pengalaman geluh bangsa Israel. (oge UI. 6:1-9).
Rasul Paulus pe ope denga ia jadi sekalak Rasul, ia sekalak si patuh kal man Undang-undang agama Jahudi si ialokenna arah orangtuana bagepe pemimpin agamana. Si enda erbahanca maka ia jadi kalak si patuh kal ndalanken undang-undang agamana.
Pengkenaina
Adi si nehen kegeluhen manusia, kususna kalak Kristen, maka enggo mbue kal kesempaten si terbuang guna banci ndeher ras anak-anak erkiteken kesibuken-kesibuken si idahiken orangtua jaman gundari enda. Anak-anak enggo deheren ras pengasuhna bagepe media elektronik si ipasilitasi man bana. Nai ope denga merari pemakaian TV, melala orangtua si mediate nandangi pertumbuhen jiwa anakna erbahan turi-turin guna njelasken kerna norma kegeluhen, cara nehken kehamaten, aminna gia alu la
langsung labo isadarina maka kai si ilakokenna e mbelin kal gunana. Tapi jaman gundari enda enggo langka kal kesempaten orangtua erbahan turi- turin guna ngajari anakna. Bicara lit pe terjeng sebatas nukur buku jenari iberekenna man anakta, ntah nukur ras mereken gadget si enggo cukup marak man anak si kitik denga. Tapi adi erlajar kita arah orangtuanta nai, maka kai si iturikenna tetap denga nge si inget janah mbelin kal gunana i bas ngajari kita ku si mehuli, labo alu ijunguti, ntah iancam, ipaksa, ntah pe iperentah. Alu mereken pujin man anak, turah rasa percaya dirina. I bas masa-masa pandemi corona, banci si idah maka enterem orangtua si ngelabuh (kewalahen) ia jadi guru man anak-anakna si erlajar i rumah nari. La sitik si merawa nandangi kebijakan pemerintah, si stress erkiteken sulitna erperan jadi pengajar, padahal situhuna orangtua me jadi pendidik utama man anak-anak dingen keluarga me jadi sekolah si pemena man anak-anak. Akibatna anak pe jadi kisat erlajar, kurang ngergai orangtua dingen pe ndarami pelampiasan guna la tutus erlajar. Rumah jadi ingan si la menyenangken man anak-anak.
Adi nulih kita ku pengalamenta ngaloken turl-turin si adi, lit piga piga contoh guna ngajarken anakta ku si mehuli emekap:
Turi-turin Kak Tangko Bunga si isina salah sada emekap “berani berbuat berani bertanggungjawab”, la nalihken kesalahen man kalak si deban. Ntah pe turi-turin kerna kancil ras buaya si ertina eme “ula jadi kalak sombong,” meganjang ukur, si akap banta si hebatna, sabap i bas sada masa lit kang si la kita beluh tapi kalak si deban beluh. Ras piga-piga turi-turin sidebanna si seh asa gundari pe ituriken denga man anak-anak si nguda.
Bagepe adi anak si kitik denga ioah (lembah), megati kal ibahan ende- enden didong doah gelah ia tunduh. Tapi adi megermet kita maka melala kal muaten nasehat, pengajaren ras pengarapen i bas kalimat didong doah enda. Aminna gia anak siididong doanken enda bayi denga lenga ngangkai kai si ibelasken kita, tapi situhuna alu la si sadari kalimat didong doah enda mpengaruhi pertumbuhen jiwana.
Alu bage secara prinsip situhuna cara mereken pengajaren si payo man anak-anak labo berubah nai nari seh ngasa genduari. Anem metode banci berbeda tapi prinsipna seri, eme alu dem kekelengen, kesabaren, ndauh i bas jungut-jungut ntah pe merawa, pangen me ipujiken dingen idukung i bas si mehuli, arah turi-turin imasukken pengajaren ras nasehat, cara e lebih mengena man anak-anak dingen lebih erguna pe man si ngajarkenca. I bas PA sekali enda kita erbahan aksi Rp. 10.000,- guna ngelitken ingan erlajar (wadah belajar) man anak-anakta eme alu mpepulung dana mbangun sanggar (wadah belajar kerna orat nggeluh, kerna budaya ras pe pengajaren si deban si cukup penting i bas masa gundari).
Diskusi:
- Cuba diskusiken pengalamenndu ngajari anak-anakta i bas masa pandemi corona, kai kesulitenndu ras kai metode si tepat akapndu tupung sie?
- Cuba daftarkenlah turi-turin si mengandung makna (pesan) moral si banci si pesen man anak ntah kempunta.
- Kai nge bedana i bas kegeluhen anakta adi ia megiken cerita bas TV nari ras adi ibandingken adi ia megiken cerita i bas kita nari?
Pdt. Oklin Jovalina br. Tarigan S.Si Theol