Bahan PJJ 27 Juni – 03 Juli 2021

ERBUDAYA RAS ERKINITEKEN

(Orat Geluh Selaku Anggota GBKP)

Kisah Para Rasul 17: 22 – 23

17:22 Paulus pergi berdiri di atas Areopagus dan berkata: “Hai orang-orang Atena, aku lihat, bahwa dalam segala hal kamu sangat beribadah kepada dewa-dewa.
17:23 Sebab ketika aku berjalan-jalan di kotamu dan melihat-lihat barang-barang pujaanmu, aku menjumpai juga sebuah mezbah dengan tulisan: Kepada Allah yang tidak dikenal. Apa yang kamu sembah tanpa mengenalnya, itulah yang kuberitakan kepada kamu.

17:22 Tedis Paulus i lebe-lebe sidang Areopagus jenari nina, “O kalak Aten! Enggo kuidah maka kam kalak tutus tuhu-tuhu i bas agama.
17:23 Sabap asum aku erdalan-dalan i kutandu enda, janah asum aku ngenen inganndu ersembah man dibata, kuidah sada ingan persembahen si lit tulisenna, ‘Man Dibata Si La Itandai’. Dage Dibata si isembahndu, si la itandaindu e, e me ateku ku petandaken man bandu genduari.

PERSIKAPEN

• Pengurus PJJ ngaturken perdalanen PJJ subuk kune ilakoken i bas sektor, jabu kepkepen, entah i bas jabu ngawan perpulungen erkiteken situasi.
• Nikapken ingan persembahen ras pertoton syafaat
• Adi i bas sektor entah jabu kepkepen perdalanen PJJ ibabai Pt/Dk entah Pengurus Sektor entah sekalak si enggo aturken pengurus PJJ. Adi ilakoken i rumah iaturken bapa entah nande entah sekalak i bas jabu.
• Kerina perdalinenna rikutken situasi janah banci iubah (imodifikasi).
• Sope benaken PJJ banci kita rende Lagu KAKR

Rende: Senang ukurku jumpa ras Yesus

Senang ukurku jumpa ras Yesus, Senang ukurku Haleluya
Rasa lalap ateku ras IA, Senang tetap ras Yesus Tuhanku
Haleluya Glory Haleluya Glory, Ersurak surak puji Tuhan
Haleluya Glory Haleluya Glory, Puji Yesus rasa lalap

RENDE: KEE. 218

’Nggo kenca seh i bas paksana
Radu ras me kita rende k’rina
Sipuji gelar ni Dibata
M’riah cawir dage ban soranta

Si bas berita si meriah,
Perukuren tetap min ergiah
Bas si la tengka minter nilah,
G’luh si mbaru ‘lah madin peturah

’Nggo kenca seh i bas paksana
Si penagkih me dage totonta
Bersih ras bulat ban ukurta
Maka serta kita bas k’rajanNa

ERTOTO (Ibabai bapa si mada Jabu)

RENUNGEN

I bas budaya kalak Karo si nai, lit sada kepercayan kerna kuasa si la teridah si nepa doni enda ras kerina isina. Sinepa e igelari Dibata janah ringan i bas telu ingan, eme Dibata i datas (Guru Batara), Dibata i tengah (Tuhan padukah ni aji), ras Dibata i teruh (Tuhan banua koling). Kalak Karo mehamat kal man Dibata e sebab tek ia lit kuasana aminna pe la iidahna.

Kalak Aten si idahi Paulus pe tek nandangi kuasa si la itandaina, alu nembah man patung-patung. Asum Paulus erdalan-dalan i bas kota e, iidahna sada mezbah alu tulisen: “man Dibata si la itandai.” Kepeken, kalak Aten nembah kerina dibata-dibata, seh maka si la ietehna pe tek ia lit nge, tapi la etehna erban gelarna, emaka tetap nge ibahan batar-batar persembahen man dibata si la itandai e. Janah batar-batar penembahen man dibata si la itandai enda me jadi titik awal Paulus mpeseh ntah pe mberitaken kerna Dibata si nepa langit ras doni bage pe Dibata si erkuasa seh rasa lalap e. Iturikenna pe kerna pertobaten, wari pengukumen, kekeken i bas si mate nari bage pe ras kegeluhen si rasa lalap.

Teridah Paulus la meneken budaya si lit i Aten tapi iterangina alu kata Dibata. Bageme iarapken gereja ngasup nerangi budaya erpalasken kata Dibata. I bas konfesi GBKP, ituriken kerna sikap GBKP nandangi budaya eme:

Positif, menghindari sikap anti nandangi budaya. Enda me siilakoken Paulus pe. Ipelajarina lebe kai si terjadi i kota Aten. Jesus jine pe labo meneken budaya, tapi IA reh lako nggenepisa. I bas umurNa 8 wari Jesus isunatken rikutken budaya kalak Jahudi. Kritis, unsur ras nilai budaya bage pe kepercayaan nandangi roh-roh kegelapen enda itulak, umpamana: erpangir ku lau, erdukun/erguru (perbegu), make jimat, lapik, pengelaris, simalang ate, niktik wari, cabur bulung, petelayoken (rembah ku lau), ndilo wari udan, nengget, perumah begu, raleng tendi ras si debanna si la sue ras kata Dibata. Kalak Kristen rembak ras Dibata i bas diri Jesus Kristus. Realistis, enda sikap si mehuli lit i bas kita sebab budaya enda pasti berubah rikutken perubahen jaman. Jadi gereja tetap ngikuti perubahan saja si tetap la berubah eme kinitekenta man Tuhan Jesus si mereken kegeluhen si rasa lalap. Erkiteken si e tetap si tuduhken kehamatennta man Dibata si itandai kita e.

Tanda kehamatenta, mari dage sicidahken arah lagu langkahta maka tutus ateta nembah Tuhan si itandai kita e. Mehamat man Tuhan e enggo min jadi sada budaya man banta ras man anak kemputa. Tole nari si ajarken kerna budaya Karo si perlu ijaga ras ilestariken. Sabab arah si e me banci sicidahken buah kinitekenta man Tuhan, umpamana arah sopan pengerana, sopan peruis, sopan erjabu ras si debanna, si banci encidahken kiniraturen geluh. Rikutken pengajaren budaya ras kiniteken, i bas tahun enda anakanakta KA/KR ersura-sura erbahan “pusat pelatihan iman dan budaya”, emaka sibuat baginta guna mendukung sura-sura si mehuli enda.

NURIKEN PENGGEJAPEN

• PERMATA
• SAITUN

IRAKUT PERTUA/DIAKEN/EMERITUS/PENDETA

DISKUSI/SHARING

1. Engkai maka budaya ras kiniteken e erkawiten?
2. Ban dage contohna erbudaya ras erkiniteken si banci ipraktekken i bas kegeluhenta

MOMO

RENDE : KEE. 354 (persembahen)

Kam si mbelin, Kam terb’rita, Kam kap sitermulia.
Mehuli Kam, dingen erkuasa, Kam si mada k’rina sinasa

Sinalsal keleng ate Tuhan, Bagi emas si labo luntur
Rejin tuhu dolatNdu Tuhan, Ngarak-ngarak kegeluhen

Erta-erta, kebayaken, I bas kam nari rehen
Kam merentah alu kuasa, Ras gegehNdu Tuhan Dibata

PERTOTON SYAFAAT

• Kerna persembahen (KAKR)
• Simada jabu ras ingan pulung sireh (Mamre)
• Kiningasupen orangtua guna ngajarken orat nggeluh kalak erkiniteken man sinursurna (Moria)
• Siturah i bas Perpulungen (Permata)

RENDE: KEE. 254 – Isuruh Dibata

Isuruh Dibata sikeleng-kelengen
Si sampat-sampaten asa kengasupen
Mbue me kap tuhu si man bahanenta
Radu ras kerina kita ndahikenca

Palasta nampati em ate mekuah
Ngusih Tuhan Yesus enggo kap nampati
Meriah ukurta adi teman pulah
Masap kebiaren ‘je dat ate jadi
Isuruh Dibata…….

Kalak si ngikutken kata Tuhan Yesus
Terangina doni ras k’rina isina
Tegulah temanta gelah ola celus
Si tuduhken dalin gelah ola mampa
Isuruh Dibata…..

‘Bas nampati teman la ngarapken balas
Pusuh peratenta aruslah meciho
Tuhan ersimulih ibereNa lampas
Sangapen kap mere asang kita ngalo

PERTOTON TUHAN (Ibabai Mamre/simada jabu)

JEDA RAS PENUTUP

Pdt. Oklin br Tarigan, S.Si (Teol)